Paupu the Hero a nungaknu’n innocent deuh a a lungsim tawng apan kipaak taktak ahihlam a mel a lang in, “Ka lungsim kipana a dim, Ba-ba-re,” a chih kha kipahna taklatna ding in nalh ka sa mahmah hi.
Athu ka zak in, nuam ka sa, ka lung a muang a, ka kha a kipak a, lam-etna lian tak toh hon om sak a, kum 20 vel i gam ‘chavaih’ tak a om dinsak thak a om theihna ding in hiai bang lel ahihlam i gengente uh tangtun theih ahihdan a langsak hi. I gam dinmun ka gelhkhak chiang in, ‘Once there was a government’ ka chi sek a, adik mah ahi. Nidang in zoudawn khota na tawm ahle Solkal a om, kisolkalna a pai thei a, mipite a kisolkal thei uhi.
Zoudawn siamsinna puahthak sawm in Pu Vungzagin Valte, Hon’ble Parliamentary Secretary in amah Constituency sung hoihtak a meetmai touh a sawmna kan a i gamsung poilitiks ua kipahna thupi hon tun om kei chih diing khop in ka kipahna ana lian hi. ‘Hiai ei ve le i gengen, hiai ei ve le i kikou pihpih, hiai ei ve le thil hithei ahi i chihchih’ ka na chi a, ‘Ba-ba-re’ himai.
Shiv Khera thugen hoih sa ten ka hi dia, ka gen mangmoh, ka gelhkha gige a hilehle ka ning tuan kei hi. Ama’n tuh ‘Gamsung siatna kichi misualte ziak ahi kei a mihoihte gamtat utlouh ziak ahi,’ a chih dik ka sa mahmah hi. Thanlon Constituency sung a siamsinna puahphatna dia houlimna a tel dia hong hoh heutupa N Khamsuanthang leh SSPP GHQ Standing Committee Chairman Pu M Jamchinthang toh ama nitak a ka kihouna uhle tua mah ahi.
Hetupa M Jamchinthang in ‘I awlmoh taktak leh mahni hihtheihna tan a koilam beek hiam a gamtat diing ahi,’ a chi a, huai hilel hi. Gengen nawnlou a mahni hihtheih lam khat beek hih a sepkhiak di himai a chi a, hiai ei ve khotang hoihna a hong kipatna diing. Mipite’n ‘hup’ chi a i boh ziak ua khotang a hoihna, gamsung a khantouhna hong tung ding ana hi phiangsan lou hi. Mi hoih khat leh nihte gamtat ziak a hoihna hong tung ding hizaw hi.
Tuni a lam-etna liantak hon pe thei U Gin (kei sapdan in ka gelhkha, heutu taktakte’n position a let chiang unle huai position toh kisai loute ah ahihna ngeimah ua sap a utzaw sek uh) bangle Solkal hichi tuk a chipzakna lai ah bangmah tohloh zou kei ni chi in a ektehtut mai thei hi. Himahleh lunggulhna kha nei a, tangtun theih thilh ahihlam phawk a, sepsuah diing ahi chih ngaihtuahna toh a om theih pen tak ahi gamsung hoihsakna dia kalbi masa.
MLA hiai zah ana omta a, pawlpi tuamtuam hiai zah in pan ana laknasa uh, heutu muan tuamtuamte’n ana awlmoh tei uh a zohlouh uh chi a ektehtut mai theih ahi. Ahihhang in, mihing khat, heutu khat hi a thilhoih amah level tan a septheih a om lam thei a semkhe dia pan alakna ah kipahna a lian mahmah hi. Solkal in thil hithei diing ahi chi a ‘policy’ leh ‘rule’ kichiantak abawl tungtawn a huai semsuah dia ‘teacher’ a lakte uh ‘cheater’ suak mai nawnlou a siamsinna a dangtaak tak naupangte sinsiam dia kisate hong lohchin uh i deihsak hi.
