Indian Institute of Defense and Analysis te saina nuai a Home Secretary lui Sri G K Pillai in, amah mah in a telkhiak thupi, ‘Manipur-a way forward’ cih zang a a lecture Youtube a kikhah khia, comment 46 om lak ah, ken comment kana piak pen kia dawnna apia a,kei comment pen: ‘Knowing what to do after retirement may still be regarded as not a bad thing. But what has he done to settle problems of the Northest in general during his chieftainship in the Home Ministry ? It's like a well known saying presence of mind absence of the body for him’ cih ahi a, amah dawnna: ‘every head hunters cannot be satisfied..especially those who come with their own concocted history.. mob culture doesnt define authenticity of history..whats needed is a civilised debate... with no self written gone by..’ cih ahi. Kei comment dawnna apiak sese ziak tuh simtu ten a thei ngal mai un ka ging ta. A simnuam leh ngainuam te a din http://www.youtube.com/user/2410668?feature=em-comment_reply_received ah sim theih gige hi.

Eilawi ki cangkang sak in,Constitution natan theisim kisa le hang le,GOI a Secretary khat in, ‘head hunter’(mithah ding zong) cin hon min loh lel lai ve aw. Kilawm bawl in ki meltheih tateuh lele,I thugen te ‘concocted’(phuahtawm paulam), I kipawl khawmna te ‘mob culture’(mipi buai vengvung te thilhih) maimai in ngai a,hucibangten tangthu picing bawl ngei lou,hon cihsan a,hiam leh pan sang in,hoih deihtak in phatuamngai in ki houlim le,gen nei zaw ding ci hi. Ei kikoihna leh mi hon koihna aki khaih luat ciang in,houlimna tuitak neih theih louh hi.Huaiziak a,I houlimna te uh a kilawmna maimai ngenta petmah na hi hikha ding hi.

Pu Pillai in a gente lak a lungkhoih diak kasak line tuh Manipur khelkhel hilou, North-east politician te a genna ah ‘Minister kuamah gam leh nam khantouhna na dia ngaihdan nei a hong kum kuamah a om kei uh,SUM ngen cauh in a hong pai uh’ cih ahi. ‘Sum ina piaknak leh bel lungkimtakin a kik zel uh’aci zawmah hi. A gensa nasatak a va gen beh ka sawm le ahi kei a,ahihziakin, ken tamveipi ka gen sang a aman khatvei lel agen in mipi kuapeuh theisiam sak zaw ding ahi cih ka theihman in ka lung akim hi. Delhi apan hon etciang a, Northeast pumpi lomkhat bang a mu lel ahi a,ngaihven huaipi sa a,asungthu ahong theihtheih ciang a,mahni angsung sial petmah ngen ahi uh cih hong mukhia a,akuan- akuan bang teng demand mah leh anang tu ding leh a kaipuktu ding a geizek a tampi om ahih man un,bangmah apaisuak keiding cih leh sautak leh liantak in a pai zou ngeikei ding,cih thei in,Phualpi sawlkal te lungngai hetlou uh hi lel hi.

Hiai thumuanhuai, Intelligent report khempeuh sim a theithei dinmun a ding in khovel zak theih ding a hon kipuankhiak in, ina uah bangcibang in hon deng a? Bangmah pi in I ngai kei uh.Ahisa mah ahi ici uh. Poisa mahmah om din a gintak huai kei,politician te lak ah leng. Chief Minister leh a kaihzatam ten leng puaknat leh vei in anei un ka gingta kei. Sek gawp ngen hita. Adiktak in,a meeting nonciang un,hiai report leh thugen kikupding(agenda) in le anei un ka ging kei. Ciamnuih na a la lel a,hihfuh kisakna toh enliam zawmah ding un ka ging hi.Manipur Assembly building ah.

Aihleh, bang cituk a I ngaihdan uleh I lungsimpuak uh saak hita da hia ? I vun uh bang citak a sah hita ? A bang mahmah I nek khak ziak ua hicia,zum leh zahtat theilou a om ihi tel ua le ??Aziak di zonhak hetlou in,a kual teltul uhi. Keina muh dan in theihpihtu muanhuai tuma hun sawtlou apan I muhte uh anuai abang ahi:

