A Banglak Suangtum Le Hipeuhmah Diing Hiam! ~Vanlallian Valte
Tallian Khua kipanin Thanlon lam zuana i hongpai leh Suangpehmun khomual - Maukot’ kichihna mun kitoutun viahviah.  Khomual khang ah kumtawn a kangtat ngeilou luinaak khat Tuivot Lui kichi om hi. Suangphok, kensia leh mun cheknok lak ah luang siahsiah a, luiguam bangle lian suk hiaihiai hi. Sialngiat Zaang lam manoh in luang suk zela, huchiin kawlbaang sangtak nih teptuah kikal  ah kitholh hianhian ta. Amun ah va mu kei mahleng, kawltung a pat galet lel in bel luang khollou a vung diimdemm bang in kilang. A khanglam ah Thanlon gam kipan a hongluang Tuipi Lui sunsuk in Tupi Lui pen, Tallian dainawl, Siiklei ah hong suakkhe-biahbiah.
 
Tallian khua leh Suangpehmun kikal gammaang a hun-awl dakkal 27 vel  ‘ziahziah liailou a’ chen mualsuah zou, 01 Jan 2011 khomuikuan in Suangpehmun Village ka vaak tung khongkhong (Albang Ka Gamman'na Gammaang.) Khosungmi Thangminpau in, “Mualdung zui lou in, kawl kensiat louh deuhna ah kumsuk inla lui palgalkai in hong paitou lechin zaw nai tuam mahmah dia, Painar Camp a hong suak lel di hive’n” chi hi.  “Ahiin lah, ‘HIMAHLEH’ tum lian pipi nih a om.  Khatna ah, tamsawlsa a khoubang a kumsuk leh kaltouh di chih zaw thil kituaklou pi ahi.  Huan, luigal lehlam ah khoubaang suangpek sangtak, tangtak a kibelh zenzon ahia, luigal na kai theihna diing in tuivung km 01 mahmah kawngtum a non paltouh nuapnuap ngai diing ahi.  Chetna om kei mahleh, huai kuamlak ah omkhat om hiin gen uh!” chia hon kupbeh zawmah lai, maizen!
 
Hunpaisa kon gen leh paisa sawnsawn khat phawkkhiak in a om! December ni 18, 2005 in ka zi toh EBC Biakbuuk, Dwarka, New Delhi ah zungbuh mantawm lawmlawmlou tuak ka kibunsak tuah ua; a kumnawn in hon suangtu nu leh pa te’ kitenna golden jubilee lawm ding in Lamka Khopi ka kidenna uhi.  Nikhat, ka puzon leh a lawmpa hong kholaileng ua -Vaigam, phaizaang leh Zodawn a innten-loutenn dan leh khosak zia khawng ka houlim uhi.  Ken, “Ka thu zaak taktak a diam: Tallian gamlak a gamvak innlam zuan Suangpehmun papi khat luipiau, dawp gei ah tutkhawl hi.  Suangtum, lutang chiah vela lian, zawl sim piitpet zawzen khat suangtaat diin enlah a, domkaanga sakhaupi a guan ziau tum mahleh, domkaang zou himhim lou mawk hi!  Taksa kiphut leh duangching, huai suangtum saa lianzaw le liangsuan a inn tut zou pa’n lamdang sa mahmah hi. Lawm di hon zong a, kithakpat ta.

Hong kuan ngeimai ua, ngaidih – suangtum ana mang hiau!  Huai suang in manphatna tak khat houh nei a diam, a kemtu om hi diing hiam? chihtan hon ngaihtuahsak hi.  Gamvakpa kua ahi mawngmawng diam?”  ka chih leh, Pa Thangchinlian in, “Lalpu, kei ka ve le!” chi hi.  Amah tu’n Simveng a Cambridge School kianglak ah khosa lellel.  Upat suak simta mahleh, a thaa kiam lawmlawm nailou hi.
                                                                *****