Tulai khangthakte kiang ah Minthang Guite  kua hiam chih introduction a ngaidiam? Tangval laphuah siam ban ah lasak siam mahmah  Hlunminthang Guite @ Minthang Guite  20th March 1984 in Lamka ah piang hi.  Apa  min Liansiam Guite A  Nu Theizaching  , Asanggamte: Mami ,Dony( Setting record for highest album sale amongst the Paites) leh Moibiaklian(Lelte Awards winner) New Lamka ah khosa ahi uhi. Minthang in tun HindustanAeronautics Ltd,HAL ah Deputy Manager sem in Bangalore ah khosa hi. Zogam.com 10th anniversary lopna din Minthang toh houlimna taakkhe nihang, a birthday kha ahihna toh..

 

Zoson:Mitheih in na unau un lasiam na hi ua,na Nu-le-pa lasiam ahi uhia? La lamtoh kisai in bangchin hon support ua?

Minthang:Ka pa’n mi theih in laa sa kei mahleh a aw ahoih mahmah chileng ka genkhial kei ding. Inn a om maimai chiang a laa sau loulou hon awih chiang in a aw kilawm tak haihvual hilou hi. Lasak lam ah ka nu leh pa’n hon kipahpih mahmah ua, gospel/secular hitaleh laa ka unau ua kasakte uh hon pahtawitu ahi gige uh.

 

Zoson:Mi tampi gendan in nang laphuahte qualiy neitak ahi a, a ngaihkhiak leng nuam kisa hi. La hoihtak ahong piankhiak theihna dinga na panlakdan non genthei diam?

Minthang:Kei panlaak dan  atuam luatna om in theikei mahleng  ka ngaihdan kon kum himhim ding. Laa phuah I chih  mimal creativity ah kinga petmah a,midang kiang ah, “kei phuahdan  a nalh,huchidan in nang le phuak awh” va chih theihchi  ahi kei. Deihdan tuamchiHat om baan ah, i laa ngaihkhiak ten hon influence mahmah hi. Etsakna din: Eimi laa kia ngai in laa phuak dia I hong kipat dekchian gothic/alternative/rock ballads genre  kiphuak khethei nlaa phuah dek chiang in tuamdeuh  style a phuah hak sanawn lou hi.

Nidang a eimi laate bang  Octave khat a kisa thei tam hi.A laa thu nalhziak in ngaihtheih luat himah leh athu theiloute adin ngaih peihhuai lou hi.Huaiziakin octave nih leh thum tan zang a laa bawl  nalh utzaw hi.

La  atangpi in music apat ka phuah ngen ahi.Music ah (Guiter bang hileh) chords tampi theih hong  poimoh hi. Major key C bang en ta le- Major key ahih ziak in -doh/mi/soh/doh- combination in hong pai a, huai apat a laa kaih ihon bawl khethei hi . Ahihziak in a khuang zom a major key khenglou hinapi Cmajor7 i tumnawn chiah –doh/mi/soh/ti- combination ah kiluutnawn a, hiai apat alaa kaih i bawl pen C key (doh is C) himahleh a combination a last na pen –ti- a I hon khenchiah i laa kaih luandan bang hong nalh tuam mahmah hi. Hiai pen etsakna dan a kon gen ahi. Chords te hoihtak a i theihleh a combination  chi tuamtuam te pansan in laa kaih nalh pipi kibawl khethei hi. Chords tampi zat ziak a nalhdi  ka chihna zaw hisam lou hi. Apoimawh pen laa genre chi tuamtuam ngaihkhiat  hin ka thei ahi.

Zoson:Na laphuah “Ngaih lenna Lamka Vangkhua” kichi hong pian khiakdan non genthei diam?

Minthang: 

NERIST, Arunachal Pradesh a engineering ka zir lai ahi. 2005 december in classmatete tawh tour kanei uh hi. Mumbai, Goa, Bangalore tel in mun tuamtuam ka vaakkual ua nuam kasa huntawk uhi. Ahihziak in Christmas hun kuan  in  vaigam  a i hong om hialleh lungleen  in hon buak a, Inn lam a om  innkuan pihte  tel in kuakua hiamte ngaihna hongl lian mahmah hi.A mihing chih phetlouh Lamka leiviu khu phulphul nasan diik uuthuai sakhop in in tenna Lamka khopi  ka miss ngoihngoih hi. Christmas ni bang in Hyderabad ah hotel a lawmte toh ki om maimah hi.PCO (mobile ki nei nai lou) apat Lamka lam ihon dial chian  a ngaih huai dan kam a genthoh theih vual hinawn lou hi. Huchin ka lungleen luatman in Hyderabad a nithum ka om sung un hiai laa “Ngaih lenna lamka vangkhua” in khovak hon mu hi.

Zoson:Mimal tak in bang la lam (genre) na ngaikhe deuh a?

