KUMTHAK LEH LAWHCINNA THUSIM

(Joshua 1:1-9)

Kumthak ciangin mikim in hanciamna thak, kipiakna thak leh sepngei loh vaithak pawl khat gelna i nei uh hi. Tu kum zalom 21na ah i leitung kikhelna manlang mahmah ta ahih manin ei zong ut in ut kei taleng i kikhel loh phamawh hi. A kikhel ngeilo Pasian i neih hangin hun leh nite in hong kikhelsak tawntung hi. Leitung khantohna a manlang mah bangin siatna lam zong manlang mahmah hi. Pilna hoih leh manpha lam a khantoh mah bangin siatna lamah zong a lutkhate kithuklut, kizang mahmah veve hi.

Samuel Huntington in a gen bangin, “Leitung pilna leh thu-muhna hangin buaina hong tam semsem,” cih i thei hi. Khatvei bek kinungta ding ahih manin i neih hun leh nite manphatakin i zat ding lim ngaihsut mahmah dingin hoih hi. Ama nuntakna zatzia ding lunghimawh lo mi pen bangzahta i hanciampih hangin kihuh theilo hi. Ahi zongin nuntakna manphatakin a zang nuam mi khat huh ding thanophuai mahmah hi. Bang hang hiam cih leh tua bang mite hangin minam sung, gamsung khantohna piang ding hi.

Tutung in Joshua sung mah panin Lawhcinna Thusim tam lo kikumkhawm leng cih kong tel hi. Joshua adingin a zuihpa Moses hong sih ciangin makaihna ama liangko tungah hong kinga hi. Gamdai ah kum sawm li a vak koikoi hun uh hong beita a, gamciam gamah lut ding bek om hi. Tua gamnuam ah lut theih nadingin upna mah tawh kalsuan ding ahi hi. Mi lawhcing i gen ciangin i saanzia kibanglo ding hi. Inn hoih leh mawtaw hoih khawng nei-in, sum leh pai zat ding kicing neite lawhcing kici hi. Lam khat panin tuate zong a lawhcing mah ahi uh hi. Ahi zongin lawhcinna neih leh lam tawh genteh ding hi leng, i Topa Jesu, Sawltak Paul leh midang tampite'n neih leh lam gen ding neilo uh hi. Ahih hangin amau nuntakna i et ciangin lawhcing mahmah uh hi. Lai Siangtho in mi lawhcing a cihte midangte adingin thupha bawl mite ahi uh hi.

Joshua nuntakna i et ciangin makai lawhcing hi ci-in i thei hi. Tua lawhcinna thusim nam guk khawng kikum ni. Nang zong Kumthak ah hih lawhcinnate na zuih leh lawhcinna lampi a zui na hi ding hi. Topa Pasian in nang nuntakna ah Joshua khang hong zangsak hen. 

Etteh ding mi muanhuai nei in (Aneu 1-2): Joshua in makaihza hong letma khempeuh Moses khut nuai ah na sin hi. Pasian mipa adingin nasepsak a, ama khut nuai ah sin ding khempeuh na sin hi. Tua hun lai-in makai thusinna cih bang laibu omlo ahih manin Joshua in nisim a mit tawh a muh tungtawngin na sin toto hi. Etteh ding a hoih penpen Moses na etteh ahih manin Joshua nuntakna lawhcing mahmah hi. Nang zong etteh ding mi na nei hiam? Tua etteh bang lian in na nuntakna hong piang ding hi leh ettehtak zuihtak nasa takpi hiam?

A hoih lam ah etteh ding mi a tam mah bangin a sia lam zong etteh ding mi na tam mahmah hi. Khangno hun sungin etteh ding kizong hamtang hi. Tua i ettehte mi minthang khawng mi lawhcing khawng na hi thei hi. Mi minthang, mi lawhcing pawlkhatte a sia a gamtat manun lawhcing leh minthang na om veve hi. Etteh ding mi hoihte in na nuntakna hong thalawpsak, a sangzaw hanciam nopna hong pia ding hi.

