HAICHILH
By Vungzamuan Valte

Obsession ichih pen eipau in haipih/haichilh kichi thei ding hi. Compulsive Obsession ichih chiangin haichilh takmeuh, a ahin a hinpih chihna leh alou a omtheilou chihna dan in koih theih leuleu ding hi.

NNASEP HAICHILH: Nasep haichilh kichi om ua huaibel workaholic chi thepthup uhi. Nna semsem mai, sepzoh chih ni om mahmah louhial, mite sang a nnasep tha-it zaw leh sep ding tasamlou te genna ahi hi. Pa rem hrelou pa talhah, chihdan deuh in rem/lem theilou ten semsem tangpi ua, sem zou pahpah theilou ua, mite sangin semgim zawtham sek uhi. Tuate nnasep haichilh ichi thei ding a, himahleh, sepding theilou a mawk om henhuan a om thau em um te sangin chu ahoih zaw himhim. Aziak bel, nna semsem a, a nnasep a tha-it ngoihngoih chiangin thildang ngaihtuah manlou tangpi hi. Hun awl neilou ahihna ah vialvak tam lou a, midangte leng gense tamlou naknak hi. "An idle mind is the devil's workshop" kichi pen theiphaban lou a, mite, a kinakbuai kheukhou lai un amah pen ama buai in buai den a, melma zong nei manlou hial hi. Nektak zonna ah, kamzol mahmah leh khuak hat mahmah te sangin a lohching zawtham sek tangpi uhi. Sum neih sunsun kembit tangpi ua, kholak ah mawk paihthang khollou uhi, a poimoh lou a zanglou ahihna uah.

KHUTZUNG KHUTTAANG PUAK KEUH: Mel toh kituak mahmah chia mihing ten i haichilh uh khenkhat om hamtang leuleu hi. Khutzung puaksak ruapruap gige ten Obsession chikhat nei tangpi ua, khutzung avangkim in supuak noknok zel uhi, timepass leh noptuamna pia ahi ngei ding a, zumselna chikhat leng ahi him hi. Thil khatpeuh hihding chiangin kisakkholh nadan in apuak loplop a om masak louh chiangin kipan theilou ua, khenkhat ten alu khong uh pei ngokngok masa ua, angawng khong uh puaksak nguatnguat masa se uhi. Chin zongsat theih mahmah khat ahi hi.

KHUTCHIN NE: Khutchin anek a nekthoh mah bang maimah, kei kei mai, limchi zawzen, chi tuau tuau tel, tuntun tel, ichih omnawn taget hi. Neulai apat mizumthei, a zakzum kichi ten chin in nei naknak ua, a maizum uh selna dingin a khutchin te uh negai phial phial sek uhi. Tuadan a ommoh te kha Compulsive disorder chikhat suak thei a, hoihtak a kichilna hiam, tawpsan tupna lungsim a omlouh chiangin buaihuaipi khat suakthei hi. Khutchin ann dia set sawm mah bang thei ua, haichilh hialthok ua, mite mitmuh in kilawm hetlou suak thei laizang hi.

HA HOLH: Khenkhat ten ann nekkham chiangin ha-kar dawt dawt sek uhi. Hakar ah annneng mehneng tangthei mah ahi, a dawt zongsang ten a ha kar uh dawt vang seusuau sek ua, hakar a taang di tam semsem thei hi. Ching zongsang ua, haichilh hialthok sek uhi. Mi lak khong ah aha uh chip/tepging tuptup sek ua, hihging chukchuk sek zawmah uhi. A namsiat dingdan, a uih dingdan lah theihsa, akhut khong un khoih laitei ua, nam zawmah lai uhi. Obsession chikhat ahi a, chinchi khollou, lah aguk a hih checheuh dingchi ahi hi.

HIH SUKSUK: Khenkhat te khutguh singpuak roprop, mit siai suksuk chih om leuleu uhi. Awl awl a hong kipan ahia, a hoihlouh dan thei ten topsan pahlian thei ua, a haichilh ten zongsang hial ua, nuam sakthoh maimah uhi. A hihfuh deuh chiang khong un lungkim mahmah laitei uhi. Thilchin kilawmlou leh chinchi hetlou khat ahi hi.

KEI KEI MAWK: Khenkhat ten kam gei, muk tung, muk nuai keih ching zongsang ua, a om maimai sung un hih zuauzuau sek uhi. Lupkawm leh paikawm nasan in khelikzen in awlmoh deuh mai in amuk langkhat uapat langkhat kei tuah nuaunuau petmah uhi. I keih keih chiangin keih ding om tawntung thei ahihna ah keipat selouh a chidam zawtham hi.

