PRIVATE ENTERPRISE KICHI AHI TA MAI A
By Vungzamuan Valte

SINTUAK:
Japante gam a haksat dan theilou I om ding un a gintakhuai kei.
Tuipi’ um kimvel ahi a, ring of fire kichi in tuamkha zawmah lai hi.
Huihpi leh huihsia, taangkaang, zinling, leh cyclone omna gam ahi hi.
Mihing’ neu tingteng leh gumtak mai melpu a om phingphengte’ tenna gam ahi hi.
Poisak luat le neilou hileh uh kilawm napi in, a poimohna mun ah a nuihmai hiuhiau thei laizang uhi.
I kibatna khat uh om hi a ka theih chu, never give up, attitude aneih pen uh hi in ka thei hi.
A gam neihsun uh a it mahmah mai ua, midangte luah ding a phal kei himhim mai uhi.
A pupa te’n a gam leh lei neih sunsun te uh, luhum tawhum in a hum mah ua, Japanese Empire kichi, a puksiat dimdem nung nangawn in, bangchichi hiam in hong khangkhe thak liingliing zelsam uhi.

KUROSHIO:
Hiai thumal pen Japanese ahi a, tuipi a gulpi pai gulgul dan a tui kihawt leh, ocean current khat, Pacific warm Ocean current ahi hi. Pacific tuisuahgiat kichi a lian mahmah mai a, Equator kichi, leitung lailitak leh nisazung ahat mahmah kumkhua namun, Negro melput theih hial namun, Philipine Island khat apat hong kipankhia ahi hi. Tuipi tung ah mual leh guam a omlouh chiangin huih haat mahmah mai a, speed breaker a omlouh chiangin tuipi nasan a hawt in kihawt lumlet vutvut mai hi. LUZON island kichi, tuikulh gam neuchik apat huihpi in Pacific Ocean, sun leh zan in nuai lumlet mai a, kum 1 sungin kha 2 kia huihnung tawldam leltak hi. Hiai huih hattak in tuipi kihawtsak nuanua mai a, leitung kipeu vutvut (Earth’s Rotation) in speed hattak nei ahihna ah, spin zialzial mai hi.
KUROSHIO Ocean Current penin North lam manoh in AMAZON luipi (leitung a lui lianpen) zakhat kigawm khawm chia vel ding tuitampi petmah hawttou in, tuipi lum (warm) hethut Taiwan leh Janpan gam lam ah tuahtou zou hialthok hi. North Pacific warm Ocean Current kichi a, Gulf Stream kichi pen Atlantic Ocean a kipei vutvut toh kibang ahi hi. Hiai warm ocean current in ngasa tampitak piatouhpih nilouh a, Japante a dingin Bonito leh Tuna matna munpi, muntampi ah bawlsak hi. Tuipi kihawt vutvut nuai ah, hiai Kurosio ziakin Japan te’n kum 100 tampi paita sungin mihing simsenglouh te’n nekzonna mu ua, tunitan in fishing vessel lianpipi sangtampi toh tuipi ah nekzong dingin, kumtengin kuankhe lai uhi. Pacific Ocean ichih a thuklam mel tampi ahi a, ngasa a hong phulkhiak hun ding ngak in sun leh zan tawlnga lou in ngak khiukheu sek uhi. Hiai warm ocean current in Japan gamsung ah vuahtui tampitak kesak a, himahleh, tui kipei vutvutte ziakin cyclone kichi tampitak piangsak veve hi.

Huchituk a gam haksa leh lauhuai, huchituk a tuikihawt lumlet vutvut lak a sihding leng laulou hial a nekzong ngapte a thuipi dan uh ginseng louh ding hi. Innovative mah ua, khovel pumpi ah Japanese te bawlsa leh technology kizang duamduam mai hi.

Kuroshio poimoh lou in, I khawgei chin uah tuipi lianpi ichingsak demdum ua, tuikihawt lumlet vutvut khawngte nuai a ngaisa omte mat sawm a kipei ngailou in, hiai tuiching meuhmouh pen a zatdingdan izon khiak ua I zat phattuam ding uh ahi hi.

Hiaithu igen hangin, I tuppen ahi kei hial! Mihing te’n, nektak zonna dingin hangsanna, theihsiamna, thuakzohna leh, I kim I kiang a thil lauhuai pipite khawng apat sin ding nei hile kilawm ichih manthu hi.
Lamka I en a, private Enterprise bawl theihna ding School leh College loungal a vaang mahmah mai.