Ka neu lai-in Nipi sangah ka sianu uh hong beisan khin Nu Cing Ngaih Dim hi. Ama tung panin ka neu thumang mawh a ka theih puan siangsitset silh in a powder gim namtui ka phawk hi. Lai Siangtho lawtngah tampi hong hilh a, khawmpi ah kidemna a om ciangin ka sam uh hong hiatsakin, ka neih bangbang uh puansilh nikten hong puahsak hi. Tuni dongin ka mangngilh thei kei hi. Ka sianu pen ka neu lai panin ka etteh leh ka pahtak ngiat khat ahi hi.

Na matutpih ding nasep ding thei in (Aneu 2, 6): Joshua in a mailam a matutpih ding kiciantakin thei hi. Tua matutpih ding i cih ciangin mainawt loh in kingah lo ding thu hi. Pasian in, “Ka nasempa Moses si ta hi. Tua ahi ciangin tu-in amaute – Isreal-te tunga ka piak ding gamah pai dingin, Jordan Gun galkah dingin nang leh hih mite khempeuh kithawi un. Hih mite in a luah dingun amaute piak dinga a pute uh tunga ka ciamsa gamah amaute makaih ding na hih manin hat inla hang in,” ci hi. Mailam matutpih ding ngimna neilo mite lawhcing cih bang om theilo hi.

Mikangte paunak khat in, “Pai nading kician a neilo gunkuang huih nung khempeuhin a lang alang ah mut koikoi ding hi,” ci hi. Ngimna neilote in kim leh kiang huihnun ngak in om uh hi. Tua bang huih hong nun ciangin amau zong tua huih zui-in na pai uh hi. Ngimna neilote'n khantoh nading nasep nei theilo uh hi. Tua hangin khantoh leh kiamsuk cih zong amau kitheilo uh hi. Ngimna na neih kei leh a lawhsam ding ngim na hih lam kiphawk in. Ngimna neite bekin tua ngimna a tun theih nadingun siksan gelna nei thei bek uh hi. Gam khangtote bang hangin khangto hiam cih leh amau ngimna kician, bang ciangin tung ding, bangci tun ding cih a kum sehsa nei in kalsuan uh hi.

Bangbang a piang zongin Pasian muang in (Aneu 3-5): Topa Pasian in Joshua kiangah makai nasep thak guan ahih manin Moses a ompih bangin kong ompih ding cih tawh thahat leh hangsan dingin na hilh hi. Joshua adingin hih vaipuakna thubaih hetlo ding hi. Galdo ding namnih nei hi: gamdang kumpi, Israel mite a that nuam leh a lawhsamsak nuam; leh Israel sung mahmah ah thumanglo mite lungkiasak dingin vaisia geel om hi. Galte hong kapna thaltang mah bangin i lawmte hong kapna thaltang hangin zong kisi veve hi. Bek tham loin, galte sangin i pawlsung panin hong do a om ciangin i thanemna a theihsa uh ahih manin kilel mahmah hi. Laibu khat ka simna ah, “Khristiante in ‘galdo dingin kuan ni’ a kicih hangun galte kap sangin amau leh amau kikapkapzaw uh hi,” ci hi. Tuni in zong biakna dangte hong kapna sangin thu-um mite thaltang kithuak lahzaw thei hi.

Tua bek hiloin, a luah ding gam uh gam awng,  kuama tenlohna hiloin nam tuamtuamte tenna mun ahi hi. Tuate nawtkhia ding thubaih hilo ding hi. Tua gam mite in amau inn leh kulhpi panin na pang uh a, Israelte bel sehnel gam panin hong pai uh hi. Topa in sep ding hong piak ciangin a baihno khat hong pialo hi. Ama huhna loin i zawh ngeiloh ding na hi hamtang hi. Bangbang a piang zongin Topa mah muang ngam ding thupi mahmah hi. Galzawhna, lawhcinna amau tha leh ngal panin hong pai ding hi loin Topa a muan ngamna uhah kinga hi. Muanngamna zahzah gualzawhna leh lawhcinna hi ding hi.

