PAITE TE KUATE AHI UA!
By Vungzamuan Valte, Columnist Zogam.com
 
THUBUL: I pupute kuate` suan le khaak (paai) ahi ua, koi apat hongpai ahi ua, leitung a mihing hiaizah zouzaite lak ah Mongoloid Race ihi, Tibeto-Burman group of languages ah itel … chihdan kaan kisutbun nailou laitel hi. Khuul a piang kichi mai te ihi ua, suidan taangpi ah, China apat lut suk tei kihi ding ahi, chihkan kigenthei nailou lai hi. Yunnan Province apat lutsuk in, Zosuante leh Meitei, Naga, Thai, Ahom, Shan (Burmese), leh adang dang te, hun tuamtuam ah kilut suk zungzung hihtuak hi. Kum zatampi lampi ah zangmang ngei ding ua, asi leh mangthang, leh midang namdangte kiang a omsuak tamtak om ding uhi. Banah, namdang leh sisan kikoppih louh tamtak te toh kilasawn ngei ding un zong gintakhuai hi. Penglam (Chhura) ngei inle Mishmi Nungak Thaironchong zi dingin nei hi.

China a Mishmi leh India a Mishmi te tenna gam kaantan hingei ding ua, Hukawng valley (Chindwin Luinak) ah tuaklut suk in, awlawl in Khampat (Kaley phaizang) lam tungsuk hihtuak mahmah uhi. Gintakthu kia lelmai, achetna omloupi ngenta ahihna ah, Khampat veel hi, I khangthu kipatna dan in suitheih lel lai hi. Hmarte suidan, Dimphai (Dimapur) lak ah khawsa kha ua, Naga ten Akpa lumet a sam met ding utlou in kitaikhia achih uh gintakhuai lou hi, Chin Hills lutna dingin a lampi paidan kituak theilou suak hi. Tuahun lai in pitu nei a pemkhia ahi uhia, Lal chihdan nei ahi uhia, chih le kichian loulai hi.

Paite te a pai pai te, a pem pem te, a pai masate, paih khiak top top te…chihdan khawng a I gen gige pen diklou sakna lianpi ka nei hi. Nam khat ahi chihbel kichian mahmah a. Pau in nam ihihna genchiang mahmah hizaw hi. Paite kampau neitu, paite mi le sa, paite innkuan leh, beh le phung, paite NAM neitu kihi a, I pai pai ziak hiam, pem pem ziak hiam, leh mite` hon paihkhiak dorh dorh ziak hiam a Paite hongpiang mawk hizawlou hi. A bulpi pen zaw, Paite pupate sakhua, nam zia, tawndan, innsung kivaisai dan, inndongta, zu le sa nekdan, kithoidan leh zi le pasal a kineihdan, banah gou le gam kiluahsawn dan, leh min kipiakdan tanpha te`n, I Nam hihna puangkhia khia ahizaw hi.

Paite (Paihte) kichi minlawhna masa muhtheih pen Pu K. Zawla laibu gelh “Mizo Pipute leh An Thlahte Chanchin” kichi laibu pek 9 na ah, “…Khampat chu kum 1000 A.D. ah an thleng a…Khampat bul ah chuan lui a luang a, chu chu a len ve em avangin, Paihte leh Ralte tawngin GUN (lui lian) tiin an vuah a, hei hi ani kan pi leh pu ten Run an tih thin…tin hetih lai hian, lal ropui, Lersia hi a han zin a ni. Liandova te unau inn ah a thleng ta a, sial a pe a, chuta tang chuan an lo langsar in an khaw hausa an ti ta ani.

Heng hlate hian an chanchin chiang zawkin min hrilh thei ang:
1. A na kau hekhuk e, gun titung ah,
Thangtlang leh Hmar pa lu.
2. Ka nau guntui kuamin tai e,
Ka pa`n Phaileng a sat e.
3. A sa a sa tamlou bang e,
Kei kan gen bang gulpui zia kawi e.
4. Buh nai piak a, buhsi nai piak,
Sa nai piak a, a guhbawk nai piak.
5. Ka tawi tawi e, Tawi lem bang lam e,
Ka sumtual ah lentual kawlva bang a lam e,
6. Ka kuanlam in pal siau siau tang,
Ka chiah lam in gun tui a lian.
7. A khuah khuan ka zut ta a,
Gun in lung ah ka zut ta a,
Ka phei gun lungin a do.
8. Gun tungah chawnban a kai,
Ka thai Tawng aw na pam lua hi.
9. Gun ah titi a tam, Than tlang kai ning e,
Than pui tlang ah kai ing, tumthe fak tang e.

Pu K. Zawla in pek 11 na ah hichin gelh sunzom lai hi, “Thuang khat chu an Chhuak a, Nattak kawn ah an kal tlang a….. .thenkhat chuan Thantlang dung hmar lam an pan a, chungho chu Meitei, Ralleng, Mirawng, Thahdo, Paihte, Zo ho leh tlangmi dang an ni…tin hun alo rei deuh a, hmar lam kawtchhuah a kal ta, Paihte nen khan Hualngo chu an inhmu thiam lo va, a zual deuh deuh ta a. Nikhat chu Sihsinga fapa Ralna (Galna) ……Ralna nupui chuan nau chu a hring ta a, ….Chhualawma (Suahlawm) asa ta ani. Kum khat chu an inngeih lo zual leh ta a, Paihte leh Hualngo ho chu an indo ta a. Hualngo ho chuan tleirawl te Chhuahlawma kha an man ta a. Chhuahlawma nupui chuan fa tirah mipa a hring a, sal a an man a lo hmuaktu kha za an tling e, ti in Zahmuaka a sa ta a…..”.

