KA PHAWK GIGE TANGMAI TAM KUM
-Valte Ginkhenpau
Tangmai a kigenkhak peuhmah chiang in kum 1993/1994 vel a Singngat khua apan Sekngalzang gam va siim a lou ka neihlai hun uh ka phawk gige hi. Huai hunlai a loubawl kuapeuh in leng tangmai kihau mahmah hi in ka thei hi. Tangmaite bang a lompi a lasawn ding mahajon ginatak om lou hilai. Lou lah gamlathei lua ahihman in lou apan Singngat bazaar tan seng dim hial a i puak chiang in tangmai pen kizuak thei sam mahleh aman tawm lua ahihna ah thaman lou sak in om hi. Huai kum zet in tuh lamnawl a kipaai tangmai muh ding a tam a, nekgaih ngellouh khawng leh chiil lou hial a daktak a kipai tam mahmah mai hi.
Eilak a piang tangmaite leh mun dang leh gam dang a tangmaite limdan kibang lou zek om hi. Amawlchik a gen in, eilak a tangmaite tuh bangmah soh louh, damdawi peuh zang a piansak hilou in pianken a siangthoutak a gahkhia tangmai ahi hi. Tuchiang in mipilte’n damtheihna mah pibawlta ua, leihoihna damdawi hellouh huanhai mah nek ding pibawlta uhi.
Asawngpilai leng hiven chi in Tangmai Festival thu ka hon zeptel cheuh ding. Apaita kum 2017 a Young Paite Association (YPA), Phualpi heutute’n Tangmai Festival kichi a hon patkhiak uh thupi in manpha ka sa mahmah vanglak hi. Hoih ka sakna ziak bangzahhiam ka lungsim ah om mahleh chi thum lel ka hon taklang ding.
Khatna ah, kithuahkhawmna hunnuam ahi. Mihingte kithuah tam in hunnuam zangkhawm tam thei leng kingaihnatna leh ki-itna lian semsem dingdan ahi hi. A vaisaitute en masa zaw lou phot in, vaisaikhiak a om pen in i minam a ding in bang tan ah khantouhna leh kituahna hon tun di’a chih lamsang et in nei masa zaw thei leng chidamhuai ding hi. Huchibang mah in, vaisaitute’n leng minam hoihna ding, kipumkhatna ding leh khantouh theihna ding tuppipen a nei ahih ua, a kiselgu tupguk dang bangmah a om louh ding ahi. Phunna ding i zon sawm zenzenleh muh lah ding a om kei ding.
Nihna ah, laa lam ah punna hon tun hi. Kum 2017 a hon patkhiak tuung un leng laa thak khat, laphuaktu heutupa V. Nunlian in hon phuak pah in huai mah tuh Tangmai Festival laapi in kizang tou pah a chih uh ka zakha hi. Tu kum a vaisaite’n tangmai toh kisai laa phuah kidemna bang hon omsak uleh tangmai toh kisai laa bangzahhiam hong piankhiak loh nawn hi. Tangmai nopbawlna ana kipankhe lou hitaleh hiaite kiphuak zok nai ding in ka gingta kei hi. Ka theihkhelh keileh, tangmai toh kisai in pupate’n Unau Tangmai Tuhte chih tangthu ana nei mahleh uh tangmai laa chih pian ana om ngellou bang hi. Tuchiang in bel tangmai toh kisai laa ngaikhiak ding tualsuak laa hoih pipi hunkhop kineita chihtheih hi.
Thumna ah, sum naak khat ahi. Lamka khopi kiim leh siangtanglam a loubawlte’n a tangmaite uh alompi a sumsuah theihna hunlem hon neithei panta uhi. Gari tun phakna khuate’n bel amau mimal in leng a tangmaite uh Singngat leh Lamka khopite ah hong zuak thei ua, himahleh huai tan hial tun zou lou bang leng omtham ding in uphuai hi.
Tutung a The 2nd Tangmai Festival, 2019 vai toh kisai whatsapp group a thu kisuah khenkhat ka simkhaknate a dikleh, singtanglam a khua tuamtuam apan vaisaite’n tangmai va leikhia uhi. Hiai thu gelh ahih tan in, tutung a hiai nopbawlna neihna ding toh kisai a Rs. 1.2 lakhs (nuai nih) vel man tangmai leikhiak a om ahi kichi hi. Huai kia hilou in, Manipur sorkal in Rs. 2 lakhs (nuai nih) ngut a The 2nd Tangmai Festival, 2019 huh ahihdan bang leng ka simkha hi. Hiai sumte pen mun dang leh gam dang a va kizangkhia hilou in, eilak mahmah a loubawlte leh atamzaw eimite lak mah a kizang ahihman in thupi kholdiak hi.
Tangmai Festival tawpsan mai ding in pammaih lua a, tatsat lou in paizomsak thei leng chihhuai mahmah. Ek tam lua vokpi in gai lou kichi ahihman in hiai zah in hunsak phot ni.
Kuapeuhmah The 2nd Tangmai Festival, 2019 zat nuam!
©Valte Ginkhenpau, 2019