Topa in a luah nading gam uh leilu lamah, leitaw lamah, nisuahna leh nitumna lamah a gamgi ding pia khin zo hi. Topa in a gamgi ding pia a, ahi zongin Israel mite'n upna tawh do in a lak zawhna ciangciang uh amau gam hi ding hi. Israel mite tangthu ah Topa ciamna gamgi ciang luah ngeilo uh hi. Ei zong Topa in thupha hong ciamte bangzah in a tam hangin upna tawh i lak ngam kei leh kingahlo ding hi.

Hangsan takin nungta inla mainawt in  (Aneu 6-7): Lawhcinna thusim khat ahih leh lau ngeilo cih hi loin hangsan nading ah hangsan ngamte hi. Hangsan i cih zong haihan om in, thuman thutak theih manin hangsan om hi. Pilna leh thu theihna kician neih manin hansanna manpha a, tuate bek mah in leitung kilamdangsak zo uh hi. Zukhamte zong hangsan mahmah uh a, ahi zongin tua bang hangsanna kizang theilo hi. Zomite i lawhsapna a tamzaw “tua bang hi kha leh” i cih tawh bangmah sem loin kinungta hi. Ngaihsutna hoihpipi i neih hangin semkhia ngam kei leng kimanna omlo hi. Tua ngaihsutna a taksuah ngam mi hong om ciangin lawhcing kici hi. Mi tampite nuntakna ngimna hoihpipi tawh bei ding hi.

Topa Pasian in Joshua lungsim thei ahih manin lau kei inla, hangtak leh hattakin om in ci hi. Lauhna in makai tampi bangmah sem loin a hun manpha khempeuh beisak hi. Lai Siangtho sungah, “Lau kei inla hangsan in,” cih thupiakna munte tawm khat i en nuam hi. Hih Lai Siangtho munte etloh in lotngah sawm in:

ñ  Thahat un la, hang un. Lau kei un la, amaute kihta kei un. Bang hang hiam cih leh note tawh hong paipa pen Topa na Pasian uh ahi hi. Note hong cimawhsaklo ding a, hong nusialo ding hi, a ci hi (Thuh 31:6).

ñ  Thakhauhin hang in la sem in. Lau kei in; bang hang hiam cih leh Topa Pasian, keima Pasian nangawn nang tawh hong om hi. Topa' biakinn sung nasepna khempeuh a kizawh matengin amah in nang hong tamasaklo ding a, hong nusialo ding hi (Khang Khatna 28:20).

ñ  Topa, ka khuavak leh hong honpa ahi hi. Kua kihta ding ka hi hiam? Topa, kei-a' dingin munmuan'huai ahi hi. Bang laupih ding ka hi hiam? Kei ka lau ciangin nangmah ka hong muang hi. A thu ka phat Pasian' sungah, lunghihmawhna khat zong nei hetloin Pasian ka muang hi. Mihing ahi lelte in kei, bang hong cihzo ding ahi hiam? (Late 27:1, 56:3-4).

ñ  Nang hong ompih ka hih manin lau kei in. Na Pasian ka hih manin lungkia kei in. Nang hong thakhauhsakin ka hong huh ding a, nang hong huhin ka hong honkhia ding hi. Bang hang hiam cih leh keimah Topa na Pasian in na khut taklam ka len hi. "Lau kei in, nangmah kong huh ding hi," nang tungah a hong cipa keimah ka hi hi (Isai 41:10, 13).

ñ  Bang hang hiam cih leh Pasian in eite tungah meidawina lungsim hong guanlo a, thahatna, ki-itna, pumpi ki-ukzawhna lungsim hong guan' hizaw hi (2 Tim 1:7).

