Kho-Hausa leh Veng - Hausa

Ninglun Hanghal

Lawmte khat in zanlam in anu birthday lopna ah lawm-le-vual, tanau-laina te chial in nasatak in a veng uah lawm hi. Huaihun ah veng dang khat apan a tanau lainate, lawm-le-vual bangjah hiam leng vakihel uhi. Huai ‘vengdang’ apan vakihel te’n a Veng-Hausa pa uh vauna tuak ahih dan uh social media ah hon taklang in, hiloudeuh asak thu gen hi. Hiai lou dangkhat, zanlam zek in solkal in poimoh sak jiak in Lamka khopi a veng tuamtuam ah electric transformer thak phuh ding in list khat suah khia hi. Veng khat a hiai bang thu om takin kipak tak in aveng mipi te ki-volunteer in, sum-le-pai dongkhawm in nasep kipan dia akisak lai un, a kiim a kiang ua teng Veng-Hausa bangjah hiam ten “hausa hihna” suah in, electricity department ah “dotna” ( questioning ) va bawl ua, transformer phuhna nasep nawngkai sak hial hi.

Hiai a kigen te “Veng” ka chih na ahih leh Lamka Khopi leh a sehvel a veng ( colony) tuamtuam a teng tampi omte kigenna ahi. Hun masa lai a, “Khua” kisaat te; etsakna dingin - Hiangtam Lamka, Zenhang Lamka, Songpi, chihte kigen lou in , ‘Veng’ om thakte kigen ahi. Hiai veng te “Khua” himawk lou in, hiai venga Hausa te leng “Veng Hausa” chi leng a dikzaw dingin agintakhuai. Hiai vengte ahih leh ‘migration’ - khopi a pemlut , milip pundungzui a veng hong piang tiltel ahi uh. Huan ah Lamka khopisung a veng igente ahih leh mimal – mahni inn leh lou a tengte ahi ua, mahni inn-le-lou neilou te mi’ innluah a, aluahman pia a teng ahi uh. “Hausa” pa in a veng a ‘saat’ chih theihlouh ahi chi leng khial lawm lawm keileh kilawm.

Khua (Village) ichih chiangin independent entity ahi uh. Mahni kivaihawm, mahni kitoudelh ahi ua, Khua- Village khatin apoimoh nek-le-tak, silh-le-ten kiningching takin kineih ua, khua khat le khua khat kikawm mengmeng lou uhi. Niteng poimoh atam louh mah jiakmah in khua dang ah apoimoh mahmah kia lou ngal kila tuah lou ( tuhun in ki-leituah) uhi. Hausapa Khua-saat ahi a, atengmasa, ana “laaksa” agam leitang ana ‘humsa” ahi hi. Pi-le-Pu ngeina dan in Hausa leh khawnbawl upa vaihawmna nuaiah anaki enkol uhi. Custom-Culture- Identity – Dan leh zuihding hiai “khua” - Village ichih te a pan hong piang khia in “Khua leh a Hausa” te custom-culture identity kembit tu, suhat tu te ahi uh. Mahatma Gandhi in hiaite “Village Republic” ana chi hial in, independent movement ideology and theory te hiai “village republic” te ah ana pansan naak mahmah hi.

Kho-Hausa te pen ‘hereditary’ – kiluah sawm, khang sawn a paisawn ahi a, Hausa nam Hausa-Chi chih bang ana om hi. Hausa vaihawmna pen ( theih khelh ahih keileh) gensiatna ding ana om lou hi. Hausa gilou chih ana om tham maha, kua hiam a khuasung a mikhat leh nih toh bel ana ki “opposition” tham uhi.

Singtang Khua a teng te ahihleh Kho-Hausa nuai ah, inn leh lou bawl in khosa ua, a inn leh loute uh – mimal a hituan lou hi. Kho-Hausa in a mipi te tenna ding, inn-le-lou bawla khosakna ding uh khenkhiak dial dial hi.

