GUH-LE-TANG
By Vungzamuan Valte
Bones ... Guh
Cartilage ... Guhngek
Disc ... Nungjang guh
Nerve ..... Kawlphemei gui,
Tendon .. Guh leh taksa kankhawmtu (thagui),
Tissue .. Taksa
Cervical .. Ngawngguh
Spurs .. Guhdawn
Muscle spasm ... Taksa natna,
Joints .... Guhbawk (guh-kizopna)
Ligament ...Guh-le-guh kizomsaktu/kankhawmtu/lenkiptu
GUH: Mihingte guh in i taksa nasemsak a, tu thei, ding thei leh tang thei in ahon koih hi. Hiai guh kichi piantung apat poihlong deuhse bang om a, guh taak zoulou leh guh ngot chihdan khawng om sese hi. Huaite bel Calcium, Iron, Vitamin etc taksap ziak khawng ahi a, ha-heng, ha-ngot, ha-muat, ha hoihlou ichih khawng guh chikhat ahihziak in taksap nei chihna ahi hi. Bawngpa in ki hoihtak leh hiamtak mai aneih inchu a kisathei a, hat leng ahat petmah a, khenkhat in ki chihtham neilou in bawngpi bangmai in adangte nung zui durhdurh mai uhi.
Guhlam siam ihihlouh ziakin guhnatna lam gen sawm ihi kei a, guh-le-guh kizopna (joints) lam houlim sawm ihizaw hi. Guhkizopna itaksa pumpi ah muntampitak ah om ahi a, huaite’n ahon dingsak thei ua, ahon paisak thei ua, a poimoh petmah mai uhi. I khutzungbom leh khebom maimaite ah leng ataang tampi om ahihna ah machine bangmai in tang-suamsuam thei a, robot abawl chiangun hiai khutzung leh khezung bawl haksa sa mahmah ahi uh chi uhi. Khut leh khe tangte ah i taksa in ointment hoihtak apiaklouh chiangin khauh geugou theisek a, kinuaipuak muatmuat khasek naknak hi. Ngawng kichi i taksa ah poimoh mahmah leuleu a, ingawng in ilu pua ahihna ah vangiktak sun-le-zan a pawden ahihna ah gim thei mahmah mai a, hiai ingawng in guh 7 nei a spine kichi a vertebrae guh in tuam bok hi. I ngawng apat inungjang, ikawng, itawkhal, ingumguh (coccyx) tan Cervical spine, thoracic spine, lower/lumbar spine chidan in kikhen a khaidiat (chain) bangmai in guh kikhil khawm tiltel hi.
SPINE: Hiai spine sung ah ikhuak kiphumgu a, ingawng bul apat ingumguh tanpha spinal cord asung ah om hi, hiai spinal cord in nasep poimohtak mai nei a, itaksa, iguh leh tangte ah message electric current tungtawn in pezungzung mai a, itaksate hingsak in hinna tuihing pia hi. Huchidan mah in ikhutte ah, ingawng apat nerve gui zamkhe sengsung te’n itaksa leh thaguite ah thahatna, theihtheihna te guan a, iguh-le-tangte ahiding bangbang semsak in gamtangsak hi. Tuamah bangin, i khete ah ikawng lak a spine apat nerve gui zamkhe zengzung a, huai nerve te’n i khemawng tanpha control in sisan guizamte ahiding bangbang in nasemsak thei hi. Hiai nerve kichi pen ikhuak a kipan ahi a, imuhna, izakna, itheih theihnate ahunhun in zang ziauziau theiding in itaksa pumpi a control ngai a, huai hithei dingin itaksa kahiang tengteng ah i spine tungtawng in zamsuaksak ngeingoi mai hi. Hiai nerve te ah ikhuak apat electric impulse kichi, ilung apat lamdangtak a hong kibawlkhia kin-gangtak in paisak zolzol den a, nerve omlouhna ah bel current omlou ahimai a, nerve poimoh petmah asuak hi. Nerve ending kichi, inak, ibil, ikhutmuk leh khemukte a sensitive diak a, numei leh pasalte zahmoh bang chu sensitive diakkhol, nerve ending te sukkhak leh hihkhelh khak chiangin nakpitak in napetmah mawk hi.