Minthang:Genre lampang ah upat dungzui in ka laa deihdan  kikheng zel hi. Ka teenage lai (late 90’s) lak vel  in Thangboi Mangte a “Leenheisa” Vol 1 leh Vol 2 toh S.Chingnu a “Zaan sawt leidi” album nalh kasa petmah hi. Hiai album te tuk a eimi laa album ka ngaih lumlet a om nailou hi. Eimi lasiam ah amau gel tunitan in ka ngaihsang pen ahi uhi.Western lam ah ahihleh ka genre ngaihkhiat akum dungzui in tuamthei sek hi.  Late 90’s leh 2000 kumbul  tan in alternative/rock ka hah ngaihkhiat hi. LimpBizkit, Greenday, Paparoach,The offsprings,No Doubt chihte bang ka ngai mun deuh hi. Huaite influence ziak khong ahi  “CBZ” laa rap/rock a kon bawlkhiat theih uh. Ahihziak in huai nung 2003 vel apat in country lam ka lunglutna hong pung hiaihiai hi. Hiai genre huailai apat tuni tan ka ngaih khiat tam pen country music hong hi hi. Huchi kawm kal in genre dang bel nuse tuanlou in ka ngai kualthei vek a , analh dan tuam chiat ka sa hi.

 

Zoson:Eimi te laa lam a I dinmun uh na muhdan..

Minthang:• Gospel laa lam ah I  khangtou mahmah in  kamu. Gospel laa siam hunkhop I om ua, album bang kum teng in bangzah hiam pawtdi om gige hi. I sutzop touhzel uh hoih kasa hi.

• Hard rock lam ah le tuchiang in khangthakte band siam taktak i om uhi. Live performance ka muh khak chiangchiang ah RAV te  siam kasa hi. Hiphop/R&B/Trance genre ah Mwanlal siam tungtuang kasa  hi. Blues/pop-rock/country ah Pauginmuan siam kasa  zel hi. Adang tampi siam taktak leng i om ua, I music industry maban dinmun hoih  hi’in ka mu hi.

• Gospel laa lamah masawn i om lai un Love/Secular song lam ah kikhang toulou ade aw ka chisim hi. Aziak ahihleh tulai Zomi love song ki release thak te atangpi in laa lui sak thak tamlua kasa hi. Laa lui zaw kepbit hoih lua hi, huai sang in laa thak tam theilam bawl khiat sawm chiat leng  chih ka duhthusam ahi
 
• Market lam ah I Zomi market uh kha I siam na leh I strategy zat ah akinga mahmah hi’n kamu. Siamtak a album bawlte a din strategy hoihtak a bawl naak ua leh I Zomi music market uh neulou ahi chih muh theih in om hi. Zomi India context chouh hilou, foreign a om tamtak te toh line bawl dan siamte a din market etlah huai huntawk  kasa hi.

 

Zoson:I artiste te uh promote dinga hoih hinapi tulai in mipi lam apan “kimaitang zah ziak khawnga kilei, I ngaihkhiak chiang alah quality om mahmah lou” chih gen le sak nei tampi om a,  na ngaihdan..

Minthang:Hiaithu kenle ka na ngaihtuah sek ahi.Atam thei lampen hoih  kasa a, himahleh quality omlou lua a ahong pumdim di pen kha poilou chimawk lenglah Music ichih Inam gou ahihna ah, akhen chiang bang in namdangte lak ah nuam hetlou dinmun  in om theih ahi. Huaiziak in, ka duhthusam bel album quality neideuh bawldi. Hithei hileh  standard set tu ding om henla, midang ten le abawl dek ching un, huai dandan level tan tum tinten le uh, ahihkeh huai sang a hoihzaw hon tum le uh  chih deihhuai hi.Huai dan khong deihna ziak in tha leh zung tamtak seng in Bangalore Zomi Collection kibawlkhia hi. Miteng zuihdia standard set tu ahi chih hikei mah leh huai dia kalbi hoih tak khat ahi chih haih vuallouh hi.Maban ah ka bawl touh dite leng huchi bang standard mah in kibawl sawm hi. Huchih chiang a midang hon bawl di ten le huai level tan , ahih kei leh huai sang a hoih zaw a hon bawl sawm di ua. Hileh quality nei taktak album hong pawt khe ding in um ing.

 

Zoson:Zawlla sak khamitna toh kituaklou dan a enpawl i om ua, bang ngaihdan na nei?

Minthang:Zawlla pen hoihlou/khelhna dan a ngaihtuah ki-ommah inteh. Mihing tuam chiat in thil teng i view dan bang kibanglou ding mah ahi. Zawlla sak pen hoih hia hoih lou hia chih mimal tak in kana ngaihtuah sau ngeikei.Ahih ziak in zawlla a hoih lou kasak pawl omtham hi. Hoih ka saklouh ahih leh: Nungak/tangval leh kua hiam kilawmlou tak a dem/tawng/kou na late ahi.A hihna diktak ua dem leh kou himaithei uh hilele laa hial a ki kou khum pen chu damsung a mang nawnlou ding ahih ziak in hoih kasa het kei.kuamah hoih bukim le ki omtuan lou ahih na ah.