Lamka te mikhenkhat bangchidan a huchi hauhsak theih mawk ahi duah aw...chih lampang le I sut sawm kei. Laithai ( Gambling) kimawl a zankhua khua a zanhak kumkhua te a hausa lua omlou uhi. A neih sunsunte uh tah mangkik pahpah zel uhi, mi tamlouchik te’n zaw hausak loh khamah unteh. Gam zuak a kipe lawikhat aom ua, sumpi a luak toihtoih thei vanglak ua, zaanglou teng a zuakgai phial ta uhi. Hiai pen nekzonna kip ahi kei. Contract bawl a politiciante toh gamtang zialzial thei I om zek ua, huaite zaw mutpuak bangin a khang huihul mah uhi, ahia, huaidan a sepding om gige thei ahi kei. Ruling lam ahong kikhek ua, alang lang I boh nawn suau suau zel ua, mumal loutak in politics I pei lumlet, lumlet mai uhi. Black market kichi a om zek sam na a, nidang bang hial in a meet lawtel nawn kei, a meet vanglakte chu a hausa kumkhua mai ua hiven, sum peidan siamte!
I kinetuah hehu ua, sumpung hawm in I diang vengvung mai uhi. Huchi’n, a neiloute sisan tawpkang phialphial in sumpung umzoute mah, mihausa ahong hi ua, pay book, pension book, ATM card nasan mangsak in mi tampite sumpung hawmte khut ah a koltangta uhi. Innmun leh, neih sunsunte banda in mihausate khut ah I koltang den tamai ua, a koltang te zawng hulhul, a leitawisak theite pung hulhul. Lamka zaang ah, kah leh hagawina mun kidelhhuan in, singtang lam a giau hulhul ta mai hi. Kineksiat nagam I suaksak ta uhi. Zuzuakte leh number 4 zuakte a hausa pen ahi keihial uhi, a nei zeksam zaw om mah unteh. Chingpi kaap ikichihmuh ua, I kuan souhsouh zel uhi. Lamka chu wild life lamte chiamteh tham hial in I minthang ta ua, a hauhsakpih leng mi 10 apat 20 kikar khawng ki omta ahi di e!

Gam leh nam itna nei I kichi ua, kahpasik inn thupipipi ilam ua, Babel innsang I bawlkhe teltul mai uhi. I kitaitehna hinkhua uh a buaihuai tel mai. Thil dang a heikawi dingdan omlou ahi diam?
Lamka under belly a huaise mahmah mai a, kizuak, drug zuak, khamtheih hihzongsang, guktak laktak, leh kikhemna gam asuak zouta hi.

I gamsung ua mun hoih penpen, Khuga Valley chia I gen minthang, tuipi dimlet nawinawi in I chingsak meuhmouh mai ua, tui I tummang sak hial uhi. Hiai tui dimlet hnerhnur in I gam a dingin bang hamphatna ahon tun a le?
Electric lah pekhe lou, tui dawn ding kiningching lah kinei tuan lou, zanglou a tui luanglut hiauhiau muhding lah om tuan diak lou! A luanna mun om sunsun te lah, cannal chim leh tuilet te’n zanglou tumse gaivek zawmah!
Japan te’ KUROSHIO a hamphatpih dan bek un hamphatpih dingdan ngaihtuah theih hun lawtel ta hi. Electric a piakkhiak sangin naupiang a tam zaw; ichihchih sang un, a zat dingdan lunggel kul lua hi. Fishing lam hahbawl le bang achi dia? Fish culture lam hahbawl le bang achi dia? Tourism leh Adventure sports lam hahbawl le bang achi dia? Speed boat, tuinuai lut (scuba diving) leh a dangdang omthei leh kilawm maw!

Medical lam en le I dinmun a hoih kei, diagnosis lam en le ahoih tuan kei, health care lam ah panlak theihna ding om khamoh lou ding hi. Tunaichin in private clinic leh nursing home banah Health Care lam a training piaktheihna mun khawng I hong thak ua kipahhuai lawtel dan ahi hi. Nektak zonna leh mite a ding a m
nekmuhtheihna kipia ihimai ua, society a dingin thil phatuam tak ahi uhi.

PRIVATE ENTERPRISE:
NGO in haichilh ua, contract I haichilh ua, sumpung hawm I haichilh ua, gam zuak I haichilh ua, samak kap I haichilh ua, gam it danin khenkhat I kineih ua, thil khaam zuak I kichihmuh ua, zuau gen in ei leh ei ikikhem kumkhua mai uhi.

Huaite sangin, bang lam ah kitoudelh theihna leh, nekzonna apiang thei dia? Midangte bangchi’n ka panpih thei dia? Chihdan lungput neih hun lawtel ta ahi hi. Lamka sung ah siatna leh mipite a ding a haksatna piansak kumkhua mai chu, a mipite a dingin chimtakhuaipi leh thuakhaksapi ahi lou thei kei!

Vaite sang (bread) gaw vengvong nek a nuam kei hial a, pastry lem nek a hautak khop mai. Puri toh singpi khum nguingiu nek gige a damtheih huai pen kei, chih theihna chiang kinei thei ahi ngei ding a, 2012 kum in, sang bawlna munpi bawlkhiak utna lungsim nei ahong om uhi. Pa T. Chinzasawm in, gengen mahleh a pichin louh nilouh ziakin, Tunnu Bakes te’n Mayapuri, New Delhi a sang bawlna khawpi ahon tuahkhiak chiang un hong khangkhe hulhul mai uhi. Quality a om chiangin azuak lam haksa lou a, mite lunggulh leh, mite deihdan a piaktheih ahong hih chiangin, sum muhna hoihtak hong suak thei hi. Huchi in, eisung ah Enterpirise chikhat ahong piangkhia a, muntampi tak ah TUNNU te sang chituam tuam zuakna om teltul ta mai hi. Hiai ahi Private Enterprise ichih. Huchi in, sang bawlkhiak dingdan maimai ban ah, ice cream nasan bawlkhiak dingdan ahon gelkhe pah mai uhi.