Parliamentary Secretary-pu’n thil a khiilkhiil a pai a sepsuahdan di a gen leng thupi kuai ka sa mahmah hi. Teacher-te’n haksatna a neih uhleh a DI-te uh kiang a tut ding uh, DI in ZEO ah, ZEO in concern MLA ah chi a a khiilkhiil a paitou pen ahi dan di mah ahi. Ei lak a Peon leh Chowkidar na tawm in a tunglam ate khawng dongkholh a sak chiang ua a suankhiak theih mai chiang un khovel a buai lou thei kei hi. Tu inle teacher-te haksatna na neih uhleh ka kiang hong pai un chi lou a a zuihdan di lampi chiantak a kawkmuh hi. Huai kal ah ‘sa-ngak palai’ om thei veve chih bel haih hetlouh a hoih mahmah diing, a ziak ahihleh khovel ah a niamte, aneute’ ‘aw’ nelhsiah leh zaklouh a om chiang khovel buaina a kipan hi.
Ba-ba-re dang khat nawn ahihleh Pu Joseph Lalrothang in mahni nasepna a omlou a loh lalate’n thohlawmle thoh nawn dah un chih pian deuh a gen kha, ba-ba-re himai. Laisiangthou in semlou in ngawl hen chi aihaih in ei lawi in i seplouhna gah ua khamangthang it chih khawng Setan kipakna mahmah in chia maw. Mahni sepna a om peihlou, loh bel la in seplouhna saptuam a gin-om leh kuhkal tak a pangte ziak a khotaang hamsiat a om ahi, kisuanlahna chang thei unla khotang leh saptuam a ‘hamsia’ leh ‘kaamsiatna’ naak, a zawlluttu na hihlam uh kiphawk le u chin ka chi, Pathian zakdah ahiheh ngaihdam ka ngen.
Hiai bang a hoihlouhna genkhe diing MLA leh bureaucrats kia hilou in Saptuam’ pulpit a tangkoupih hun ahita. Pulpit a huai i kikoupih ziak ua i thohlawm uh a tawmleh Pathian in a dang di hon pen a di ahi. Pathian i gintaakna uh a neu luat ziak in thohlawm tawm di lau a i gen ngamlouh sung ua lepzoh nawn vuallouh di siatna in hon buak thei ahi. Pulpit pansan a saptuam leh khotang siatnate i gen ziak ua Upa leh saptuam makaite nawlkhiin diing i lauhleh i lauh sang ua siatna thupizaw in hon buak thei ahi. Laigelhtute’n a gelhgelh ngam hang un kongrou a su kei, gen dia tuak leh kilawmtak Upa leh Pastor-te daih khinkhian ziak in, i chi ut hi, Pathian in a thaunilhte i genkhakna ah A ngaihdah lam ahihleh ngaihdam i ngen hi.
Deihthusam dukdaklou i beisak uh a ngaita hi. Mi khat in ‘Solkal skul ah teacher kihihenla, kai ngailouhna ah kiposting henla, sum kidawng henla solkal a loh pen saving in, sumdawnna a pungte in missionary kivaakleh,’ chi tel dan ahi. Phuahtawm hilou in a gen taktak ahi a, sum a neih ziak in solkal teacher chu a mu a, kai ngailouhna ah posting le a mu a, sumdawn chu a panpan a, missionary le a hon vaak lai diing. Khamangthang bangzah matna in a hong pang diam chih bel i thei kei!
Khamangthang taktak pen mun dang gam dang a om hilou in ‘amahmah’ khamangthang ahihlam kiphawk hileh chih ngaihtuahna ah a lian mahmah hi. Missionary dia sawl a omna a sepna skul ahi chih a theih kisam hi. Kiveivial sek hang a!
Bangteng hileh, siamsinna lou in bangmah tan i tung kei diing, tua diing in mihoih tampite gamtat nuanua ziak a tangtun a hi kei diing, mihoih khat leh nihte ziak lel in zong i gamsung neuchik ah kikhekna thupi tak a tung diing chih ginna liantak a om hi. Huai diing in hong pang un aw.
© JANUARY 15, 2013:0530 | PAUZAGIN TONSING