Mother’s Day reminiscence : KA NU CHINGMAN
Ka nu hon omlouh san nung kum 10 bang ahita a,ani adak a gen in June 20,2002(Kiginni) ahi.Huai nung mun tuamtuam,gam tuamtuam ah om mah leng,a damlai a Lamka a ka muh nunung lai ka phawk gige hi.Mangngilh vual ding leng ahi kei mah a, amah mi taima leh pahtakhuai mahmah, naupang thumang deihhuaitak bang mai ahi. Amel mahmah leng a hoih a,kicei asiam a,amah kituahpih ding puansilh nikteen a theisiam a,kipaktak in leh thanuam tak in alang alang a delh hi.Adamlai a inlam ka pai nunung un, Jordan manoh ding kuan ka hi ua,nau te school suty tomkha sung a va zin ka hi uhi.Ka pai uh hun kuan hita, nitak khat,ka upasal te geel toh,ankuang um khawm dingdan te kikum in,kanu mahmah leng ahong tel a,amah deihdan bangbang a hihding in ka kithukim uhi.A zingciang a ka upa pen te inn a ngasa meh ding a bawl lemkisa hi. Ngasa ka nu lungngulh leh etlah khat ahi a, zingciang nisuak ngaklah mahmah a lum hingei din ka ging ta hi. A lungsim kipak leh thanuam lua in,a lupna tung a hong kiphu hatlua hiding hiven,zinglam a zunnawn dia kongkhak hong dia kisa,angeina banglou in,ahongtheikei nilouh ahih tuak a,a gei a lum ka uten akongkhak sukging za a ava et ciang un,ana pau gina thei nawnlou in, a veilam pang teng ana zeng pian ta hi. Doctor te cihdan a seizure nei ana hi a, hyper-tension nei mi mah leng ana hi a, a lungtang in dahna leh lungkhamna tampi ana palsuahpih toujel mah leh huai zan a lametna kipahhuai neucik a ngaih theihmai in kithalopna pia a,a lungphu hong kisat tan hikha ding hi.Inlam ka pai teng in, ‘dam a non muh non uh gingta lou hing a..’ci’n kipaklua in a lu bang a khoih a,alu tuamna puan bang a bawlthak a, kisuanglah mah a bang thei hi. Ka Pa’n a hon omlouh san nung kum 22 phial a hon dampih ahi a,pasal dang in deih le uleng utlou a,a tate leh tute ittak a enkol tou ahi a,ahihziakin in,kuamah theihpih louha sawtpi apan ka pa (a pasal) sianglam manoh dia naki buatsaih nilouh hita ngei ding hi.
A lupna tung ah kisuanlah citak in a lum diden a, akhut kava khoihsak cian honna en leplep a,ka en a,a ut a gentheih louh ka thei a,haksa pi a hong pausawm ding ka lauh man in,sawt leng ka en ngam kei.A tangthei lam khut ah mi damlouh vehna sumte bang a len thinthen a,bangcik ciang hiam a zatkhiak kilamen lai le a hi ngei ding. A tute amah veh a hong te bang hiam bek leisak nuam lai ahi ngei ding. A tapasal neupen ka hi a,amah ngaihin atapa telak a kapa(apasal) sundeuh pen in le hon thei a,ahon ngaina tuam bik hial in ka thei hi. Angeina bang in Meitei dial san leh ngou a gial in aki tuam a,nupi hicibangtuk a taima,tu maimai theingei mahmahlou,atapa in hong veh a,paulou a lupsan mai zaw..haksa kasa lua hi.A sisan gui apan panpihna piakte hong haksa a,a nakna apan piak ahi a,alungtang leh tha a aguk a damkiknawn dia ahahpan didan te ka thei a,tua pangzoulou a alup dildel mai zaw,va mukha kei leng ahoih zaw mai diam bang ka ci hi. Damdawi inn apan hucidinmun a kapaisan louh theihlouh lah ahi a,ka tate neulai nih toh,ka zi toh,mimbang ka pianna nu leitung a amel munawnlou ding in ka nuse ta mai u zaw,ahaksa hi.Hon ngaidam in aw Nu!
