Gammang singkung khawng om ngengngung ah Zawng khat singkung leh singkung kawm tuah in a luai keengkeeng hi. A khut langkhat a bulh (omlouh) ziak in a khete toh pangkhawm in a kiban theihdandan a kiban keengkeeng a om lai in Ngau honpi in hon delh uhi. Suahtaak sawm a kipat hang in gamla a tun ma in Ngau hon in a umkual man ua, a lohngaihna theilou in a khut neihsun in singkung a pom a, a belh diindeen hi.

A hon naih huaihuai ua, Ngau tal lian mahmah khat in a pum a man in a pet motmot a, suahtaak ngaihna omlou zawng tuh a ham keekkeek a himahleh apan theihna a om nawn tuan kei hi. A lawite phazou lou hiai Zawng in Ngau’ keihna nasa in a ham vuaivuai a, a kisat sengseng hi. Huhtu diing a lawite a om kei ua, a mantu Ngau in lah hehpihna om hetlou in a kei muatmuat hi. A sihkhiak ma na tawm in a sabeu hunkhop keihkhiak sak in a om hi.

Hiai Zawng dinmun toh huhtu diing neilou i lak ua songnawite (miphaloute) ka tehkak hi. Amau a dinkhiak zohna diing tha neilou, amau’ hihna (rights) na tawm genkhezou lou, genkhiaksak diing omlou kia hilou a, atan diing ua seh sunsun na tawm laksak leh suhsak a omte hinkhua ka ngaihtuah chiang in mittui tampi ka seen loh hi.

Pasian in tungman in ‘mi’ a siam a, Amah apan hinna kha a hatkhum apan in ‘mihing’ a hong suak (hinna kha a hatkhum ma mi himahleh mihing hilou) hi. Hiai Pasian apan ‘hinna kha’ nei peuhmah mihing i hi ua, ke’n le huai hinna kha ka neih ziak in mihing ka hi a, nangle huai na neih ziak in mihing na hi. Huchi bang in taksa hiang ah bukimlouhna om mahleh hinna a nei mi peuhmah huai Pasian hinna kha nei i hi uhi. Huaiziak in ‘hinna manphatdan’ (value) ah mihing tengteng a kibang ahi.

Ahihhang in taksa kahiang a bukimlouhna neite’ sepsuahtheihzah leh a bukimte’ sepsuah theihzah a kibang kei kha mai thei hi. Ngaihtuahna khuak om zah kibanglou a, hihtheihna dia taksa hiangte omdan kibatlouh ziak in theihna leh hihtheihdan leng a kibang kei diing hi. Hiai bang himahleh ‘hinna kha’ i neih uh a kibang leltak hi.

Huaiziak in taksa bukimlouhna leh kahiangte a taksapna om ziak in atuambiik a amau a dia sehsa solkalpa in a bawlsak hi. Amau’ tung a gamtat khohei kilawm leh chiindan dite dan bawl in a om a, taksa bukimte bang a hinkhua a zattheih louh tawp uale amau a hinkhua kizat theihna (independent life) diing gelsak in a om uhi. Disability Rights bang a chih kawmkawm un i gensa bang a taksa bukimte’ neih mah ‘hinna kha’ nei ahihman un ‘Human Rights’  mah hizaw ahi chih ngaihdan a om
a, ahi mah ahi.

Tua chi kawmkawm in  mihing khat a apiankhiak naakleh solkalpa’ keplouh donlouh ahi kei hi. Solkalpa’n taksa bukimlouhna neite’n hinkhua ngeina tan a tun keilehle a sungkuan leh khotaang ban ah gamsung a dia tuantual saktu ahihlouhna di leh, ngeina hinkhua toh kinaih beek a hinkhua a zatna diing un lam tuamtuam a kithuahpihna leh makaihna a bawl uhi. Hiaite nguntak a i sut a i et chiang in a tuna diing tunglou, a ngah dite in ngahlou, a phattuampih di diktakte in a diktak a ngahlou in a om lai uhi.

Songnawite etkaina leh dopkaangna diing ngiim in Solkal in dan tuamtuam a bawl hi. Abiik in Persons with Disabilities Act 1995 (2011 kibawllel) kichi bang a Act min ngawn ahle chiang mahmah khin hi. Atup tak tuh Equal Opportunities, Protection of Rights leh Full participation ahi. Bukim tak a omte toh hamphatna kibang, songnawite’ tan diing sehsa leh nautaang lak a ngeina bang a atel theih diing uh ngimna ahi.

