Sim taktak uh hia chih zaw ka thei kei, tampite’n hon gelh lai in hon chi sek uhi. Sim khol keile uhle nuam himhim. Gelh ding a hon deih uh ahihleh i khovel thu uh, i politiks thu khawng uh ahi. Gelh utlou hilou in gelhsate suah thakthak lele kibang lai ka sak ziak lel hizaw hi.
Zan khat thu a thil tung diing ahihlouh lam phawk luat hang in mihingte’ tehna tomchik toh i teh chiang in zekai sak dek naak in a om chihman ahi. Tribal rights i gen ua, land rights leh ownership, forest rights, ah! genlouh khukkhak a om khol kei, gelh louh luat le i nei kei ua, i document ettehte uh kilamdang khollou, a ngei teng mah lumleh tuantuan khong lel ahi hi. Mi thak hong pai a huaite mah pansan in aw-phawi tuam deuh in hon gen ua, hon gelh uh chihman lel ahi.
I hon gen uang ngial bangzaw aw i huansung a singkung poule ei a hikhalou ahihdan khawng hangsan tak a gen theihna dia Forest Act khawng ana om hi veh aw. Ahi tak in mipite’ patauhna leh heutute patauhna a kibang a, himahleh bangmahpi i tokliing zou kei ua hi.
I maban diing uh zaw lungziinhuai mah hi. Abiik in ei Zo suante sung ah kituahna a om theihlouh mahmah poi petmah ahi. A gelhtute leh phuaktu leh satute in duththusam saamsaam hang in i dinna mun uh kisuanlou, i kalsuan sunsunte un i sikna sa mah sik tuantuan a, mailam telhlou hi ve hang aw. Khosik mangse deuh a banghiam in hon na delh, i tai vonvon hang a i tai zohlouh mah a bang, hat a hat a diang i chih hang a bangmah tan i tunlouh toh kibang mahmah i hiai ve ua!
Koisan a khial a, koisan a diklou hiam chihlam sang in a issue mah i buaipih ua, huai issue mah nidang pek a i na buaipihte mah uh ahi zel hi. Phut theihdan, nawk theihdan in i nawk ua, a khenleh tou nawk in a khenleh suk nawk, i tou nawk hun bang a om a, i suk nawk hun bangle a om zel. Atawpna bel a ngeimah ahi lailai hi.
Tehna niamchik a teh ka hihtaakleh ngaihsiam, hilehle heutu masate hon tutna chiang a khawl lel i bang uh ka sa hi. Heutu masate’n amau hun toh kituak a hon tutna tan ua khol in, ei lah sang tak tung bang a i kingaihtuah hang ua amau hon tutna tanlel a ekteh tut i hilim di ua aw chih theih hi. Ei bel ekteh tuh i hihlam kiphawk hetlou in. Khantouhna bel a hun toh kituak a khantouh ahi a, nidang ate aa toh teh a sangpi tung bang a kilanglel i hi uhi. Ahihhang in politiks ah bel huai hun toh teh a niamzaw dinmun a om i hi uh hia chih kidot tuak ka sa mahmah ve.
Ka chi sek a, nidang in solkal ana om takpi ahi. Ei neu mahmah lai tan ah leng khe a ni khat ni nih paina tan ah damdawi innte hoih tak a puah ahi a, sokal skulte’n laisiam tampi ana sekkhia uhi. Huai hun lai in solkalpa’n mite a dia a geel rosot antangte ana om a, tagah meithaite’n amau tan dia gelsak a omte amau nget hilou a va piak in a om uhi. Mipi’ sik-le-tang a ding MLA khawngle ana om a, zoudawn khotate dolkhatte etkaisak in a om hi. Nidang inle gam it vang a thau tawi pawl le i na om ua, hinna taanle ana om uhi.
Ahi a, i hun paisa leh tuhunte i tehkak chiang in a khovel mahmahle kidanglam a, a mihing mahmahle kituam in kitam mahmah ahih man in hihdan tuam leh chiindan tuamle om hikha inteh! Himahleh nidang a i omna mah ua om i hi kei uh maw chi nuam i hi. Huchi i hihleh banghang hi hiam chih velchet mahmah kul hi kha diing a, i kalsuan zia vel thak a, a sangzaw lam i delh uh kisam hilou hiam?
© September 12, 2012 | Pauzagin Tonsing