NGAKUAI A NGASA KA MAT MASAKPENNA
By Ginkhenpau Valte
Bandhs, general strikes leh total shutdown chihte a kiphawk ma hunlai in naupangte’n school khawlni om sunsunte khawng aam leh manphatak in kizang sek hi. Atangpi in kaal khat sung in ni nih khawlni kinei a, Kiginni leh Nipini ahi hi. Kiginni hong tun kal kingaklah thei mahmah mai a, lawmte khawng toh school ah Kiginni chiang a hohna ding leh hih dingte kilawptak in kikup in om sek hi. Nu leh pate lounasemmi ahihman un hun tamzaw ah lou hon kuanpih ua, himahleh a kallak ah, i kinget zohleh ei utna bang ah hon hohsak zel sam uhi. Kei bang leng ngakuai kam ding khawng in ka kingen zelzel hi. I ngaihtuah thakleh, a ngakuai kam taktak sang mah a leng lawmte toh hunnuam zatkhawm ut ana kihi zaw sim lim maithei dingdan ahi.
Khatvei, school ah lawmte toh Kiginni chiang a ngakuai kam a kuan ding ka kikum ua, ka kilawp thei mahmah mai uhi. Huchi in, huai ka kikup kaal ua Kiginni hong tung ding pen a kuan ding in ka thupuk pah uhi. Ka pate kiang ah ka kingen a, hon phal pah vanglak ua ka kipak mahmah hi. Kiginni a hong tuntak in ngakuai khawng leh a poimoh dawm deuh ding a lamette la in, ka lawmte toh ka kizuikhia uhi.
Singngat khopi suahlam pang a mualdung zui a Thadou Veng kichi om hiven, huai pel lam a “tampak lam” ka chihsekna uh khenlam pek ah lawmte’n hon kuanpih uhi. Zou Veng apan hong kuan ka lawmte bel atangpi in gamvak, vasabet, ngamat chihte lunglut ua mat leng a man siam mahmah chiat uhi. Gam leng a thei ua, amau hon piina munmun a nungzuih totolhtu lelmai ka hi hi. Sawtpi petmah hon paipih nilouh ua, gim gu sim mah leng kei utna a hoh mah ka hih toh ka kilawpna ziak in bangmah ka genkhe ut kei a ka pang teitei zaw hi. Atawptawp in mun khat ah ngakuai mung ding chiang hon lakpih ua, phaipi kung keute khawng khiaktan in tuilam ding in ngakuai khau ah ka khih uhi.
Ngakuaite ngasa omna tui siang ngellou lak ah khia in paulou leh thawm neilou hial in ka tu khiuhkheuh panta uhi. Sawtlou nung in lawmte’n ngasa hon sat khiakhia panta uhi. Kei aa lah ka sah teng a awk ngei mahmah lou. “Bang hun a na sah zel uh a?,” chi a lawmte ka dot siausiau chiang in, “Huai a tuilam pen hong kisat litlit chiah na ngakuai mung satkhe leteh,” hon chi uh. Ke’n leng en vengveng in, huai tuilam pen tuisung lam a hong kisat lut dek litlit chiang in ka ngakuai mung ka satkhe ek zel sam hi. Awk tuanta mawngmawng lou! Ka khatvei ngakuai kamna ahih toh alohngaihna ka thei mahmah kei hi.
Man ut lawtel sam ka hihman in ka lawite hihdan ka en gaugau zel a, amau hihdan ka enton zel hi. Himahleh a awk thei tuan mahmah kei. A matdante uh va dotdot mawk ding lah ngasate’n i pauging hon zale uh taimang ding uh ahih chiang a kipaupau ngam lou zel. Bangtanhiam ka khai nung uh, ke’n khat leng ka mat ma in lawmte’n pai ding hon sawm manta uhi. Hon hehpih law sam uh zaw hi inte, khat in, “Saklam ah leng i kam tou lai ding ua, lungkham kei leteh i matte uh kihawm theih ahi” chi in hon hehnem hi. Kipahhuai thou bang mahleh zumhuai ka sa gu sim hi.
Luidung khat, lianlou chik, hon zuih touhpih uhi. Inn lam zuan kawm a pai hita ka hihman un ka upmohna munmun uah ka ngakuaite uh ka khesuk zel uhi. Lawmte’n bel man thei lai veve ua, ke’n ka man thei tuan mahmah kei hi. Ka kam louh kal chiang un, lampai kawm in ka lawmte tuh bual thehna ding mun hoihtak a theihte uh khawng kikum zel ua, a ngaihkhetu in ka pang nilouh hi. Bual theh nuam ka sakna mahmah khat ahihleh, lawmte toh pangkhawm a ngasa omna tuivung khat peuh kitheh khawm ahihman in mat louh chih om lou hi. Huai i matte leng kikim hawm dialdial hilai zawmah ahih chiang in kei aa ding in bel supna om lou in bual theh a kuan kichi a met lampang ahi zaw himhim hi.
Huchia luidung lianlou luang selsel pen ka zuih touh zellai un, khuk tan vel lel a thuuk mun kawina kom khat ah ke’n leng ka ngakuai ka paihlut zat hi. Bangmah in hong ne lou ahihman in, ka lawmte lah masawn a paitou zel ahih uh toh, amaute delh ding in tuilak apan ka ngakuai lakhe tuanlou in a daina mun a tui luangging sialsialte lak ah ka kaitou hi. Huchia ka kaihleh ka ngakuai mung hong kipik in ka thei a, ka sahkhiatleh, en dih, khutpi chia ding vel ngasa khat ka ngakuai muk ah kipek leklek kawm in ana kikhai lingleng hi! Neu lawtel napi ka kipahdan bel lamdang himai. Ka ngaihtuahkik thak chiang in, huai ni a ngasa tamkhop man ka lawmte sang in lamet nawn louh nung a, vangphatthu a khatlel man zou hamham, kei kipahna lianzaw ngeingei ding in ka gingta hi. Unau giat leh nu leh pa toh sim a mi sawm nek a ik a leng nam zou ding hikei mahleh.
Khut liing sim pipilh zezen kawm in huai ngasa tuh ngakuai muk apan ka lakhia a, bang ngasa hi hiam chih leng ka thei kei. Ngavok bel ahi kei peuhmah chih ka theichian hi. Tuilak a ding kawm ka hihman in, a ngasa a nal toh ka kiaksak a ka khahsuah khak thak phing ding bang ka lau mahmah popop hi.
“Kei matsa ngasa khat toh inn tung ding tuh ka hi peuhmahve” chi a ngaihtuah in, lungnuam tuan mahmah kawm in, inn lam ka zuan theita hi.
©Valte Ginkhenpau, 2019