Pasian thu thei inla zui in (Aneu 7-8): Joshua lawhcinna thusim in “thukham, thupiakte” limtakin zuih ding leh tuate khat zong pelhloh ding thu ahi hi. Thupiakte zuihna in lawhcinna bulpi hi. Moses kianga kipia thukham laibute mangngilh loh ding leh tua thute sun leh zanin lungngaingai ding cih hi. Tua bang hi leh na mavang ding a, na tangtung ding hi. Pasian thu zuih ding i cih hangin theih nei kei leng, zuih ding neilo kisuak ding hi. Tua hangin nisim Lai Siangtho sim leh thungetna pelmawh a neih ding thu ahi hi. Tuhun ciangin thukizakna, laibu dangte kisimin Pasian thu ah dangtakna i nei kei uh hi. Television leh Cinema et hun ding i neih theih tawntung hangin Pasian thu simin ngaihsutna neih hun ding i nei kei hi. Lai Siangtho sim hun ding nei keng na cih leh a sim nuamlo na hi kha ding hi. Lawhcinna zong tua zah in a lunggulh lo na hi kha ding hi.

Pasian thu sun leh zan in lungngaihpihna in lawhcinna hong pia ding hi cih Pasian kammal hi. Tua hangin vei leh tak lamah pial ken, zuih ding thute limtakin zui in, tua hi leh na mavang ding a na lawhcing ding ci hi. Topa thu ngaihsut ngiungeuna neite in a manphatna na mu uh hi. Late sungah tua bang ngaihsutna neih ding thu leh tua hangin hamphatna bang zah hiam na en ni:

ñ  Pasian thu ngaihsunsun mite gahsuah in mavang ding hi (Late 1:2-3).

ñ  Pasian ngaihsutsutna in gukngek leh sathau ne bangin lungtaiina leh lungdamna pia (63:5-6).

ñ  Pasian thu ngaihsutsut manin hauhna sangin nuamsazaw (119:14-15).

ñ  Pasian thu ngaihsutsutna hangin simmawhna leh thuneite panin suakta (119:22-23).

ñ  Pasian thu ngaihsutsut manin thupiakte zuih nuam sa hi (119:47-48).

ñ  Pasian thu ngaihsutsutna in a thupiakte deih mahmahna piangsak hi (119:97).

ñ  Pasian thu ngaihsutsutna in siate sangin thu theihzawkna pia hi (119:99).

ñ  Pasian thu ngaihsunsunin zan khuavak in zanhak hi (119:148).

Hong ompih in lam hong tonpih ahih phawk in (Aneu 9): Joshua lawhcinna thusim in Topa Pasian amah tawh omkhawm hi. Pasian ompih mi peuhmah lawhsam paisuak ngeilo hi. Mihing tehna lam panin a lawhsam a bat hangin ama khang i et leh Topa in thupha tawh heisak hamtang hi. Mi lawhcing i cih kimkhat zong amau innsung en leng, a tate hiam a tute hiam in na thuaklawh thei uh hi. Tua hangin lawhcing cih leh lawhsam cih i muhdan kibanglo kha thei hi. Bang hang hiam cih leh eima muhna hun tomcik sung ahih man hi. 

Pasian in Josef tawh omkhawm ahih manin a sepna khempeuh ah lawhcinna a pia hi (Pian 39:2,3,21,23). Kumpite nasepzia ni khat nangawn sin loin thongsung panin Egypt gam adingin Prime Minister a suak hi. Tua bang sem thei dingin koi lai panin pilna ngah hiam? Topa Pasian ompihna a ngah mite in tunglam pan hong pai pilna nei uh hi. Tuni in nang hong ompih ahih lam na phawk hiam? Hong nusia ngeilo ding cih hong kamciampa' thuciam na muang hiam? Khatveivei, “Topa aw, koi ah om na hiam,” na ci kha hiam? Pasian ompihna i telloh man bek in Amah nang kiangah omlo hi cihna hilo hi. Topa ompih ding lunggulhna tawh a samte kiangah Ama’n ompih takpi hi. Topa nang tawh a omkhawm leh mi lawhcing na hi khin zo hi. Topa Pasian in lawhcing toto dingin thupha hong pia hen.