Ka zalmang hileh cii'ng:

ZOGAM NUAM ??

Upa te cihdan leh, damsung nitaklam zang panta ka hih toh, ka pianna Zogam bang le, mukha nonlou maimah thei ka hi cih ngaihtuahna in, zankhat a hon bual a, mimbang ka pianna, kulbang ka khanna mun leh mual te ka mit mahmah a vamuh a, ahuih khisiang hiauhiau te ka naak mahmah a va dik a, atui siang silsel te ka kam mahmah a va dawn ding leh asing asuang te bang le, ka khut mahmah a va khoih khak ka lung-gulh hi. Mite gen leh gelh te ka sim khak na ah, nidang bang nonlou in, agam a lei ban ah, inlehlou te bang leng khangtou mahmah ta hi'n ka za hi. Huaite bang leng en kawm a,ka damlai lunglenna khitui te va nul a, mangpha vakhak mai utna leh tupna lianpi ka nei hi.

Ka gintak sanga hatzounonlou ka hihziak mah in, ka khua uh zantun ding ka hita. Gamlak a giah dan omlou ding ahihman in, khua mial mah leh, ka tun matan tuh pai teitei ka maban ahi. Khua muizul hita, lampi lah awng mahmah, kuamah kituah pih ding leng om nonlou in,huih vot hiau hiau te lak ah ka pai zel a,lamgei a pakhoih mahmah khat leh nihte, zan hongtung ding mangpha khak hileh kilawm a,ding siuhseuh te'n hon lungmuan mahmah uhi.Hucia ka pai zel lai in,ka malam gamla simtak ah, mei vak kiukiau ka gal muh hi.Gim mahmah a, khawl tawldam bang le ut mahmah ta ka hihman in,tua meivak omna mun tun pah tum in ka delh jel hi.

Tua meivakna mun ka hon naih deuh deuh ciang in,khualbuk neukhat ngak a tu,nungak nou khat zong ka galmuh hi.Nitak kikhop hun hiding hitaven,Biakin dak ging vengveng bang zong kaza a,hicibang mun a omlam theikha nailou ka hihman in,bangcibang mun hiding hiam cih ka ngaihtuah na ah lian mahmah hi. Mundangteng a mial bikbek hang in, tua Khualbuk pen vak kiukiau a, a kongkhak ngaknu zong melhoih leh kicei mahmah khat hin ka mu hi. Zan mialnuai a hibang mun a nungak hoihtak om tuh Van-gam ahih kei leh gawtmun hi mai lou di hiam ka ci hial hi.

Tua mun pen Zogam Nuam ana ci se ua, khongkhak ngak nungaknou kiang 'hong tawldam zek bek ning e' ka cih leh, aman gintaklouh pi in, meivak de in, inn-nuai lam ah hon pi suk hi.Innuai kongkhakpi a hon hawn tak ciang in, mitampi husa kaza a, nuamsa leh kipak a laam hi un ka thei hi.Kongkhak vengtu in thau lianpi leh saupi tawi ahihman in, amun pen 'mun maimai hilou' ding in ka ngaihsun hi. Mi omte ka etciang in, khenkhat nuamsa mahmah a laam bangmah le uh, khenkhat te lungngai leh kisk hileh kilawm in atutna mun te uah kingai uhi.A tamzawte ka muh dan in, gim leh tawl a naksam a puk sawm a laam uh hi'n ka mu hi. Khenkhat ngial amau leh amau kisoisa a ataksa natan uh liamsak bang un ka mu a, maban neilou, phaktawp pha a, beidong a kipei uh abatna ciang leng om hi.Ken zong, tua nungak nou kiang, 'ka dangtak mahmah ven, tuisiang noukhat beek hon pia in' ka ci hi. Nungaknou in lamdangsak citak a hon en a, 'hiai mun ah tuisiang omlouhna sawtpi hita ei, dawnding noukhat le mukei niteh' hon cihsan hi.

