Ihmu thei lou chih di lah hilou, mang nei lai hiam in ka kithei hi. “Tuni duty kuan di ka peih kei ngei..” ka chi toh kiton in ka phaitam uah Bu-al a hong khuang ngelngel a, “Oh! Inn ah om kei vele, ngut tak zan nitak in Chingno te inn ah kava pawt mah vele maw.” chi’in kin tak in ka thou a, suahlam tangdawn ka et suk leh zing ninou suak etlawm tak mai in Lamka khuapi a tanvak singseng a. Zo huihkhi siang in sing leh gua te a sem ging selsel a, silpak leh louhing dipdip  etlawm na te in, mun chih mual chih a hon zem ua, Zogam etlawm dan ka lungsung ah a hong thak semsem hi. Hiai ei vele maw Zogam na chihchih uh! “Zing lungleen bang le thuak hak viau veh aw,” chi’in, Sir.(L) Muana Ngaihte Laa, Deih Anglai ngai kawm in Zo huihkhi siang ka kimut sak heuhheuh mai zaw, a nuam tel mai. Hiai ei vele maw Zogam a chihchih uh!

Phak theih na chiangchiang ah kava tai pawt tei hi. Changkang sot mahmah ta chih louh ngal gen di dang ka thei se kei. Nidang a nga beng a ka kuan sek na mun te bang inn mun ngen in ana dim ta hi. Kei bang lel tak kholai pawt di bang ka zum tuntun hun a tam hi. Nidang a zaw khe ngen a kipai keuhkeuh sek hia, tu’n chu khe a pawt mai di le ka zum hun a tam mawk hi. Gari a tam tuk in a heksiam tam ding in ngaih sun kei ing! A gari zat te uh a mau a hi sese ding in le ka koih tuan sam kei. A gal ah kana za sek a, “Innlam ah Gari tam lawta, hilele a tamzaw in Lamka aihkeh Manipur pua kan ngam lou uh.” Chih a hi zen houh veh! Bangziak a chih bel kei gen le a ngai se kei dia Lamka a om, Gari nei ten na thei pen mai du chu maw. Lampi chu a ngeingei in kamu hi, Speed Breaker kha lampi bawl chiang a veng chih kibawl siak uhia, Speed Breaker nei tamtam hampha chih dan deuh a kidem I hih hial di uh zaw ka ging ta hial kei. Nitak chiang in huai ten i speed a hon break thah kei ua, accident ding lauh huai zaw mawk a bang hi.

Speed Breaker teng bek nuh ngou thei leng bang chi dia? I nuh ngou louh tawp in le lamkiang ah Speed Breaker signal/ signboard, gari light in a salh vak theih ding bek in kitak theih leh ka chi hi. Lampi kuak, kisiatna chu a tam mahmah lai mai. “Hiai lamkuak, lampi kisai te pel a na tai koikoi ziak uh houh eidiam maw accident a hichi tam.” Ka lungsim in ka chi lel hi. Hichi tuk a gari neu (a diak a two wheeler) tam a’ Helmet khuk di bangziak a thunei tuten a ngeingei ding a rule bawl lou uh ei dia aw? Helmet poimoh dan thei lou uhia or hair style siat ding lauh ziak a khu ngam lou? Two Wheeler hek tengteng lak ah 5% khawng chouh Helmet khu kamu lel a, kei mahmah in le kava khu sam kei, ka neih louh ziak un.

Ka theih tan in chu tulai in Sepaih ten le Gari lai (RC toh DL) a check sek un ka mu hi, nak hoih lawtel. Kum´ chinglou a gari hek, kham nei a gari hek  bang hoihtak in enkai  uhen la, sum a kitan sak mailou in man geihgeih mai le uh accident bang kiam tuan mahmah ding in ka gingta mawk hi. A diak in Pathianni chiang bang in STRICT sem lai le uh ka chi ngoihngoih mai. Huai Teddim Road, Bank kong lak khawng a Sepaih te Gari lian beubuau khawl sek ten chu lampi a su neu tuan mahmah ua, a dong kholh hun tam mahmah ding in ngaihsun ing. Transportation lam chu nuam lawta himai, veng chih, kilchih teng Diesel Auto in tawn kual vek ta! Gintak sang in New Bazar bang siangthou kasa vanglak veh. Changkang na gam!  Himahleh huai Pangzawl khosak a I Bus Terminal di a chih uhia, aihkeh Bus Terminal dia a bawl uh lah hi zou lou deuh pen kava muh leh Ka Nui Lum Dek (KNLD)!