TATGING A LING DOR DOR: Tut maimai kawm a khe tatging keuhkeuh, lingsak dardar, khe pumsawihling zawzawih, zinling tungsak mah bang, khenkhat ki om kha gun hi. Zumselna ahia, obsession asuah chiangin haichilh takpi ua, midangte a dingin nuamlou leh ninhuai asuak thei leuleu hi. Ki et thak thak poimoh ahihna tam semsem hi.

TANGSAK SUAMSUAM: Khepi, khezung tangsak suamsuam tampi ki om taget venchin, omna mun leh khawl tawldamna mun peuh ah, khepi tangsak gagauh, khezung tangsak suamsuam kitam mahmah mai hi. Kidam haksapi khat ahia, haichilh louh ahoih.

VUN NUAI: Khenkhat ten a khut, a khe, a mai, a ngawng, a awm lak ua vun nuai nuai khase sek uhi. Vun inuai chiangin ninlom dandeuh kihuallum tiltel theisek tangpi hi. Chin zongsat baihlampi khat ahi a, haichilh khak theih ahi hi. Obsession asuah chiangin a kilawmlou tantan a gamtat khak theihna atam, pat selouh a damdoi hoihpen ahi hi.

TINGLING FINGURES: Mobile phone a omma in, midang toh i kimuh kawm chiangin khut koihna ding avang mahmah sek a, zahtatna mun ah etding leh etna mun ding theilou in imit vialtai den thei laizang hi. Maisan tuaituai a om theihna atam. Mobile a om nungsang zumselna dingin ki en kha thithe sek tangpi a, kizen mahmah vanglak hi. Ahia, mobile in tingling figures omsak taget zel a, ring pailoupi khong, ring hongpai danin kithei khasek hi. Zumselna danin, sakhau apat kisawkkhia a, en vel vatvat in, koih kik nawn chihdan ahi. Compulsive disorder chikhat piangsak a, a haichilh kha ten midang poimoh lou in mobile kia buaipih taget zel uhi. Houlim a nuamsak kei a, mihing kipolhkhawmna leh sungkhat ki houlimna a buaisak thei hi. Chinchi lawmlawm khol kei, houpih ding omluopi leh message et ding omloupi khong buaipih in mi khemkhem khol kei le. Amun toh kituak loupi in mobile lasuah/gingsak kongkong khol kei le, mansuah luat ding omlou hi. Na trick mi'n hon man lawtel thou uh ahi. Tuali ngial inchouh whatsapp, Twitter, Messenger leh adang dang tamlua hiven, thupina leh kithupisakna dan in paisimta a, nnasepna, nekzonna, laizirna, kilhohna, naudonna, kikhopna, lupnatung leh annhuanna nasan hon tokbuai zou mahmah mai hi. Huaite haichilh a obsessed lup khat ding lauhuaipi ahita.

KEI KEI KEI KIA KICHIHNA: Kei ka omlouh leh piching lou ding ahi chih ngaihdan nei ki om khagun sek a, huai mahni kipoimohsakna in obsession khat hon tun leuleu a, mite a dingin thu buaihuaipi khat atun thei zawmah hi. Kei kichihna lungsim leh mahni kipoimoh koihna lungsim pen i kipiaktawm hitangpi a, mite dawha manban lou a, mite kamsiam theisiam lou a, pumbuai khak theih ahi hi. Nu maizen, kei omlou hileng, achitata uang diak maimah ua, heutu hihna khong kipetawm ziauziau thei takpi uhi. Mahni kipoimoh koihna in mitmialna hon tun thei a, midangte muhdan leh ngaihdan koppih thei lou uhi. Obsession lauhuaipi khat ah a, mite mitmuh in kilawm lou takzet hi. Mipi punkawmna peuhmah ah, sehsa leng hisamlou hinapi in, kei/ken thu ka gen kei leh dik lou ding ahi , chia ngaihdan kiguantawm zok in, thu gen dia ding thithe tampi tak om uhi. Kha hon theihsak peuh chi unchin, kisiamtan suk ziauziau zawmah lai uhi. Ninhuai leh bengseng maimai asuak thei, kidam siam ahoih.

NUNGAK: Nungak haichilh ten lohtak khollou tangpi uhi. Numei hailou in nnasemlou a mawk om nengnuang gige pa neihtak salou hi. Duang vul zen a kuikunguk pa'n a nungak buaipih leh obsessed pih pen a zalmang maimai suak, fantasy khovel a lengden hilhial hi. Pasal tak a omsiam leh ahuntawk lel theite mah numei ten tate papa dingin telzaw thamtham uhi.

