Kiten kum 26 nitan in

JUANNA DANGLOU

- L.T.Ngaihte, Kabul

Ka Headmaster lui, Pu Jampu kampau mah ah kong puk non jel maiding a, ‘jel aw’ nana cih tak ua leleng, juanna dang lou cikhin phet ihih cian maw. I laka heutu fel khat N.Thangkhogin in ‘La Tualleng’ min vuah a lahoih tamtak ana kaihkhawm a, huai ah hiai la aphuaktu min gelh louh in a tuangsak a,  I laimal lak ua akizang tawm mahmah ‘J’ zang in ‘Juanna danglou’ ana cih man in, ken leng huai geih mah ka hon zang hi. Heutupa Jam Khothang in hiai la ana phuak kha kei khading cih lauhhuai petmah ahih bangtuk in, heutupa N.Thangkhogin in La Tualleng laibu ana bawl kha kei kha ding cih leng lauhhuai petmah hi. Anih nih ua tung ah kipahthu igen masa hi.

Sapte laphuahsiam, William Shakespeare in Romeo and Juliet a gelhna ah, "What's in a name? That which we call a rose by any other name would smell as sweet" cin kampau minthang tak ana zang ta a, tuni tan in mihing tampi in huai kampau tamlou tuh a gen mangmoh uhi. Eipau a vagen didan a ngaihtuahtuah cia Pu Jampu in ‘Juanna danglou’ honci khe zeih mai hi’n ka ngai hi. Nidang a meh lim isak te mah I upat nung a le ki gengen mai mah hi tazen a. Singtang iten lai a, vuahpi huihpi nun nung a, nitak a khapi hong vak mahmah, agei a akipahpih leh a panpihtu hi awmtak a meipi ngou bikbiak omte toh, khotawlam a golak a Vabak ham ging zel te khong, khat vei sunsun na muh khak, tu na upat nung tan a le mangngilh lou cin a,hucibang deuh muhkhak nawn sawm a khodakdak hilim na hihi.Juanna dang mawkmawk lou hi. Shakespeare in a gelh hun geih theih ahihlouh hang in, 1591-53 tan khong hidia koih ahi.Kum 420 val paita a ana gelh, tutan a kideih lailai ahih in ciangtak in juanna dang mahmah lou mah hi hon cisak hi.

Pathian kepna leh ompihna toh, ka zi toh ka kitenni uh a kum 26 na bang melmu ding in a hon koih a, mun tuamtuam, gam tuamtuam, tuipi gal lam, Jordan gaal natan a honpi a hon nuse ngei lou, inkuan bawltu Pathian minthang hen aw. Kum 26 icih ciang in mihing damsung ngeina toh I etciang in, simpha mahmah hita sam hi. Ani a sim in ni 9490 pha thei a, a dakkal in 227760 ngut ahita ding. Hucitan insung khat a tenkhawm tuttut pen peihhuai hetlou bang mah leh, ka kiten ma sang un, tuciang in, ka zi ka ngai zawsem tazen hi. Amah lou a omtheilou phial ka bat tawn atam hi. Thil tampi ka theihlouh bikbek ziak le hilou in, amah kampau leh khohei ka ngaihnatman a, ka dotdot pawl om hi. Ka kitenkum uh hong sawt deuhdeuh leh, dot nop ka hau deuhdeuh a bang hi. Sawtkuam ki omkhawmta ahihhang in ‘hun sakphotni’ cih ni omtuak lou hi. Juanna ana dang jel hile zaw, huai cih hun bangle omkha maimah ding hia..

