Mihoih Te’n Bangmah A Hihlouh Ciang Un ~L.T.Ngaihte
‘Mihoihte’n bangmah ahihlouh ciang un gitlouhna a vualzou’- (All that is necessary for the triump of evil is that good men do nothing) by Edmund Burke.
Hun paisa leh tulel hinkhua a thil hoih leh gilou kisualna hiai atung a Edmund Burke thugen ah amuh theih hi.Tuma hi’n tulai hileh, mihingte lak ah, migilou a ngaih te sang in mihoih a ngaih te a tam zaw gige hi.Huci hina pi’n,a tawmzaw te’n atam zaw te nuaisiah gige a bang hi. Khangthu I et ciang in, atam leh tawm in thu paw gige lou bang mah leh,a hoih a ngaih te’n hoih asak uh semkhe ngeilou uhi. Hiai tuni a ei taangmi te lak a leng problem lianpen khat ahi. Bible pansan in enle hang,agintak huai sem ding:
THILHOIH BANGMAH A SEEM KHE KEI UH:
Mihoih te’n bangmah ahih louh chiang un, nahoih bangmah sepkhiak ahi ngei kei.Hoih hihna taktak din, nahoih sep a poimoh hi.Pathian in a mite nahoih sem din a deih (Luk 6:35; Eph 2:10). Kris in tatlekna tengteng akipan a hon tatkhiak a, ci teltuam, thilhoih hih a phatuamngai, amah ading a ahon hihsiangthou theihna ding in,I sik un akipia hi (Tita 2:14).
Talent gentehna thu ah, Jesun,mikhat bangmah hihlou a gen. Apu a pan sum amuh in, ‘...a pai a,lei a tou a,huai sum tuh a seel ta hi’(Math 25:18). A pu hong kik takin,huai asum phum ava toukhia a,ape kik hi. Ciamtehtuak tuh, hiai pa’n thilhoihlou hih a,asum na zang thang hiam ahi het kei a,ahihziak in lah,hiai sum zang in thilhoih khat leng ana hih tuan kei. Bangmah ahihpih louh ziak in,bangmah leng amu kei. Huaiziakin, Jesu’n ‘sikha gilou leh zongjaw’ aci hi.
Leodicea saptuam te kiang ah, Jesu’n bang a gen a ? Na thilhih te ka thei, lum lah lum louin na om a; na lum leh lum inla,na vot leh vot vanglak lecin ! Lum lah lum lou, vot lah vot lou a na om pelhpulh ziakin,ka kam akipanin kon sekhe ding. Mi genthei, nuamsalou, jawng, mitdel leh vuaktang na hihlam kithei louin, ka hausa, hauhsaknate ka neita, bangmah kakitasam kei na cih ziak in.(Kil 3:15-17)
Kristian tamzaw leh saptuam tampi te le bangmah hihlou atam. A ngaihkhetu leh agaal a entute atam zaw ahi uh. Sepkhiak hoih hong om sunsun ciang in,ana kipahpih sam mah le uh,amau a huai thilhoih hihkhiak tupna anei kei uh.Alehlam ah, thilhoihlou hong tun ciang in,a phunciak hatpen te ahi uh,huai tunlouhna dia panla hi le uh kilawm tak in.
Jesu’n theipi gahsuanglou, anah kia adim amuh in a hamsiat a,theipi kung a vul ngal hi.(Mat 21:19) Mihoih a kingai a thilhoih hih si loute Jesu’n bang cin a ngai dia ? Baptist tu Johan in ‘tua kipan in heipi singbul teng ah a koih ta uh;huciin, sing leh chi gah hoih a gah lou peuhpeuh a phuk ua,mei ah apai lut jel theihna ding un’(Mat 3:10;Joh 15:2) aci.
THILHOIHLOU A VUALTUNG TUANG SAK UH:
Mihoih ten bangmah ahihlouh ciang un,thilhoihlou a vual zou.Huai hi let mai. Setan, khelhna leh migilou te hicia omsak mailouh a, dou ding ahi. Pathian in mihoih te toh a kinai ding uh ahi kei acih baan ah, adoutu a apan di uh ahi aci.
Kristian te kiang ‘mial thilhih gah nei ngeiloute ah panna himhim nei kei unla,pan naksang in adiklouh dan uh theisak zaw un (Eph 5:11) aci.Khelhna leh thilhoih loute dou lou tuh,a om uh hoihsa te ahi uh cihna ahi. A doudal lou siah a hihte toh kibang a ngaih ahi (Eph 5:7).
Elija hunlai in leng, kuamah in bangmah a gen louh ziak un Ahab leh Jezebel in a ut teng uh ahih ua, Elija in kua ahia na zuih ding uh, Pathian hia Baal acih in, kuamah in a dawng kei uh (1Kings 18:21). Thilhoih lou nanglou a, paulou a et maimahna in,migilou leh thildiklou hihte nakpitak in tha pia hi mawk hi.Ei dinmun toh akibat louhna om kei.
