Mihingte hinkhua ah I mawl mahmah hunlai apat civilization in a hon tuamkiimvel hun tanpha in hihdan ngeina kipianpih chiat a, society/community dandeuh (social being) a omkhawm khiukheu ihihna uah, kithununna chikhat kinei chiat hi. Culture ichih hong piangdok a huchi`n biakna in hon zui hi, biakna leh culture kikhen thei ngeilou hi. Sap mipil te`n culture is religion, religion is culture, chizawzen hial uhi. Pipute hinkhua sui-sin le, a hun toh kituak in thuhoih thusia piangdok zelzel a, lauhna khovel a khosa ahihziak un chi`ndan leh ngeina a hun leh phat in kivaisaidan, kikhamuandan, kihanchiamdan nei zelzel uhi. Pianchilna tangthu (myth) a chetna (proof) omlou ngenta khovel a nam tengteng in nei chiat ua, ei Zosuante gintakdante zong a tuamna om neuhneuh mahleh, leikawhawm/Khul (cave) apat pawtkhia nuaunuau danin kithei ua, ganhingte leh sing leh loute hong suahdok dantoh kitehkhin mahmah uhi. Dawi leh kau toh khosa ahihna uah, suklungkim ding leh thawi ding mahtak tampha mahmah a, Animism kichi, nature worship chikhat anazui uhi. Hiaipen mihing khempeuh te`n a matuah masak uh leh a zuih masak uh ahi hi. Lui leh guam, tangsang leh khaam/kawl kensia, lei kawhawm leh tui lipi, suang sang leh gamngawte, ni leh kha leh aksi, leh thil lamdang asakte khempeuh uh bia ua, lau ua, thawi lungdam sawm uhi. Kipahna, lungle`nna, khasiatna, sa leh gal, chinat lunat, leh sih le man etc. om thithe te ziakin kisongbawl dan piangdok hi.

Galloway in sahkhuana a genchianna ah, “Man`s faith in a power beyond himself whereby he seeks to satisfy emotional needs and gain stability of life, and which he expresses in acts of worship and service”.

Tangthu khat ah, Songthu pi a nopbawlna lam ah, NAMSAU vaizotzot kawm a laam inchin, mitampitak vailum zelzul, Ni Nuaimang kiang a heek ua, huchia, Ni Nuaimang in Songthu pi kiang ah, Vaan ah na ma`n nop leh mang in, Lei a na ma`n nop leh maang in, achih ziakin kulhpi pawlam ah taikhiakna thupi om chi hi. Vaan Maang leh Lei Maang omsak uh ahi chih theihtheih hi. Huai pemkhiakna ah sial kili nei in lamkai a, sial kili nei pen dawi ahi kichi hi, Chindwin lui (Tuikangpi) dung zuisuk uh kichi hi, Songthu pite hun lai in dawite toh kihou leh kithuah hihtuak uhi. Mimasate Kabaw Valley (Tamu apat Kalemyo) phaizang a ate`n lai un Khampat khawpi ah Mawngsing suan ua, Thado pa suan ahi kichi, huailaivel in Aukpataung (Awksatlang), Tahan khokiang a mualsang ah kithoi zel uh kichi hi. Hiai thugousiah in genchia`n mahmah:

“ Ka phun Bungpui dawi ai ka sanna, Mi khoih louh, sa khoih louh ten, Thangin lian la, khuanu`leng hualin, I tang zarin piallei a zawm tikah, Seifate`n vangkhua rawn din leh nang e”.

Huai hun lai in hiai lapau hoihtak phuakthei zenzen lou ding ua, a khonungpi a misiam kha phuah chu hipeuhmah ding hi.

Tua hun lai in a pianna mun uh, “Lailun puk a piang, Chimnuai puk a piang, Seipui lungpui a piang” , (PUK- CAVE), khong chi in phuisam sek uhi. Pu Songthu in khua asat dingin Aktal in Aisaan masa kichi, tuadan mah in Phuisam kawm in siansuah zelzel ua, Ui, Ak, Kel khongin hih zelzel ua, sa ngoi in khawmun chiamteh zel uhi (melmate lut theihlouh na ding, ka khawsung chihna dan ahi). Khampat omhunpen Dahpa, Penglam leh Lengtonghoihte hun ahi kichi, dawi & kau toh khosak hun ahi.

Suanghawm/Khul (cave) a pa`n piang kichi ua, hichidan in Phuisam la nei uhi:

 “ Khimpi ziin ni, khapi kiat ni, khawkhen ah, khawlzang ah, michin sachin kikhawl nung tungpi suah ni, ka pi Nem nikpi, niksan hong hai tateh. Nannu khulpi hong khupnelh tateh, khulvang ah hong suak tateh, Dawi in Kau in hong piang tateh, gantual ngo kuan tateh, na tuahmoh chiangin hiai nu hiai pa guh teep tateh, na gantual ngo zon hiai nu hia pa guh teep ken, na gantual ngo zong mu tateh, na khua zuan in, na tui zuan in, na tong na laam dingin ho`n ngaklah”.

