Aizawl Ah Siamsin Conference - Cum - Presidential Election Ah Ka Kihel
By Kimbawi’ Pa, Columnist Zogam.com
08.05.2015 ahi a, ka ngeina bang in Office ka kai hi. Ka staff-te uh khat in lehkha a hong pe vevauh a, bang ahi mahmah a chia ka hon/phel leh Siamsinpawlpi Aizawl Hqrs. A kipan chialna a na hi a, tel di leh tellouh di ka saikak a, hohpih di a om leh tel ngei di’n ka kikoih pah hi. Hichi bang hun leh mun a kihel hi mi toh kitheih tuahna mun hi a ka ngaih ahi a, huai in le a hon utsak hi. Tangval’ lai khawng a mi’ khua a school kai a om, huai a hantou di khawng a i kuan leh a khawmite toh kitheih baih in a om a, biakin kai bang le mi toh kitheihtuahna hoih mahmah khat ahi.
Aizawl a ei mite dem leh gensia hi hetlou in ka muhdan (impression) ko’n gen masa ut hi. Ka inkuante ka tonpih ma in Aizawl ah ka sepna ka join hi. Huchi’n ka naunu ka zawn a, ei biakin, EBCC ngei ah ka va kikhawm uhi. Nih vei EBCC biakin a ka kikhop in ka mel theihsate kia in a hon houpih ua, a kiang ua omte’n le ‘amah kua a?’ chia hon kan a om himhim kei uhi. Huchi’n ka inkuante Shillong a kipan a va pi in Aizawl ka lut uhi. Ka inkuan ua ahi thei teng biakin ka kai nawn ua, huai ah le meltheihsate chihlouh hon houpih a om khol kei ua, kuamah a hon kan le a om kei lai uhi. Tua SSPP Conference mah ah le a hon kan a, kei kua ka hia, bang sem a Aizawl a hong teng, chih hon kan mi khat bel ka tuakkha hi. Huai le accidental a hon kan/dong kha a suak hi.
Hiaite ka ngaihtuah chiang in kei, ka mel-et mai a le kuamah in dottuak le hon sak louh uh ka hi maw, chih ka kithei phing a, kilamen khial ka kisa mahmah, tu ban a dia ka pilvan ngai di ahi, chih ka phawk hi. Pianthakna khat ka neihloh a, Aizawl a eimi omte’ tung ah ka kipak hi. Min a hon et/muh mai ua le ka hihna leh ka sepna tanpha kan tak hilou a hihlam ka thei deuhdeuh lai hi. Aizawl a ei mite tung ah kipahthu ka gen hi. Amaute ziak a Pianthakna mu ka hihman in.
Tapa Taimang bang deuh in, ‘Ka thou ding a, ka pa kiang ah ka pai ding a, akiang ah,’’Pa, van a tung ah leh nang mah mitmuh in thil ka hihkhial,’ chia nget a sawm bang in Aizawl a ei mite’ kiang ah ka kisikna thu ka gen hi. Hiai ka gelh lailai a ka hihkhelh delete theih himahleh delete le’ng ka ‘impression’ gelh kha lou di ka suak zel dia, ka hihkhelh leh ka muhkhelhte a hon ngaihdamna uh ka ngen hi.
Programme dak 1100 hrs. a pat di chih himahleh huai hun geih a akipat leh kipatlouh ka thei kei a, pan uh hi ngei di’n ka gingta hi. Tonpih di ka ngaih ziak in ka zekai kha hi. Ka lut chiah un Nk. Lalruattluang pen ‘special number pe di’n a na ding geih hi. Mel hoih, duangching tak in Paite la ngei siam tak a soundtrack toh hon sa mai chu chimul a thou sungsung mai hi. A mikhual pen a phur a va kipatna mawk di lah a rem kei deuh hi.
Programme kizatdan tangpi anuai a bang ahi.
Presider :Pu PH Vanlalmuan (A/Secy., Standing Comittee)
Recording Secretary :Pu Thangkhankhual (Finance Secy., SSP Hqrs.)