Pu T. Chinzasawm in lungge’l khat nei taget zel venchin, Cement Blocks bawlkhiak ding lunggel nilouh hi. Kum tampi a saikak nilouh nungin, TUNGLUT ENTERPRISE kichi bawlkhia a, PAVER CONCRETE BLOCK MAKING MACHINE kichi, Cement zang a concrete Bricks bawlna maisuah khong khong hi. Hiai Machine pen, electric power a paithei ahihna ah, pollution omlou hial in leh, sound leh water pollution nasan omlou in bawlkhia hi. A machine pen Horse Power 5 hi a, concrete blocks a bawlkhiakna dingin Hydraulic Technology zangin Pressure tonne 90 pia a, concrete/cement block/brick sah belbul, khin nelnul, leh akil teng maam pekpok pawtkhia hi. Fire Brick pangngai sangin a hoih zaw diam ichihleh, a touzawtham ding chi hi. Huaite banah, fire bricks te sawi leiloi, kawi lenglong, a sahdan le kibanglou om nakkhem ahihna ah, azat haksa a, kilawm hak mahmah ahi chi hi. Huai concrete block pen, a sahdan, a gikdan, a akil 4 teng amam dan kibang vek sipsip ahihna a, inn bawlna dingin zat nuam mahmah ahi chi a, akil kituak rem lou chih omlou, leh plaster sese ngailou a paint mai theih ahihdan gen zawmah hi. Ton 90 in a press ahi a, cement leh sand proportion huntawktak a I piak naknak leh, huchimai a kiphelkham thei ding hilou ahi chi a, akilneng hekkhe nengnung leng omlou ngei ngut hi. Tui tampi poimoh ahihna ah, ni 3 apat ni 7 tan tui a buak gige poimoh a, a seasoning taktak chiangin khauh mahmah geugou ahihdan ka va mukha a, chinchituak sa mahmah ing. Inn bawl zoh tei hun ding ahon ngaklah sak hial hi.

Hiai Concrete/Cement Block making machine in Pavement blocks kichi nalh taktak, design tuamtuam bawlkhe thei bok a, lungluthuai mahmah mai hi.Ka inn kongtual ah pavement block 2012 in ka phahsak dek lai in, Lamka leh Imphal ah aom kei a, Pu Chhuanawm in Dimapur apat ahon puaktunsak hial hi. Tunitan in innkong tual sung teng siangthou takin a om heuhau ua, kongtual nuam tuan mahmah mai hi. Pavement Blocks kichi khawpi ah footpath dingin hahzat mahmah mai ua, park pawlam leh sunglam bana ah walking track ding leh mun tuamtuamte nasan ah zang tangpi bok uhi. Parking munte ah zangtangpi ua, khawpi a cheimawi tuan mahmah mai a, singthousak tuanse abang hi. Footpath ding leh Lamnawl alkatara in a tuam khak banlouhnate ah concrete block nalhtak a desigh ahon phahsuak chiang un kilawm tuam mahmah mai a, leivui khu beisak a, khawsung a siangthou sak a, etlawm baih mahmah mai hi.

Concrete/Cement Tiles design tuamtuam zong bawlkhia a, gintak sangin a ngaihtuahna leh a sepkhiakte, mit a I vamuh hial leh, houchik bang mahleh, a product te’n quality nei mahmah mawk hi. Inn bawl ding lah kinei lou a, kongtual lah ka bawlkhitna sawt ta a, a zatna ding ka zonzon nalam ah, building inn bawl mengmeng utna lungsim ahon guan hial hi. Hollow Bricks pen ka va en khualkhual sek a, nasemtu leh machine in nna asep lai ka tuakkha thei kei a, a specification lam gendingdan ka theikei hi, hiai leng thil hoih mahmah tuh ahih tuak. Dimapur (huai le Gauhati lam apat laksawn) apat inn bawlna ding van I puaksak lutlut pen a hautak dan I theihsa chiat uh hiven, Tunnu Bakes te toh, hiai Concrete blocks/Bricks/Tiles bawlkhiakna pankhetute PRIVATE ENTERPRISE CHITUH PANKHETU AHONG HI MAI DUAM MAW
?

Khaih! Lemon grass leh lamon oil lam toh kisai ahon pankhetu Pu R. Sanga bang kimangngilh dek ta zawzen! Hiai Lemon Oil Extraction Project bang ngialhouh, pu Sanga in amah lunglutna, kipiakzohna leh, kisinkhiakna te ziak liauliau a piangkhia ahi hi. Pearson khawkhung a lemon grass plantation, Singngat a Lemon Grass plantation, processing, marketing etc tengteng tungtawn in mihing/sungkuan bangzahta in nekmuhna in zang uhiam? Ana kansui mai le uchin maw!

TAM SEM SEM LENG ANUAM HI