ADC in 6th Schedule ngen diing chih ka simkhak in, ka lungsim ah, ‘nuam dek panpan’ chih a hong lang zatzat mai ka chi. Kum 20 nung a Kiteelna om thei chih State Government in a kisaktheihpih mahmah pen kiteelna om nung kum 3 ale sepsuah khuukkhak nei theilou dia thuneihna kichian piaklouh ahi lai hi. A kisaktheihpih uh kum 20 nung a kiteelna om thei pen ahi a, himahleh hiai kiteelna om theih hang a ‘sahang ha bei’ bang di ahi tuan dia aw.

Khatvei, A bawmhawm mah i chi thak nawn di uh hiale? State Government in a kisaktheihpih a, power le kipia, tanggam khantouhna dia semthei diing local self-government kibawlkheta, tutung Assembly  ngial bang a chu ADC khut a power 50% kipekhia chi in a tangkou thithe uhi. Hon nopnehna maimai di ua ADC kiteelna nei i hi di ua aw chih theih in a om hi. Power 50% a piak uhleh a piaklouh uh a kituamna taktak mipi in i theih uh a om diam ah, omlou le hisim mai in chin maw.

Thuneihna i neihlouhdan chu ADC nuai a sepna 300 val awng a huaite hukdimna dia Honourable Member of District Council-te tukhawm uh, a tutkhawmna ua thupuukna tuh Solkal a hukdim sak dia NGET DI chih hi nengnawn in maw. Hiaizah sepna awng pen i muan mahmah, mipi’ palai MDC-te tutkhawmna a hukdim ahi diing chih thupuukna la theilou himawk un chin. Hukdim theihna dia nget di hi pan i chih chiang a angaihna mawngmawng omlou hi veh aw.

Asung taktak a omte’n thuaksawt peih uhle sa mai ka hi. ‘Ka liim in lah tau buntah…’ chih bang a gari tung khawng a chu san zelhzelh theite kithuah biambuam in, mipite sik-le-tang a dia vaihawmna tutphah a tu un, vai hon hawm taktak uhleh a thupuuk theihna om uh chu ‘NGET DI’ ana himai mah in chin. Ngen in hon phalsak kei uhleh chu phallouh himai di ei voi maw? Mipi sik-le-tang a dingte’ thuneihna neu lo nengnawn hi ve aw. Hichi tuk a thuneihna kichian neilou ahih lai un State Solkal in bel thuneihna kipia chih chauh gengen mai uhi.

A thuneihna uh kha ‘Nget di’! Student hiam civil organization bang inle Solkal a deih i neih chiang a ngetna kibawl in kiphinna tuamtuam bang kinei naihnaih zel. Hichi bang a civil society khawng in ngetna a bawl bang mai ua a mipite hoihna diing uh deihna a ADC in le solkal a ngetna bawl thei lel chihdan pian hilim ve aw maw.

Tuabang dinmun ahihna ah thuneihna kichian taktak neih kisam ahihlam niteng hun teng in langh huaihuai mai hi. Council Act bangchi zong teng in amendment bawl in thuneihna tampi hon pe mahle uh India Constitution a tuangban louzaw a bawmhawm mah hi veve diing hi.

Huaiziak in tutung MDC-te tutkhawmna tengteng lak a ngaihven tham pawl ahi de aw i chi. 6th Schedule nget mai hon sawm uh kha! Lunggulh hak uh ka kisak ziak zaw hi pen. I ADC dinmun uh leh kiteelna hon neihsak teitei ziak uh hoihtak in ana sui sam le 6th Schedule ngetna dia hun lemtaang mahmah ahihdan mu diing in ka kigingta hi. Phualpi solkal in nohsapi a piak ziak a a ut thu uh hilou, a deihthu uh le hilou, tanggam-te a self-government om sak teitei utna le hilou, tanggam khantouhna di deihna ziak le hilou a ADC kiteelna hon neihsak uh ahi.

Tun nohsapi piak ziak a ADC limbawl nuai a vai i hawmna ah i thuneihlouhdan uh a chiang mahmah hi. Ahihhang in, lunglut tak in 6th Schedule noh dia man taktak i hi dia aw chihle ngaihtuahna ah a om lai hi. ‘VAIPUUMNA’ maimai a 6th Schedule ngen di chi i hi hia ahihkeileh ‘SUMNAAK’ dia 6th Schedule ngetsawm lel, ahihkeileh ‘MEMENTO’ dia 6th schedule ngetsawm? Ahihkeileh ‘MIPITE KHUALNA’ a ngetsawm, kingaihtuah vai?

Manipur Assembly pailel ah ADC a thuneihna 50% piak chihleh fund allocation etna kawm a ‘vaupuumna’ maimai diing in 6th Schedule nget theih mahmah ahi, solkal bille a doh mahmah diing hi. Ahihkeileh, Zero Ibobi china hang a hiaipa kha mivaangnei hi in, sum a hihmoh neilou ahihna ah kiphin taktak ma a sum lom toh hon denkhakleh chi a 6th schedule ngen dek i hi uh hia? Ahihkeileh, ‘memento’ dia ‘Kou hunlai ale 6th Schedule ana ngen kei ve ua’ chih di deih man maimai a kisa i hi hia? Gamsung khantouhna taktak di deihziak a 6th schedule poimohsa i hi hiam chih kiveel ni.

I lunglut taktak leh  thil hithei ahi. Abiik in Churachandpur ADC bangchu powerful mahmah ahi. Solkal ah nohna nasatak pia in, Churachandpur ADC in kitawp ngam di khop in i MDC-ten pan hon lale uh mipite lah kiminsa, Manipur Government inlah Churachandpur ADC in a function theihlouh di lauh a lau ahihna ah hiai tha-neihna (power) i MDC-te un hon zatsiam uh deihsak huai hi. Central a grassroot level tan a self-government hoih tak a dingsak zou chi a State Government kha kichaphousak mahmah ahihna ah i challenge ngam ngai hi veh aw.

District ADC dangte banglou in Churachandpur ADC in amau munmah luah in, District mun mah tutkhum in, mipite toh kithuah a muh ahi. CCpur ADC a function ziak lel a Manipur pumpi a ADC function dan a ngaih ahi a, Naga Area a ADC-te bel Imphal khopi sung a kikhoh fafa lel ahi uhi. District dang toh kikai matlou inle ei District ngawn in lungsim tak toh 6th Schedule phut mai tuak mahmah hi.

Muhdan  leh ngaihtuahdan a kibang kei a, himahleh ADC level tan a 6th Schedule i na tunzoh ngeingei leh tunung in UPF leh KNO nuai a political talks nei a, huai nuai a kilemna hong om di chiang in 6th Schedule tung ah a om ngeingei a ngai ding chihna leng ahi ngal hi.

Ngaihtuah thak taktak in CCpur ADC in i poimohna thei in huai advantage a la in 6th Schedule mah noh di in kisa nawn ni uh. N’ong kisak taktak ua, hiai kum 2 chauh hun na neilai pen uh a phatuam theipen dia na hon zat un chu a nawn chiang a uncontest a chin di himai, hong kisa taktak un aw.

©June 27, 2013 | Pauzagin Tonsing