Zanlam a ‘Dawnding a ka kunsuk aleh..’ cih ka thugelh a ngaihdan te,Lamkaleh vaigam a simtu bangzah hiamte lak apan akhasiat thu uh ahon theisak ua,I gam omdan vei leh et a neite ading in,khasiat huai sak theih mah ding ahi ka cihpih kawm in, mimal a kitunding na ding lampi kikum le uthuai kasa hi. Bussiness promotion khat ah ‘when everything else fails, there’s a master card’ ana ci ua, plastic sum (Credit card) te lemtanna a gen na uh ahi a, a lohcing ngial hi.Hucibang plastic card zangkha teilou eilam te ading in ‘ nagam nalei leh na khalam heutu leh lamkai te tengteng a puk ciang un leng, apuktheilou - lampi,thutak leh hinna khat na om lai hi,huaipen Pathian cii, na sung a om ahi’ cih taklat sawm ihi.

Sawltak Paul kampau pian sim in, YPA a ka khanletna Pu Tai-a (Ngulthuam) in laibu leh CD a bawl khiak teng in, koi ah om lengle a copy ahon khak vangvang zel a,a kawm sung ah,tlawmngaih suah in a khut ngei a gelh in, ‘To, L.T.Ngaihte’ cih a gelh a,anuai lam ah,’Presented by – V.Ngulthuam @Tai a’, cih a gelh zel hi. Hiai in amah mi hinzia a, apaipih(principle) nasa tak a gen kha hin ka thei a, Pa Tai-a ngeingei cu’ ka ci jel hi. Nidang bang a hat leh tei a haksa hetlou a gelh thei ahi nawn kei a, panpetmah ngai ta ahihna ah, a khut gelh doctor te a abat sim tak hang in, a hon ngaihnatna alatsakna sawnsawn ahi a,ka ngaina tuan mahmah hi.Tutung a bawl pen ‘JESU TUI HING LUI’ cih ahi a,dawnding tui maimai hilou,tui hing,ka dangtak laitak a honna pekha geih houh leng adiam aw kaci hial hi.Ka kipahpih mahmah !

Hiai laibu pulakna a Pu L.Kham Khaw Lun in a gelh bang in, Pa Tai-a in kum 70-80 tuam vel ahih nung in ,Pathian apan thu leh la tampi a mu phing a,Pathian toh kithuahna apan a thumuh thupi 25 zet a gelh khia a, huaite ban ah,la zong tampi tak a phuak hi.Abraham zi Sara, kum 90 ahih nung a, naupai ding ahicih hilh ahihlai in ,bangcibang in aom(re-act) diam I thei kei na a,lamdang sa mahmah din I gingta hi. Huaibang sim in Pa Tai-a in leng, ka omna Kabul apan ka houpih leh, ciangtak in ‘ka tek nung-vuainung in Pathian in thu leh la tampi ahon pia a,bangziak a keibang leltak kiang a hizahta thu hong tunghiam cih ka thei zou kei...’cin hon hilh hi.Mi hampha na hi mai ve le, non gelh khe jel dia’ ka cih pih thei hamham hi.

Tek leh vuai ziak a, adam theihna ahoih nawn louh hang in, nidang in, UN(United Nations) Army a pang in, tumlam gamte ava pha kual daih ta a, atulmoh Jordan tuisiang bang leng ei khong zubang mom lai pek in,ana pal daihta hi. Amah cihmah tak, Jordan tui khuainulhai(bottle) in a hon dim a, asin hoihtak toh,Lamka a hon pawtung a, huai apan guite Kual a khua om zouzai lak a, a paw vial vial hi. Army a pan a retired nung in VLW na a sem a,huailai in,singtang a ka khua uh Lawibual ah nibangzah hiam tam in hong zin hi. Pulpit tung a Jordan tui,khaunulhai a alah khiak lai khong ka mang theih mialmial hi. ‘Social Work’ cih bang le amah apan ka theih pat ahi ka ci nuam hi( ka khaw kim te un bel ‘Socil Wuk’ aci ua hi ven !)Huai hunlai in, Lawibual football field a gulhikloupa saupipi a zam ziai zuai zezen te amuh ciang in,mitdon huai sa mahmah ahi ding a,zing khat Papi leh tangval te samkhawm in, ‘A-khai,koi ahia, hong pai khawm chhin dih ua, Social Work I nei di uh’ cin,a kikou a,hucin,zingkhat thu in,kholai teng hah siang ahi. Huai lai pek apan social work a kigen khak cian,amah mitkha in a hong lang zel hi.Amah tungtang detail tak a gelh din kong kisa kei a,awl a khat vei sut thak zaw ka lunggulh hi.Pathian lem geel in, Lamka bang ah leng vengkhat leh inveng in ka kinei kha ua,atapa upa pen,Engineer in ka sanggam te khat zi in a nei a,a tanu neih sun in, ka Ute khat a nei kha nawn bok a,kipahhuai kasa sonson hi. Atapa naupang zaw nih te khat Civil Aviation a officer liantak ahita a,aneu zaw pen leng Ukil suanhuai tak ahi.Inkuan khosak ah, Lamka zang a inkuan enkawl te lak a,lai leh theihna lam a a lohcing penpen khat hidin ka tuat hi.