• SETAN BIAKNA:Leitung pumpi hin mihing pumpi hileh, a original state tuh Setan lalgam ana hi. Genesis ah leitungpumpi mialna in a tuam a a, melput neilou leh asia ahi aci. Pathian in‘ vak hong kilang hen aw’ acih apan vakna ahong om a,mihing leh thilsiam dangte khosak theihna ding a hong suakta hi.Huci ahihma a bel,mial gige,mihing leh thilsiam dangte khosak theihna vual hilou- tuipi nuai a om vek ana hi.Vak hong om apan,mihing te tentheihna ding a hong suak a,sun leh zan leh hunbi tuamtuam poimoh te ahong om hi.Hucibang in, mihing te leng,Evi leh Adam khelhna ziakin, khialsa a piang ihi ua,Pathian thilthawnpiak hotdamna I san apan,I sung a Pathian ‘neng’ om ahong vak khia a,Pathian toh kizopna ahong kipan hi. Ahihziakin, atung a thil nih igente ah,abulpi (background) pen mialna mah ahi a, huaituh Setan lalgam ahi a, a om gige hi. Setan abei mawk kei,I hatzohlouh zek ciang in,a hong kilang guamguam zel hi.Eite,adiak in Manipur simtum a tengte tuciang in I vekpi ua kristian, huaituh Pathian thu zuite dan a om ihi uh. Huaiziakin,Setan nasepna a hatzou kei nilouh hi. Ahihziakin,tuma khatamlou paita apan,hiai Setan Biakna nasatak in hong ki gen a,miallak thilhih a mihing leh ganta sisan a ciamtehna bawl(cult culture) mun bangzah hiam ah hong kimu hi.Hiai thiltung in mi tamtak lungsim ah,lungzuanna cikhat atuh a,tua I omna(Kristian nna) pen ah muanmohna cikhat hong tuh abang hi. ‘Tun Khris lou lungkimna omlou’ ci ngam taktak lou in,mitampi,adiakin,tuailai maban ciangkuang loute lak ah,ngaihdan hong kituh kha hin ka mu hi. Hiai thiltung tuh I ngaihtuahna(emotional) hon khoih kha mahmah te lak akhat ahi a,liamna(injury) bangzah hiam a nusia hi.

• HIAMGAMMA :Eimah leh eimah kaal a hiamgamna mulkimhuai taktak kazak patna a sawt nai kei. Ka neulai in, ka khua uah,pata thau a kikap lumkha aom ua,gamvakna munding(singkung tanding) ki hilh lawklouhna ziak ahi.Apapi’n a naupa ta kapkha ahi cih a theih in,a pom a,akap a,khotheilou hial in a pukpih hi.Nupa khat apasal in nupi dang a ngaih man in,huai nupi pasal thah tum in a antun ah ‘zusalou’ ahel ua,ahihziakin,apasal in agim aza a,nelou in hon pawkik a,hausa ah akihek ua,a thah sawmpa a kipuang a,gangou in ngaihdam a ngen a,a kingai dam uhi.Akikhen kuamah om lou in.Hiai khong thil lauhhuai tawp kazak tea hi,ka neulai in. Simleivai a kigawm khawm a,gam leh lei kepbit ding cih thu hoih leh manpha 1980 veel apan I lak uah,gankhiak thak nawn ahi a,athu hoihtak a ngaihtuah te adia kituahlouhna ding omhetlou hizen pi,makai dinmun luahnop ziak a,panmuh khoh te ziakin,pankhawm malak-salak in unau kaal a kidouna ahon tun a,khua leh khua ki buhal,tem leh hiam a kidelh a kisattuahna,ki gawl-atna,leh Biakin natan zahtaklou a kithahna mun a zatna te ahong tung a. Nidang a gamsa kapna dia I zat thau te I unaute kapna ding in I zang ta uhi.Huai in,sahang sisan ciamkha a gen bang un, ilak uah,kithahna,kisoisakna te vanzat ngeina leh lemtang a koihna hong om a,insung mi ngeingei natan,hing mat a,gawt a asihmatan haksa thuaksak cih te ‘ngeina dan’ ahon suah hi.Tamaizen,tamaizen ci a kihui pawl om hang in,tuacibang a thilhih ten,vualzohna a ngai in,kiphasak leh maingaltak in a khosa uhi.Eimah insung a bit kisak louhna leh thawmhauna thupi tak a hon pia.

• SUMDUHGAWLNA :Khutsiamna suah a thil kilawm leh pahtak huai te bawl khethei dia siam hina pi in, lung sim ngaihtuahna leh pilna te zang a nek mu a khosa thei dia siam leh thop hizen na pi in,huaite a kisinsin sang mah in,sawlkal in a gam mi ihih ziak a,I khosak nopzawkna dia thil bul leh baal bawlhoih ngai te adia sumlehpai hon piakte,paulam dikloupi toh na lakkhiak a,hauhsakna leh nopsakna neih utna nasatak in kum tamlou apan I lak uah nna a hon sem a,paikhiak cihni om ta lou in, ilak uah cancer natna bang in,kil cihteng a pehta hi. Mihing leh Pathian mitmuh a sum muhna nei lou hial te in,inn leh lou lianpipi a hon tungding ua,neih leh lam ki uangsak tak in a taklang ua,Nebuknazzar hun a a ki otsakna te naupang ciamnuihna lel I suah uhi.I inbang sang taktak te ua,’mene mene tekel upharsin’ cih laimal ki gelhte I mu baan kei ua,a uangzaw sem in I gamtang uhi. Bangmah sepna lah neilou lah sum leh pai hau mahmah te mithupi a ngaihna hong om tazen hi. Simmoh a nuihsan dia kilawm te phat leh etzui din I nei ua,sumlehpai leh thauvui thautang hatna nuai ah thudik gum a dinkip dia kipia Kristian te hehpihhuaitak in I khosa uhi.Sum duhgawlna ziak in,khelhna khelhna ci ngam nonlou in,Pathian mai leng en ngamlou in, I om tamai uhi.

