_{K. HANGHAL LEH T.THANGKHOGIN LAPHUAH
Text by Thangkhopao Ngaihte,IAS(Retd)
Reproduced by L.T.Ngaihte}

Pa Khupzathang Hanghal Thanlon ah Circle Officer in 1946 kum apat 1950 kum tan apang hi. Pu Tombing Thangkhogin leng Thanlon ah Thanlon Government M.E.School a Headmaster in 1948 kum apat 1960 kum tan apang hi. Amau gel eimilak alaisiam masa leh muantham chingte ana hi uhi. 1949 kum in anih ua kithuah in GAM NGAIHNA cihla khat aphuak uh. Huai la THUKIZAKNA 1949 December kha a kisuah ah hong kigelh hi. Thukizakna Editor ahih leh  Pa Nengzachin ahi. Ala kisuah lak a thumal khat lel leng gelhkhial louh ding ahi. Huailai in Thukizakna kha khat a khatvei suah ahi. 1949 December apen ken copy khat tunitan in (kum 61 phata) ngainatakin kana nei lai hi. Ala min(title) dia ana gelh uh ‘GAM NGAIHNA’ ahi. Akigelh bangbang in hiai ah ka hon gelh khia hi:

GAM NGAIHNA

1. Mimbang ka pianna Zolei gam nuam aw,
   Mual dawn sokngei leh tullel
   Heisa pal lunin mualchin bawm e;
   Etlawm sa’ng ka pianna gam.
         Ngai ing mimbang ka pianna,
         Zolei gam leh tunnu;
         Ngai ing khawlhpih lia leh tang,
         Tawh ngabang ka lenna.

2. Mimbang ka pianna Zolei gamnuam aw,
   Lungzuan lummei’n mualchin bawm;
   Singchin pallun leh vachih paltan,
   Pakin tunglengthe’n zai awi.

3. Mimbang ka pianna Zolei gam nuam aw,
   Siktui duh hehnem, Zo-kuam;
   Damtui a luang zaitha tawl heh nem,
   Ding mualdawn huihkhi hawng lang.

4. Mimbang ka pianna mualdawn vangkhua aw,
   Lia honem vailou kuanna;
   Han zai sakna khawlmual lam bang ve’ng,
   Mubang ngai ing vangkhawnuam.

5. Mimbang ka pianna simlei mualzatam,
   Sang chih lai chih sumlu tawh;
   Laukha zinbang khakna sawm sial,
   Zatam nuihchiambang ki lel ta.

6. Mimbang ka pianna ka pupa phamna,
   Na min lawibang a thangsa;
   Naubang pawmning zaila’n awi ning vual,
   Vabang na tuan ma teng.

PAITE PAU SINNA kichi laibu a page 144na ah la min (title) NGAI ING MIIMBANG KA PIANNA chih a om a, huai a akigelh bangbang in hiai ah ka hon gelh khia hi:
NGAI ING MIMBANG KA PIANNA

1. Mimbang ka pianna Zolei gam nuam aw,
   Mual dawn sokngei leh tullel
   Heisa pal lunin mualchin bawm e;
   Etlawm sa’ng ka pianna gam.
          Ngai ing mimbang ka pianna,
          Zolei gam leh tunnu;
          Ngai ing khawlhpih lia leh tang,
         Tawh ngabang ka leenna.

2. Mimbang ka pianna Zolei gamnuam aw,
   Lungzuan ngoumei’n mualchin bawm;
   Singcin pallun leh va chih pal taan,
   Paakin tung lengthe’n zai awi.

3. Mimbang ka pianna Zolei gam nuam aw,
   Siktui duh zaitha tawl neem;
   Zokuam damtui leh mualdawn huih khi,
   Namin loh ka bang theilou.

4. Mimbang ka pianna mualdawn vangkhua aw,
   Lia hounuam vailou kuanna;
   Han zai sakna, khawlmual lam bang vel’ng,
   Mubang ngai ing vangkhawnuam.