July kha a Shillong kava zin in, ka tangval lai a singtang loukhou a ka kuanpih mun mahmah, ka nungzui, ka sanggamnu lawinu, ka pu tanu neupen, Vungnou kava mu a, Army khat pasal in anei a, Shillong ah kum tampi a omta hi. Amel ban a, aawsuak ka hon zak ciang in, kum tampi val paita a, Lawibual a loukhou a vuahthuak zen a kapan pih lai khong ka phawk a,vuak azuk cia, ‘itai di uam U Kam ?’ hon cih ciang ua le ka seppih teitei khong ka phawk khia a,huailai in bangcizahta a gimhuai himah leh,huai hun ngaihna a hong lian mahmah hi. Unau te kampau tak ah, ka nak ngek guh peuh hong na tantan, ka awm peuh hong bing pian liang hi. Ka nutsiatna zong sawtpi hita, ka sepkhak nonlouhna zong sawtpi hita, ahitazong in, singtang lou nasep te’n, tutan in la lung a lengsak lai hi. Rose pak mindang in gen lele, agimlimna omthou di ahih bang in, juanna zaw na kidang theilou mah hi.

Ka pa’n a damlai in, ka nu kiang, Burma lam a sumdawng a azinlai a khokhat a Dawlngek tui a hawpkhak lim a sak dan a gen gen sek a,ka nun azak nin simciang in, ‘na gilkial leh dangtak lai tak a, na gintakphak louhna a nava tuah khak ziak hilim ve aw’ acih san geih zel hi. Ka pan huai a gen veu dikkasak sang in, ka nu gen pen dik kasa zaw hi. A lunglen man ahi a,hucibang a lim a Dawlngek tui dawnkhak non kilamen hi zaw hi. Nulehpa te bang leng, laigelh hun ding khong nei a, ei bang a laigelh na ding tuamtuam nei hitazen le uh, tangthu ngaihnophuai hau mahmah ding uh cih ka gingta hi. Huailai pek a Dawlngek tui siang kiuhkeuh aduh uh, tutan in kiduh lai hi.Juanna danglou mah hijel in cin.

Kabul Khawpi ah, Campus living panthak in ka om a,tuciang in kha 9 bang katang in ka om ta hi. Eikia om, office leh tenna building khat sung a om,kongkhak I honleh office kilut, ikhak cia inn ki lut, namun ah,khatvei cangcang hihding omlou petmah thei hi. Nitaklam ni hong kihei nung sawtlou in, commando tang-gol te Volley ball hong ki mawl ging ua,akisel husa te uh hong daih cian, vasa neu kawlgit hon vaipai ding kizongkhawm in, hong ciak vengvung ua, singkung sang taktak te a, koi a om uh ahia cih theih senglouh a tam, a omna ciat uah a ham ua, hici vengvung a bang ciki zonkhiak mahmah ding uhiam ci a ina patauh lai in, khomial toh kiton in, a hong dai diam uhi. Kimutuah vek a, inkuan kim a tawldam u zaw hingei din a gintak huai. Hucih hunlai in, Hindu Kush tanglam apan awl tak leh dai zikzik in, singnah te liah ah, nungak a ngaihzawngpa kiang a kisuanglahtak a om dinden bang in, khapi tuh a hong tangkhia hi.

Huai khapi mah tuh, laphuaktu Pu Jampu in, kumtampi paita a ana muh ahi a, huai vak nuai a anungaknu toh akihel lai nite uh apailiam nung in, nitak khat amah kia om in khapi lamen tak a en in, ‘sawlkha tang silsial nuai a houlung I kup, Kumsawt zong ngaih aw juanna danglou..’ana cihna kha mah ahihi. Ken tuni a kamuh mah ana hilai a, a vak ngei in a vak lai a,ka en a, ka neulai a ka field ua ‘Tlan vangvang’ hiai khavak nuai mah a ka kineih lai uh ka phawk a, Luipi lampi suk a kangtalai a ka tai lai khong natan uh ka phawk hi.Ka insak ua tanglungzuang in Tam-ngai mut a, adang khat in Nahpa mut vengveng te,va houlim pih leng bang cibang tangthu anei di uam maw..ahihkei leh khokhang lam a Vabak ham zel,houlim pih leng,U Jampu banga ‘Zanciang ka jalmang in aw sen vangngaih, Ka laukha’n ngaih sianglam bang hon zawng, Houcimlouh ngaih aw khang thei lou veng, Kei ka heina sing gamlei hi e’ cih pih dia mansa bang leng ahi kha moh di ua.. amau adin le juanna adang dang khol tuan dia hia..