Opening Prayer :Pro Pastor Khairoding (PCI)
Welcome Speech :Pu Thangsangmuan (Vice President, SSPP Hqrs.)
Secretary Report :Pu K. Muanlal (General Secy. SSPP Hqrs.)
Felicitation :Pu PL Rolian (Education Secy.,)
SSPP Activities Review :Pu Ngulzathuam (Secy., Standing Committee)
Speech : Chief Guest :Pu VL RobiakaMLA, Hon’ble Chairman ZIDCO
Election & Oath Taking :Pu Liansangvung (V/Chairman, Standing Committee)
Prayer for the newly :Pastor G. Sanglian (EBCC)
Elected President and
The Siamsin
Exhortation Speech :Pu Vanneihtluanga, Prominent Journalist
Presidential Message :Out-going & In-Coming
Vote of Thanks :Pu Khamzagin (Member, Standing Committee)
Closing Prayer :
Programme pai zel kal ah artiste-te lasa di’n a sam zel uhi. Lasak siam uh ka sa thei mahmah hi. Artiste-te hiaite ahi uh. Nk. Lalruattluangi, Nk. Zodinmawi, Pu Thangromawia Thawmte, Tv Siamhminglian, Tv Thuamsanglian, chihte ahi uhi.
Tua bang a pan di, chih ka buai zel hi. Kuamah kan/dot tak le hilou in hiai bang programme nutsiat mawk di ka ut sam kei hi. A tawp tan hun ka zang thouthou lai hi. Ka kikhualsak lou ka hih ziak himhim le ahi.
Welcome Speech tomkim leh siam tak in seh a om in a hon gen a; Secretary Report tomkim ngaihkhiak ahi nawn a, hun zat a siam mahmah uhi. Felicitation in a zui a, ka kiguih phial hi. Doctorate of Philosophy ngah mi 5(?) bang a om zou ua, MCS gelhching 2 a om lai ua, thupi uh ka sa mahmah hi. Hiai bang a Mizoram a SSPP member omte Ph. D ngahte ka ngaisang hi. Khat bang IDAS ahi zawmah hi. Hiai thu ka zohna lam ah ka comment sawm a, hiai tan hi phot.
Programme zat a siam mahmah ua, thugentute bang in tomkim tak in a zou geihgeih thei uhi. Chief Guest in thu a hon gen a, Paite pau siam kei mahleh mahni hihna paih theih a hihlouhdan bang a hon gen a, siam leh pil ka sa mahmah hi. Paite ka hihziak a hiai Conference a Chief Guest dia chial ka hi d’aw, chih khawng a hon gen a, tomkim tak in a zou a, programme zohma in a hon paisan hi.
Presidential election pen election ngailou in Tv Sanghmingliana President dia puankhiak in a om hi. Artiste lamte mah in hun awng a hu zel uh. President thak kichiamna leh thumpihna neih ahi a, programme zou dekta. Pu Valneihtluanga in Exhortation speech a hon nei meuh chu a thupi e. Paite hi ngal a pau thei nawnlou ahi. Himahleh Mizo pau in a gen a, mipi’n a kingai ut thei mahmah hi.
A thugen tangpi:
@ Paite kichite himhim adventerous i hi uh. Nidang a Aizawl a ‘Otto Recording’ neitupa’n a gen a; Hongkong a Hotel a tunna ah Paite khat in US dollar sum na kheng ut hia?’ chi’n a hong dong a; Paite-te mi adventerous na hi uh, a hon chi, achi hi. Paite lungput huai di mah ahi, chi’n a hon gen hi.
@ Paite-te hi kuamah in a sep peih louh nung ua ‘na hih peih hia?’ chia mi’n a dot ua ‘ka peih’ chia a dawn ngam uleh zuau gen ahih kei ngal uleh Paite mah ahi, achi hi. Namdang in a peihlouh nung ua le sem peih laite Paite ihi uh.