MARKETING HAICHILH: Compulsive buying kichi haichilh theih chikhat om leuleu a, van neihlouh ziak leng hisamlou, lah market a paiding a lungtang in a phut a phu tuttut mai, om maimai thei mahmah louhial, chihdan omthei hi. Addiction ichih toh kinaidiak a, lauhuaipi khat ahi veve. Sum neiloupi in le van abat in lei ziauziau ngap ua, siatlohna tuntheihna omdan lauhuaipi khat ahi hi.

SEX: Mi khenkhat sex a obsess omthei ua, haichilh zenin gamsate lungsim neithei zouzen uhi. Gamsa ten huk hun nei ua, tuate bang mahin gamsate toh kilamdang louhial in phututut hileh kilawm in ahuk in huk lumlet thei mawk uhi. Pianpih thil chihding ahi kei a, mihing peuhmah in utna lungtang kineichiat ahihna ah, lungsim thazoh zoulou leh lungsim paikhial khate ahi naknak zaw uhi.

CINEMA/PORN: Cinema et zongsang in haichilh zawzen mi tampi omthei ua, 1970's lai in I gam uah huchidan khagau in sungkuan tampetmah amat khak ziakin suakta zoulou in a tate uh mangthang zouphial uhi. Video parlour haichilh a X rated en kheukhuau papi tampi om ua, VCR ahong tamdeuh tak leh CD player ahong omsuah nung himhim innsung tawng lam aluhta hi. Porn haichilh ten a chintawk theilou tangpi ua, tatkhelhna makaitu lampi hoihtak ahi. Tuchiang chiang inzaw mobile phone apat thunsa leh online a et ziauziau theihna atamta a, thuguk laguk leh selguk omthei nawnlou ahihna ah viral pahpah hi. Whatsapp tungtawn in image leh video namanlou chikchik kikhak sawn hehu ta ua, khangthak te lungsim ah chituh hoihloupi piangsak zenhouh hi. Huchidan te haichilh a internet tungtawn a en thithe thei te obsess naknak ua, omzeneilou haipihna chavaih khat ahi veve. Thil himhim obsessed pih hial tel zaw ahoih lam sangin a selam atam zawsek tangpi hi.

Compulsive Obsessive Disorder nei ten midangte pautuh tuau tuau, kisiangthou sak a kiphiat phiat se, nin neuchik le ngaithei mahmah lou, thei pen kisa, siam pen kisa, midangte muang ngam lou, haksatna hiam damlouhna te khong tawtawrot mut zen a gengen leh tape record a replay thithe bang mai a, gengen mai, gensate lumlet zihzeh etc.

Awle, I houlimna pen Haichilh takmeuh ichih te omdan ahi tangpi. Kivelthak sin le, obsession pen asia hipumlum lou in, haichilh neih ahoihna khenkhat om dingin gintakhuai hi, haichilh deuh lou a thil hoih piang zoulou ahihna ah. Etsakna dingin, Liasim hahkatna lam ah obsessed hial le, lai hahsim luat ziaka sihna tuak hial omlou hiven, chi'n haichilh zou hial in panla leng asia hilou ding hi. Nnasep haichilh leh mohpuaknate theisiam a haichilh pen poi lawmlawm lou ding hi, lohchinna kalbi hoihtak ahih ziakin. Innsung kepna lam haichilh leh tate kepna lam haichilh ten lohchinna ngah nakkhem uhi. Talent tuam nei ichih artist, sportsman, footballer, Musician, painters ... lamte khong siamna tuam neiten haichilh takpi ua, mite ihmut kar in zan bangzah zanhahpih ahi ua, hun, tha leh zung, lungtang etc bangzah seng ahi ua....mi minthangte hinkhua apat ithei vek ding. Sumsinna, sumdawnna ah milohching ichihte sum haichilh a obsessed pih vek ahi uhi. Haipih hial lou in mihing sumsin huchizah lak a va lohchin tuamna ding vang mahmah mai hi. Sun leh zan a sum kia ngaihtuah, sum kia simsim mai, huchia milohching hong suakte i haza pha zenzen keihial. Banghang in, sih leh hin kar a sum zong a sum musuah ahih ziak un, a thawn a hong om mai hilou a, si leh thau polh a zongsuah tute ahih ziak un.

Hitamahleh, compulsive obsession hial zaw disorder chikhat ahi a ahoihlam sangin asiatna tam zawdeuh hi, a lungkhamhuai lampang ahi hi. Lungsim ngaihtuahna apat hong kipan mah ahih chiangin, naktakpi a kisuk ek a control theih ngenta ahi hi.