GUH NATNATE:: Mihingte taksa pumpi bel central nervous system in control vek sipsip ahihna ah, lungphu hoihtakin, sisan siang tungtawn in khuak ah oxygen supply a, khuak in anasep ding asep theihna dingin electrical impulse paisak suausuau a, itaksa pumpi ah kivialleh hehu mai hi. Hiai electrical impulse pen mit hileh, si kihimai dan ahi hi. Hiai electric current a poimoh diakna i taksa kahiangte ah enkhawm in, hiai current paihouhlou te'n itaksa tunga buaina a tuttheih dan leh a kilattheih diakna guhbawk (joints) lak ensin le chidan ihi. Guhnatna chituamtuam tampitak aom ding a, Rheumatoid Arthritis leh Lupus kichite guhbawk natna ahi a, hiaibel immune system paikhialte nasep gilou ahihna ah damdoi a ki-etkol ngai hi. Guh leh guh kisutuah sak a, gawmkhawm mawkmawk a, tangtheilou in fuse mawk thei hi. Osteoarthritis kichi leng upa natna ahi a, khuk, khelpi, khutzung leh ngawng khawng ah omthei hi. Hiai natna bel guhmong tuamtu, guhngek (cartilage) keu gaivek in guh-le-guh kihetsak kha chihna ahi a, nat chihtakpi in na-sa ua, paihoih theilou, dingtang theilou leh nasem theilou in koih mawk thei laizang hi.Huchidan a guhtaang natna in nerve paivelte nasatak in subuai thei a, taksa (muscle) leh sisan-guite anasep ding bangun semsak hoih theilou suak hi. Guhbawk (joints) natna neite athau' leiloi ngial uleh, anat chiangin na-sadiak mahmah mai uhi, a uangdiakte bel surgery bawl or hip/knee replacement bawlhial ngai hihtuak hi. Mihingte a gikluat chiangun guhnatna omnuam se a, aguh leh tangte un pawlzoulou thei a, damsiang vilvel ding bel haksa mahmah hihtuak. GOUT kichi guhnatna chikhat ahi a, khutzung leh khezung khawng ah om nuamse hi. Khepi, khetal, kheme a joints khat peuhpeuh ah om thei mawkmawk a, uric acid itaksa in a piakkhiak tam luat chia koilak hiam a kikholkhawm kha chihdan ahi hi. Uric Acid Crystals kichi, khetal joint a kikhol kha ka theihte bel bai loihloih zou maisam dan ahi ua, nat chihtakpi a na-sa ahi uhi. A natna mun ding enle, muhding om khollou, zuaugen bang hial thei ua, v’ung deuh thithiai a, damdoi nek nek dingdan ahimai hi, hiai gout natna neite bel a kidney lam uh etkai ngailua hikha dingdan ahi uhi, kidney function a hoihlouh chia uric acid tamsak se ahihna ah.
Guh-le-guh (joints) kisuktuahna mun ah a kankhawmtu LIGAMENT kichi thagui khauhtak leh duaipenpun aom hi, hiai ligament in itaksa leh iguh-le-tangte kankhawm ua gakkip uhi. Tuadan hilou hileh, iguh kilong pahpah ding a, kitong lemlum ding a, balancing zong omtheilou ding a, kipai theilou, nasem theilou in ki-om ding hi. Hiai ligamentte suknat khak ahihchiang in ligament tear kichi a, guh le guh kihetkha a natpetmah in na-mawk hi. Lamdangtak in ligament pen repair theih vanglak a, thagui mundang apat lak in zong bawlthak thei zenzen hi.
