"Kei kiangah a hong pai mite peuhmah in a nu leh a pa, a zi leh a ta, a sanggam numeite leh a sanggam pasalte, leh ama pumpi mahmah a nial ngam kei leh keima nungzui suak theilo ding hi. Ama singlamteh mah puatawmin ka nung hong zuilote, keima nungzui hi theilo hi." (Luke 14:26-27).

KHEN NIHNA

David Watson in a gelh Called & Committed : World-Changing Discipleship cih laibu panin nungzuisuahna thu pawlkhat kikum khawm ni. Amah Pasian zat mahmah thugen minthang hi a, cancer natna hangin February 18, 1984 in si hi. A sih ma in cancer natna a thuakna thu leh sihna tungah gualzo Pasian tungah a kingakna thu Fear No Evil cih laibu gelh hi. Nungzui mite i cih ciangin hih a nuai a thute i phawk ding kisam hi.

1. Thumang dingin sapte hi: Rabbi nuaiah sinna nei khempeuhte'n sila bangin a siapa uh tungah kipumpiak uh hi. Ama nuai panin a sinna a zawh mateng thumangtakin om uh hi. Jesu Khris in a nungzui dingte ama kiang panin a thusinna a neih hun sung bek hiloin nuntakna bei dong thumang dingin sam hi. Vantung i tun madong thumang ding pelmawh hi. Thumanna in nuntak sung lungkimna hong pia hi. "Kei kiangah, 'Topa, Topa aw,' hong ci mi khempeuh, vantung ki-ukna sungah lutthei kimlo ding uh a, vantungah a om ka Pa' deihna bangin a gamtate bek lutthei ding uh hi," (Matthai 7:21). "Bang hangin, 'Topa aw, Topa aw,' hong ci napi-in ka hong gente zuilo na hi uh hiam?" (Luka 6:46). Mualtung Thugenna a zawhna dingin Topa'n a thugen zui leh zui lote kikal kigamlatna thugentehna suangpi tunga innlam mipilpa leh sehnel tunga lam mihaipa thu gen hi (Matt 7:24-27). Soren Kierkegaard in, "Up ding haksa i sak mahmahna a hangin thuman ding haksa ahih man hi," ci hi. Upna dik leh nungzuihna hoih thumanna tawh kigawm loin piang theilo hi.

Na hoih sem dingin thumanna leh siatna bawl dingin thumanna cih zong om hi. Tulai leitungah mi tampi sihna dingin amau nuntakna pia ngam a thumang om hi. Tua bang thumanna hoih kici thei lo hi. Ahi zongin itna nasepna dingah amau thumanna bangin kipia ngam zen hi leng bangzah ta in a thupi tam? Eima ngapna ciang beka thumang ding Khristian sungah i tamluat manin ci bangin ki-al nawnloin meivak bangin kitaang nawnlo hi. Khris in na Topa ahih leh banghangin a thumanglo ding na hiam? Na ut bangin gamta kawmkawm Khris ka Topa hi na cih leh zuau gen na hi hi. Thuman lohna tawh na Topa na zuak khinzo hi. Tuhun i kisap penpen ahih leh lunghianna bangmah omloin Topa tungah kipumpiak mi ahi hi. Jim Wallis in, "Tulai cialpina ah i sepkhialh gige khat in, up ding bek hi cih kilim gen mahmah in thuman ding cih kitawm gen hi," ci hi. Thumanna omloin nungzui kihitheilo hi.

2. Nasem dingin sapte hi: Topa in a nungzuite amah tawh omkhawm dingin a sap ahih hangin amaute, "Cinate damsakin, misite hingsakin, miphakte damsakin, dawite va hawlkhia un," ci-in na sawl hi (Matt 10:8). Jesu in Peter leh Andrew a sap lai-in, "Kei hong zui un; nga mat bangin mi tampi a huaite kong suaksak ding hi," a ci hi (Marka 1:17). Nungzui sawm sagihte a sawl khiat lai-in, "khuasunga cinate damsak un. A khuamite kiangah, 'Pasian' Gam ding hun note-a' dingin hong naita hi,' ci-in gen un," ci hi (Luka 10:9). A kisiasa mihing nuntakna leh leitung bawlpha dingin Kumpi Jesu hong pai hi. Tua nasep "ann lak" sem dingin Topa in a si tawh nang hong lei hi.

