Mahni kithah a solution hilou ahi..
By David Son, Columnist Zogam.com
Tulai in mahni kithat chih i tuailaite lak ah zaak ding om zezeuh mawk hi. Poi I sa chiat uh a bangziak hiding hiam ? Lungkhamna, lungzinna thupitak tuak, lam et bei kisa in hin utna himhim nei nawnlou, sihna in a haksatna leh lungkhamna a tuahte uh beisak ding a ngaihsutna, mahni kithah a lampi omsun hiding a ngaihsun uh adiam chin I suangtuah theilel hi.
Hiai lam toh kisai gelh ding theihna haumi I poimoh mahmah uhi. Awlmoh luatna ziak in kon gelh ahi.
LAM ETNA BEI KISAK HUNBI MITAMZAW TUAH AHI: Hinkhua ah mihing in I thiltuah tuamchiat mawk hi. Laisinna , vualphalou kisakna, sepna zonna ah muthei nailou, damtheilou kisakna, I it mahmah ngaihzawngte in hon khenna, I dream neihguuk giugiau hong lohching ding a kisa hong muihmawk chihte ziak in hinkhua a lam et bei kisakna hon tunthei hi. I dreamte taksuah nawnlou ding hon bat hunchian, I hinkhua a plan I bawlte hong kisiat hunchiang in lam et ding a tawm a, khasiathuai in kingaihsiat huai tuntun hi. Himahleh hiai theini, Haksa I tuah eikia thiltuah hilou in midang in leng tuak uh a, himahleh sihpih hetlou in pal mualsuah uhi.
LAM PAM SIKKHIAL LOU OM LOU: Na hinkhua ah lamzang tak a pailai na theihlouh man hiam, tuailai lungsim a na hihkhelh khak a khonung a kisiklua a kingai se zezen chihbang omthei hi. Ngaihzawngten kholak a hon pawt pih maimai ding sa a I zuihleh hon guksawm maimah ua, a zaan a taikik hizen pi nuthoi hihna tangkha, ngaihzawngte itlua hang a sex hon neihpih uh nial ngamlou hang a khonung a hon taisan maimah uh chihbang, khatvei ngaihzawngte luppih kha zenzen chihleh hong hong gaikha, lawmten le hihtheih chi a khamtheih va taste kha tua tawp ut a phe tenten chih bang a lampam sikkhialhna omthei tham hi. Hici bang thilte hihkhial kisalua in kingaihsiatna tunthei hi. Bangziak a va huchi kha zenzen ka hiam chin kisik in kingaihsiatna tunthei hi.Himahleh sanggam aw, na lawm na vualte sang a mise tuamlua hituanlou na hi. Lampam sikkhial na hilel a, lampi dik lunggulh a kisik na hihman in na mabaan ah suahtakna om ahi chihthei in.
LUNGGIMNA APAN SUAHTAKNA DIA LAMPITE:
1) VERTICAL WAY:JESU KHEBUL A KUUN LUT POIMOH: Jesu Kris I chih zenzen mihoihte sam ding a hongpai hilou mikhial,gilou, leitung in a pampaih,simmoh leh kizuakte natan hondam dia hongpai ahihman in nang le kei hihkhelhna leh sualnate ngaidam ding a sisan kidaih law mahmah ahi. Amah khebul a kitunlut photleng aman I haksatna leh lungzinnate a lohding dan theihlua ahi.I haksatnate vualzawlna suaksak thei a,I lungzinnate kipahna khitui suaksak thei hi. Jesu Kris a omte ding in lam et bei hinkhua chih omlou ahi.
2) HORIZONTAL WAY
A)ANA TUAKSA TE DONG IN: Haksatna leh lungkhamna I tuahte ei adin na lua a, I tuahpatna ahihziak in lohding daan kitheilou sek hi. Sialpi vuahthuak mah bang a thuak kenkun khasekte ihi uhi. Mikiang a va gen thanop huaihetlou ban ah mi theihpih dia hoih hetlou thil leng hikha maithei ahi. Himahleh sanggam aw, ei tuah bangbang ana tuak palmual suah mi omtham ahi. Huaite na theih a na approach leh nang problem hon theisiam pen ding ua, a solution ,damdawi,lampi dik leng hon kawkmuh siam ding uhi.
Kum bang zahhiam paita in problem khat ka tuak a, office aleng nasemthei ngellou in ka om hi, kei problem ana tuaksa mikhat ka call leh hon theisiam mahmah in a damna ding lampi hon hihsak a, phattuam mahmah in tutan in ka mangngilh kei hi.
B)COUNSELOR NAIH IN: Lunggimna I chih lungsim lam toh kisai ahihman khopi a omte din psychriatist naihpah ahoih hi. Eilak a I theihkhelh nak uh psychriatist I chih mihaite kia naih ahi chih ahi. Mikhat in pyschriatist naih chih za leng huaipa haidek a de aw chih ngaihsun mawk d hihang. Hibang ngaihsutna ineih lai teng mimawl mahmah ,bangmah theilou kipilsak ihihdan I phawk kul hi. New Lamka Hebron veng ah MLCU graduate counsellor numei khat om a, Delhi Kim veel a omte ding in Rebuild and Restore Ministry 8287508148 om hi. Amaute eipau mah a houpih theih ding uhi.