“ Ka Kulhpi, na phahpi,  a kulhpi ka Lungzai, ka siampa, ka pathian”, chih kammalte phuisamna ah thangsak mahmah uhi. Luika khua ah khatvei suangpi nuai ah kawhawm om a, naupang mang ze`zeuh uhi, khomite`n thaangkam ua gulpi awk hi, a lai`khiak dek chiang un gulpi pau a “ka omna thuuk mahmah a, ka mei in gungal baan hi, vansuang zawl ah kivial hi, ho`n kaikhe zoukei nu`teh” chi a, gulpi sattan uhi. Luika khawsung teng ah gulpisa hawm ua, meithainu kia`h a luu pia uhi, a huanchiang in hong pau leuleu a, ka mit na dawt khadek chimawk a, lunghimawh in vokpi pia hi. Meithainu ak khuang nawn leuleu a, “na zinte kha ve” chi hi, a zinte a khaak Kar in vuahpi leh huihpi zu a Luika khua menchim in delhmang a khuamite simang sipsip uhi. Huaiziakin, gulpi pen Lungzai chi ua, lauhuai dan in ngaihtuah uhi.

Pupi Songthu in a naunu ( a paneu tanu)  Pi Nemnep (Nepbuk) toh ta aneih ziak un a kiselna ding leh zumselna dingin phuahtawm tangthu bawl a, (a pi thubawl ahi kichi), naungek pen aktui apat piang, nigui thahatna toh, chizenhouh hi, hiai thu ziakin Nitui Ai, Aktui chia Suangvom biakna nei hi, kichi. A mualphou louhna ding in tangthu phuahtawm zok a bang mahmah. A naunu toh lou gia`hna ah kipawl ua, huai lou pen Aisan lui gei hi a, aisante nupa kichi laidep hi. Hiai Songthu suante lakah Mangsum in pu pa ngeina leh biakna puahpha a mite`n muang un nuamsa uhi, Mangsum tapa Tuahchiang in insung dongta bawlkhia a, aisaantu ding leh siampu kiningching takin koih a, siksek, galkap, tangko leh upa vaihawm bawlkhia hi. Ngeknguk kipan leuleu a, a galmatte suahtakna pia hi, “tute aw, I ki it I ki ngaihnate manglo dingin pusa na thoih chiang un dawi thoih saliang no`n puak ding uh, chi hi, huaipen “Tou” sa kichi a, Tou Sagoh kipatna ahi hi.

Songthu suante laka Mangpum tapa Thanggou nu tangthu I et leh, vaite`n kamakhya temple a suangkek a biak sang un biakchi zaw hi, Sialthah khua ah meithai khat a tate toh teeng ua, mite`n simmoh mahmah uhi, a ta upa zaw Lammang houh a khetul gui sattat sak ua, khaam ah sawnkhia uhi, nikhat sabeng tangval honkhat in Thanggou nu kisilna ah a nik tei (spear) in hawkkhiaksak ua singkung ah khaisak uhi, Lawmte aw ka nik hon pe kik houh un, chi a, amau, Na su no`ng lah keileh hong pekik kei n`ung, chi uhi. Thanggou nu`n, munuam teutau nahih vua leh en un, Lammang leh Thanggou ka hinkhiakna hi chi`n a su phenkhum, a nungchiangin huai tangvalte puul/si phengphung uh kichi hi. A khonung in Lamzang inpipa Thanggou hong thupi a, phuisam zenin khua ana lam hi,

“Lamzang khau ah siahtung siahphei ne a, maang zota hen no`n chihleh, hiai dawp lakpi zankhat thuin kang in”, chi`n phuisam a, a ninawn in ana ka`n taktak ziakin khua sat hi kichi. (sih-dawp).

Himahleh, Songthu in a suang biak pen sunzom hi chih kimulou, numeite vanneih le kibesamlou hi.

Naulakte phuisam la ah, “Chimnuai, Geltui, Khuangen, Sasih, Dimpi, Kalzang” chi`n kipan a, Thangho leh Liandote unau Chimnuai apat, Geltui ah, huchi`n Dimpi ah khosa uhi. Hiaihun lai in Lal thupi mahmah Lersia kichi om a mingthang mahmah hi, Lersia pen Maang thupi ahi chih Lusei te`n pom ua, himahleh Ralte suan hi a, Ralte te bel Galte kichi a, Thado suan ahi uhi, tulai in Chawngthu kichi uhi. Luseite`n huaihun lai in Lal neinailou uhi. Lersia pen nikhat putek danin kibawlsia a kuama`n zintun utlou ua, tagah Liando, Thanghote unau in, ka ni anhuansa ne ka hi uh, chi`n zintun uhi. Lersia in sialpi a deihpen uh kai dingin sawl a Tangkou nu panpihna toh sialpi hoihloupi mit-ekkai nimnem khat kai uhi, nou-nei zihzeh a dawi toh kithuah chihna hilim hi. Pitek khatin ompih a, neih leh lam hong hau hulhul uhi, awlawl in pitek leng paikhiak sawmta a, nikhat hichi`n chi hi, no`n poimoh nawn kei ua, haksatna, buaina, mangbatna na tuahchiang un no`n ngaih ua leh hiaimun ah biakna leh kithoina na bawlzel zel ding uh, chi`n sumtawng ah akpi a kisiam in leivui lak a manghiau hi. Hiai apat Sumtawng biakna kipan hi, Naulak innkuan sabiakna ha poimoh diak a, Paite te a deuh ahi sese. Liando, Thanghote la tampite lak ah:

 “ Thei ka sen a ka mel nei mak, buh nong piak a buh ei nong piak, sa nong piak a guh nong piak. A guhbawk tuk duhlo a. Siang buh zu le a tak nemnem pia aw Neihtawng aw (Liando zi Neihtawng/Neihchong ahi).

 “ Thangho aw na dialsan hong khim ve aw, Liando aw dial nai hong khim ve aw, ni-nun tual ah taang hong laam ve aw, Kei pawh taang laam ding ka lawm lou a, ka tam gual kaai in zak hi ee”.

Liando leh Thangho te unau min manmohna hiai la ahi, “Ka kuanlam in palsial sial ta`ng ka chiahlam in guntui a lian e…..”. La khat leuleu ah, “Liandoute unau unau, dar eng nge in tum in tum, dar eng mah kan tum lo e, Liando bur chhe te kan tum kan tum…”, chihpen apat Luseite toh tengkhawm ahi uh chih chiang huntawk mahmah.

Sumtawng kithoih Phuisam la, hiai sumtawng kithoihna ah voknou tuailai a dawng thitthet in kithoihna nei ua nikhat zeh tang uhi, Paite chanchin ah Akpi Siakkawi a kithoih ahi le kichi:

“Anphel hong saang in

Taang tung a leh taang nuai a in

Anphel hong saang in

Chidam ludam kong ngetna uh hi

Mim chi taang chi kong ngetna uh hi”

Hiaihun pen 1300-1500 AD lakvel ahi.

Loumun leh inn gei ah Sih (dawp) a om inchu, sih mun ah kithoina nei ua Siampu in hichi`n phuisamna nei hi:

, “Naupangte I nu I pa an om em, Awm lo, kou roh u, ko roh, Manmasipa lo tum e, hui hui hui, Manmasipa lo thleng e. A lo thleng toh em? Thleng toh e, eng nge I duh? Eng mah dang ka duh lo, I hnenah hian, nun tluak, pangdam, he mite tan hian ka ron dil ani, Chibai, kungpui pathian ron inkhawm roh u. Chibai, tui chhim luanga mi, tui hmar luanga mi, hei nun tluak, pang dam ka ron dil e, lo kal roh u. Hei I inn ah ka ron khalh e”, chi`n sial hawllut taktak bangin pang fanfan hi, huai hun in nuih phallouh ahi. Chidam pangdam na ding pathian kiang ah ngetna ahi, sih dawplak pen dawi leh kau kep, aneitu om ahi chih gindan khat nei ua, hoih mahmah leuleu, tuinak I kep siangthou ding mah ahi hi.

Khupching leh Ngambawm (Tlingi leh Bawma), hiai hun pen Pu K. Zawla in Khampat (Kabaw Valley) a Zosuante khosaklai ahi chi hi. Himahleh, Thangtlang a tun tan un ladou tawi chikchik nei ua, “Vi li liu, vi li liu, haw haw haw, ku ku kui”, chi`n kikou vakvak ua, a teipi tawi uh lei ah sohbur chorhchorh sek uhi. Huaiziakin, Khupching leh Ngambawmte Chimnuai, Geltui a Zosuante khosak khawm hunlai mah hiding hi (1300-1500 AD). Hiai tangthu apat sinding om hi, Khupching asih zoh in, Ngambawm lungleng lua khasia in sidang hial hi, Ching omna ah a khaa tung a, Ching pen guhvuak phial in nekding neilou in om hi. Khasia kisa in hong harhsuah nawn a Ching nek ding haithak hoih tata puak a, sidang nawn leuleu hi. Ching a muhnawn tak in anahoih mahmah ta a, u bawm na nekding ho`n puakte ziak ahi chi hi. Tuithei tun na gei ah Ngambawm in kum tengin a haithakte a hoih phapha kithawina dingin pathian kiang ah hlan zelzel a, tunitan in huai MIMKUT kizanglai hi, Haithak thawhlawm, haithak lopna kichi hi. Mimkut a bawl chiang un, mimsang su ua, inveng inkhang kihawmtuah ua, misisate sunna nei uhi. Pathian kianga kipahthu genna hi a, Kaina leh Abel hihdan toh kilamdang lou hial hi. HAITHAK a tun chiangin kilawm a Pathian kiang a kipahthu genna dan ahi hi. (sutzop hi maithei)