Jesu nungzuite in khemna nam nih a tuak tawntung uh hi. Khatna, midang sangin lianzaw thupizaw hih nopna hi. Nungzuite sungah kua lianzaw ding cih kinialna hih bangin na om hi:

Tua laitakin Zebedi' tapa James leh Johan in Jesu hong naih uh a, "Kong nget peuhpeuh uh nong vaihawmsak ding ka deih uh hi," a ci uh hi. Jesu in, "Bang kong vaihawmsak ding deih na hi uh hiam?" ci-in a dot ciangin amaute in, "Minthangin kumpi tokhom tungah na tut ciangin na taklamah khat, na veilamah khat hong tusak lecin ka ut uh hi," a ci uh hi. Ahi zongin Jesu in, "Note in na hong nget uh na thei kei uh hi. Keimah in ka thuakding gimna note in thuakzo ding a, ka kiphumna ding gimna-ah kiphumzo ding na hi uh hiam?" ci-in a dot ciangin amaute in, "Ka hizo ding uh hi," ci-in a dawng uh hi. Tua ciangin Jesu in amaute kiangah, "Keimah in gimna ka thuakding mah bangin na thuak takpi ding uh a, ka thuakding kiphumna zong na thuak takpi ding uh hi. Ahi zongin ka taklama tut ding leh ka veilama tut ding pen kei' hong piaktheih hilo a, a tu dingin Pasian in a vaihawmsaksate-a' ding ahi hi," a ci hi. Hih a kihona uh thu, nungzui dang sawmte in a zak uh ciangin James leh Johan tungah a heh suak uh hi. Ahi zongin Jesu in amaute samin, "Leitung mi a ukte in mite tungah aana nei-in, mi a makaite in thuneihna tawh a ukna thu na thei uh hi. Ahi zongin note lakah tua bangin hilo ding hi. Note lakah a lian nuam khat peuhpeuh, adangte khempeuh' nasem hi ding a, a makai ahi nuam khat peuhpeuh, adangte khempeuh' sila hi ding hi. Bang hang hiam cih leh Mihing Tapa zong, midangte ama na a semsak dingin a hong pai hilo hi. Midangte' na a sem ding leh mi tampi a tatkhiatna ding ama nuntakna a pia dingin a hong pai ahi zaw hi," a ci hi (Marka 10:35-45).

Nungzuite zong leitung uliante leh kumpite bangin lianzaw thupizaw hih ding lunggulhna nei uh hi. Tuhun Khristian makaite nuntakna i et ciangin tua khemna mah thuak haksa sa hilo i hiam ka ci hi. Khatvei Mumbai khuapi ah AIDS leh HIV tawh kisai National Council of Churches in India te thu kikupna ah ka kihel hi. Juhu Beach ah hotel five star ah hong tung sak uh a, zan khat giah man India sumin Rs.12,500 hi, ann khat vei nek man Rs.700 hi pahpah hi. Ka thukikupte uh bang hangin numei naupang kizuakna hi bangin khuapite ah lian hiam? Bang hangin AIDS leh HIV kiamsuk sangin khangto tetek hiam? Pawlpite in bang mawhpuakna nei hiam? cih hi. Tua thukikupna saipa kiangah, "Numei Rs.50 panin Rs.2000 khawnga kizuakte thu gen dingin bang hangin hih 5 star hotel ah giak ihi hiam? ka cih leh aman, "India bishop leh pawlpi makai liante 5 star nuaiah giak nuamlo uh hi. 3 star bangah tung dingin sam hi leng hi zah hong pailo ding uh hi," ci hi. Pasian Tapa, lu ngakna ding zong neilo nungzuite in 5 star culture ah kinungta a, lianzaw, nuamzaw bek kilunggulh hileh kilawm hi.