Zahmuaka chu Zadeng, Palian, Thangluah, Thangngur, Rivung, leh Rokhum te unau suangtu ahi. Thangngur tupa chu Sailo ahi hi. Mite hontheihdan leh chiamtehna ah Paite (Paihte) I neukei hial hi, Nam khat mai hilou in Sailo suangtu ihi chih pomna kiptak omta hi. Mite paih paih hiam, a paipai te ihi-laizang kei…

KHANGTHU SUIMITE MUHDAN:
Pu Shing Khaw Khai in agelh “Zo People And Their Culture” pek 12 – 14 tan ah, “The families of Guite and Thawmte are unique in tradition. They are referred to as mang, and are regarded and respected as noble ... that Thuan Khai, the chief of the Lai speakers and the founder of the Lailun –Sunthla settlement, and Song Thu, the chief of the Teddim speakers and the founder of the Chimnuai settlement, were related to such noble families as Guite,Thawmte etc....The Thado migration myth says that there were three great men named Song Thu, Song Za, and Za Hang of whom Song Thu led the migrants of the Teddim group, Song Za led the Falam group, and Za Hang led the Hakha group…according to Gierson, the Northern Zo is represented by the Thados, Suktes, Sihzangs, Raltes and Paites .... ...... in early times, the Teddims were probably referred to as Paite and the Teddim speakers in Manipur, India, adopted this name for their racial designation .... the Teddims called the Falams Poi and the Falams in turn called the Teddims Pai or Paite ....
.......some literary records suggest that the name Pai or Paite was not of local origin. It was, perhaps, the name given before the founding of Chimnuai capital. Yet there is no clan or family which bears the name. It is, therefore, very likely that the founders of Chimnuai had been known or referred to as Paite before their entry into Chin Hills.
The Teddim speaking tribes in the present place were known to outside after the name of name of Vuite, the same name with Guite , who were predominant in Teddim area before the rise of Khanthuam or Sukte family”. Pek 21 ah, “...the Teddims in early times were known to Falam as Paihte and to Lushai as Vuite. It does not matter whether Ngeknguk or Ngengu in the Teddim source, Ngeknguka in the Mizo source was of either Guite or Sihzang, what is certain is that the Sailo family was revered and respected because it was probably believed to have descended from the noble tribe .... What seems most certain is that the name Ngeknguka, the immediate ancestor of the Sailo ruling family, is historically linked to the people known to the outside as Paihte, Vuite, Sihsinga. .......Ngeknguka (in Lushai) once represented a significant figure like a tribal chief of the Paite.”
Gierson in Mr. Davis laigelh a quote na ah, “Duhlien Tong or Duhlien language...the general term that includes all inhabitants of the North Lushei Hills of which the principal sub-divisions are as follows:-

(1)    Dulien or Lushei (2) Mhar (3) Ralte (4) Paite”, chi`ngelh hi.
Dr. B. Lalthangliana, Mizo historian in hichin gelh hi, “......the pedigree of Sailo is traced to Niguite-a, who hands down Ngeknguka and Sihsinga of whom the Sailo family belongs to Sihsinga…”

Lt. Col. J. Shakespear kichi mithupi mahmah khat ahihna bel, eite dinmun leh I minam hihna honsut chiang mahmah khat ahi hi, Mizoram (Lushai Hills), leh Manipur a mohpuakna liantak nei kha ahihna ah, a thusutdan leh a muhdante authentic mahmah a, tunitan in historical, Anthropological, leh Societal values sangtak nei lailai hi.

The Lushei Kuki Clans kichi laibu manphatak a gelh pek 3 na ah, “The existing Lushei chiefs all claim descent from a certain Thangura, who is sometimes said to have sprung from the union of a Burman with a Paihte women, but, according to the Paihtes, the Lusheis are descended from Boklua, and illegitimate son of the Paihte chief Ngeknguka………… the North of the country was occupied by the Sukte, Paihte and Thado clans. These appear to have been firmly established….” Pek 139 na ah, “…The Paihte or Vuite…This is a clan of some importance still, There are eleven Vuite villages, numbering 877 houses, in south west corner of the Manipur state and two in the adjoining portions of the Lushai Hills ..... The clan is generally known to the Lushais as the Paihtes, but Vuite is the term more commonly used by its members and in Manipur..... my informant tells me that in his father`s time, when the Dongel and the Vuite lived near to each other, the former paid Sathing.......The first Vuite village is said to have been at Chimnuai near to Teddim. The name of the site comes first in the Vuite Sakhua chant, which I obtained in the Lushai Hills...” Chi in gelh hi.

Mizo Society and Customary Practices kichi laibu Brig. C,G. Verghese, VSM leh R.L. Thanzawna (MCS), both retired te gelhna ah, Tribal Structure of Mizoram kichihna pek 35 na ah, “The following are the major tribes of Mizoram, Lushai, Pawi, Hmar, Lakher, Paite (Vuite), Ralte, Chakma, Riang, Thakma”, kichi hi. Hiai laibu pek 101 na ah, “Thangur clan and the Sailo Chiefs chih kigelh hi…. The Paihtes had their first village at Chimnuai, south of Tiddim on the road Tiddim - Mualbem. The name of this place comes first in the Vuite (Paihte) sakhua chant......in the early part of the 16th century, Boklua was believed to have lived in a village called Thangluang .... Boklua was the son of Ngeknguk and Lakiri......... the clan was at war with the Paihtes, who were then living in Thangtlang .....the one from Hualngo tribe who captured young Chhuahlawma had no sons of his own, so he eventually adopted a son and was given a Hualngo-wife. From this union, a son was born who was called Zahmuaka. The Paihtes and Hualngos became friendly, presumably after the birth of Zahmuaka........ .” Pek 111 ah, “Nwites had occupied large villages around the present town of Tiddim. But these villages were subsequently deserted and the Nwites had left Chin Hills and settled down in the southern border areas of Manipur and northeast corner of Lushai Hills. ......the migration of Nwites from Tiddim took place in two groups, one party went north and settled down near Mwelpi, ....the other group migrated to Mizoram and settled down amongst the Lushais….” chi uhi.
I THEIH DING A HOIH MAHMAH BEL, NIDANG LAI IN, I PIPUTE A KIMINLOHNA TE UH LAL/HAUSA NUNGZUI AHIHNA UAH, ZADENG NUNGZUI, PALIAN NUNGZUI, SAILO NUNGZUI, KHANTHUAM SUKTE NUNGZUI, KAMHAU NUNGZUI, GUITE/VUITE NUNGZUI, THADO NUNGZUI ETC IN KICHIAMTEH A, NAM MIN BEL NEI VEVE UHI; PAITE, POI, LUSEI LEH ADANG DANG.