'Ehe, Zogam a tuisiang dawnding om nonlou', lamdang na e kaci a, ahihkei leh amun tuampi khat a tung kha kahi zaw hia,cin ka lung abuai mahmah hi.Kei neulai a,tangtung natan apan tui siang hong luang suk selsel a, lampi a hong luangkhesuk a, huai te na ki dawn khitkhit hi a, khitsiang le ngailou, I et mai a leng siang kelkel mai, tua te koi a om hita ding? Ka khonawl zek ua tui ki zawl a, maupum kiphel khap a,atung kisin nimnem a, tui hong luang a, inkatau a kiluangtung sak a,huaite suansou le ngainawnlou a kidawn a,anhuanna ding, meh huanna ding a kizang a,puansawpna leh a poimoh teng a zatding baan a dawnding a kikoih a, asun azan cih omlou a tuisiang luang ziahziah a,mihingte kialou,ganhing-bawng,vok,kel,belam leh ak te natan in ki dawn khawm a,huaicia leng zatseng louh a om hi a, tua bangcidan a dawnding tuisiang kamkhat le om non lou maimah ahia ? Mihing khangkhat leng hi nailou hilou maw ? ci'n lamdangsakna in ka kidim hi.

'Zogamnuam,zogamnuam' cin na kikoukou na ua, a sungtak a bangmah om nonlou hilou a maw ? cihna lianpi ka nei hi. Tua insung a zu leh sa dawn a omte loungal, a gei inn neukha kha setaktak a teng ngen ahi ua, meivak lah nei lou, nek ding lah neilou,tuisiang nasan dawn ding neilou ahita uhi. Nidang a lou kuan a naseem a, alou a piang teng amah in kitan a, lungkim leh lungmuangtak a ne a dawn hi a, tuciang a sepkhiak ngelngel tung a leng, midang in thu neih khum ua,a buh neihzah lak a adeih zahzah uh va laksak ua, a gan khoi sunsun te lak a deih dandan uh va goh sak ua,a van neihsa te na ngawn bang leng a deihdeih uh va zatsak ua, tua amah,bangmah hih peihnawn lou a, gilkial-dangtak a om ahita mai ve. School kakai lai ua,migilou 'Thugs' kici te tangthu ka sim khak te, tuaciang a mimbang ka pianna, kilbang ka khanna a hong lut ahita u maw ?'ci'n huai khualbuk gei ah,gilkial leh dangtak in ka kingaihtuah hi.

Hucia khomiallak a, minuamsa kisa, tagah-liangvaite buhpang a omte laksak a gilvahtak a kivak te ka gaal et lai in, ka lungsim ah,'hiate bangtan hicibang a khosa thei ding uh a set a, akivakna uh inn leh loute lah segaita a, sing leh lou tenglah ngalsau ten la mang ta ua, tuisiang dawnding nasan om nonlou hita, lamet ding neilou kisa a,akta mangkuan kitu bang mai lel ahi zaw uh hia le, cih peuh ka ngaihtuah lai in, ka nungzang boot a hong kisui in ka thei a, ka et leh,Vengtu thau sau leh lian mahmah pua khat in, 'nang hiai a lunggimtak a na hong om a,thil omdan na puaknat kul lou pi,pai kik nuam le cin leng, dam a hon paikhesak tuanlou ding hi ung, kou pen, tuzan tan lel ente hi ung, ka muh sunsun ua nuamsa ding,kou leh kou kithu neihkhum lel hi ung,ka ut dandan ua ka om theihna ding un,thuneihna lianpi nei hi ung' cin a thau tawi lianpi hon kamkhum hi.Lamdangsa a ka et lai in, a lawmpa agei ding pan 'hiai mun a hong lut khempeuh, hing leh dam a paikhia om lou hi, aguk a taike kha te zong, a lemtang masa pen in ka that zel uhi.Nang zawng na paikhiak hon kham kei ung, ahihhang, cidam in hiai mun pawtsan tuanlou ding hi teh' cin hon hilh hi.

Karei, mimbang ka pianna, kilbang ka khanna Zogam nuam kawi a om na hi taam ?? 

...