Ka pianna nu, a hon don tu, ahon picing saktu himah leh,a tangthu tam ka thei kei hial a,ka itna leh ngaihna lou ngal gelh ding tam ka thei kei.Amin tak Chingman ahi a, avual leh pai ten a noutawina in Chingtawi ngen aci uhi.Mi dinsang lou, kitha phu litlet ahih ziak ahi ngei ding. A sang-gam omsun Pu Jamgou ahi a(Dr.Langkham Pa),a unau dang te uh Hanship lam ngen a teng ahi uh.Apianna pa min Vunglian Biangtung ahi a, a nu Vungvai Khumlai ahi (Ka U Zam ciamtehna bang in). Kum 1919 a piang a ciamteh ahi a, asih in kum 83 apha hi.Mi dam thei petmah, adamlouh ziak a lupna a ngak khak lam himhim leng ka theih louh ahi.A damlouh nikhua a leng,kuamah zak leh theih ding a gen lou leng ahikha ding. Ahihziakin, a seng dim thei lua, let vonvon ngen a thil pua ahihman in ‘maimom’ toh a teh khin hial ua,khothang te ngial in ‘nuomtinphur’ aci hial uhi. Ka pa kumteng a Convention Khawmpi a zin khe sek hiven,a omlouh sung in ka nu’n bawngnoi a suk jel mai hi. Seplouh mongmong nei lou in,kou neulai diak in,louvat bang in leng a kuan hi.
Tanu 4 leh tapa 3 nei in, Pathian vualzawlna toh cidamtak a keem picing in, vual leh pai nuai lawzen a khosa omlou din a picing sak a,singtang dawn a seem a,apoimoh hun a lou bang a le giak zel hina pi din,damtheitak in,buh leh baal ah leng kuamah kiang a puktaw ngei kei uhi.Hucibang a nu dinmun soiselna ding omlou tuk a na luah a na sem khia kia hilou in,a thil hihna khempeuh ah kuhkal takin a seem hi. Thupi kasak mahmah na tuh,nungak hel a nitak pawt ka paitan anhuan inn ah honna ngak jel a,vokan huan te zou vek ta nung tan in leng,tuanglai a tubial in Bible ana sim a, a ging in a simkhia a,amah leh amah kithanop suah tak in ana pang zel hi.Meikuang lel zang a hicikhop a Bible sim a awlmoh kankan a thupi kasak a om kei. Sepna nei a,mun cangkang deuh a ka omkhak ciang bang in leng,meikuang zang a laisim peih ka nu thupi kasa deuhdeuh nalai hi. Lengla ka pai ciang in, bedroom lam a ka lutma in, anhuan inn a tui dawn din kava lut teitei sek a,aman Bible sim in ana tu a, ‘koi a hoh ka hiam..? cih bang honna dot chang a om a, zingcia loukuan ding ka hi hiam, thacial om a,na kuan peih hiam’ cih peuh honna dong a,hucia lumdia ipaisan khitciang in,amah leng a meipam lupna ah,atute toh a lum zel hi. Zingsang loukuan ding a ka thoh zoh louh cang in le,lupna room a hong lut in, ‘Kamte,thouta na hi maw, thoulou lailai I honsa a’ ahong leh cih daih jel hi. Lupna tung ah hehsim in ‘thou nai lou’ na ci leng le, ‘na thouta mah ve,lou kuan hun le hita eive’ cin hon paisan lel hi.Lamka ka tuncing un leng, a tei thou in a tei a,lawm leh vual kholh theih ding a zongkhia a,khatvei Simveng a in kawmbu simpi khat a kava hohkhak na nu un,’ka nu toh kipawt tuahsek ka hi uh’cih bang honna hilh a,Thanlon lam a neulai a kitheihpih khak te bang leng,va zongkhe thei ahi nalai hi.
Ka tangval lai apan ka khualzin tun teng a,insung lut phet cia Pathian kiang kipahthu gen a, ka zin khiak ma a,Pathian kiang panpihna hon ngetsak zel in taksa a honna paisan nung in,thawmhau kisakna lianpi ka nei a,ahihhang in, aomna apan hon en gige leh hon cing gige ahi cih ka thei khe pah a,lungnuam leh tawldam in ka om thei hi.Ama damsung in, atate teng ka dam lai hamham ua,aman hon paisan nung kha 5 leng cing manlou in,atanu nihna ka u Songchin in hon sihsan pah hi.Amau gel leh ka pa, sitheinonlou dinmun a ding a,na kithuah ngei ding un ka gingta hi. A ki ngaina mahmah ngal ua.(120513)
00oo00