NUNGKIK ZUAL LE: Abul ah lutkik zual le, Kalay leh Khampat kiimlak ah kum tamkuamtak ana khawsa ua, Aupatong tangtung ah kithoina khawng bawlsek uhi. Khenkhatte sutdan in Songrokhum lal thupitak nuai ah namchih khawsa ua, nuamsa mahmah mai ua nektak, khosak, inten, louten bubittak in khawsa uh, chi uhi. Hiai mun ah KUT chituam tuam pankhia ua, sikpui ruoi bangle hiai mun a kipan khia ahi chi uhi. Unau Hmarte sutdan in Lal Chonhmang heu in Khampat pawtsan ua, Vanlaphai tung uh kichi uhi, adik diam a, Khawbung ah asulnung uh muhtheih ding om hi. Khampat a pawtsanna ziak uh chiantak a theihna omlou himahleh, simlam apat lal thupi hongsuak achi ua, Shan lal thupitak gen hidingdan ahi uhi. Aziak bel Kublai Khan in Burma a suasam zeek khitin 1303 vel in pawtkiksan hi. Tuakhit phet in Thailand (Siam) apat Shante lut ua, Burma gam pumtuam gawp uhi, Assam gam tanpha ah Ahom kingdom dinkhia uhi.

Tuaziak in, I pipu ten a laibupi uh ui tuahmangsak kha himahle uh, a gelhthoh omlou ahihna ah, Shan kumpi in Kalay fort thupitak kum 1400 A.D. lakvel in bawlpan ahihna ah, hiai thu pansan in, I pipu ten Khampat a pawtsan hun uh early 15th century A.D. hingei ding hi. Folk tales ah, kulhbang bawl pen hautak lua, haksa lua, ahihdan a genmangmoh uhi, nikhat sungin mihing khut (fingers) kitan, lawh (basket) khat dimzou chitel uhi. Haksa salua ua, sihman` gaihvek sangin chi a, vivivi, lilili, kukuku, khukbak eh! chia kikhohkhia hihtuak uhi.
Heutu nei a taikhia hihtuak ua, Leng thupi Lersia kigen minthang pen hi, Lersia pen ukpipa hileh kilawm a, nam tuamtuam kinai chik chik a tengkhawm hihtuak lai uhi, Liando te unau tangthu ah kichian mahmah lel hi. Hausa nam hikei mah le uh, Lersia vualzawlna ziakin mithupi suak ua, Liando te unau tong hial uhi, A tong masa kichi Dahpa pen mihing hia, dawi… chih kichianlou ahihna ah, sut chilou suak hi, himahleh Lusei suangtu danin Hualngo ten sui ua Thlapa chi uhi. Seipui ah Hualngote, Lusei namte kiseklut ua, Seipui Khur chi uhi, Lusei min a pianna hiai Eden huan ahi hi. Suaipui ah Pawite kiseklut ua, Lailun ah kitawl khenawn ua, Pawite te pianna Lailun puk kichi leuleu hi.

Hmarte bel paisuak uh chih igen ta. Pupu Songthu (Chawngthu) kichi lamkaipu khat nungzui in lawi khat ten Chimnuai khua sat ua, Paite te nursery (Eden huan) chihtheih thok ding hi. A piangmasa kituhna khawvel ahi a, Thahdo, Ningui, Dongul, Hankip, Kipgin te kituh masapen ua, folk tales tampitak piangkhesak uhi. Aisan gam, Aisan lui, Aisante nupa chih khawng gen nak mahmah ua, Songthu in a sanggamnu Nemnep (Nembuk) toh ta nei (a khen ten a meinu Tawichin toh chi), Gelsing hawm a nizung in aktui apat naungek keuhsak, nigui zuite, Nemnep mangthupi genmangmoh, chih toh bang toh. Thado pen a thahat in, galhat in, vaihawm siam in, huchia amin hongthang ahi hi, Thalun tapa ahia, Thalun in a zi tusual amuhleh, tukkilh in denglum chih bang om hial hi. Nigui (Ningui) hong khanglian a, vaihawmsiam khat suak in thuneihna mitampite tung ah nei ahi chih muhtheih in om hi.
 
A suan leh khak (paai) te Guite kichi hihtuak a, a nungzuite zong Guite kichisuk maidan hile uh kilawm hi, Pau zatpen bel Paite pau ahihna ah, tuahun laipek in Paihte te chi`n Luseite leh Pawi ten na minloh khinta uhi. Chimnuai pen Paite pau pianna ahi ngei ding, Liando leh Thanghou te unau ngei leng, Geltui khua a khawsa ahi ua, Geltui pen Chimnuai apat kigamlalou chik ahia, Dimpi, Dimlo chih khawng Paite khua kisaat masate ahi uhi. Unau tangmai tuhte, Khupching leh Ngambawm, Lengtonghoih, Vanglengtanu etc te tua hunlai a tangthu piangte ahi ngei ding. Khangthu sutdan in Chawngthu pen Ralte suangtu chi ua, Thado suangtu zong chi ua, Guite suangtu zong chi uhi, ahihleh Sihzang Vaiphei ten Thuantak achih uh toh kibang hilel lou ding hiam? Aziak bel, Boklu, Ngeknguk, Sihsing chia sutlut veve uh hiven, Ngaihte ten zong khul apat pawtkhe masa a sutsut chiang un Taitom chi toh Sonna chi toh kituhbuai laitel hive un, buaina khovel zaw ahi petmah ve, Valte toh Khuptong a piangmasa kituhchu nepte suakta.

A gelhthoh etkak ding omlou, a genchian thei zawsam lah omlou ihihna uah, kamsang kichite gen leh, a gelhke masasa diktang hilel leh kilawm maimah. Banghang a innsung thu sekguk chilchel ding hi-awmtakte khawng, huchitel a thupingaih ihi ua, ichihleh sulsung apat kinanate hile kilawm mahmah hi, tungnun` kituhna khawvel ah kileng a, a piangmasa kou ka hi uh, chi in tunitan dongin unau Thahdo leh unau dangte buailaitel hihang. Abraham suante ziakin tunitan in khawvel a buaisak ichih dandeuh hileh kilawm maw!

