Hamphathuai I chiding uhhiam gam ah Bank tuamtuam hong kihong thak I muhbeh a, solkar bank te kia hilou in private bank bang leng om zawmah chih ka ngaihsut chian private bank hong tuten I gam ah potential mu uh hiding ahi. Bank tungtawn a I gam khantouhna tampi tunthei chih mi tampi theih ahihman in kipahhuai I sa a, Bank tuamtuam tampi hong ombehna ding in panlak a, omsate zatdan siam I ikisin uh poimoh hi.
Solkar bank te bel solkar policy dungzui in market potential om le omlouh thu hilou koimun peuh bank omlouhna ah bank hon ding chih ahihman in eigam a hong hon uh mimal panlakna chi khawng a credit kipiak chi hilou ahi. Solkar policy “financial inclusion” dungzui in bank omlouhna khuate a bank hon ding ,a honna ding a phalna RBI a leng lak masak sese ngailou, ban ah bank operational cost kum 5 sung RBI in piaksak na laidep ding uhi.
I zakdan in Central Bank of India , Singngat leh State Bank of India Thanlon hon khiak hita a, himahleh huaite function theih taktak na ding in solkar office dangte leng Singngat leh Thanlon mun ah a function chiat poimoh mahmah ding in kilang hi.
Tua bek hilou in Private bank te Axis Bank leh HDFC bank ten leng Lamka ah dawr hong hong uhi. Huai a semten ahih hoih uhleh sangpi tungtou ding , a hih hoihkei uhleh a sepna uapan tawpsak theih a om chih kuapeuh in I theihchiat sa uh ahi. Huaiziak in Lamka a branch hong hon un sum bangzah profit hong mukhe ding ua chih target kipe ding ua, huai target muhsuah teitei na ding in nakpitak in na hon semding uhi. Bank in profit amuh hoihna pen LOAN tungtawn ahihman in loan hawmna lam hahbawl in hong om maithei hi.
Private money lender ten interest kha teng a hisap nagam ah bank ten interest yearly charge ahihziak in loan lanuam tampi omdin ka gingta hi. Nidang in kholak thuthang ah bank khawng a loan application form , a thunei thautawi pawl makai khawng I theihkei leh mawk muh hilou chi uhi. Dik hia diklou I theikei,himahleh loan muh baihlam lou chih a chiang hi. A teng miten gin -omna nei kitawm a, loan piak bank ten haksa sa uh leng himaithei ahi.
Mobile kithan tung a BSNL number muh ahaksa a, private player te hong lut un SIM card haksa chihbang zalmang bang theiding dinmun ahi. Huaimah bang in private bank te hang in mipi ading in loan muh baihlam deuh maithei hi. Government employee te ading diak in baihlam kha ding hi.
Dan dungzui in loan a piak ahihchiang in guarantor poimoh hi. A omzia bel loan latu in a ditzoh kei leh a guarantor in ditkik sakding chih ahi. Huaiziak in loan toh kisai himhim guarantor apan pilvan petmah kisam hi. Banghiam chi a loan latu in ditkik zohkei leh a guarantor dinkik sak teitei ding uhi. Dan dungzui in loan latu leh guarantor mohpuakna kibang hi. Hiai guarantor clause hou ngaihluat ziak a suai kaihmawk in thil saupi hon sawkkha thei hi. A khonung a buaina om in mahni hamphat pih hetlouh a loan bang ditkik sak ngai chih a tuakkha mi omtham ahi.
Ban ah loan Iadek khenkhat in mi guarantor a pang dia sawl, suai hon piaknop kei uhleh hehsan chihbang leng omthei hi. Mohpuakna lianpi om ahihman in kitheihsiam leng kul hi.
I gen hang in guarantor a pan louhding chihna hilou hi. Himahleh guarantor a na panna ding peuhmah in loan alakna ziak ban ah a dinkik ding hiam chih chian teitei ding ahi. Loan kisai insurance policy om leh huai hihsak teitei hoih ding hi.Ban ah guarantor a pang na hihdan a loan latu innkuan pinten ahon theihpih teitei uh ngiat thilchin hoih ahi.Akhonung a "This I promise but..." chih nualnual hetlouhna ding in
.