Zomi pasalpha a sih chiangin “Laangpi” ah zawng ua, lukhu neisak uhi. Lukhu ah Tukpak a siat leh melma thah zah, Vaphualmei a siat leh Sial gawh zah, sawn a siat leh sa-vom leh Ngalkhaat mat zah, sawn laikang a siat leh Sahang mat zah, Akngesawm  san a siat leh sakhi mat zah etc. Mi thupite sihni in kongtual ah “Hanchiam” chi ua misipa nasep thupite puangzakin kikou tuaituai  kawm in thau gin dupdup sek uhi. Mihangsan loute huchidan a pahtawina toh kivuilou hi. Kristiante gindan a sihnunga  Lal lukhu muhding ensak hi.

Misi zahna in a sungte`n kawsah bawl ua (Kua-hole/sah-make or bawl) sa tampipi that ua, niang leh tai in om uhi. Misikhua lampi ah huai gan thah te`n makai ding ua Sahnu in lungme nesaklou ding, Pialgal lutsak pah ding chi uhi. Sihnung a hanveh chih thangsak ua, misi nekding pua in khitui naptui toh sunna nei uhi, Mary in Jesu han a vehna toh kibang mahmah, tulai in pak tawi in han I veh sek, huai toh kibang geih ahi.

Gal hat, leh mi hangsan ahihchiang un misikhua ah a galmat/thah te un zui ding ua pialgal ah siahloh tampitoh khosa ding uhi. Gamsa matte tengteng toh pialgal lut ding ua Sahnu leh Pawla in buaisaklou ding chi uhi. A gamsa matte khaa in zuiding a, panpihtu muanhuai suak ding uhi. Gungal ah pialgal om chi ua, Jordan luigal ichih chih toh kibangsim dan ahi, chi uhi.

Misite a vui chiang un sa lung, sa tuap, sa kal.. neng pawsak ua, misikhua a nekding chidan uh ahi. Sahang leh sa lauhuai a mat chiang un, sa-aih bawl ua, vualtungtuana thupitak ahi, Galthat zoute ngialhouh thupidiak ua, khovel khosakna ah mite ngaihsa`n ahi uhi. A sihchiang un misikhua ah pialgal alut ding chiang un a galthahte uh kikou tuaituai kawm in mithupi hongpai chi`n tangkou di uhi. Gal a site phuba lak ngeingei ding chih ahi, tua hikeileh misikhua a galte naa sem a omding chi uhi.

Head Hunter te Gal-Aih La:
1)    A si batphu, a kon ni`n e, Sa kamkei bang hang ing e.
2)    Zang lei aa taa, sumlu mai-pa, Tang in siam bang met e.

Thupi kisa a Sa-Aih La:
1)    A kap, a thang tazaw maw, A ai ,a thang tazaw maw.
2)    A kap in, zu leh sa lawh e, A ai, lawi bang thang nah e. (mi sa-kap le Aih sak theih ahi)

Zomi diktak hihna bel maimailou hihtuak, head hunters kihilim akei.

Kawlni (Colney) te mihangsan Darbunga in, Siakengte mihangsan Suangsapuia a thahzoh ziakin hia la phuak uhi:
“Suai hnuai ah vangkhua ka siam, A khua kip in ai ruan e, Suangsapui a rang ka thah, Ka do cheng hnuaisiah ing e”.

Dahpa la leuleu:
“Simbu in builu Gun gal ah kaipihta, Simbu lalthah kei lalthah, Khuamual ah lu suang ing…… Suangmual ah hanzai sa`ng”

Haanla khat leuleu:
“ Ka thang e, kawlchiang ka tawi e, ka kawlchiang tawi gia bang a tang e, Ka kuanlam in e……….Ka chiahlam in e………. Len tawm a ging dimdim”.

Tuahchiang (Guimang tupa, Mangsum tapa) la phuah:
Ka khua mual pi aw chi ing, Chim khua mualpi aw chi ing, seino ka thah lu leel ah phualva bangin tuang na e”.