Khua thak asat chiang un innkuan bangzah hiam toh inntuan zel ua, Sih omna mun ah unau khenkhat teng uhi, Sihjangte chih hong hi ua, awl in Khawpalva, Khawvaiphei te ah teng ua, huchi in pau le ham hong tuam ta hi, Vaipheite chih asuakta uhi. Unau khenkhat Gang gam ah khosa ua, pau hong tuam deuh zel a, Gangte chih piang dan ahi hi. Unau khenkhat Zoupi ah teng ua, gamngawpi lak leh mualsang tung ahina toh, zou huihsiang hiauhiau omna mun ahihziak in, Zoute chih hongsuak ua, Zou pau a tuam deuh piang leuleu hi. Sainoujang ah sai, (loupa) tam mahmah a, tuamun a tengte Saijangte chih hong hi ua, Teising omna gam a tengte Teijangte chih hong hileuleu nawn uhi. Pu Lianzamang Hauzel in, Ngawn pau piangmasa pen Vaiphei pau hongsuak ahi chi leuleu.

Guite insung baan ah, Thawmte hausa hihna len masate hi leuleu ua, Mangsum Thawmte a thupidan a theilou I om gintak huailou hial hi. Tombingte le hausa hihna len masa khat ahi uhi, Manlunte bel Langza hunin Bumjaang ah lun petmah ua, Sukte hausa a lal ma un khuviau mai uhi. Ngaihte te zong hausa hihna khua neite himahtham uhi. Abiktakin, Chimnuai suakte lak ah, hun hongpaizel a, kum 200 lam bang achin khit nugin, Vaiphei, Thahdo, Gangte, Zoute kizial tuam ua, khaw tuam leh muntuam ah Nam dang suakta uhi. Ralte ten bel Lusei/Hualngo te bel ua, Pawi gaal thuakkhawm neknek uhi. Sihzangte, Teizangte, Guite nungzuite teng teng Paite te chia minloh ahi nginget ua, hun hongpaizel in, pau leh ham ah neuchik chik kibatlouhna ahon tun a mituam leh nam tuam kisakna hongpiang hialthok hi. A hathat te thuneihna ahihziak in, innsung kuan khang bubit leh tanau laina haute mah tungnung zelzel ua, hun tuamtuam ah Hausa hihna leh gam neitu hihna kikhek kawikawi zel hi.

PIANKHIAKNA THEORY KHENKHAT
Khul theory pen a kigen tangpi ahi a khul apat pawtkhe nuanua in, mi tamlawta chia kongkhak ngaktu in akhak ziaka tawm ihi, chite atamzaw kihi a, meipi zap ziaka tawm kisa zong om uhi.

Chhinlung/Sinlung theory atuam lua hilou a Sinlung kichi munkhat apat piangdok hidan a kigente ihi uhi.

Chin theory ah China kumpi CHIN dynasty apat khanggui kichi zouzen pawl kiom hitel in maw.
Zo/Jou/Chou/Sho theory pen Chou dynasty apat kisuilut ut pawlte pansan ahi hi.
Israel theory om leuleu a, tuapen mikhenkhat ten Manasi mimangte kisa in pibawl mahmah leuleu uhi.

HIHNA TUMTA NEI MINAM HIHNA:
Eilawi bel abang theory peuh hitaleh evidence omlou ngenta ahihna ah pomtak khat leng omlou suak hi. I gensa mah bangin, Khampat vela pat kisut thei lelte ihi ua, historian ten research ahon bawl ua, thudik leh laktak ahon muhsuah ma uzaw, Mizote nasan in Khampat baan sutzou nailou ahihna uah, dawmbawl deuh mai ni. Chimnuai suakte ihi ua, ngeina nei a pupa Sabiakdan I bawlkhiakna mun uh ahi hi. Liando leh Thangho te unau tungtawn in SUMTAWNG pusa biakna kipankhia a, hiai pupa paidan penin Paite ihihna chiangtak in taklang hi, midang teng teng in Paite te pusa biakna SUMTAWNG KITHOINA ahi chih pom tinten uhi, taanglaipek apat in. Ton sagoh leh sihnung a khamuanna, Chiaugal luttheihna ding lunggelna, religious cultural foundation Paite te patkhiakna munpi ahi hi.

Khangthu suimite muhdan in Songthu suan, Songza suan, Zahong suan, Songkip suan etc danin khen diudeu mahle uh a chetna taktak omlou leh kibulphuna kiptak (documentary evidence) omlou ahihna ah, pomsiam dan neih kul hi. Bangteng hileh, akua suan hi in akua khakte, leh khanggui hitale, Chimnuai suakte himhim zaw, unau laina ihi vek ua, kitengkhawm a, tawndan khat neite ihihna uah, a kinaidiakte ihi uhi. Sisan a kinai mai hilou in, kitenpolh a kineituahte ihihna uah, I sisan kigawmkhawmta ahipen hi.

Genetic mutation lam suitute muhdan in, nu-le-pa te (couple) sisan a khanggui kiphumgu, hinna zungkai (gene) kilasawn ua, a tate uh 100 ah 50/50 in pesawn uhi, awlawl in I sisan, I pianphung kikhek khek ahizaw hi. Khang sawm nungin ahon suangtute sisan a gene ki mutate naak mahmah dingin gintakhuai a, sa leh gal, suak leh sal a kiman a kineihte (tengkhawm) hive hang, I sisan gui kizommat mahmah ta ding hi.

Tuate ziakin, suan leh khaak a khanggui simna dingin Suantak, Khaute, Baite, Phaltual, Tawtak, Sektak, Lunkim, Thangngeu, Changsan, Doungel, Touthang, Hangman, Manlun, Tungdim, Hanghil, Akgal, Puthil, Tunglut, Chongloi, Hangsing, Kipgen, Haokip, Thado, Sitlhou, Lhouvum, Singsit, Singson, Sitkil, Samte, Malneu, Ngaman, Zawnghil, Kom, Guite, Hauzel, Hanghal, Munluah, Leimang, Dousel, Ngaihte, Sinte, Ngeknguk, Thatzui, Valte, Khuptong, Nivang, Mangpi, Sawmpau, Munthuk (Nunthuk), Doel, Sukte, Zilom, Neihsial, Chiljang, Vahui, Naulak, Langel, Bawmkhai, Kamhau, Khupson, Songput, Zahlang, Vomlang, Taitom, Leivang, Thangsing, Tangpua, Tombing, Gualnam, Guiziam, Luisuk, Neilai, Lamhang, Phutsong, Thawmte, Pante, Thatzui, Thangvup, Neihkhup, Mangzou, Vuphil (Khuphil), Khuaphuai, Guileng, Sianthuam, Khutthuam, Hilsia, Vahil, Kipging, Sum-ai, Lamthang, Dolbak, Biangpi, Bawngmei, Hatzaw, Hatlang, Hangzou, Munsong, Kullai, Kulngen, Shoute, Sona, Zamang, Tonthang, Phaipi, Tungnung, Tolam, Hauhulh, Dousong, Kiltung, Nekgen, Mangkim, Mangte, Zilzem, Dalsong, Zemnei, Dimhang, Hangkawl, Nauzawl, Songngul, Nauzawl, Sawmpau, Buansing, Tonsing, Doulun, Doulam, Douthuk, Siantung, Vualzong, Neihguk leh adang dang simsenglouhte CLAN danin BEH kichi uhi.

