TAGRA RAHO!
~Vanlallian Valte
Leitung ah pangpalek kimuh louh na om sun, Antartica gambuppi sung ah ahi. Butterfly min masa, "flutter by" ahi. Singkhuah, khuah khat in makhai amat lai in zing khat lamnawl ah lom tamtak naang a kikaan khawm; kawng tan vel a chian saang tung ah lawmte toh nilum awi in ka khawl khawm uhi. Kei le mihing khat ka hi. Mihing amah kia a om phallouh ahih gimsi nam panpan houh ka hi diam ah – tuitawi numei khat ka en chim moh hi. Kiangnai ahong tun in ana, "ehm!" leng, hon mukpiik khum vial veh. Candemna paukam toh,"Shaktiman mai-hawk sa a tai bombom na batbat toh!" ka chi taktak mai zaw aw, valh haksa saa hiinte, 'Ak ngaan tu' agen uh mah bang awk-awk tah! Aguuktak a mu pangpalek houh ka hih mel kua a gensiam a suutsiam?
Chikoh! - Galvan tawi tam huntawk nawn vialleh na dia Indian Armed Forces in a zat phatuam pen Shaktiman trucks ahi. Hiai truck te 1959–1996 sungteng Indian Ordnance Factory Board nuai a Vehicle Factory, Jabalpur in unit 75,000 hilhial bawlkhia hi. Shaktiman trucks, Jonga Light Utility Vehicles leh Vahan 1 ton bawlkhiakna 1959 kum in Gun Carriage Factory, Jabalpur ah patkhiak in om. Huai hun lai a Prime Minister Pu Pandit Jawaharlal Nehru in gari bawlkhiak masa hon hong ki-throot khiak mit mahmah in va en. Huai khit 1969 kum in Vehicle Factory, Jabalpur ah bawlkhiakna nasep sutzop in om hi. MANSE of Germany te phalna/licence in Shaktiman truck; Nissan of Japan phalna in Jonga leh Vahan 1 ton bawlkhiak ahi.
MAN suak masa enton in Five ton Shaktiman VFJ 4x4 model kilam hi, Germany in a suktuak MAN-AG components te zang in kilemkhawm. Bawlkhiakna lam hahbawl a poimoh dungzui in parts/components sutuah diin Indian suppliers te zat kuul ta. Indian Army in hiai Shaktiman trucks tamtham a chah nanung ahihleh 1993 kum in truck 3000 ahia, 1996 kum in ngah bukim hi. 'Shaktiman production line' 2003 in suktawp hita. Shaktiman omsa teng candem gaih phial in om hi. 2009 tan in Shaktiman truck 7000 khawng lel khetching uh. A thakhengtu Ashok Leyland Stallion MK-III (60,000 trucks) leh TATA LPTA 713 4x4s (28,000) ahi. Stallion MK-III te zong MK-IV in khengkhe sawn hi.
Ni khat, 'Kandem' chih thumal bang genna hi a, ahong kipatna koisan hi diing hiam chih zong in ka phili hi. London khokiang ah Candem Town a om lam ka thei ta, himahleh kei 'kandem' theihchet nop to kituak lou hi. Huaiziakin, "Cancel leh condem thumal vuahtuak a 'candem' chi hi ni" – hon chi sak. India Army te gari zatte: Class-I, II, II, IV, V & VI vehicle ahi. A thakset te Class-I; huai khit in II, III, leh IV ahia, Class-V Army surplus vehicle – puahphat taak, nidang a ex-servicemen leh widow te a piak te uh ahi. Class-VI te bel, 'hinawn mahmah lou' chia auction a azuakte uh ahi. "Gari kandem."
A zing nawn in ka lungsim boycott chihtak in hong BOYCOTT nawn: Ireland gam, County Mayo, Ballinrobe kiang, Lough Mask House a khosa gamneitu Lord Erne in Irish Land War hun lai a land agent dia a guan Captain Charles Boycott min kipan a hong piang khia thumal 'boycott' pen English pau hong suak hi. 1880 kum in louhaai piang aginat louh man in, Lord Erne in leisaapman 10% loubawlmi te diin kiamsak hi. September kha hong hia, gam luah te'n 25% leisaap kiamsak diing ngen a akiphinna uh Lord Erne in nial. Huchiin, Boycott in gamluahtu mi 11 hawlkhiak tum hi. Gam lianpi nei, insung hausatak a khanglian leh land reform agitator leng hi - Charles Stewart Parnell in Ennis khopi a athugenna ah, gam-awng luah tumte tung a thagum zang lou a kuaman amaute kawm lou zaw diin mipi hasuan:
"I wish to point out to you a very much better way – a more Christian and charitable way, which will give the lost man an opportunity of repenting. When a man takes a farm from which another has been evicted, you must shun him on the roadside when you meet him – you must shun him in the streets of the town – you must shun him in the shop – you must shun him on the fair green and in the market place, and even in the place of worship, by leaving him alone, by putting him in moral Coventry, by isolating him from the rest of the country, as if he were the leper of old – you must show him your detestation of the crime he committed."
Hiai ngaihdan Boycott tung ah zatpat a hong in, Irish Land League te etsanna tuak hi. leitual a ngasa om mah bang maimah. Inn le lou a nasemte'n kholsan uh; local businessmen te'n kidorhpih tawpsan; daakpu nasan in laithon pe nuam lou hi. Lou leh huan a hai piangte khawmtu diing omlou. A tawp in Cavan leh Monghan bial a kipan nasemmi 50 kipumpiak uhi. Amaute vengbittu diing: 19th Royal Hussars regiment khat leh Royal Irish Constabulary, 1000 vaal goih in om uhi. Pound 500 man louhai khop na diing in pound 10,000 huu seng uh suak hi. A lawk kei tel mai maw!
TAGRA RAHO: June ni 15, 1941 in Shillong ah Lt. Col Ross Howman in Kekzaak nai lou Assam State venbitna ding leh Japan galkapte nang diing in Assam Regiment ana phutkhia hi. Shillong a Elephant Falls kuam ah first battalion din in ana om. Leitung Galpi Nihna leh tuchiang dong gamsung buainate a anasep thupi uh ban ah Battalion nih - Formidable Fourth & Striking Seventh te Indian Peace Keeping Force(IPKF) min in Sri Lanka ah (1987-1990), leh; Always First, One Five Assam and The Thundering Tenth te tu'n UN Peace Keeping Force, Cambodia (UNTAC), Lebanon (UNIFIL) leh Democratic Republic of the Congo (MONUSCO) mun a ava kholailen thu uh suut sawm ihi kei. Indian Army chiatchiat ah AR te' regimental salutation, "tagra raho" ("stay strong/fit") dangdai mahmah hi. 1960s lai a Commanding Officer (Phamta) Maj. Gen. S.C. Barbora in a naupangte' damtheihna leh kigalgindan, "Tagra ho?" ("are you strong/fit?") chiin kan sek hi. A dawnna uh: "Tagra hai saheb" (I am strong/fit, sir) chih hinawn leuleu lel! Tagra Raho! Unau, hattak leh hansan hon suah phot mai in...
VV'Laidiip/01042017