Hiai diing in siamsinna (education), sepna (employment), zawnna apan dopkaanna di (poverty allevation), amau a hihna om bangbang mi dangte’n a pom theihna diing ua hihna nei (rights), leh lam tuamtuam ah a tan diing uh sehsa ahi. Hiai diing in songnawi om zahzah tung a tuat in solkal in pichin diing hunkhop a khantouhna diing a guang hi.

Huchi bang a solkal in awlmohna lian tak toh songnawite lam a khut a zaaklai in a sepsuahna di lam ate’n ana donsak hial khol kei uh chile i khial kei diing hi. Etsakna diing in songnawi peuhmah in Disability Certificate a neihma songnawi a ngaih ahi kei, khomulou bikbek hiam, ngaihtuahna buchinglou hiam ahihkeileh khut buul khe buul in omlehle hiai Certificate a neih kei uhleh solkalpa theihna ah songnawi ahi kei uhi. India sung a State dangte ah Primary Health Centre inleng hiai Certificate a piak theihlai un Manipur ah hiai piakna diing in JN Hospital, Imphal a assessment (Assessment Camp hong neihte uh genlouh in) bawl a Social Welfare Department nuai a State Medical Board in a piakkhiak diing un a hihsese uhi. Songnawi khat a dia Imphal hoh thil zangkhai ahi kei hial, Manipur ah songnawina tuh gawtna ahi.

Solkal in zawnna apan dopkaangna (poverty allevation) dia scheme a guan tengteng ah songnawite a dia 3% reserved ahi, hiai in MNRGS leng a huamkha hi. Solkal leh solkal sum zang a building tengteng songnawite lut leh pawt theihna dia bawl diing (accessible building), solkal a sepna 3% amau a dia reserved leh private company a 3% chiang reservation bawlsakte a dia  solkal in a company uh huhna pe diing, siamsinna a thawn a ngah diing chih khawng tampi a om hi.

Siamsinna toh kisai in gensau zekle. Atung a PWD Act i gen ngial in songnawi naupangte’n siamsinna a thawn a ngah diing uh chih ahi. Hiai diing in school admission  fee a om kei dia, tuition fee a om kei dia, uniform leh laibute a thawn a angah ding uh (free uniform & textbook), gelhlouhbu leh a poimoh bang a thawn a angah diing uh (free stationery), naupang in vanzat a poimoh bang a thawn a ngah diing (khozalou ahihleh hearing aid, paitheilou ahihleh wheelchair a thawn a ngah di), tuaban ah a nu-le-pate’n a tate uh school a a khakman uh a ngah diing ua (escort allowance), hiai school in songnawi naupang a kaisak man un sinsaktute training na diing in sum piakbeh diing chih hilai hi (teacher capacity building). Hiai tuh SSA tungtawn a sepsuah diing chih ahi a, tulel semsuah dan a om in, songnawi naupang tampite min a gelh ua himahleh a hamphat pih khak sun uh escort allowance chauh himaimah hi.

Neekguuk ah a siang om keimahleh hiai songnawite tansik laksak hialzaw vaangsiatna in zui dia ngaihtuah mawk ka hi. Amau in amau tan diing leh hihna kitangkou pih theilouh kia hilou in genkhe theilou diing ua nenchip in a om uhi.

Amau a diing a gensaktu diing a om kei a, amau a diing a ding diing a om kei hi. Ahihna bangbang ua pom ahi kei ua, chiamnuih leh nuihza bawlna banglel a koih in a om uh. Mi phalou diing sa a ngaihtuah in a om ua, i lak ua a tel chiang unle kilkhat deuh a om diing a ngaihtuahna toh i om uhi. I muh mai chiang in i lauhbawl ua, i kih ua, gneina bang a om thei diing ua ngaihtuahna i nei kei ua, ei neih ‘hinna kha’ mah nei ahihlam uh i phawk kei uhi. Amau’ leng kingaihsiatna i tun ua, mi tuam sa tuam kisakna chi i tuh uhi. Khovel dang apan hinna nei (aliens) hong pai bangmai a i koih ua, mihing bang a i ngaihsut louh ziak un amau ah kingaihsiatna a lian mahmah hi.

Tuabang a om hang un amau a dia solkalpa in a sehsakna tawm i etlah sak ua, i mihinpih ahihlam phawklou i nawlkhiin uh. Khat in thangpai leh beidong kisa in, “I va hoh di ua ‘Ka tan uh tang un’ chi in iv a vualzawl di uh,” a chih ngaih ka sa mahmah. Amau’ tan ei tang hialtakle haksa sa penpen di i hikhamoh kei diing. Tan moh hilou ahi, khatvei ni leh i tung a tung thei ahi chih phawk gige ni.

Panpihtu diing neilou huai Zawng tuh Ngau hon in a hing neek hilhial ve ua!!

© July 15, 2012 | Pauzagin Tonsing