Hiai beh chituamtuamte ahong kipatna pentak bel, pipute`n khua khat a saat chiang un, independence puang uhi, nungzui nei ahihna uah amin un khangthu sut pan sek dan hi uhi. Khekhatte gendan in, a Thangsuah zoute`n beh bawlthei ua, a khangthu uh amau khang apat sut ahi chise uhi. Bangteng hileh, a omsate beisak mawk dan lah omkei venchin, a tengkhawm a, mi-khat-sa-khat dan a kiloute leh NAM khat dan a pau chikhat neite mah Paite kichite ihi uhi. Muhdan khat ah hichi hileu leu hi, kuahiam khat in a beh, a phung a sutsut chiangin a theihphak tan ah tawp hi, huchi in koute huaipa ka pu uh ahi, huai suante ka hi uh chidan in pai a, atu atate kiang ah gensawn zel hi, beh (clan) danin hongkilouta uhi.
Etsakna dingin, mi khat kithupisak khat aom hi, ka douteng ka zouta, ka minthang a, ka thunei a, ka lian mahmah chi henla, Tong ong-ong hitaleh, atu ate huaipa minsuang a family tree pai dingdan ahi. Etsakna khat nawn leuleu ah, Goukhothang suan te`n apu uh thupi sa mahmah hile uh, khang bangzah hiam nungin, eh! Kou Goukhawthang suante ka hi ua ka clan uh Goukhothang ahi chi ding uhi. Ensin mah le, Biangtung, Bawmkhai, Buansing, Tonsing, Dolbak, Kiltung, Pante, Phaipi leh adang dangte mihing min hikhollou maithei hi, singmin, buanmin, atung anuai, leh mun khat min khawng la in, tuamun aa tengte, chihdan khawng hihtuak mahmah hi.

Teijangte a tenna minpu hisak hangin, Saijangte a tenna min uh hisak hangin, Lamjangte a tenna innpi min pusak hangin, Lousaute Kailun khawsat minpusak hangin, Bukpite a tenna kua min ut pawsak hangin, Dapzarte a inntung khuhdan uh genna in min pia hangin, Vaal te a pau aw-kaih min pusak hangin, Tedim te a khua min uh pawsak hangin, CHIN chih bel Paite suangkuan ah tellou a, tuisuahgiat gal a tengte min honpiak ahi hi. Sukte kichi pen beh khat min lel hi a, Guite kichi zong sungkuan khat khanggui ahi lel zaw hi, Vuite kichi zong om lai hi.

Khaw min, tenna min leh pau aw-kaih dan tuam zekzek zel ahihna ah, tuadan in paipai lehbel, Singngat, Lamka, Songtal, Kangkap, Saidan, Saikul, Hanship, Bungmual, Thanlon, Mimbung, Kawlbem, Hiangmun, Ngaizawl, Sesong, Nausel, Pearson etc suakte kichi ding hanga, tulel lel a I buainate uh, Teizang, Lamzang, Dapzar, Lousau, Tedim, Dim, Khuasak, Sihjang, Saijang, Bukpi leh adang dangte ahong suahkhiak dan mah un hongsuak khe ding a, mi tuam, suan tuam, kihuituam, tuam teen, pau tuam, koute huchi khachite kahi ua, huaite suanlekhaakte kahi uh, ka pau u`zong tuam ahi, hong kichi zel maithei uhi, PAITE APAT SUAKKHIA BEL HI VEVE.

KHAWSAAT THU LEH LA:
Chimnuai ah Songthu in a naunu Nemnep toh tapa anei chih I gen khinta, tuakhit nungin a zipi toh tapa neinawn leuleu ua Thado suan kipatna ahi hi. Songthu in Chimnuai pawtsan in Chianlai khua, leh Saijang khua te ah teng hi. Guite pen Chimnuai ah khosa a Nigui, Guingen, Guimang, leh Mangsum (Mangsum masa) khang tan Chimnuai ah khawsa uhi. Tuahchiang khang ah pupa tawndan Bangkua sung, sihni phatni, Biakna, Gal vai-sa vai, Tangkou, Upa Vaihawm, Siksek, Siampu, Tou kaina chihte puahpha a Geltui khua ah khawsa hi. Gouvum hunin Kaljang ah khawsa ua, Tonmang hunin Saijang ah Tombing te hausa in pang ua, Dimpi ah Gualnamte hausa in pang uhi. Tua hinlaipek in kidouna neipah hihtuak ua Dimpi pen Tonmang in Gualnamte khut apat suhkhia hi. Guimang hunin Tedim khua sat ua, bualtui ching dimdim amuh chiang un, Tedim chi`n phuak uhi. Vumsum hunin Tedim leh Dimpi khuate ah Hausa hi a, tua hunlai in Phungmang Gualnam in Saizang ah Hausa sem hi.