C. Thangzatuan gelhdan in:
“Hing e e e, hi na pet ing e e e, pasal that a kei ka hi, hi na pet ing e e e.
Hing e e e, hi na pet ing e e e, nupi that a kei ka hi, hi na pet ing e e e”.
“ Hong en un, hong en un, Gelkawn nuai hong en un.
Gelkawn nuai hong en un, lal lu sia vaupaak bang”. (Gal mate lu a koihkhawmte vaupaak bang hial).

“The British government collected all guns from Zogam (Chin Hills) numbering 7000 and released 5000 captives recently captured slaves belonging to Shan and Burman from Sihzang, Kamhau, Tlaisun, Zokua and Hakha areas (Ginzatuang:1973, Liansakhong: 2000)”. Goukhothang Meitei Lengpa`n  amat ziakin a tapa Sumka thangpai a, mihing 78 ngut sal dingin man hi, Lengpa toh thukhenna a bawl khit chiang un tua mimatte khahkhia  hi, Head hunter te chetna thupi thousam leh kilawm.

Naupa`n lai a si te a vui chiang un aktui leh sa them kengsak uhi, Sahnu leh Pawla in misikhua a a lusakna ding chih ahi. A sihchiang un van tuamtuam toh vuikhawm au, huaite, tuithawl, tuibuk, galvan, tem, tu, puan etc. ahideuh, ei kristian te`n le I kengsak thou uh hilou hia, pipute tawnda mah kizui lailai. Lal thupite a sihchiang un a salte (gaal matte) lim mualsuang ah tuangsak ua, a gal lu-lakte uh toh takkhia uhi, thohnawnni chianga a sipaih (bodyguard) di chi uhi. Vanhnuailiana Sailo haan ah, a gaal matte lu hunkhop kitak a, Sukte pa khat a mat luu zong tak hi, a sa matte lu tamtak kitak bok a, a hanpua ah mihing khe khat dawkkhesak uhi, thupitak a kivui dan ahi, huaite tengteng a standing army di chihna. Sihnung chiang a aom dingdan uh buaipih ngial uh hituak. I sahkhuana in tunitan in eile hon lok a, sihnung a omdingdan buaipih in I hun tamzaw leh neih le lam suahkhiakna in i nei uhi. A pia/thoh tamte lallukhu hoih tuan di chih khong omsak pawl ki-om lai.

Gaal-aih--- gal dou ding akuan chiang un, tangval bangzahhiam khosung ah nuse sek ua, numei leh naupang kia koihlou uhi. Vuallelh leh taimang hiau ding a mansa in om uhi. Lou kuan chiangin a kuanmasa lubei a muhding omsek, galte`n a luu laksak uh, huaiziakin lou kuankhawm ua, louzaau nei uhi. Galdou chiahlam a lohchingte husa nasa mahmah a, khomial kuanin khonawl ah thawm nei uhi, huchi`n khosung a numei naupang, nupi papi, a tek a khang tengteng zaankhua in kisakhawl ua, galzoute vaidawn dingin naasem uhi. Thaam (zawlbuk) a tangval omte zankhua in thau kikapdem ua, zingsang baihtak in galzoute husa nasatak toh thau gin` dupdup kawmin khosung honglut ua, gallu a lak uh tawikawm in khitui naptui toh vaidawnna thupitak om hi.
Khibah a hoih thei penpen, ngawng a ohtheih leh khut leh khe kilawmsak a but theih chiteng in vualtungtuangpa vaidawn ua, khuang leh zaampi tum in laam dupdup uhi. Mihangsan pa`n gaal ai a, niang leh tai in om uhi. Mithupi suahna lampi khat hi a, sihnung tanpha a vualtungtuanna kalbi suaksak uhi. Puanthupi silhsak zawzen uhi.

Zomi Diktak hihna bel, head hunter kihilim akei.