Tribals of/in Manipur: Hun nanung ah
By Ninglun Hanghal

Houlim na khenkhat ah, Mizo bus in hon taisan ta, tua Naga bus taikhe dek lel lel, hiai peen le I tuang zok kei leh hon tai san non diing chih dan deuh , chiamnuih thutak a ki houliim na taangpi khat ahi. A dangte ( Naga leh Mizo lou siah) Manipur context ah, a Bus tuan na di omnai lou, om lou diing chih dan deuh hi leh kilawm hi.

Tuhun in Bus chih te om non lou hi. Kum 1980s tan khong in bel solkal in government bus na nei mah ahi. MSRTC ( Manipur state road transport corporation) chih ana om ngei a ( a rong bang leeng a san ahi) tuhun in ki mu non kei hi.

MNF movement hun lai in a tuan na di bus uh bawl sak in na om mah ahi. Eilam ( geographically and politically) Manipur a Zosuante peen "tuangtheilou" "ta theilou" diing in accord na ki sign hi. Huai accord peen na sign kei le uh , tutan a bus diing uh peen na ki bawl lou diing hi. Territorial integrity/ compromise chih zawk diing hia, peen a accord a na kigelh/gen in agreement na kibawl hi. Bangteng hileh , MNF ten a hun tak in agreement na bawl uh hi. Lehlam ah hiai peen Manipur a Zosuan te a diing a leeng hoihna khat om hi. Aziak ahih leh, agreement na bawl kei le uh, Mizogam jong piang lou diing, Manipur Zosuan te jong "buai" hiden diing hi. Tua Naga te din mun bang in ki om diing hi.

Huchi mah bang in Naga te bus diing leng territory peen a compromise kei uh leh a bus tuan na di uh ki bawl lou diing chih ahi. Huai mah jiak in "sovereignty" demand peen negotiation ah tel sak non lou in , Indian constitution nuai ah "kihou" diing in kilem uh hi. Kum 50 val ving veng , a phut nung un leeng tuni tan in a bus diing uh om nai lou hi ( va tuang ut mawk leng leeng).

Ahun leh a context et in Mizo Bus leh Naga Bus ( aom dia gintaak) peen kibang lou hi. Mizogam peen in state na nei nailou in huai peen statehood piak a hong om in buai na hong dai thei hi. Banah, MNF te leh mipi teen lemna leh muan na peen deih tak tak mah in a civil society leh traditional bodies, YMA, church leaders, leh a Chief Minister uh tan in pangkhom vek in , kituak tak in paikhom uh hi. Hiai peen Naga te case a hilou hi. A hun leh context jiak mah hiam , amau kal jiak hiam chih peen ki thei lou in tuni tan in lemna gen thei nailou in muan na leeng om thei lou hi A mau bel ngak nget ngut uh hi. A thu uh leh movement uh peen in jong amau ( Naga te) sung kia hilou in nam dang leh state dang na san su buai vek hi. Tuma kum nga vel sung khong in Manipur Naga ten ( UNC) nuai ah 'alternative arrangement' hon gen uh hi. Hiai peen amau mah leeng Naga Bus ah talou diing chih a ki theih jiak uh ahi, a bus tuan na diing mah leeng a hong kibawl diing leh diing louh ah zong chiang lou uh a hih man in.

Thudang khat non ahih leh, Zeliangrong te'n amau a diing hon gen non uh hi. Rani Gaidinliu kum 100 chinna birth anniversary lopna na sa tak in hon bawl uh hi. Huai ah nidang pek a pan a mau adiing Bus ana ngaih tuah peen uh hon gen thak non uh hi. Rani Gaidinliu peen ahih leh BJP solkal in north east a ginna lam a Hinduism a suk haat ut na jiak un hon thupi bawl/promote uh toh amau ( zeliangrong) te a diing Bus nget na toh hong ki jui in lengchang in hon la non uh hi.

