Thanlon MLA Pu'n A Duh Ankam Tuihaang A Hawp Khelh Thu
By Vanlallian Valte, Zogam.com Columnist
“A Duh Ankam Tuihaang Hawp” chih elhouna kampau, kichohlohna ahi. Etsakna diin, mi kuahiamkhat in deihsaktu thuhilhna ngeingaihlou in gamtaang teitei henla, lohsapna/deihlouh tuak leh, “A duh ankam tuihaang hawp eileltak voi!” chihtheih diing hi. Huan, tuma chin in ka inn uah Delhi Police, SI khat leh Constable nih in numei thoh/sualluihna thubuai toh kisai in hong zong uhi. Ngohtunu theih a eimi pasal pa'n ka Qtr zang le chu himaithei. Moh leh mat hileng bel, tampiin, "Aduh ankam tuihaang hawp kha liap e!" non chih kei taak uah!
Ken, tua kon gennop ahihleh huchilam toh kisai hi khiankhuan lou inchin - ankam tuimawl siangset pen mah hi zaw hi.
MLA pu pen ka pianna tunnu’ nunglamte hizenzenlou ahihmanin, “Pu Gin…” ka chi tuankei dia; kei sanga Krismas lop lenkhopna a zanhak masa leh hak khovak mun zawtham ahihna ah Ginboi chih teutau di lah hi kenchin - Ka sapdan ngeina bang in ‘U Gin’ chih mah zat ahi sin ngala! U Gin in Thanlon MLA tuh dia kisingsa ahihlam aginsak hiauhiau chiil in Thanlon tuamlak a ka puzon (Thangsing) te hauhsakna khuate ah zin kual hih chituak.
Hunpaisa phorhveu hon chi kei hen, amah pat ahi. "Ba’ vote zong in kei phalna tellou a ka sakmin leh ka ‘sak-face’ zang a ka puzonte va "midanglou" bawl hihiam? Theihsiam baihlam na diin - kisuk popular na dia hon minloh ahipen mai. Apoisekei! ka tangval lai a khuh-damdawi-miuzik ngaihnopna; tuilum hon duhsak den; aak puuldi kuan bangmai a mitsit duauduau theihna te leina dia 8 rupis ka thunglaak toh kimai sak suk le himai! Vondeih nihgel pupu veh a zin te bang rupis one hundred tuak petoih zawmah.
Kalkat khopi a ka tenkhoplai uh, asepna kipan a khaloh a laak masak niin maw voksa limchitak toh hong tung hi. Mawl huan di ankam leidiin hon sawl venchin...ken ka 'mission' mangngilh daih. Aduh ankamtuihaang a hawplouh zaw poi sa nawn kei hen, kei le ka pawt haat man in voksa hon gaihsan thou uh - ni bangzahhiam nung a inn tungkiik chih himhim!
Thil omdan: Baihlai thou a’ihchia pawtsuak; Franky Lawmkima Sailo leh Lalmalsawma Colney toh kimu; China nungak (anunu Mizo) hell dia Tram car leh city bus a kuan : tunkuan a taxi laa; kumkhe nuam pah lou; kei houh zahkaai lem peuh ki-neih. Travolta polish ngeilouh (ankamthau nulh-zol) ka bulh a; scarf ok; automatic hilou HMT khutbulh sana bulh… Khaih! Inn tunkiik di kilawphuai kei telmai. Ni 03 nunga le, “Na ankam lei la!” chih hithouthou lai. “Na memory uh le hoih thei vanglak nah e!” chihhuai sim…
Awle, hun leh nite'n ngak neilou a, summer vacation dia inlam pai hong hunta. Bangchipai le ka set diam ah: hapta kaar khat nung a Salt Lake City mah tungkiik buumbuum. Kithakpat nawn; Kalkat-Singngat via Shillong: Brahmaputra luipang ah one night:Shillong ah hapta khat; Barapani chiaugal ah ni khat va ki-huihtheu tadihdih.
Baralpani kipan a km 09 vel a gamla Assam Regiment te camp a va kholaileng; Shillong zuan a khe a pai keuhkeuh teitei; zankim-zankhang hita; Shaktiman leingawi pua hong tai buambuam. Gari a tuangte’n si’kha hon sa uh. Dawi hilou; mihing ka hihlam honchet nung ua hon thawnpuak uh - sehnel nom chepchup puanphah dia zang a Shillong, Police bazar tan tuan chu vot thou!
Shillong a College kaai eilammi khat in Kalkat khopi a degree sin chia hon ‘star’ puak zotzot zawmah...eilahchu-eilahchu! St Edmund College a laisimna sutzop theih didan lampi peuh houlung kum. Wards lake khawng muhlouhna kumkhua a sawtta mah ve seusou chin!
Tun ka tupna mun, Singngat tung bun mawngmawng lou, bang doh-ai hitam? Tunnu'n ana chinat kholoh. Kha khat nung a ka tun leh damchet! Damta hiven chia Mizoram a zinsan nawn. Tomchik zin dia diangdok hizenpi, lingmin gah khawng va taan nilouh taget, huiha!
“U Gin, Thanlon bial a sikul omte nasatak a puahphat; college/high school thak XII tan bekh simtheihna; changkaangtak, library, boarding, music school leh sports institution khawng toh kithuah tundin tum na hihdan velhchet dawl ngellou zaza’ng. Lamka lamte’n le hon zuan supsup diing ua gintaak hinchin, bangtan na tutta? Hiai thei in - na bialsuang, khochih a centre fresh haingiat kumteng a nihvei hawmsuak veu dia na thuchiam na tangtun ke’n zaw : kapuzonte'n gampiak hon tup chinten uh pom diing a, "Uihai Farm" hong bawl ek na vengh!" ...achi-khekhe!