Cycle heekthei sam mahleng motor cycle bel ka na heekthei kei hi.Delhi a motor cycle heek ding chih innkuan pihte muan ngamna leng kitangkha lou ahihman in ka na sintum kei hi. Car ka neih main driving school ah ni 14 bang zilsam mahleng mi bang in ka siamthei pah kei hi. A gendan un motor cycle hekthei saten manbaih uh a, dikding in leng ka gingta hi. Huchin ni 14 ka zilzoh in thalopna a dim ka himai ding e, car ka va lasam ta hi.
Kisiam nailou deuh ahihman in ka lawmpa Mangkhum ka kiang ah tuangsak in aheek ka zilzel hi.Nikhat amah a hong man thei kei a, ken leng zingkal khat lakhia in ka va taikhia hi. Ka koihkik deklam in inbang khat ka vaphu ek a, side langkhat kuak dekdak hi. Kisinna neitou zel in Pathian ni khat kikhawm ding in ka tawlkhe nawn a, a malam side langkhat smart salua ka hihiam, bus khawllai ka va phu a, Okhla workshop lam ka tungdaih hi. Insurance om mahleh sum singkhat phalou deuh ka seng ban hi.
Sunday kikhawm ding in Mangkhum toh ka kuan nawn a, thautui thunding chi in South Extention Part II a HP petrol pump lam ka manoh pih hi.A mun ka tun dek ka engine ka sisak mawk a, ka start nawn le ka ma petrol hon thunsak dipa a petrol pump metre reading box toh ka phubelh hi. A khe tul a dulh helhal a, bihari te ahihziak a, na sa taktak hia chih theihlouh in hong kap ta hi. Enlah lohding dan kithei tuanlou hi.
Hospital ah pawding chih leh a manager pa uh ngak ding a chi tinten mawk uh a, pilvang kisa sim uh hia, police te 100 number ah ana call ua, PCR van hong tungpah uhi. AIIMS trauma center ka phut khak pa puak in omta hi.Chimoh kisa gendi lah theilou, I vaipau siamlouh toh kiding belbul mai hi. Hiai hun ah zaw car ana kineikha dah maile zaw hiai bang teng kituak lou di hia.. Vualzawlna hilou vuallelhna hizaw ding eive maw chin ka om leiluai hi.
Mangkhum in “Bangmah chilou ding I hi, lungkham ke’n” chin hon khamuan den hi. Chimoh beidong kisa in UKamsuan ka phone leh inn a repairing work omding ziak a kikhawm lou ana hizenzen a, hon awlmoh in hong taitou pah hi. Amah hong tun in lungsim bang nuam deuh hi, Police ten Home Ministry apan ahihdan atheih un zahtakna toh etbawl pah uhi. I buai mahmah hun a zaw Pathian in panpihtu ding hon bawlsak zel hita e chih muhtheih in hong kilang mawk hi.
Huaini a Dwarka EBC biak inn a taksap awnghu dan a projector enkai ding a Pastor pan muangtak a hon sep ahi. Himahleh ka lungsim ngaihtuahna bangmah omlou, om dedu petmah ahihman in hong kikhawm manlou ding ka hihdan leng ka gen tuan kei a, ka ngaihsut kikchiang in ka kisuanglah mahmah hi.
AIIMS trauma centre ah ka bihari phutkhak pa Police ten a va pawlut ngei ua, hichibang accident case te “medico-legal” case a gelhlut ana hi. Hiai medico-legal case neihkhak ding lauhhuai petmah ahihdan police ten gen hi. Ka naunu leng huaini a shift duty ana omchet ziak in a report bang hihiam chih ka ensak ua, ‘normal” chih hon hilh in lungmuanna hong lian tuan hi.
Huchin policete hon lemgel sak bang in case file louh a kihoulem ding in Hauz Khaz Police station ah ka vat u threpthrap uhi. Bank a sem ka hihdan gen kha chitchiat ka hihziak in sum haupi ding khawng in hon gingta ahimawk ding ua, Rs 30000 tak hon ngen uhi. Tam sa law mahmah ka hihman in ka hehdek sim mawk a, Usuan leh Mangkhum in “ei a hehding pen hilou ihi” chin hon khou hi.
A hon ngetzah uh h pehial lou in kihou lem in case file lou ding in suai ka kaita uhi. Accident man tam a, chin zongsat huailou hetlou hi.Ka phut khakpa damhoih hia, a zing a semnawn pah hia bang chi hia chihleng ka theizui nawn kei a,damding in ka koihmai hi. Himahleh huai mun ah chu petrol thundin tuni tan ka kuan nai kei hi.
Ka ngaihsut kikchiang in vangtah bang sim mahleng ka phut khakpa toh kihoulem thei chihbang hamphat huai ka sa hi. Ban ah hong buaipih tawntung UKamsuan huai ni a biak inn ana kailouh sese Pathian in kei panpih ding a na koih ka chi hi. Hiai article tungtawn in UKamsuan tung ah lungdamthu naakpitak in ka gen hi. Amah kia hilou, Mangkhum le! Amaute ziak in Pathian min pahtawi in om hen aw!
Khopi a khosa ihihna uah thil peuhmah a aggrieved party ihih ngeingei leh police 100 dial pah ding hihdan ka mukhia hi. Hiai call pen mawk beisak theih hilou, monitoring omden ahi. A complaint tu in a lungkimna tan a gelhthoh a piak kei leh call closed theih himawk lou ahihdan in police ten gen uhi.
Tuahsiat pen kikhel zenzen lou himah leh mihing in I siamding bang a siamlouh ziak a zong hithei hi. Kei leng ka siam ma in maingap lawtel keileng hiai bang tuaklou maithei ding hiveng.! Tuni chiang in bel huailai sang in siamzaw deuhta ka hihman in huailai a bang chi hek ka tel de aw chih khawng ka ngaihsun sek hi.Khenkhat in nuihzat huai hon sakpih uh hiam maw chiamnuihna in gen ua, i experience taktak le zaw nuihzat huai hetlou ahi chih kithei chiang kilkel hi
.