LUNGSIM NATNA VEITE PANPIH DINGDAN..
David Son

Psychologist hiam, Counselor hiam ka hi kei, hiai gelhding in siamna ka neisam kei hi. Himahleh gelh poimoh ka sa hi. “Phulun pawtna ding leikha in kei vang” chi uh hiven, gelhsuk leng a hoihzaw thute hong pawtna ding in. Ban ah huchi bang tuak na lawm hiam, na tanau bang omleh na panpih theihdan omkha ding hi.

Zogam.com FB group lawmte lehdan in Heart break(lungtang kitam kham) , emotional pain(lungsim natna), depression(kingaisia) chihte zau takin I huamsak ding .

Natna himhim a thuaklou ten a natdan theisiam lou kichisek hi. Huaibang dandeuh in lungsim natna veikha louten theisiam khollou ding uhi. Himahleh a thuak kha ten na saw law petmah, sihpih dek phial a lungsim natna ahi. It le ngaihte toh kikhenna ziak bang, hinkhua a lohsapna ziak bang, hinkhua a haksatna tungte ziak bang in hiai natna tuahtheih hi.

THUAKPIH NA HIHDAN THEISAK IN: Hichibang tuakte awlmoh thou leng le personal thil simsim ahihman in va kan nuam kisakhollou hi. Himahleh hun tamzaw ah a thuaktu in thuak kenkun ahihman in thuakpih na hihdan gen in amah a ding nuamtuan ding hi. Bangziak hiam chihte va dot leng a ngai sese kei, ahon genleh hoihtak in ngaihkhiak sak lel in

Hucibang hun in gending kilawm theih haksa hikha thei hi. “Huai khawng khemkhem huchi puaknat” khawng chih hetlouh ding ahi. A khemkhem hetlouh ziak in a thuaktun lungsim natna neiloh hial ahi chih theihpih ni. Huaiziak in “Haksatna natuah poi kon sakpih, naa sa mahmah na hi chih kon thei. Bang hiam kon panpih theihna ding omleh ka man gige hi. Non poimohna omleh hon theisak in” chih kampau kilawm mahmah ahi.

THIL HON KUP LEH NGAIKHIA INLA THUMSAK IN: Lungsim natna neite a ngaihtuahna khat uh pai tang gegu, thildang ngaihtuah theilou ahihman in “a hun in aphak” chiang in,lungleng deuh kisak chiang un a lawm le vual te hon call ding uhi. Huchibang hun chiang in amau thu gennop uh hoihtak in ngaihkhiak sak I panpihna hoih mahmah ahi. A hong ki express khiak uh amau a ding damdawi hoihtak ahi.

A poimoh penpen hiai ah gen ni: A gennop teng hon genzoh chiang un thumsakna amah zak ding in neihsak teitei in. Hiai mun geih ahi Pathian naa thupitak miteng in I septheihna uh. Pathian thu i hatziak hilou, I lawmpa /nu haksat hun ah damsak theitu Pathian kiang a ngetsak I mohpuak ahi.

THUHILHNA PE KENLA LAMPI OM KAWK MUH IN: Khat veivei I awlmoh luatziak in “ na huchih leh hoihlou ding, na huchih ding” chihbang in genkhak baihlam ahi. Huai kampau hoih hikhollou hi. Huaisang in “ Lawm, huai mipa/minu leng huchi bang tuak a, himahleh huchi lampi a zuih leh damsiang inchin nang le na lunglut le zaw huai Pastor pa va naih theih di zaw hi a..” chia ngaihdan kup a decision bawltu ding a damlou pen hihsak teitei ding ahi.

GIN OMNA LANGSAK IN:Lungsim natna neite'n a haksatna uh hon gen uh amau a ding in damna ding a poimoh mahmah ahi. Himahleh a hon gente uh gensawn chin louh hoih hi. Min muangtak a thil hon share uh va gensawn pen gin omlouhna lian mahmah ahi.

Adiak in mite'n Pastor hiam,Upate kiang hiam ah a haksatna uh va gensek uhi. Himahleh khenkhat in “Pathian thupina din” chih minloh in thugenna hiam ,houlimna hiam ah gen sawn ek uhi. Mi'n a haksatna te uh gensawn ding a phalna hon piak kei uhleh va gensawn pen lepchiahna lianpi khat ahi. Ban ah huchibang Siamtu in a kipahpih ding in gintak huaikei hi.Hiai chiindan hoihlou kuapeuh in tawpsan tuak hi.

Pathian thu genna a example I deihleh Bible ah gending dim let om a, ban ah min amau hinkhua haksatna apan suahtakna amuhdan uh mi theihdia a gelhkhiakte gending leng tampi in om hi.

Ban ah hiaithu ah Pastor te leh Upate kia mohsak theihtuan kei veh aw. Counselling ding a pawt chiang un,min a naihchiang un a zite un “ Bangthu hihiam?” chih a dot chiang un in hilh kha pahpah sek uhi. Numeite'n ahon theihchiang un “Kuamah kiang a gensawn louh ding” thute a thei hong tam lawpah sek uhi.

LAIBU HOIH SIM DING KAWKMUH IN: Haksatna apan suahtakna a muhdan uh tangthu gelhna laibu hoih tampi om hi. Inspirational movie hoih taktak leng tampi om hi.

Laisim utmi ahihleh huchibang laibute present thil hoih mahmah ahi. Kei mimal choice ah Joyce Meyer laibute hoih ka sa mahmah hi.

DAM KHIAKNA DING HUNBI OM AHI: Taksa I damlouh chiang in damdawi hoih penpen ne lehang le a damkhiakna ding in hunla hi.Hucibang in lungsim natna neite leng khatvei counseling hoihtak neihpih hiam, houlim pih a damkhe vilvel ding hi zenzen lou hi. Huaiziak in damlou kep piansim bang a “damdawi” pen I piak zelzel ngai a, etzui touh ngai hi.

JESU KRIS DAMNA TUIHING AHI: Hucibang lungsim natna tuakte Jesu Kris kianglam a refer geihgeih a hoihpen hi. Jesu Kris in haksatna , nuaisiahna, simmohna, enghouna, gimthuakna ban ah sihna hilhial ana thuak mualsuah ahihman in miteng haksatna theisiam pen a ,solution leng theipen hi.Mosi hunlai in dal gul khaikang ente a dam mahbang un Jesu lam mitsuan te'n damna ngahsek uh chih hilhsawntu hithei chiat hihang