Jesu leh Vualphaloute
Written by Pauzagin Tonsing, Columnist Zogam.com

Leitung a Jesu hong vaaklai in vualphaklouhna neite toh kisai kha mahmah hi. Thillamdang 34 ahihte lak ah 25-te vualphaklouhna leh damlouhna toh kisai ngen ahi. Vualphaklouhna leh damlouhna tuamtuam nei Amah kiang a hong pai peuhmah a na nawlkhiin khat lelleng a om kei a (Mathai 4:23-25), lungliap tak a ana kiksak leng a om sam kei. Jesu’n a hinkhua a vualphaklouna neite a awlmohdan leh anasep ah enton a i zuih diing atam mahmah hi.

Amasa in, Jesu in vualphaklouhna neite ‘mihing ngeina’ bang in a mu hi. Laisiangthou mun tuamtuam a i muh bang in Jesu’n a damsak vualphaloute Amah khut mahmah in a khoih ngeekngeek a, kih a nawlkhiin hiam ahihkeileh chizauhuai sa in a taise mawk kei hi. Luka 5: 12-13 i etleh Phak ahihdamna thu ah chiang mahmah hi. Phakna neite tuamkoih in a om ua, kho pua khawng a koih in kuamah toh kihetkha lou in a kem uh. Mite’n ten in nawlkhin mahle uh Jesu’n a tuambawl kei hi. Huan, mihing ngeina bang in a bawl a, kamsiam-kamdam in a houpih a, nuihmai leh itna taktak a mel a kilang in a en chi uhi. Luka 5:20 ah zeng khat ahihdamna a i Laisiangthou BSI lui pen uah ‘mihing’ chi in a sam a, gelhdangte ah ‘lawm’ a chihna leng a om, Mathai 9:2 ah ‘tapa’ chi in a sam hi. Bangteng hileh, ‘Nang, Zeng’ ahihkeileh ‘… mitdel, … na-ngong, …. khebai,’  chi a sapdan kilawmlou in a sam ngei kei hi. Itna chisoh tel in a vualphaklouhna uh amin uh hisak mailou in duat leh mihing dangte toh kikim a koih in a sam hi.

Khotang lak a ngeina bang a hing a, midangte toh kibang a om theih diing uh a deih hi. Himahleh nautangte’n noh in nawk mahle uh Jesu’ bil tukna ahi hi. Marka 10:46-52 sung ah, Jerikou a Jesu hong tun in mittaw Bartimai tuh mipite’n ana khaam ua, a kikou lai bang dai diing in a sawl uhi. Himahleh Juesu’n a kikou aw a za a, dal lou a Amah kiang a pi diing in mipite a hilh hi. Hiai a lungluthuai mahmah khat nawn ahihleh, a hong pai in Jesu’n ana damsak chot mawk kei hi. Bartimai in bang poimoh a, bangchih ut hihiam chih ana dong masa hi. Bartimai hihdam ut ahi chih Jesu’n a thei a, himahleh Bartimai in amah poimoh amah-le-amah a kitheih a, amah deihteel theih zalenna hun a bawlsak a, huchi in Jesu in Bartimai poimoh bang ahihsak hi.

Jesu’n a vualphaklouhna nei a damsak tamzawte kiang ah ‘im’ di leh kuamah hilhlou diing in a thuhilh zel hi. A damsak a ahihsakte kichaphousakna hiam ahikeileh minthan utna ziak himailou a awlmohna leh itna taktak toh sem ahihdan a langh sak mahmah hi. Adamsakte kiang a lam etkik nei hetlou in, tua naksang a im a kuamah hilh lou diing in a thuhilh zomah hi. Ahihhang in mi kipak mahmah in a thil tuah uh a im zou khuukkhaak a om kei uhi. Huchikal lak ah Jesu demtute’n bel a thilhihte a sawisel ua, Farisaite’n diklou tak bang a gen hang un (Mathai 12:22, 9: 33-34) Jesu a paukei hial hi.

Jesu in taksa buchinlouhna leh damlouhnate kia uh awlmoh hilou in, a ‘khalam hinkhua’ mahmah uh a ngaipoimoh masa a, tua leng vualphaklouhna neite’ kia hilou in a sungkuan leh a kisaikhakpihte na tawm uh ‘ginna’ mahmah zong a ngaipoimoh hi. Mathai 8:5-13 ah Sepaih-zaheutu ginna bang a thupi mahmah ziak in Jesu in a inn uh va siik se lou a damsak thei ahihdan muhtheih hi. I BSI Laisiangthou lui pen uah ‘ka naupangzaw’ a chih hang in LST dangte uah ‘ka sikha’ a chi hi. Sepaih-zaheutu in amah apan suak hilou a sikha damna diing na tawm a ginna a aneihna ah Jesu in a inn uh sikse lou in a damsak hi.