Jesu’n khualzin khat suam a om thu a genna (Luka 10:31) I et leh, huai khualzin pa suam a vawte cu mi gilou leh sual hihte ahi ngeitak uh. Ahihziakin, suam a ompa,lamlai a panpih bei a om,Levi te leh Siampu te’n kimuhkhem bawl a lampi gei a apelh maimah pen uh Jesun a haw mahmah hi. Gintaklouh pi in, Samari khua a mikhat,amah kia a pangngam a thilhoih hih a hong omkha ahi zaw. Lamka khawpi khelkhel lou,singtang dawn apan khoneucik apan hi lele,I gam adia Samari mi bang hong piang thei din na gingta hia ?
Jesu’n hici’n agen, ‘Kei lam a pang lou tuh hon dou ahi, a hon lakkhawm pih lou tuh a thehzak ahi’(Mat 12:30) Thil hoihlou douna ah,alailak cih a om kei.Mial leh vak bang ahi.Na dou kei leh apanpih na himai. I pan khak nalam ki ngaihsun le maw...
MI HOIH A SIMTHEIH AHI NAWN KEI UH:
Mihoih in bangmah ahih kei leh,ahoih a sim theih ahi nawn kei. Thil hoihlou va hih khelkhel louhnak leh hoih a kingaihna a om. Kei tellou ci a kisiam tanna a om.Hiai adik kei.Hoihlou ahi cih na theih a leh na dou ding ahi.Na dou kei aleh,nang le ahoihlou lam a pang na hita.Gilou hua inla,thilhoih hih in(1 Pet 3:11).Jacob in hicin agen, ‘thil hoih hih ding thei a,hih tuanlou tuh,mikhial ahi’(Jak 4:17). Geih lel.
Jakob tate lak a upa pen,Reuben in a unau pih ten Joseph thah a sawm lai un,athil hihdek uh hoihlou ahi cih athei.A unaute a kham taktak kei a,thah hial san bel sum a zuak khiak ahi. Huaitan a le kisiamtan lou den in,paulap bawl a kihui khiak a sawm a, sahang in ne ahi ci’n a pa kiang ah agen (Gen. 42:21). Zuau thu paulap a nei.
Jawlnei Obadiah in Edom miten a inveng uh Judate tung a haksatna tung a Jerusalem dou ahih lai a, bangmah hih lou a aet thoh maimah uh nasatak in a moh paih.Pathian in Obadiah ngeingei leng a mohsa a, ‘nang leng amau lak a tel bang in na om’ aci (Obadia 11).
Tuni in leng,kristian hoih leh saptuam makai tamtak te nangawn,melma taktak- thil hoihlou leh diklou, pen tangtak a dou ngam nonlou in om uhi. Huai mohpuakna apan kisiamtan sawm in,a kristian pih leh a seppihte mohsakna leh amau tung a lungkimlouhna na ding zong in,genlehsak tampi om hi.Gilou pen dou zawlou in, abaihlam I kim a seppih te khong tung a lungkim lou cih tam mahmah hi.Hiai hi kilepna,paulam thulimlou leh diklou ahi.Committe sung a lungkimlouhna,ki gensiatna,ki gul etna,kituam khenna cihte.
Sawltak Paul in bang agen a ? ‘Himahleh,na ki keih ua, na kinektuah uleh na kinek gaih louhna ding un,pilvang un’ aci hial hi.Saptuam na sem leh kriatian te bang le eimah kinek gaih theih hi mawk hi.Hucibang tuh ‘khalam sasialne te’ cihna ahi.
THUKHITNA:
‘Khemin om kei un;Pathian zaw zekhema mawkbawl vual ahi kei;min atuh peuh uh huaimah a at nawn ngei ding ahih ziak in’(Gal 6:7) Mi kuapeuh thildiklou kalh lou a,ahi dandan a omsak, ‘kei tellou’ ci a kisiamtan ten,cii lauhhuaitak tuh ahi uh. Phet lou in,Jesu ngaih a,a diklou hihte lam apang hita uhi.Thil diklou leh gilou hihte beisak na ding a bangmah ahihlouh ziak un,a gah a at ngei ding uh.Gamlak mei in a kaat ciang in,sing hoihloute kia akaang kei a,ahoih a gei ua omte leng a kaang veve ngal ua.
Thil diklou lohcing sak ken.Tut sam hithiat in, om san maimai ken. Dingkhia inla mite zakdin gen inla,thil gilou/diklou hihte maituah in,adiklouh na uh theisak in.
(Wayne Greeson thugeen pansan a gelh)
081113