5. Mimbang ka pianna ka pupa phamna,
   Na min lawibang a thangsa;
   Naubang pawmning zaila’n awi ning (e),
   Vualtung vabang a tuan na’ng.

Thukizakna a kisuah pen ah stanza 6 apha a, Laibu a pen ah stanza 5 apha. Stanza 1na leh 2na a kibang tuak. Stanza 3na pen line masapen chihlouh akibang kei. Stanza 4na a line 3na pen Thukizakna a pen ah ‘khawlmual’ ahi a,Laibu pen ah ‘khuamual’ hi. Khawlmual chih leh Khuamual chih thumal te meaning tuamtuak in ka gingta hi. Thukizakna a stanza 5na pen Laibu ah tuangkhalou. Thukizakna a stanza 6na leh Laibu a stanza 5na kibang chihtheih hinapiin, line khatna a ‘ka’ chih pen Laibu a pen ah ‘kei’ chih a gelh ahi, line 4na a ‘vabang natuan mateng’ chihpen Laibu ah ‘vabang a tuanna’ng’ chih a gelh ahi nawn.
    Pu Khupzathang, Pa Thangkhogin, Pa Nengzachin chihte ei khangthakte a dingin amau pan I jil ding atam hi. Ka ngaisang mahmah hi. Hon dampih lai le uh chih a ut huai hi.
++++++++++++++++++++
Behlapna by L.T.Ngaihte
Hiai a tung a la mah LA TUALLENG compiled by N.Thangkhogin, May 1992 1st issue a pek 23 na ah hi chi lel in a tuang hi:

NGAI ING MIMBANG KA PIANNA

1. Mimbang ka pianna,
Zoulei gam nuam aw;
Mualdawn sokngei leh tulleel,
Heisa pallun in mualchin bawm e,
Etlawm sa'ng ka pianna gam.

Ngai ing, mimbang ka pianna,
Zoulei gam leh tuunnu;
Ngai ing kholhpih lia leh tang,
Toh ngabang leenna.

2. Mimbang ka pianna,
Zoulei gam nuam aw;
Lungzuan ngoumei'n mualchin bawm,
Singchin pallun leh vacih paal taan;
Pak in tung lengthe'n zai awi.

3. Mimbang ka pianna,
Zoulei gam nuam aw,
Siktui duh zaitha tawl nem,
Zoukuam damtui leh mualdawn huihkhi,
Na min loh ka baang theilou.

A tuung a la dawng 6 pha pen, tuciang in dawng 3 lel pha leuh lauh mawk hi. A phuaktu ten lah hon dampih nonlou uh ahih tak ciang a, ei tulai khangthak ten, I deih dandan a soisa maimah khat ihi uhiam’ cih ki ngaihsut huai hi. A tuung a  dawng 6, huai ban a A phuaktute phuah dan mah ngaihnatna toh,diktatna leh itna toh kepbit pen hihtuak mahmah hi. English, mi tamzaw in I theihlouh kampau, a la kiphuak te pen, a meaning deih a ikhenlam dang thithe le zong, ei pau mahmah a kiphuak late pen, ei ut thu a va khenlamdang pen ahiding dan hilou kasa hi. Duhthusam bangtak hileh, eilak a I theih mahmah thou- Hmar,Thadou,Vaiphei,Simte, Lushei leh Zo pau a la kiphuakte bang,a phuahna pau mah un sa mai le zaw kilawm mahmah lel ding hi. Sapte popular song te lah, amau pau mah a sak thangsak mahmah hang a, a ngaikhete theihzoh vuallouh ding natan a sa rumrum hang a. Huaite sang a baihlam zaw Hmar te phuah bang, Hmar pau mah in sa zaw mai le, cih bang ka ngaihtuah sek hi. Lasa siam ka hihlouh man a, midang hihding gen mah tuh ka hi jel. Awlmohna fumfe ziak ngen hi.