CERVICAL toh kisai, ngawngguh (vertebrae) natna penbel sensitive diak a natna buaihuai petmah khat suakthei hi. Neck Arthritis kichi Cervical Osteoarthritis achi ua SPONDYLISIS zong chi uhi, hiai natna pen ngawngguh 7 te kikhilkhawm tiktek, kithuap litlet ahihna uah, a kithuapna munte ah sponge dandeuh cushion danin cartilage (guhngek) om hi, hiai guhngek a buaikhak chiangin ngawngguh leh ngawngguh kihetkha ua, nat chihtakpi in na hi. Taksa hatlouh ziak bang, accident ziak bangin om thei a, teknatna leng kichi hi. Pilvanglou tak a omkhak ziak bang, kimawlmite a kisukkhak chiang khawng un hiai natna neikha thei ua, arthritis dangte dan in immune system paikhial khate ziak bangin leng omthei veve hi. I taksa a galdoutu in a galdou ding lamhaih kha a iguhngek va nesia in, guh-le-guh va sutuah (fuse) chihna ahi hi. SPONDYLOSIS toh kibangsim ahi ua, theihkhelh khak baihlamtak ahi uhi. Spondylosis inbel ingawngguhte kikar a nerve zamkhia (spinal cord apat) liangkou, nungjang leh khutzung tanpha a nerve gui pai zengzungte a root ah tepkha a, huaimun ah spark kichi eng sengsung, san pempom omsak a, bawk sak leiloi a, deihbang in electric current paisak zoulou sek hi.
NEUNOU GAM: December, 2017 in ngawng natna khat ziakin buaihuai peuhmah mai a, frozen shoulder leh stiff neck (delhkhelh khak) ding sakkhak in aom nilouh hi. Innlam kipai ahi a, Lamka ah ahong nuam kei mahmah mai a, veilong kahih ziakin ha-nawt maimai leng thil haksa asuak hi. Spondylosis in taksa veilam soisa ahihna ah khut deihbang a zat theihlouh chu ahaksa khopmai. New Lamka a tha-zutthei ka zutsak a phatuam teuhlou, Rengkai hanmual gei ah ka zutsak nawn a anuam deuh, tha-natna chimawk dan ahi uhi. Lucknow ka tun phetun Neurosurgeon leh orthologist ka ensak pah a, napetmah ahihna ah MRI sungah ka lut gulgulta mai hi. Thumvei (ngawng, liangkou leh khut) ahon MRI mai uhchu mittui a pawttam khopmai, Taksa tatsak theihlouh chi ua, ikhut lah nalawtel petmah himai, kahkhiak vongvong hial dia hoih ahi. Spondylosis neihchu a haksatdan a theiloute lak a genthaman omlou kachi mai, tut a nuam hilou, din a nuam hilou, lup a nuam hilou, ithazung nat chihtakpi a na mawk, a natna mun muhtheih leng hilou. Ngawng tuamna zat ding, lup tang zetzat ding, exercise lak phallouh, TV et phallouh, tut chia tuttang geugau ding, mobile khoih tamlouh ding, adu ada tam lua...
Vangphathuai takin stage 3 na ahi a, stage 1, 2, 3, 4, 5 tan om ahi hi, stage 4 hileh surgical intervention ngai dingdan ahihchu. Pain relief leh vitamin neurobion khong leltak ahon pia ua, physiotherapy a sukdam ding chi uhi. Life style desease chikhat ahi a, tulai mite’n phone, computer kihahkhoih lua ahihna ah, TV nasan a etdan kipilvang zoulou sawsop, tuate ziak mahmah a ngawng lam in thuakzoulou leng hikha inteh, naupang chikchik khawng physiotherapy poimoh om neunou tampitak ka mukha hi. Khenkhatte bel, gym a body building bawltute kisukhial kha khong ahi ua, kimawlmite tampitak leng physio poimoh aom uhi. Adiakin, nupi lamte nungjang guh na, kawngguh na, leh khukguh na atam mahmah mai ua, physio hih suausuau maidan ahi uhi, Office a nasem ihitangpi ta ua, tutdan remlouchik a tut leiluai, computer mai a kun kheukhou kawm a tusawi leiloi, remchang loupi a mobile mekmek leh, laptop pompom kawmte ihihna uah, ngawngguh in nasapi a thuakkha anahi hi. Tunitan in ka khutpi leh khuttal muk te’n (veilam) ahon hih milmel lai ua, bangtan huchi ding ahia chihbel kithei bun talou hi. Nerve kichi, a impulse a pai dingdan tak a apai theihlouh chiangin i taksa in thuak nak mahmah mai a, muscle spasm chihdan leh khut ling dordor, na velvul, nungjang hon kai nguingui, liangkou kekhe dek hileh kilawm, ngawng lah tang theilou, om heihui chihdan ahi hi, nuam hetkei veh. Tutchil, kikhopna a nungngaihna omlou a tut, YPA tutna a tut chihte chu hithei lou himai, mite lak a mittui aguk a luang saksak di ihih kei ngal leh..
