MALSAWM' PA KA HI
~ Pauzagin Tonsing
Malsawm in hon omlouhsan kum khat chin ni zing (April 23, 2017) ahi a, The Malsawm Initiative (TMI) a kipattung apan a kaikhawmpih, a kum uhle kibang naupang khat ka va veh. Damlouhna ziak in amah leng kha bangzah hiam a hong kai thei kei hi. Kuadang hilou in TMI hong phakha peuh in a pahtak uh, a it ua lim kilakpih mun pen khat uhleng ahi di, Pumtuahkim @Kimboi ahi.
Lupna ah a veilam pang delh in ana lum biibei a, a unu'n noodle ana pia a, ama'n a khut taklam in mobile khat ana tawi a, a veilam khut kilawm tak ah khutbuh sana abun hi. "Kimboi," chi in ka sam a, a u kiang ah kua ka hihiam chih a dong a, a u inle ngaihdeuh in, "Pagin ei voi,"chi in a dawng hi. "Kua Pagin e?"chi in a lehdot nawn a, a u in hilhchet theihdan a a hilhchet nung in, Ë! Malsawm'pa maw?"chi in a hong nui hi. "Hi, Malsawm'pa kei voi," ka chih toh kiton in ka dang a awk hi.
Nidang dan hileh ka mel a muhlouh ale ka aw a zaklel a hon theih gige ahi a, Sir Gin chi a hon sap sek himahle'ng tuni in Malsawm'Pa in hon na thei hi. Amit in hon en mahleh a mit in hon muchian lou ahi diing a, ka pauging za mahleh amah a dia ka aw chiang lou ahi chih ka thei a, ka khasiat tha a suak mahmah hi. Alohngaihna theilou, kidekzou lou diing ka hi chi in a khut len in thilpiak neuchik pia in ka dikkhe vut hi. Anu leh apa phaitam apan hong lut chet ua, houpih dan di ka thei kei a, ka aw a taang chot ta mai hi. Kidekzoulou dek ka hi chih a theih man di uh lau in konglam ka delh a, ka gen mumal le theilou in paikhiak kin di ziak ngen gen in innlam ka pai hi.
Kum 2007/08 vel lak in kou bang a songnawi (persons with disabilities) ta nei nu-le-pate in kimuhkhawmna khawng ka nei ua, ka haksatna uh kikum in, a khenchiang in ka kapkhawm ua, a khenchiang in ka nui khawm uhi. Ka tate uh songnawina kibanglou vek himahleh songnawi ta neihkhak a haksatdan kibang tangpi ahihna ah lawmta bang phet hilou in innkuan bang in ka kibawl uhi. Kou a diing a haksatna hon dawnzangkhaitu diing pawl (organisation) a om kei a, ka tate uh siamsinna diing institution a om kei hi. Tua kia hilou, songnawi ta neih chih bang i innveng kim-le-kiang in hon ten bawl ua, "Bang hihkhial na di uam maw?" chih dotna tamveipi kituak chiat hi. Mite lak a om a nuam kei a, mahni chauh a om a kingaihsiat vungvung hun a tam mahmah hi. Tuaziak in, tan kibangte ka kipawlkhawm chiang un nuam ka sa ua, ka kikhamuan uhi.
Kimboi' nu-le-pa ngial bang in a haksatnate uh a hon gen chiang un thuak ha kana kisa in, ei tuah khawng ana neep ahi kichi ut sim sek hi. Kimboi ahihleh hydrocephalus ziak in a lu (head) lian hi. Lu apan tui paina pen a hoihlouh ziak a tuabang a om ahi a, etmai a kilangh baih ahihna ah mite etnop suah bang tuk ahihdan uh hon gen khawng un lungsim a la mahmah hi. Himahleh Kimboi a etkolna uah zumpih lou leh amau' hihtheih bangbang a pan alakna uh thupi mahmah hi. Kimboi in hiaite nu-le-pa a neihkhak hampha mahmah ka sa hi.
Huchi bang a mite lak a tel utlouhna nei a, hichi bang a mite lak a genthei tuam kisak ziak a hun zat bei mai di lai in tan kibang nu-le-pate kithuahkhawm khak ana thupi lua ahihlam phawk thakthak in a om hi. Ka kimuhkhawm tuung lai uhleh tuni tan a i khotang leh saptuam ah mite etnop suah leh nawlkhiinna chih kiamsot mahmah hi.
Kimboi ngial bang a inn kong uah biakinn a om a, anu'n lazil khawng hong om chiang a ut thei lua, mi lak a va tel ut sek a hihlehle nuamlou ahi chi sek hi. Himahleh hichi bang a nu-le-pate kipawlkhawm a, songnawite etkaina diing a pawl (organisation) leh school-te hong om a, Pathian' pina ziak a saptuam in hon lunglutpih ziak in songnawi ta neih pen zumhuai hilou ahihdan kiphawksuah a, tuakia hilou in saptuam leh khotaang inle pomdan chikhat hon nei pianpian in nuam sot mahmah hi. Kimboi bangle biakinn a lazil diing bang a zot a om ahih chih khawng zak a om chiang in Pathian kiang a kipahthu kigengen mai ahi.
Malsawm omlouh nung kum khatna a a school kaipih leh alawm hoih mahmah ka va veh in tha hon pe mahmah a, a haksatnate un kisiingsat thak uthuaina lungtang a hon pia a, haksa mahleh mailam a kalsuan teitei diing ahihdan hon musak hi. Malsawm'Pa chih a theih chet theih ka hihlam hon phawksuah sak thak a, Malsawm ziak a hiai nna haksapi pen phutou zel a, beidot leh lungkiat hun tammahleh nungtolh lou a septouh zel diing ahihdan hon musuah sak thak a, Kimboi tuh kei a diing a inspiration hon petu khat a hong suak hi.
Ka unu in Solomon in Tempul lam diing a a kisaklai a apa David in a hanthawnna thu a gen tungtawn in keileng a hong haanthawn a, lungmuanhuai bang ka sa hi. David in a tapa Solomon kiang ah, "Tum chinten leh kimuangngam tak in om in. Nasep pan inla, bangmah ziak in khawl hetke'n. A nna ka sep, TOUPA Pathian in a hon ompih diing hi. Ahon nuse kei diing a, a Tempul bawlna nna sepkhit ahih masiah a hon ompih gige diing hi." Hiai ban ah David in a tapa Solomon kiang ah nna teng amah kia a semsiam veklou ahihna ah siamna tuamtuam neite huhtu diing om ahihdan zong a gen beh lai hi.
Theihna nei hetlou leh maban leng saupi mulou a, lau leh liingkawm a hiai songnawite etkaina diing leh kepna diing a kipankhia kihi a, lung-ngaih vungvung hun a tam hi. Kipattung lai 2007/8 chih vel bang in chu mi lak ale kipawng gen ngamlou ahi, himahleh tuni chiang in Pathian in hon pi a, huhtu diing a hon pia a, siamna tuamtuam neite hon sawllut zel hi. Theihna taksap hun in theihlouh gam apan bang in mi a hon sawl a, beidong a talsawn mai a om lai in lam-et phaklouh apan huhtu diing a hon pia hi.
Hiai tan Pathian in hon pi a, hon taisan mawk lou diing in ka thumna in ka ngen hi. Malsawm in hon omlouh san mahleh mawlsam tampi, etkai seng louh vualzawl tate kep diing a hon pia hi.
© Pauzagin Tonsing | April 23, 2017