Nihna, ei leh ei kihehpihna khemna (self-pity). Nungzui masate'n zong "inn leh lo nusia in Jesu zui" ahih lam uh phawk tawntung hi. Khatvei Peter in, ""Ko zong ka inn ka lo uh nusia-in nang ka hong zui uh hi," a cih ciangin Jesu in amaute kiangah, "A mantakin kong genin-ah, Pasian' Uk ding a deihna hangin a inn a lo, a zi a ta, a nu a pa, ahih kei leh a sanggamte a nusiate in, tuhunin a zah tampi, leh hong tungding hunah nuntak tawntungna a ngahlo ding kuamah omlo hi," a ci hi (Luke 18:28-30). I hat lohnate phawk ding a kisap hangin ei kihehpihna i neih leh Pasian hehpihna hang bekbek tawh hih ciang tung i hih lam zong kimangngilh thei hi. Pasian sila i hih ciangin mite'n limtaka hong zindo ding leh nek leh tak a lim a al lametna tawh nasep khak ding kidophuai hi. Nungzui mite in amau deihna, amau ngah ding a kilawm nate nangawn nusia uh hi. Kei ngah ding kilawm ahih ciangin ci-in delh loin Topa in hong piak leh lungdam, hong piak kei leh zong lungdam, cih lungsim nei uh hi.

Pasian min tawh ka taan, ka suplawhna i cih tangtang hangin Ama min tawh i ngah tamzaw gige hi. Pasian min tawh inn nuam gam nuam nusia ngam mite ka ngaihsut ciangin amau kipiakna lamdang kasa hi. I neih leh lam Pasian min tawh ka suplawhna i cih ding a om kha zongin na thupi lawmlawm dingin ka um kei hi. C.T. Studd in a pa gamh (will) tul za tampi a luah lai-in, zingsang khat Lai Siangtho a simna panin, "Na neih khempeuh na zuak khit ciangin mizawngte tungah na sumkholte va pia in" cih a sim ni-in Pasian in ama hauhna pia dingin a deihna phawk a, Moody Bible Institute adingin, Mission nasepna dingin leh tagah kepnate ah na pia hi. Ama tangval lai-in Cambridge University ah na minthang mahmah hi. England Kumpipa sangin khangnote'n C.T. Studd mu nuamzaw uh hi. Tuate khempeuh nusia in China gamah missionary in na pai-in, tua zawh ciangin India gamah zong kum bang zah hiam sem hi. Missionary panin a tawlngak (pension) zawh ciangin, ni khat ama kikhopna ah missionary khat in thugen a, "Africa ah missionary kisam lua, kei tawh a sem khawm dingin kong cial hi," ci hi. Tua sapna ah ken kong zui ding a ci omlo ahih manin ciang khut tawh kikhawm C.T. Studd in missionary dingin kipia kik hi.

Tuhun ciangin Mikang gam tun ding i hanciam uh hi. A tungte zong hampha kisa, a tung nai loten zong i eng mahmah uh hi. Mikang gam nuamzaw, nek leh tak nuamzaw leh ki-ukna nuamzaw cih bel i tel ciat sa hi. Hihbang gam nuam panin a beisa kum za khat lai a Zogam hong pai missionaryte lamdang i sa uh hi. Kikawmna omlo, Dawimangpa ukna nuai a om Zomite hong it hong lainat mite i pahtawi laitakin nang zong tu ciangciang na tunna hih Lungdam Thu hang bekbek ahih lam na mangngilh loh ding thupi hi. Tapa taimang in inn a ciah ciangin, "Nasem nuamin ciah hi." Itna leiba i hih manin i dam sung khempeuh i sep hangin lohzawh ding hilo hi. Nang, bang thu in Pasian na hong semsak hiam? Ama itna hang hiam ahih keileh gamdang pai theihna ding, Mikang pau sin theihna ding, dollar ngah theihna ding hiam? Isaac Watts in Pasian itna hangin leiba ahih lam kitel mahmah ahih manin:

"Leitung khempeuh pia thei hi leng,

Tam lua ka ci ngei kei ding hi.