TAWBOU NUAILAM: Tuadan mah in, slip disc kichi zong omthei a, anatdan bel a thuakha loute’n kigenthei lou ding hi, lawmte khat toilet a omlai a dics khat slip kha a, floor ah kizan maidan ahi hi, aw le suak zoulou. Kawng lak ah spondylosis chihdan khat om thei leuleu a, tawbou lak a spine ah nerve zamkhiate a buaisak khak chiangin SCIATIC NERVE kichite natpetmah in na a, SCIATICA chi uhi. Hiai in tawbou langkhat hitsak melmul a, akhenchiangin phim a kisun bangin sun cheuhcheuh zel a, akhe uh tangtheilou leh likzoulou khong in omsak thei hi. Ngawngguhna toh kibang thou ahi a, nerve paiding block ahihna ah a treatment bel physio mah poimoh veve hi. Ngumguh, coccyx bone kichi funny bone dandeuh a tawbul a zum chiucheu ahi a, huaipen bel i spine beina, meibul ahi a, sukkhak ding lauhuaipi khat ahi hi. Ngumguh tattan khate a nuinui ua asi uh kichi hiven, ikhuak toh kizom a, spinal cord beina ahihna ah, kitan leh bel, ikhuak suntou pah chet dingdan ahi hi.
Hiai spondylosis pen bangziak a hong om mawkmawk ahia, lupsiat luat ziak hihiam? Lukham khap sangluat ziak hihiam? Chichi lengle, aziak ding kitheizou tuanlou ding hi, lumse ngeilou, lukham sang kham ngeilou kichi eu-au ding hihang. Kisukkhakna kum 20/30 paita a neikhak ziak leng hithei veve, teknatna chikhat (degenerative disease) ahi a chimawk vial ua, up haksat chilua! Ahia, itaksa kahiang koi-laklak hiam khawngin zaw hon teksan maimah ding ule chu hithei! Mit hatlou kichi khawng bangleng amit uh tekta chihna himai a... Nidang lai a van gik taktak ipuak kukuih ziak hiding hiam, chi-le-lah, daktor in hilou chizel boks ding a. Football kimawl te’n nakpipi in ball a head fongfong ua, angawng uh huchi louzel a, ichih chia, daktor te’n, a ngawng guh uleh a ngawng taksate uh khauh gawp a hat mahmah ahi uh, sek gawp uh ahi, chizel!
Bone spars ziak leng hithei, tissue breakdown ziak leng hithei, lu-gik belbul ingawng in pawden ahihna ah, kepsiam kisin poimoh leh kul hinatel e, anat chiangin ana vongvong telmai a maw !!!
Ponsylosis nei nahi chih hiaite apat atheih khiak theih ding hi:
Ngawng na velvul, ni 2, ni 3 tan a damlou.
Nungjang lam na ngeingui
Liangkou lak hon zen ngeingui
Khut tha na ngeingui, thil hon hihkhial sak peih puih
Khutzung lam hit melmul, hon chip zok zok zel.
A thawidamna ding taktak omkei mahleh, ngawng kaihsak (traction), physiotherapy hoihtak a hihsak, pilvangtak a tut, pilvangtak a lup, pilvangtak a om...kun kheukhou ding hilou, ngawng hekpuak muatmuat ding hilou, samtante ngawng khoihsak mawkmawk ding hilou, achangchang a ngawng exercise zelzel ding...awle...a theiloupi zutsak mawkmawk ke'n...
SUGAR (DIABETES) MAHMAH IN HON THAZOH PENPEN A, SUGAR SANG IN NERVE NATNATE UANGSAK DIAK AHI ACHI UH !