VOK-AN PIAKNA
By LT Ngaihte
Tulai khovel a bang ci kawngkawng hiam a kigen khanak ahih man in leh lunglen bangle kaithou theisimpi ahihna ah,Vokan-piak toh kisai saulou kikum pak le.
Vok kici invulh ganhing laklak a fellou pen leh anin pen ahi. Thilsui mite gen dan in, akhosakna leh ngaihtuahna et in, ganhing laklak a mihing toh kinaih pen ci uhi. Theihsiam huaipi kasa. Nekdi om leh nene, gilvahtak a anek khitcia ihmu huthut zel, ihmut cia le nakging huhu zawmah ganhing ahi. Nupa kipolhna lam ah leng maimai lou ahi ua,talehnau bang leng hauthei mahmah khat ahi uh. Vok icih a let zohpeuh uleh hoih ahi mai uh. Asanek di leh zuak di ahih lel man un. Ci hoih te suan te asuangtu bang a hong lian deuh jel uh ahihman in,voktal lian nei te'n, aci/azang zuak hial uhi.
Voktal khat kiang a voknu dangkhat pepeuh khum lut lehang,hun sawtlou sung in gentam lou in, na pawl zel mai a, huci in api a hong gai a,ta ahon nei hi. Mihing te toh akibatna sawnsawn hikha ding.Vokpi lian in ta khatvei thu in sawm val bang nei khe thei hi.Huaite te kivakna ding in,agil tonsuak ah noi nei seuhsouh a,leitual a kual in,huai te a nou ten tep in kituh vengvung mah uhi. Kholak a adin lain a ngawn in,anou ten anoi va tepsak uh hitang hial hi. Huai kia a vahzoulou ahihman un,nektheih ci tuamtuam zong in,mun kawmbu teng tonsuak doudou uhi.A honglet dung zui un, mihing mah bangin,noi hon ngol ua,amau a kivaktheihna lampi tuamtuam hon zongkhia uhi. Singtang a afavorite gige utuh, mihing ek uih ahi. Namnam masa mah a ne uh ahihman un, auih vilvel te limsa diak uh hihtuak hi. Huai diik theihna ding in nakvang lian tak leh dawktak a nei uhi. Mi adiakin,nupi zingsang a eksuak tak a dainawl manoh te khong a zuih utlamtak uh ahi. Mihing tea bat na sawnsawn uh ici thei diam....
Vok-an piakna pen Vok-kuang mah kicipah lian. Singtum lian ki phelsuah in,alai ki sat kuak,fit 3 tan di bang a sau,konglam inka bul ah kikoih a,tui ziak mah a buannoi sim gige,alei mahmah leng amau utna dia uih sim phial a,an kipe sek ahi. Inkhat a inteknu'n a pe deuh tangpi a,avok te lak a anhai tuamlua om asak ciang in, keupi in alu satsak bik lel hi.Hucia nasa a alu apei kual velsung in,a hatlou zaw ten deihtawk in pan nala ua,na bak thopthop uhi.
Vok-an ding in, ankhing,mehkhing te ban ah,vanbal teh cih khong huanmin zezu hitang pi hi. Zubilh ten zu-ha peuh pia uhi. Athupi na khat uh, nek limlouh cih nei ngei lou in,vokkuang dim tampipi ne gai zou tang hilhial uhi.A lunggulh dantak in Vokpi an nesak le hang,agil in leiphiat ding a,paitheilou ding hitel hi. A thawn apiak ahihnak ua leh duhlouh lai omlou,deih louh lai omlou,nene mai,na maimai hilou,bak a bak thoh,kamgei tuak a let khe zuazua mah a ne uh. Mihing toh akibat na sawnsawn uh ahi jel diam...
Vok-an piak hun theite nupi fel ahi ua, ne ut gige,duh gige ahihman un,sap khawm haksa hetlou uhi. Amin ua sap cih zong om ngei kei.Li-li, Li-li icih leh a hon a hongpai mai khat ahi uh. Nupi khenkhat in Vokkuang a khet ging maimai ule zong,ngaklah tak a na bildoh khinkhian te,lam tomtheipen tawn in hong tai khawm latlat uhi. Vok-an piak lohcinglou cih om lam kithei vet lou hi.Zatna ding- zuak ding hiam goh ding hiam a deih ahihciang un, vok-an hoih deuhdeuh kipia a,a khan-hat na ding un,ki pe mun deuh zawmah hi.
Singtangmi ten, hiai teng lel inle,itheihsiam mahmah uh gintak huai.