Tukum January 17 in Assam Tribune report ah , Bus thak - political leh administration "community leh ethnic based" in ki bawl non lou diing chih Indian solkal in gen chi hi. Zomi Bus, Kuki Bus chih te peen omthei diing bang lou deuh deuh ta. Banah, tunai in Hindustan Times, January 30, in NSCN leh solkal te kihou na pailel lel ah Nagaland in a mau flag nei diing chih hong om nawn hi. Naga flag hilou in Nagaland flag chih ahi. State khat in federal government nuai ah flag nei thei mah hi. Himah leh Naga te flag hilou in State Flag / Nagaland state flag a hong hi diing hi.

Hichi bang kaal ah, Manipur a singtang mite peen, hun nanung ( political ) lam ah I ding ta hi. Nam Bus hong ki bawl non kei diing a, kua mah Bus tuan na diing hong ki doh nawn kei diing chih a chiang hi. Chih sa mah bang in a hun ( time) leh context peen ki dang tahi.

Tuhun ah ei Manipur Singtang mite'n inn veng te ( Mizoram leh Nagaland) te bel thei mawk lou diing ihi uh chih a chiang hi. Solidarity leh moral support peen thutuam hi in, Politically ah ei singtangmite peen in I Bus tuan na diing uh i bawl ngai ta hi. Hiai bus min peen nam min a hi thei kei diing in , huai jiak in bang a hiam I tuan na diing uh chih ngaih tuah tak tak ngai ta hi. Long sui kipat ngai ta hi. Nam min pai pih diing in a hun in hon peel ta. A nam him him in leeng ei kaal sung mah a buai na I tuak khin tham ta a , tu in leeng hiai mah I buai pih lailai diing uh leh , Manipur singtang mite mah moh suak diing ihi. Eileh ei ki tuisa buah hi diing ihi uh.

Tu in "tribal movement" I kipan ua , ahoih mahmah. Hiai peen in ei manipur singtaangmite lak ah awakening – understating of current context/situation hong om I lam en ahi. Tribal chih pansan lou in political movement peen ei Manipur singtangmite a diing in foundation dang om lou hi. A jiak ahih leh gen sa bang in ahun leh context in pua ahi. Nam pai lou in Tribal chih hiam hill areas , mah pan san leng solkal a diing in leng vaihawm theih na hong om diing hi. Singtaang mi kaal ah leeng ki unau na hong hoih seem diing hi. Tuhun a theih diing khat ahih leh, 50s leh 60s lai leh gaal pi zoh hun lai in "the Pen is Mightier than the Sword" ahi a, tuhun in "Market is mightier than the pen chih ahi". Globalisation, free market hun ah bang chi in igam I humbit thei dia chih a hita. North east pan san in solkal in nasa tak in economic policy bawl hi ( Look East/Act East policy). Hichibang hun ah ei Manipur singtang mite , tawm chik te kikhen zak lai leeng ki mang thang vek thei diing din mun ahi. Solkal adiing in khua khat a inn 100/200 om na development project in a suk siat peen "minor" – collateral damage in ngai lel hi ( etsakna diing in Tipaimukh Dam project ah khua 12 ki sukha / uproot diing chi lel in huai peen a dam bawl topsan na diing in rational sa lou hi)

Huan ah, media lam a kigen naak mahmah a. Tutung buai na ah bel , ken ahih leh media in hon naak theihpih mah mah hi. Ahi a , media peen a "end" hilou in a "means" ahi. Enkiik leng MNF buai lai in media a om kei. National Reporter om sun te leeng "defence correspondent" khong ahi uh. Sepaih te camp khong a va om kawm a report tam lou khong gelh zek lel uh ahi. Media, national Tv bang na om hileh, buai na leeng bei nai lou mai thei ahi. Naga te buai na hih leh , media te leh civil society te'n naak tak in a tang kou pih uh, himah leh tuni tan in a bei tuan kei, huai sang mah in a buai na uh a hong neu deuh deuh.

Singtangmite, eimah nam bing a hin na leh progress om lou diing leh om thei non lou diing chih pen chiang hi, maban ah collective movement suk haat sem a , thu leh la kichian tak nei in paitou zel leng I vek pi in, singtang mite a diing in dam na leh muan na ahong hi zo diing hi.