@ ‘Paite kichi himhim thahat ihi uh, kei chihlouh, thagum nei, ann le hai ihi uh’ achi hi. ‘Himahleh lemtheihna i nei tawm uh’ chi’n a hon gen a, nasem dia a goih khat, suang nawn di ahi ngei dia, ‘suangtum lian pipi a hon pua a, bangdia hiai chiachia hon pua na hia’ ka chi khanak, achi hi.’ A suang nawnna di mun a sekpi khat kikoih a, huai a seknen deuh in hon nawn leh ka deih mahmah a, suang lian pipi a puak ziak in a kawng khawng na leh kei a buai di ka hi, chih ka theih ziak ahi, chih bang a hon gen lai hi. Lemtheih a poimohdan a gen hi.
@ Faiuat chih a gen a, ‘Ka in ua electrict fit dia ka goih khat kiang a, hiai mun ah bang ball/watt fit le’ng a hoih di’ chia ka dot leh FAIUAT achi, a amah faiuat ka chi uh, chihdan in a gen hi. Paite kichi pawl 8 pass lou tanpha ‘Five Watts’ chi theilou tanpha a kivakna di mu thei ihi uh, achih bang eite a diksak di’n zom le hoih di’n ka deih mahmah hi.
@ Paite mite i hoihlouhna lam uh a genna ah, mikhual lungsim i put uh a hoihlouhdan a gen hi. ‘Mikhual lungsim put sang a khawtualmi hihna i omna peuh ua i om di uh ahi, chi’n a gen hi.
Gensawn di a om lai hi, himahleh a sau dia, hiai teng ka gen a kipan inle thugen siam, laigelh siam, a pau thei kei mahleh Paite a hihna suang mahmah mihing ahi. Phathuai ka sa petmah hi.
Pu Vanneihtluanga thugen khit in programme a ngeina bang in a pai zel a, programme zoh a hih in refreshment ka ne ua, huchi’n ka kikhen uhi. Zuau gen di no’n sak uleh a banner uh, ka mobile camera a chiang kei na a huai toh ko’n post khawm hi. Hun nuam kizang bel ahi veve.
Hiai programme zatna hun a hunzat siamlou deuh a om sam uh. Himahleh a tamzaw in a zang siam ua, democracy a majority lam vualzou a hihziak in programme zang siam in ka chiamteh hi. Mizo Zirlai Pawl leh Mizo Students Union heutute bang in hong uap uh a hihman in Mizo pau a leng pau alou-theilou di mah ahi. ‘When you are in Rome; do as Romans’ chih ahih miau ziak in. Conference hong sim tute’ theih dia pau i zat mah uh le ahi di mah ahi.
09.05.2015 a Aizawl SSPP Conference-cum-Presidential Election ka zatna bangtan hiam k’on gelh gelh khin a, ka thukhitna di ka gelh ut hi. Entertainment lam a hon sulimtute phathuai ka sa mahmah hi. Lamka lam khawng a music video bawlte a tamzaw la sa thei (who can sing) ahi uhi. Hiai conference a a la sate bel lasiam (singer) hi un ka chiamteh hi. Kuamah siam tuam hi’n le ka thei kei, ‘style’ thu mai ahi, Paite la hoih tak in thei in sa le uh Lamka lam a lasate chu nepte hi di un ka gingta hi. Lamka lamte simmoh ka hi tuan kei. Lamka lam ah bel lasa thei deuh teng in ‘music album’ bawl a sawm ua; a sum di haksa pipi a akaihkhawm uh hi di’n ka gingta hi. Huaiziak in a music album uh ki-innkhum a zuak uh ahi pen mai hi. Mizoram lamte bel music album mawk bawl a om nawn mang kei uhi.
Vote of thanks gentu U Khamzagin in Chief Guest tang tak a dawn theih hileh a gennop a hon gen a, vote of thanks bang lou hial in thu a hon gen hi. Vote of thanks bang entertainment a bang hial a, a nuam veve hi.
Kuamah zakdak louh dia hia report k’on file ve maimai ahi.