Lamka Khopi beel a, khopi kiim–le-kianga tengte ahih leh inn mun a kilei uh ahi tangpi hi. Veng-Hausa in aten na ding uh a thawna apiak ahih agintakhuai kei hi. Mikhat in Inn mun /loumun liantak lei in , tanau a neizoulou deuhte huai khawm in , mantawn deuh in leisak in teng khawm uhi ( khat le nih bel inn mun piak om kha mah in te). Hiate veng hongsuak in hongkhang in ana leimasa hiam atengmasa deuh pa pen a “hausa” hong suak hi. Self Style Hausa chi leng a dik pen maiding diam.

Hill Tribal ( singtangmi) area hihna toh, vaihawmna lampang ah, Hausa nuai a administration pen Paidan- system dan a kizui ahihman in Veng-Hausa a hong poimohin development te Hausa tungtawna -system dana pai ahihman in hiai Veng Hausate lemchang tak hong suak hi.

Tuhun in Hausa vai a kipuakna pen “deih non lou - hoihsa non lou” chih a kigen tam ta mahmah hi. Ajiak tampi om ding in a gintakhuai hi. Hausa vaihawmna pen ahoih pen, adikpen leng ahikei maithei hi. Himah leh langkhat ah, Nam Identity, Nam Hihna ,Nam leh Gam thu ah Hausa vaihawmna pen “bitna leh political survival” khat asuak zel hi. Nam-le-Gam thu ah Hausa vai pen adiak in ei Zosuante ading in “foundation” ahih angai zel hi. Huai lou hi leh igam ichih te pen Hausa gam ahihman in Hausa nei kei leng mangthang thei ding dinmun in om hi.

Ahihleh, Hausa deihlouhna hong piantheihna etkik poimoh leh akilawm hi. Tulai in Hausa chih a pung in apung zelzul mai hi. Adiakin Veng-Hausa tampi omhi. JobCard Hausa chih bang leng chiamnuih thutak in kigen thang mahmah maihi. Hiai ten Kho-Hausa( original) te suniam ua, Hausa chih bang leng chiam nuihna suakta hi.

Development – Khanthouhna a poimoh a, huai ding in vaihawmn a kichian, baihlam, lemchang a poimoh hi. Singtangmite hausa vai a paidan kinei ahih na ah hiai- Khopi a veng om tiltel te Hausa nuai a kipua mah ahi. Himahleh, hiai Veng-Hausate mah development na ding a ‘stumbling block’ khat suak ta uhiam chileng ikhial lawmlawm diam? Hausa ichih pen Power kia ahi kei a - khua-le-tui ading a khantouhna, mipi te a ding a nuamzaw leh sangzaw deuh a khosakna ding poimoh ngaihmi ahih ding uh ahi. Power show, ikiim ikiang ate ngik gige, chihte pen haihuai lua hi. Khopi beel a khosa te’n hiai bang lungsim pua a, ikiim ikiang ate nuamsaklouh ding leh, ikkim ikiang ate hoihna ding deih lou himhim Hausa te ahih ua leh bel, amau vengsung lel hilou in, vengdang te tanpha khantouhna daltu suak uhi.

Lamka khopi beel a nek-le-tak zong akhosa ngen ihihna ah, kiim ikiang a khosa te khosakna bang leng ngaihpoimoh a ngai hi. Singtang Khua bang ahi kei a, Veng-Hausa te theih dia hoih mahmah ahih leh , Veng Khat le Veng khat “Inter dependence” ngen ihi uhi. Gamgi chih bang leng om thei taktak lou ahi- a om ding leng hilou ahi. Veng khat ah mei hong kang leh akiang a veng pen le a mei in hon peh ding ahi chih theih ahoih ding hi.

Singtang khua a, Pi-le-Pu vaihawmna Hausa-Dan pansan a Lamka khopi vaihawm taktak ding ichileh hiai Veng leh VengHausa te Independent taka om masak angai dia, veng dang toh kisukhalou, niteng poimoh ki-latuah lou, ki-lei tuah lou a ikhosak tiltel uh angi masa ding hi. A huchih kei leh, khopi ah van deihlouh paih bang in Hausate hon pai kha ding ua, Lamka ah niin hahsiang a poimoh luat bangin Hausa Hahsiangna neih ding chih a hong pian khiak leh lamdang lou chih ahong ngai maimah diam aw, chih ngaih tuah na hong pianghi.