Khatvei Langhlun Manlun in Thangpum (Vumsum naupa) sal mat in man mawk a, a tatkhiakna dingin dangka pawta nih pia uhi. Langhlun le kipak ahi ngei ding a, mangpha khak kawm in, “simta Zota ka thah louh ka mat louh um sih, Guite Thangpum kong mat in, ka chihmawh hong hu dildel mah ei”, achih leh Thangpum kihei zok in, “na chihmawh na dong hu kisa mah ing, na zi` su ka luk toh kituak lah kei”, chi`n dawng laizang hi. Langhlun hehtakzet ahi di, kikhoh phei puat in Thangpum` sangkil kanlai a kawlzaal khau ah manin innsung lam ah kailut kik hi, buai thak petmah ua, hawmsa, gensa teng hawm louh gen louh suak hen, Thangpum tatkhiakna dingin Takok lam 9 a sau, Sakhi kaang (white) khat, Dopi kha a patung pou khat, Huanghua miksi gawpum a kibawl theikuang dim, chih ahita. Bang chichi hiam in chu tankhe thak thei ahihtuak ua. Vumsum nau khat Thangpau kichi om hiven, khat vei Vumsum zunezou a ihmu beibai heipi in sat ek mawk a, hazatna lianpi nei hihtuak. Vumsum pen a zi`n a ngawngkawi chiltel ahia, a zi hakpi (sik tau kual lianpi) in a hinna humbit hi, kawlmong amuhphak lai ziakin silou in kep zoh in om a, tuahunlai in Phaipi ten Vumsum kem uhi. Thangpau pen taimang a, Lusei gam ah mangthangta hi. Vumsum tapa Mangpum in Saizang khua lakik leuleu a, Thawmte Mangsum hausa in pangsak hi.

Khang hongpaizel a, Guilun pen ta nih kia nei in sipah leplup hi, Lammang leh Thanggou anu toh meithai tagah asuakta ua, gouluah thu a lungkimlou in anu`n a nawlam Bumzaang Manlunte khua ah nawkikpih mawk hi. Bumjang mite`n Lammang a neulai in a kaihzatha sattan sak ua Khaam/kawl ah sawnkhia uhi, anu`n ngaisiam lou mahmah mai hi. Thanggou hongpiching a azi dingin Manlunte mah anu`n neisak hi, Manlun ten a melma bawl louhna ding ua lunggelna ahi hi, himahleh simmohna liansemsem a, khatvei Thanggou zu-lup in sa goh mawk ua, akgesawn leh puamdum peuh toh zem belbual se uhi, lungsim neitakin a zunek buailaitak un Thanggou innuai ah aguk in kumkhia a, taimang hiau hi. Aigia khua ah teng mahleh lungmuang zoulou in Sialthah lam ah pem nawn leuleu hi. Ngaihte ten gungal ah vakha ua, “Mi` tung a thil hoih hihte vuaksuak ngeilou”, chi`n Thanggou in a khatute kiang ah kipahthu gen hi.
 
Sialthah khua ah khamuan naksangin ahaksatna uh uangzawsem a; nikhat tangval sabeng ten, Thanggou nu lui a kibual lai anik teipi a dawtvang sakin hawkkhiak sak ua, singkung ah taak uhi. Lawmte aw, ka nik honpe kik houh un, achih chiangin uangtat semsem ua, Na su n`ong lak kei leh honpekik kei n`ung chizawmah uhi. Mu nuam teutau nahih vau leh en un, Lammang leh Thanggou ka hinkhiakna hi, chi in a su phenkhum hi. A khawnung in asi toh abang toh om lemlum uh, chi uhi. Khatvei Sialthah hausapu`n Thanggou kiang ah, zawl aw, hih ka pu lamsa, hih ka pa lamsa, hih kei lam; chi`n a khipi neih hoih te, a dakbu neih hoih te, lak lak se hi, Thanggou in zawl aw, nang Neihsial hileltak vechin aw, achih leh tunitan in Neihsial te kichiden uhi.

Ngaihte ten Khuangnung khua saat ua, Munjang saat ua, huchi in a khawnung lamin Lamjang khua Hausa dingin Thanggou chial uhi, huchi in Lamjang ah Hausa thupi hongsuak a, Lamjangpa chih hong hita hi, Lamjang pau hiai khua apat kipan ahi khamoh keihial ding. Awl in, Sialthah hausapu pen Lamjang ah khualzin in vahoh hi, kol ana bunsak beubuai mawk a; heh tinten zaw ahi ngei di. Huchi in a zawlpa aneih le lam kisial sial pa gou neihteng a suhsakta hi. A tapa Summang Lamjang mah ah Hausa hi a, tapa Pumgou, Ampum leh Kailun te nei hi. Pumgou in pupa satsa Tedim gam ah kikhintou a Ampum Hiangjang ah tengsak a, Kailun Lousau ah tengsak hi.

 Munluah te`n Khovong leh Vajang saat ua, Neihsial te`n Tuithang, Sialthah leh Nuamkhua te saat ua, Naulak te`n Dimlo khua saat ua, Sukte te`n Tulsuk, Mualbem, Tonjang etc. sat uhi. Lamjang ah Ngaihte te tengmasa ua, Sialthah a Thanggou aom lai in Hausa dingin chial uhi, Taitom te`n Bumjang a Hausa Langza Khuangnung Hausa dingin chial bok uhi. Thangsing ten Zuangkhua saat ua, huchin Khuangnung ah Khuangnung apat pemkhe nawn ua Ngopa lak ah khosa nawn uhi. Hangluahte khaw saat Salap ahi hi. Nidang lai leh tunintan in Ngaihte ten Hausa hihna khua hau mahmah ua, Hausa gui khat chu ahi himhim uhi. Tangpuate Saijang leh Dimpi ah teng ngei ua, Hausa khawsaattu ahihna u`le om hihtuak. Tedim khua saattu Guimang ahi, khang bangzah hiam akhosak nungun pawtkhiaksan nawn leuleu uhi.

Mangsum Guite hunin Tedim mun leh Tedim Mualsang ah khosa hi. Khanthuam te pata in buaina abawl bawl ziak un Mangsum Guite Tedim apat Kisuankhia a Phatong khua ah kum bangzah hiam tu hi, singtaam a om ziakin Teikhang ah kisuan nawn leuleu a, Teikhang khua Khanthuan in Pawite toh pangkhawm a asimgawp ziakin misi tamlua ahihna uah Teikhang khua nawsia in Mualpi ah Hausa na sem nawn leuleu hi. Thangvup te Phutthang Hauzel te toh Sianphung Sianthuam heute Neihsialte khawmun lui Nuamkhua ah kiseklut uhi, huai apat Sianthuam leh a heute Keijang ah kituan nawn ua, himahleh Mangngul Khelte in vasimgawp a mi 80 tak asih ziakun, Chipui ah Hulian (Palian Lal) va bel uhi, Mizogam a lutna uh ahi a Dapzar min piakin om uhi. Hatzaw te Laihau, Tunjang, Tuangtung, Phaiza leh Tonglawn khuate ah teng deuh uhi. Hatlangte Muizawl ah tengdeuh ua, Thawmte te hauhsakna kichiamteh theipen bel Mangsum Thawmte khanlai a Saijang khua hausa luntak ahi chih.