A hong it na ken ngaihsun leng,

Ka pum ka tak ka pia nuam hi," na ci hi.

3. Thuak dingin sapte hi: Thuakna i cih ciangin pumpi tawh thuakna, lungsim ngaihsutna tawh thuakna leh kha nuntakna ah thuakna cih bangin lam tuamtuam om hi. Jesu nungzui mite adingin Singlamteh lampi tawn i hih lam phawkhuai hi. I zuihpa' Khris in gimna thuak, ama mite' nialna, Singlamteh dongah sihna hong thuak hi. Tua hangin Paul in, "Bang hang hiam cih leh Khris' na sepna ding hunpha zong note tungah a hong kipia hi a, Khris upna tawh ama na a sem hi bek loin, thuakna tawh zong a sem ding na hi uh hi," ci hi (Filippi 1:29). Bawlsiatna amau pumpi mahmah tawh thuak tu mahmah in gam tampi ah om hi. Stephen, a Topa min tawh martyr a thuak masa; James zong namsau tawh sihna a tuak hi. Paul mahmah in zong ama thuakna hih bangin na gen hi:

Khris nasem a hoihzaw pekpek ka hi hi. Amaute sangin na ka nak sepzaw a, satna tamvei ka

thuakzaw a, sih dektakna tamvei ka tuakzaw hi. Jew mite' khutsungah sawmthumlekua vei satna

nga vei tak ka thuak hi. Rom mite in thumvei hong sat a, khatvei suang tawh hong deng uh hi. Teembaw siatna thumvei ka tuak a, sun khat leh zan khat tawntung tui tungah ka laam ngei hi. Khual ka zinzinna lamin tuikhang lauhuaina, misuamte lauhuaina, ka mipihte' sukding lauhuaina, Gentail mite' sukding lauhuaina, khuapi sung leh gamlakah lauhuaina, tuipi tungah lauhuaina, lawm manlote' hihding lauhuaina a tuamtuamte ka phukha hi. Nasem silbawlin kiom tawntung a, ihmu manlo liangin zong ka om zel hi. Gilkial dangtakin ka om zel a, annek ding neilo, giahna ding omlo, puansilh ding neiloin ka om hun tampi a om hi. Tua bang haksatna a tuamtuam ka thuak banah nisimin pawlpi a tuamtuamte-a' dingin lunghimawhin ka lunggimpih lai hi (II Kor 11:23-28).

Bawlsiatna a tamna ah Khristiante cihtakna tawh nungta uh a, suahtakna gamah mite thadah in a nop bekbek zong uh hi. Khatvei lawmte mi guk tawh Bhutan ah thungetna nei dingin ka kuan uh hi. A khuapi Thimpu a pastorpa tawh ka kimu uh hi. Ken zong, "Pastorpa, no Bhutan Khristiante'n bawlsiatna thuak toto na hih manun thungetna nei dingin kong pai uh hi. Thungetna ding tawh kisai bang gennop na nei hiam?" ka ci hi. Aman, "Bawlsiatna omlohna dingin thungetna hong neihsak kei unla, nisim a Jesu min tawh ka nuntakna uh a pia ngam tawntung dingin thungetna hong neihsak un," ci hi. Tuni in Jesu min tawh a nuntakna a pia gam tuamtuamah om den hi. Nungzui kiciamtehna lian mahmah ahih leh, thuakna mapawn neihna hi. Jesu min tawh bang thuakna na nei hiam?

*******