• DIKTATLOUHNA: Ei gamlak mi te ading in,laisiamna lou I suahtakna ding uh lampi dang a aom kei. Sum leh pai leh hauhsakna in kuamah ipha zou ngei kei ding. Sumleh pai leh hauhsakna te nikhat-zankhat a mangthang thei ahi uh.Pilna leh siamna in khantawn a daih a,kuamah in hon laksak thei kei. Hucikhop a poimoh dinmun luah sinsaktu(teacher) te’n, zulhzau tak a seem in,amau acin leh a siam a sehte kuanlou in, a lemtang bang uh guang sawn in,naupang te sinsakna ana pia uhi. Huaituh ‘proxi teacher’ I cih cih uh ahi. I maban(future) makai ding te hicibang mite khut a na kinga ahi tel hi.Hucibang thilhih te mundang a sepna nei a om pawl bang leng om kici.Huaite mah leng saptuam a makai te hi tou jel. I society leh khotang thil a leng,huaite lawi mah I makai hitou jel.Ettontak dinmun luahsak hithet. Hicikhop a diktalou nam leh beh te ihita zen uhi. Ki hi saksim in, kiliansak sim mah le cin,hicikhop a diktatloute inkuanpihte na hi,cih na ngaihtuah ngei hiam.

• OMDAN MANSAKNA : Sapte thugelh, ineu apan isim khak sek ah, If you lose your wealth, you have lost nothing, If you lose your health, you have lost something, But if you lose your character, you have lost everything, ana ci. I tuailai te uh omdan I etcian, mitamtakin a character uh mangsak uh ici lou thei kei.Abaan zek en le hang, tuailai te kia leng hilou in,nupi-papi te leng puk tou jel.Tumazek apan, I lak uah gamtatdan thulimlou petmah a omna ahong pung petmah hi. Bangziak le atel a, cih maimah hita. Lota hunlai a Sodom leh Gomorra tangthu kigen te toh a kikhiatna a om lai leleng,tawm mahmah ta ding hi. Mata Dam hia Khuga Dam a,zanlamzek a thiltung bang,ipupa khang a thiltung dia manglam ale mat phaklouh a hi. A hong kigen cian, hucibang a gamta hun sawtpi apan na omtou nilouh, a hong otluat mahmah ciang a,imvuallouh a hong kilang khia hi zawmah hi. Huaini a kilawmlou tak a gamta te,amau kia hideklou a,mi tampi petmah hucibang a va om jel uh,cihna ahi. Character icih eipau in ‘lungsimputdan,mizia,mihindan, thil omdan leh chindan’ cih te in I let uhi.I mizia leh omdan bang in bawl hiam,ci leng, I thuzak(information) leh I gintak(belief) in bawl hi lel hi. Huaiziak in,I thuzak-politics hin,Pathian thu hin abang hileh,I khitsiang thaknawn uh ngai,huai khitcia I thugin(belief) hong kisiam thak di in,huai in I mizia leh omdan hong khek ding hi zaw hi.

• Hiai a tung thute bual leh veh a om nungta te ading in,bangmah poisak tuan ding om nawn lou bang in,sialpi vuahthuak a thuak in,mihing lak a lamet ding tawm mahmah in kilang hi.I tuailai te uh, athil bawlkhiak te uh et in, thil hihtheihna a dim ahi uh.A hih theih uh atam,a hih siam u leng atam.Huaite a lohcing leh khovel theih tham a akhanna ding un,muanna leh bitna baan ah,niteng poimoh tui leh electric power te,a poimoh bang ua azattheih ding uh,omsak ei te mohpuakna ahi.I zou kei uh.I lohsam uh leng a bang.Heutu muanhuai leh ginom omlouh ziak mahmah ahi ka ci tinten hi. I pianna gam in a zil kei ci a va tutsan theih leng ahi bok kei,gam mundang a neilou ihih ziak in.Ut leh utlou a,mipi te mahmah kipan a I bawl masiah,siatlam manoh deuhdeuh ding hi lel.I lak a mikhat beek, lungsim botkek a,sai ippuan silh a I gam a dia lungsim taktak a thumna nei om le zaw,Pathian in dawng nuam lai mahmah ding in ka gingta hi. Rev.Thangngur(1891-1943) bang a,
‘Gosen gam-a,a mau bang un, Ka mau uh Nang ngai in;
Tuipisan na pikaina khut tha-hat in, Hon piisam in,zalenna hon tun in.
Aw Galilee tuipi tung a Na simthu gen,
Hon gingsak nawnta in aw,Toupa;
Buaina chiautui in a taihte’n,
Honpa ka ngai uh’, lungsim taktak a cithei kizong ni.