Awle, tui icih ciang in,rong nei lou, gim nei lou,melput nei lou,a suklam manoh a luang hipen mai hi. Ei mitmuh a tui tengteng kibang in lang mah leh, singtang a ka khualzin sek lai natan in, tui lim leh tui limlou om lam ka thei hi.Asiam zaw ten hon gen ciang un, tui tak(hard water) cih bang,soft water cih bang, sweet water cih bang omsak uhi.Tua ka omna Kabul bang ah,tui luang akimu pen dawntheih vuallouh a al ahi.Sawtpi baltin a aom ciang in, a alna te baltin a belh in ngou phiak phuak hi.Puan ngoutak sawpna ding bang in zat theih louh hi.Huaiziakin, distilled(khitsiang) tui kia kidawn hi.Hiai pen tui sapsap zong,ci tuamtuam om a, mihing ading a hoih deuh bang om a,sing leh lou a dia hoih deuh bang na om sawn ahi, cih I taklat nop man ahi.Tuni a igen bel,dawntheih tui ahi hi.Tui laklak a tui hoihpen I ci thei ding.

Kum 35 vel paita a India Prime Minister ana hi,Morarji Desai in zingsang teng in a zun dawn hi. Zing athoh a athak khiak masak pen dawn sese hi.Mite theih hong hihtak in, press saite na ngawn in va dong uhi. Aman a dawnna ah,’mihing sung apan mah damna tui kibawl ahi’ aci hi.Jesu kampau Johan 7:38 a pen ana zakha hiam, ana sim kha hiam hih tuak mahmah hi.Jesun bel, ‘kuapeuh kei hon gingta tuh,laisiangthouin a gen bang in,tui hing luite asung ah hong luangkhe ding hi’ ci hi zaw hi.Abang citeng in na la himah leh Morarji Desai in a zun a dam theih pih a, ataksa adin damna apia a, a lungsim ngaihtuahna a tawldam sak a, tek kun kum 99 tan mahmah adam hi.
Ka gennop pentak, makai leh etzui a ineih – politics ah hin,khotang ah hin, saptuam ah hileh, mihing mah ahih lai sung,puk thei,khial thei,taksapnei ngen ahihman un, hucibang a ahong puk ciang un,anungzui eite ading in, lungkiakna buannawi a na tum theih mawk ahi.Huaihun a ipansan ding tuh kuamah dang hilou in ,eimah(self) ahi.Eimah sung a Pathian om, huaipen et a zuih ding ahi. Jesu thugen hoihtak a I et leh, amah hong hihding a om nawn kei a, mihing mah sung a hinna tui luangkhe ding hi zaw hi.Huai hinna tui pen, amah mah in I sung a kiningcing sa a akoih ahi. Huaipen a ‘on’ na I theihlouh ziak hiam, eimah in I ‘on’ ding ahihlam iki hilh louh ziak hiam ua, patau in puksia leh mangthang ding a kingai a, ki koukou kihi zaw hi. Saptuam nasem te Pathian muang zou pen te a hi het kei uh cih theih phot kisam hi.Amuan sawm te a hi zaw uh.

Huan eilak a mihoih pen te le ahi kei uh cih bang leng theih ding ahi. A hoih sawm a mi ma a hong ding ahi zaw uhi. Huci ahihziak a, amau va pum muan a, amau hoih louhna te hong dawk cia, ei na lungkiak luat pah mawk ding hizaw lou hi. Amau apuk ua leleng, eite a kaiding nawn dite ihi zaw uh cih phawk kisam mahmah hi. Ahitak in, biakna khong a kicinglah tamtak te, a khelhna uh mipi mai a khuh sawm a phezen te a hi nuam mahmah uh. Etton cing hipah laizang lou uhi.

Politics leh khawtang thil zaw gen nawn nawn dah ni,I ngaihtuahna bulpi (tobul) pen thugin leh lametna thu (Pathian thu I cih mawk sek) dik photphot leh,adang te zaw hong hizaih mai ding in ka um hi.

(130413)