PEMKHIAKNA LEH DARHZAKNATE:
A omdantak bel, huchia khaw tuamtuam asaat chiang un sungkhat lainate kizui tangpi ua, beh le phung ahi naknak uhi. Zi le pasal a kineih polhte ihi ua, unau laina ngen ihi, tuaziak in ka sanggamte kiang ah, ka beh ka phungte kiang ah, ka pute (nu sanggamte) kiang ah, chidan in kipai kawikawi a, gal lau ngen, gal a kibawl tuah thei jeljelte ihih ziak un, alang alang kidelhtuah hehu hizaw hi. I omna lam lam uah khua le tui mi leh sa hihna kinei zel a huchi in zi leh ta nei in kikhosa hi. Vaiphei khua a tengkha ten Vaiphei pau azang mai ua, Gangte te khua a tengkha ten Gangte pau azang mai ua, Zoute khua a tengkha ten Zou pau azang mai uhi.

Pempina hunbi Khampat ah om hi, tua hunin alompi a kizui khate lompai ua, Lusei, Hmar, Thado, Pawi, Paite etc in kikhen thei ding hi. Chimnuai aa khosa khawm chil chil, unau laina, sisan khat, suan khat himah lehang, Chimnuai ah kikhendarhna thupitak paingkhia ichilou theikei, Babel Innsang lamlai bangmai in kidarh phengphung hial a, pau tuam tuam piangkhe neunou se hi. A gam in azirlouh ziak ahi a, gamhaksa ahih banah, kimuh mengmeng haksa ahihna ah, i omna peuh uah pau ichihte piangkhe maidan ahi uhi. Guite hausa te leh hausa dangdangte zong huham thei ua, liau-le-pan, don-le-khon, api-ake mah tam ahihna ah, kitaisan hun piang mah leng ahi hi. Pempina Chin Hills ah Khanthuam hunin omnawn leuleu a, Thado lam zuikhate Thado lak ah tengden ua, Guite te mahmah zong Thado kulmut tamtak om veve uhi. Sianthuam Sianphung leh Henhong te nung zuikhate bel Luseite toh kinai deuh ahihna uah, chik kha deuh mah ahi uhi, himahleh Paite identity kembit trangtrang uhi.
Kamhau zi Guite tanu ahi, himahleh ahong khanlet ua ahong thupi chiang un kinawktuahna thupitak om hi. Khanthuam toh Kamhau ten Tedim gam, leh Mualbem gam uk ua galhang mahmah ahihna uah Guite nungzuite, Zoute, Vaipheite, Gangte te leh adang dangte kikhintou in Manipur lam, Mizogam lam, Vangai, Tipaimukh leh muntuam tuam ah kithehdarh ta uhi. Mangsum Guite Phaitong apat ahong paikik a Teikhang aluah lai in Guite innpi suasamna nasatak Khanthuam leh Pawite gal ziakin darhzakta uhi, Mualpi tungdorh pawl toh, Seipui naih a tai pawl toh, Sailo lal bel toh, hiai darhzakna in siatpina tunta hi. Ahi, tunitan in Guite kual ichih leh Guite khawk ichih omlai lai hi, Guite kual bel Manipur a eite tenna gam hideuhse a, Guite khawk bel Burma gamsung a eite tenna gambup Tuimui, Serbung, Haichin, Pangmual, Lingthuk, Tongchin, Tualkhing, leh akim-le-kiang a khuate genna ahi hi.
Huchidan in khua a kisaat chiangin khang tampi kitenglou hial hi, kang thak ten luahtou zel ua, sungkuan tuam in hun tuamtuam ah khua kisaat te luah thak zelzel uhi. Chin Hills a tengden te mituam leh suan tuam hithahah louhial uhi.

Manipur te record ah 1877-78 kum in Chin Hills leh Mizogam apat mihing 2000 vaal Manipur ah kilut hihtuak hi, pempina khat chu om ahi ngei dia, kial ziak hia, gal ziak ahi hia, chih bel theihchet hilou lai hi. 1871 in Gokhothang in mihing 900 lamding Sailo gam apat Manipur ah lutpih hi, Manipur lengpa gal mat a mat atuah lai ahi hi.

Mizogam ah buaina lianpi khat Mautam aom ziak leh chi-le-nam a kizialtuamna nasatak aomziak in 1950`s leh 1960`s in pempina nasatak omnawn leuleu hi. Gambuai ziakin 1997 in alehlut pawl ki-om leuleu hi, kipem kual kual tadih lai-zaw ahi pen ve. India apat Chin Hills lehlut pawlbang om zelzel te hihang.

Kidou, kimat, kithah ichihte nidang lai in gam kituh, khua kituh, mihing mahmah kituh, neih-le-lam kituh, numei ziak, kiphasak a la kiphuakkhum ek ziak, phuba lakna dan, leh adang dang ana om tham hi, hitamah leh kichimang hial lou hiven, kidawm bawldeuh aduam maw. Sisan khat ahihna uh mangsaklou ahipeuhmah ding ua apoimoh hunin kihuhtuah zelzel thei vanglak uhi. Meitei leng in Kamhau adou lai in Paite khua-le-tui tengteng pangkhawm ua, Mualpi apat tampitak kuan uhi. Meitei ten Gokhothang a matna ziak khat uh ahileh, a galvan tawite uh Meitei ten theichian mahmah ua, Kamhau toh a kidou lai ua galvan a sukmangthangte uh ahihdan a theihkhiak chiang un thangpai mahmah ahi uhi. Gokhothang Yumphan a suangkulh a taan lai in hutkhiak sawmin Guite makpa Kamhau pen naaktak in pang tham tham hi. Pu Gokhothang makpa Pa Dong-Ai Valte, gim mahmah in tawl mahmah hi, Tedim, Mualpi, Yumphan kikar ah kileh thithe.