2011 December Khristmas ma zek in “Heart Strings” chi in Hornbill Cable studio a Live Performance om hi. Huai ah zawlla hoih hia hoihlou chih gen na omkha a, huailai a  Pauginmuan in a gen hoih kasa  hi. Hichi dan in gen hi:”
1) Mikhat in nungak/tangval khat ngai mah2 a lungleeng.
2) Huai tak a laa hon gelh khia.
3) Huchia huai laa akaih hong ki bawl khia.
4) Huchia alaa pen hong kisa khia.

Hiai in a zawlla pen hon bukim sakta. Huchi zawlla pen hoihlou hileh akoi pen a pat hoih lou ahidi?Point 1) maw ahih keh 2)? Ahih keileh 1+2+3+4 igawm chiah hoih lou hia? Point 1 pen hoih lou hileh chu lungleen hoih lou chihna hizel. Point 2 pen hoih lou va chih mawk pen kha le dik thei lou zel......” chi in hoih takin hon gen leh azatu khempeuh in dik kisa mahmah hi.

 

Zoson:I zawlla te uh tamzaw vualleh la I chi ua, vuallelh hun a inspiration muh baihlam deuh adiam? Or Romantic deuh hun a inspiration tawm ahi diam? Nang ngaihdan.

Minthang:Eimi laate nidang apat tuni tan in  country genre ngen kizuideuh hi. Laa genre i zuih pen uh western country laate i et vengveng leh a love song tangpi uh vualleh (Ei chih dan)laa ahi. Nidang country lasiam minthang mahmah George Jones,Connie smith,Dolly Parton leh tulai a country singer Taylor Swift, Dixie chicks leh adangdangte laa huchi lampang tam hi. I pau uh vocabulary atamlouh ziak in I zawlla tangpi uh “VUALLELH” laa ichi sek uh ahi.Huchi hiai pen english ah kheng di hile “FAILURE” laa chih bang ngai maimah ding hi. Ahih ziak in English country laate ingaih leh avuallelh lam pang bang a et di hileh ei late sang bang in uang zaw hi. Ahihziak in amau huai la te “FAILURE/LOSER” laa chi lou in “BROKEN HEART/HEARTBREAK” songs chi uh hi.Huai kha hidaih mai maw! Huaiziak a vuallelh laa ichih pen bang le ngaihtuah sau leh vuallel chih kammal pen bang le ana dik khinlou, ahihziak a pau vocabulary tawm ziak mah a thil tampi genna dia kammal khat kikop lel hi in ka ngaihsun hi. Huaiziak in Heartbreak songs chih kilawm zaw mahmah hi.

Kuapeuh mah dah hun, kipah hun leh thanop hun om hi. English Country music genlou in eilam ah en le, nidang leh tulai a a upa lamte bang misi luang kiang ah kahtam alawhte uh laa chikhat ahi.Hiai pen athute gil thei mahmah hi. Upa lamte bang misi a suun mahmah chiang un kahtam ngaihtuah sese lou in a lungsim ua hong pawt zungzung in loukhe mai uh hi. Ahihziak in tua kahtam lou siamte kipahni in kipah laa chi in kimawkloh lou uhi. Lou din sawl lele misi luangtung a kahtam aloh bang un kuaman mawk lellou ding uhi. Huai in a etsak ahih leh lungkham/lungzuang/heartbreak lai tak a laa ichih pawt uut zaw ahi chih kilang mah mah hi. A huaiziak takmah a i zawl laate uh Heartbreak (vual lelh ichih uh) laa tam ahi chi in ka ngaihsun hi.

 

Zoson:Song writer khat na hihziak in la phuak ut a hong kisate bang advise nop na nei a..?

Minthang:Laa hon phuak ut a hong kisa te kia ka gen nop points tamlou hiai teng ahi:
• Originality mah ngaisang in, ahithei tan in laa kaih omsa copy louh sawm tinten ding ahi.
• Lapau hoih taktak te kembit in athak bang le introduce thei zel le chih deihhuai.
• Nidang a lasiamte ngaihsan huai mahmah uh. Hilele amau laa paidan te entawn lou in tu generation ah chituam deuh leh athak deuh puak khiat sawm zawk ding ahi.
• Laa phuak, khum zoh aki release khiat chiang in ut leh ut louh in I nam gou hong suak hi. Huaiziak in namdang te’n hiai Paite laa, Zou laa or Vaiphei laa ahihkeh atom a gen in hiai Zomite laa hon chi ding uh hi.Huaiziak in a nalh theitawp suah dia panlak ding ahi.