Deihkibatlouh jiak a lohching theilou ihi diam ?
By Ninglun Hanghal
Khabangzah hiam paita in Assam a Bodoland te MP pa Pu Daimary in Lamka hong pha a, thupithei peen a zahna leh lametna lianpi toh mipi te'n na muak in , public meeting leeng neih ahi. Huai hun ah MP pu in agen mipi te chiamteh peen ahih leh " na deih uh kibang lou" chih a hi. Bang jiak a huai chi hiam ichih chiang in, polam a mi hon et dan a " thu tuam tuam, demand tuam tuam bawl teltul" ki bang hikha diing hi.
A leh lam ah hiai peen 'issue divert' na dan chi khat ahi. Solkal in hichibang "tactics" peen ana zat gige mah ahia, pawl tuam tuam sutuah gige mah ahi. Huan ah MP pa'n hiai a gen theih leh hiai 'tactics' peen mun tuam tuam aleng ana kijang gige mah, eilaka hong ki zat (dek) ding genkholh na in leng laktheih ahi.
Hiai "deih kibanglou" chih peen, bang jiaka hong piang hiam chih leh, deih nget peuh mah khat leeng tangtung lou ahih jiak chileng khial lawm lawm kei leh kilawm. Manipur singtangmite kiphin na , demand bawl te , singnuai leh nuai lou hitaleh, en veng veng leng 'lohching' chih diing om lou bang mawk hi. Lohchingnailou leng ahi thei , himah leh lohching hak lo deuh ihidiam ?
Bang ziltheih a om kha hiam chi in popular demand leh nget te enkik taleng.
Sadar Hills district demand tungtang example hoih tak ahi. Manipur state piching ahong hih in district diing a " ahisa" ahi. Bang jiak a tua district hilou mawk hiam chih ngaih tuah tham ching hi. Tonghen Kipgen, Sadar hills movement a makai pa'n a movement laibu a suah na ah hichiin gen hi. Manipur CM Alimuddin (1972) in a Sadar hills district hih na lop nadiing ah " dak pi" tum ding na gen kei uh chi in kilep khia a , huchi mah bang in Kuki minister te'n a district headquarter leh office mun ding na gel fel kei uh chi in 1997 in CM Nipamacha ki lep khe nawn ( huai kum mah in Imphal east leh west district ki bawl khe hiau hi) . A poimah mah dang khat ahih leh unau Naga ten dal chih tak in na dal uh a , phaijang mite mah in leeng huchi mah bang in . Hiai pen " poilemtang" tak in solkal in " sadar hills' peen district suah na diing in buai na tam pi piang diing chi in tutan district hi thei nai lou suak hi.
Khen khat gen dan in bel hiai peen "DC khat leh SP khat transfer le uh hi mai eive le " chih ahi. Thupi lou chik himah leh 'thupi tak' suak hi. Hak sa lou pi haksa tak suak hi.
Kum 80s lai vel in ATSUM te makaih in sixth schedule demand ana haat mah mah a, District Council election leeng sixth schedule lou a election neih louh diing chi in na ki boycott hial hi, kum 20 sung ving veng. Hiai peen bang jiak loh ching lou ahi diam chih leh, Naga singnuai te'n amau demand peen a 'suk buai khak' ding deih louhna jiak in na dal uh hi. Banah huai hun lai in student movement him him naak tak in solkal in dou hi. Huchi mah bang in Manipur ah leh NE mundang te ah Student movement peen awl awl in hat lou hiai hiai hi.
Hun (timing) I chih peen a poimoh mah mah khat ahi. MNF movement enkik leng a 'huntak in' suveng uh hi. Adangkhat ah Naga ten ahih leh "kial lap lou" chih khat suak uh hi. Kum 20/ 30 lai vel a vaihawm na dan toh tua vaihawm na dan leng ki bang nawn lou leh kibang thei nawnlou ding mah ahi. Hun hoih khah suah chih bang leng omthei.
Kum 50s lai tan vel in "the pen is mightier than the sword" chih ahi. Tu in " the market is mightier than the pen" chih hita hi. Naga te' problem solve na diing angaih tuah na uah zong "market" oriented mahmah diing in gin huai hi. Market ichih pen 'bazaar' hilou in 'liberalization" lam gen na ahi. India in naak tak in suah lam en in sumdawn na hah tak a panlak sawm hi. India in ei malsuah gamte hiai kisum dawn tuah na diing a "alampi" dia ngaih tuah leh hah taka panla lellel. A hoih na leeng om himah leh hiai 'lampi' a tengte hilel mai thei diing dinmun in kiom.
Tulel din mun etin "separate administration " chih ahi. A dang ten 'sixth schedule'. Khen khatin "alternative arrangement'. Hiai teng kia lel in leeng "kituak lou" nget kibang lou chih theih mah ahi.
Separate administration chih peen 'concept' ahi a, singtangmite , atuam in kivaipuak na ka deih uh chih na ahi. Alternative arrangement chih pen ahih leh, NSCN leh solkal kihou na ah Manipur a Naga te a dia lungtung huai lou diing chih theih na om jiak a " thukhit na bawl diing na hih uh leh kou adiing bang hiam hon ngaih tuah sak un" chih na ahi. Hiai te geel a kok kibang mah leh, a uap mipi te leh gam peen neu chik ki bang lou hi.
Sixth schedule peen ahih leh, ahoih lou chih na hilou in, ei (angen tute – civil society te) gen ngai lou phot hi in ka ngaih tuah hi. Kihou a ki "negotiate" chiang a diing dan in ka koih hi. Thukhentu diing te "thukhen" diing peen iva gen ngai lou chi dan kahi. Civil leh non civil, banah traditional institution tuam tuam leh siamsin pawl tuam tuam om ihih na ah, nget pen tuam veng vung maithei. Pauzat leh "press release" suah dan kibang lou maithei. Hiai peen apoilua hi khollou hi. Hiai veng vungte ngaih tuah a 'thukhat laa khat ' hong ngaih tuah khiat diing uh vaihawm dia telching aom te leh, thukhen dia seh aom te' naa diing ahi.Thu khat laa khat ngaihtuah khiat diing peen a nasep ding uh ahi - parliament , assembly, north block chih te a tute adiing in.
A poimoh khat ahih leh civil society ( traditional bodies, student body, numei pawl etc ) te'n dialogue leh 'kihou' na neih diing a solkal phut na neih diing ahi. Kihou na pailel te ( etsakna in KNO leh UPF) leeng pressure piak diing thil poimoh mah mah khat ahi.