Huai Ziakin, Gun-Gal a tengte, Gun-Sung a tengte, kuadang hilou in, eimi veve hihang, hiai anuai a ten taklang semsem:

PAITE PUPA NGEINA
1.    Tapa Upa in nu le pa goukhawm in Inpi ngakte ihi.
2.    Indongta nei a kivaihawmte ihi.
3.    Tousa gou a toukaite ihi (kihih vek nawnlou).
4.    Ki-innbul heelte ihi, Zi neih pasal neihdan kichiantak neite ihi.
5.    Kitenna ah Thaman/tutphah alou theilou a ngaite ihi.
6.    Sanggam numei/tanute khak chiangin Tanu khakna sagoh leh TUN sagoh bawl a saseng pawsak te ihi.
7.    Man kipiak khit chia Sialkhumsa goute ihi.
8.    Pu Zukholh leh pu tawp zu bawlte ihi.
9.    Nau Akmit Etna/Nau minphuahna dan (phuaktu ding etc.) kichiantak neite ihi.
10.    Sih le man thu ah kisongbawl dan leh paidan, kichiantak neite ihi.
11.    Zu hawm/Sa hawm dan kichiantak neite ihi.
12.    Nungak Tangval kihel nam ihi.
13.    Nu leh pa, Pi leh pu, Ni leh gang, U zawte, Nau zawte, sungte, Nawlamte, aneu alian kizahtaktuah kawm a kisapdan kichiantak neite ihi, hei kichi maimai te hilou in.
14.    Kawsah, Langkhet, Si-an-siah neite ihi (Christian suahnung kihih nawnlou sim).
15.    Sa-aih, Gal-aih, Ton neite ihi (Christian suahnung kihih nawnlou).
16.    Pusa Biakna, Kithoina, Zehtang leh adang dang neite ihi (chriatian suahnung kihih nawnlou).
17.    Thu-leh-La lam ah kihausa mahmah mai hi, tangthu kumlui tampitak a tultheilou aneite ihi.
18.    Nau-Oih La hoih taktak tampitak, namdangte sanga tam neite ihi.
19.    Thupil (Ideoms and Phrases) kichi simsenglouh neite ihi.
20.    La Pau khunkhan taktak atul theilou simsenglouh neite ihi.
21.    Pau Upa kichi namdang tampitak in a neih louh uh adim ahaa in kinei hi. Nam piching leh Nam upa ihihna langsak mahmah hi.
22.    La chituam tuam Zangta la, Sannem La, Lawm Ngaih La, Gam Ngaih La, La Tualleng, Zawl La, Sa-aih La, Gal-Aih La, Sisun La, Lengzuang (Lavui), Biakna La, Lengkhawm La, Pathian Ngaih La leh adang dang tampitak neite ihi.
23.    Laam chituam tuam Phiit Laam, Suktuah Laam, Zangta Laam leh adang dang tampitak neite ihi.
24.    Phuisam La, Phuisam Thute, akinei-zah chiamteh senglou Nam ihi.

CONCLUSION:
Tedim gam ah na om hangin Paite vive hi teh, Mizogam a na om hangin Paite vive hi teh, Manipur a na om hangin Paite vive hi teh, koipeuh ah na om hangin hiai atung a pupa tawndan zuite, leh Paite pau toh khanglian nahih naknak leh kimikhual sak ken, na mi le sa te ngek ngek hi uhi. Ki-angtang sak mahmah mai in, a angsung nuam ah, a kawlzaal, a zabawm, a bawmpi lian mahmah hi, a kongkhaak kihong za mahmah hi. Paite hih utlou te bel Paite hih teitei kullou kha ding hi, Tribe Certificate zong phamoh keihial unte. I zin i vak vialvialnate ah thankik bangmai in i rong khek khek selou in, i hihna ah kip tinten le Nam hihna pen khek zualzual theih thil hilou hial hi.

Census Enumeration bawl ahih peuhmah chiangin BEH MIN peuh guanglut neenua kei ni, Paite mah tribe min ah koih tek ni, a milip mahmah i tam leh hoih semsem hi, kisek neuneu lou in. Teijang, Lamjang, Dapzar, Lousau, Vaal, Sihjang, Saijang, Dim, Bukpi leh adang dang aw-kaih ineih hangin Paite sungkuan mah hihang!

Census chiang kia hilou in, PTC bang neibuang sam ihih chiangin Tribe Certificate issue natungtang khawng ah, PTC in panla henla, mumaldeuh a vaisai dan bawlkhiak kilawm mahmah ding hi. Chil chil kawm a nek nek thuah ihih khak ding lauhuaipi suak hi. Manipur leh Mizoram chauh ah Paite recognised hilai tadih ahihna ah State dangte ah zong recognition bawlsak dingdan lunggel kul hi. Hiai Paite identity in Zomi/Mizo ihihna haatsak sem ding a, a daltu hithahah louhial ding hi. Awle! Nam neuneu a kigawmkhawm ten, NAPI bawlkhia ahizaw uhi.

CHIAMTEH DING:
“THE PAITE” kichi laibu Tribal Research Institute, 2011 edition, Aizawl in a bawlkhiak ah Mizogam a Paite beh omte hiaibang in chiamteh hi: Guite, Thawmte, Khuptong, Laingek, Nekngen, Nunthuk, Tunglut, Tangpua, Langel, Hualnam, Bawmkhai, Valte, Kullai, Hauzel, Ngaihte, Sona, Suante, Chiljang, Siahliap, Khuanghau, Dousel, Phaipi, Paukhil, Hangzo, Hangsing, Selman, Hatzaw, Sektak, Tonsing, Tombing, Naulak, Hatlang, Bukpi, Saizang, Lousau, Vualzong, Sihzang, Milun, Zahlang, Lamhau, Shoute, Buansing, Khaute, Suantak, Duhlian, Thangniang, Khupson, Vangteh, Thangngil, Hualte, Genjo, Samte, Vawmlang, Zawngngil, Zo, Zamang, Haukip, Lamkhai, Sukte, Suahsia, Satmun, Vaiphei, Thahdo, Thaute, Thanghau, Hilsia, Hanghal, Sianthuam, Songput, Thangnawk. Paite huapsung ah innsung pau chituam tuam omnawn leuleu a Lamzang, Dapzar, Bukpi, Tuichiap, Losau, Teizang, Sihzang, Dim, Sukte, Saizang te ahi chi hi.