Mathai 9:27-31 ah mittaw nih ginna a muh in Jesu’n a ginna uh tungtawn in damna a pia a,  a gintaak luat ziak ua inn tung apan mi li in zeng a hon khaikhiak uh a damsak hi. Ahihziak in, taksa damsak a omma in Jesu’n a khalam ah damna a pe masa hi. ‘Na khelhna ngaihdam ahita’ chi in a khalam damna a bawlzoh nung in, ‘na khe in paita in,’ a chi pan hi. A khe paisak masa lou in pai inla huchi in na khelhna ngaihdam ahi diing a chi kei, khalam amasa sak hi.

Jesu’n tuh taksa lam damna sang in khalam damna a ngaipoimoh zo tham hi. Mathai 5:29 -30 ah taksa hihpuktu mit ahihleh khelkhiak a, khut in a puksakleh tankhiak a taksa bukim a Gehenna pai sang a bukimlou a hinna neih a hoihzawkdan a gen hi. Mathai 18:8 ah leng tuamah bang in piangsual leh bukim a khantawn meidil a paisang in bukimlou a hinna a lut a hoihzawkdan a gen hi.

Jesu’n tuh vualphaklouhna neite nopsak louh diing  a khual ban a, vualphaloute hihna kepbit sak in a khenleh mipi lak apan bang in a pituam hi. Marka 7:33 ah Galili gam ah Nangong, pau leng pau kichian theilou khat mipi lak apan pikhia in Jesu’n a bilsung khawng sawk in, a chil sia a lei khoih in huchi in vanlam en in hong kihong in chi a thum in damna a pia hi. Tua bang in Bethsaida ah leng Mittaw khat khua a kipan in pikhia in, a hihdam hi (Marka 8:23). Vualphaloute’n leng nuamsa lou thei uh ahi chih a phawkpih a, mi lak a zumhuai pi a om thei uh ahihdan a chian, tuaziak in Vualphaloute hihna zahtaaksak in a kebbit pih hi.

Mun tamzaw ah Vualphaklouhna neite Jesu in a muzaw a, vualphalou va zongzong om mahleh Amah ana delhzoulou leh delh theiloute leng Jesu in a naihzaw hi. Luka 13:12 ah numei kum 18 hatlouhna nei Jesu’n ‘a mu’ in a damsak a,  Johan 5:1-9 ah Bethsaida Dil kitoh diing ngaak kum 38 zeng leh mittaw Jesu’n ‘a mu’ a chi nawn hi. Luka 14:1-4 ngial ah maitang bawkkhat Sabbath ni a hihdam siang diam chi in dantheite leh Farisaite kiang ah a dotsak lai zomah hi.

Sinlai i lak theih atam mahmah hi. Jesu’ nungzui ei Khristiante in i zuihpa’ khekhap i zuih diing uh a om hi. Jesu’n vualphaklouhna neite awlmoh leh a zalbawl mahmah lai in eite’n bangchi in i na koih a? Jesu’n mihing ngeina bang a bawl in, lawm leh sanggam bang a angaih lai in en i na kih in i lauh thoh mai uh hia? Ana daltu leh nawlkhiintute i na hikha hia ahihkeileh Farisaite banglel a doudal pawl i hi hia? Huan, vualphaloute’ khalam dinmun a diing in bang i na seppih a chih kivel a hun hi.

Jesu’ nasep nung semte’n hiai vualphaloute hinna lampi a pilut ding in pan i la hia? I saptuam level in bangchi in pan i la a chih kivel thak hun mahmah kha diing hi. I biakinn leh a misiangthoute kipawlnate taksa bukimte mun diing kia a koihkha i hi hia ahihkeileh vaulphaloute hong tel diing un i va zawn in i chial ngei uh hia? Amau hon naih ngak mai i hi uh hia ahihkeileh i saptuam sung ah tuabang vualphaklouhna nei bangzah om a, bangbang haksatna tuak uh hiam chi in amau leh a sungkuante i va houpih kha ngei uhi hia?

A hong pai diing pa hi taktak na hiam chih Johan nungzuite’n a va dotlai un, Jesu’n, ‘… Mittawte a mit uh a hong vakta, khebaite khe in a hong pai ua, phakte a hong siangthouta ua, bengngongte leng a hil uh a hong vakta, misite leng kaihthoh in a omta ua, a zawngte’n leng Tanchin hoih hilh a dongta uh,’ (Mtt 11:5) chi in Ahihna ana gen chiang hi. I zuih Jesu hong painasan pichin diing in ei mimal, saptuam leh khotang in pan i lakha taktak hia chih kivel tuak mahmah hi. I hihkhak nai keileh kiveel thak in pan i lakthak kuul hi.

 
© November 11, 2014