I Zogam uh a keu, Tuailai te a keu uh, gintak louh pipi, a pian uh I theih te bang khamtheih hih in ana om nenaw mawk uhi. Etmai in gen lele I gen khelh lawmlawm ka gingta kei hi. Khamtheih mantam, a hih le tam, ki draw geih! Lamdang kasak mahmah khat chu bangdang hikei veh. Koi veng hiam khat a, a Ice Cream freezer uah Kingfisher Beer miteng muh theih ding in ki koih vot ngiingeei! Ice Cream lei lah naupang a tam zaw sin ngal a. Burma Beer a kithang mahmah, kiman hilel tak ven maw. Zu (Whisky, Rum, Vodka etc.) a man tam mahmah a, huaiziak ei di chu a dawn gige te’n Meitei Zu a dawn sek ua, a taksa un a zou kei chih etmai in le a gen theih hi. Lamka ZU te nasa lua deuh ngal hiven maw, a huan dan uh, a mun a trop dan lah i theih sa uhia. Kei mahmah in le ka mit ngei in kava mu a, tua kia lou leng nidang a ka Vok ann lak lai khawng in le kana thei mahmah hi. Huai banah Burma Alcohol Product himhim dawn kei thei leng a damtheih huai ding. “Lamka Tuailai te aw, huai na khamtheih tang utoh Meitei Zu aihkeh Burma Beer na mix chiang un eive na taksa uh a siat loh hithet!” va chih mawk di lah hikei deuh ven. Govt.in zu zuak phal hileh zu dawn i tawm beh zo maimah duam maw? Tawm beh kei hial leng le zu dawn te tua sang mah in a damsawt zawk uh ka gingta tinten hi. ZU a hoih kei na a hilele huai lak ah a hoih tampi I theih louh uh a om veve hi, “ZU chihziak a PUM SIAT ahi het kei. Ei Christian ! Eh, ki Christian sak ten khelh na diktak bang in I ngai ua hiven maw. ZU dawn lou’ Angkawm ten khial lou uh chih na ei tuan se diam. Angkawm te’n mimuh dia hih lou himawk ve un, a gim nam lah hi zenzen lou a maw!”

Hiai ka gen na in zu dawn dia hon hasuan ka hi het kei. A duh in dawn hen la midang va tok buai sese kei hen. Innsung Pa’ pen nitaklam teng zu inn ah lut, inn tung chiang a Zi leh Tate tok buai veu chih khawng ka ngaih sang louh pawl tak ahi. Zu kham chiang a miteng ban chou chih khawng le kana ngaisang tuan kei. Poi kana sak mahmah bel bang dang hi lou in, khatvei lawm te toh Farewell dan deuh chi’in kou le koi hiam khat ah kava 'Round Table' tei uhi. Lamet het louh chih di ahi di, ka kiang uah Skul naupang uniform silh a chiak nainai ana om mawk ve uh! Mah ni met nang, sum muh nang hi tawk lele Skul naupang, laizirlai (kum chinglou) te kiang ah zaw zuak nai kei thei le ka chi ngoihngoih mai.

“Aw, nou ka siamsin pih te, na duh ua lele na uniform bek uh zahtak ve ua maw, na Nu leh Pa te un thei le uh bangchi tuk in a puak uh ana di, kei hon thei ngei lou in hichi tuk a puaknat huai kasak hia maw?” ka chi thei lel hi. Hiai thu lawm te kiang ah ka gen leh a hon thulak khol kei ua, “Hiai khawng hou lua lai ahi, om sawt le chin na thei deuhdeuh di, na pawtpawt leh na heh nang khop mu khia gige di na hi.” A hon chih khum geih uhi. Theih beh lai leng nasa na deuh in chia!

Electric zaw gen louh in le I theih chiat sa uh le ahi. “Regularly Irregular” chih di himai. Huai, Hmuia Veng khang deuh a Transformer chu lauh huai kasa tel mai, siik dai a lah ki um lou, kua hiam zu kham khat in va mai kha le chu, KICHAI ! (Electric ana pai khak zenzen leh chih hilai). Electric gui te khopi cheimawi na maimai a kizan chih di lah hikei deuh ven maw.  Chrismas (dek)chiang in’ inn cheina colour paper te va tak zeizai le Lamka khopi etlawm mahmah ding in um ing. Kei mimal ngaih dan maimai in chu a Dept. phiat a,  veng chih in Generator kineih in mahni veng sung teng regular tak in Electric supply mai le houh a hoih zaw diam maw ka chih hun a tam sek hi. Ana negu man a om se diam ah.

Chiamnuih khat a gen bang un, “ Electric sang a’ a Fee dong te inn ah pai mun zaw uh” chih hi tel aihchia maw, lungkham hang! Electric a hong pai zenzen a, Computer, Laptop I hon zang dek pan a, Internet a hong ki load sung in mei a hong mit bang chu hehtha suak himai. Ei va gengen a phatuam di khat le om kei veh. Naupang lai pek, nidang pek a hichi den, hichi lel, hichi toutou lai di. Mei pai louh nitak sawt nung a pawt bang chu lauh huai sim veh aw. Mial thraps himai. Mial Gam ah teng zaw ki hi peuh mah in maw.

Huai lai pek a I na theisa uh, tuni tan in le a kibang tou den lai hi. I Lamka Khopi uh bouruak hoih lou, lungphawng thei thu zak thei phutphut, ki om gekgawk den, koi ah buaina a om a, kua te bang chi, kua leh kua a. Nitak pawt sawt louh damsawt na ahi chi leng a dik thei phial di e maw. Nitak I pawt chiang a bang, “Na hong pai lam chiah Chengkawnpang, Phailian lam na hon tawn kei di aw” chih ki vaikhak na hi mawk. Teddim Road, New Bazar lak dak 10pm lak khawng in i hong tai tou bang chu lungsim a nuam khol kei sam hi. Nidang ka pawt hat lai ua Meitei hel te’n New Bazar a pat EBC, Central Lamka te biak inn kong tan a hon Frog Jump sak lai bang uh phawk in om veh. Nitak a dai khipkhep mai, ui haam zak di le a vang mahmah ta. Kei om sung sawt lou in le mi kisual, kibuai, YPA te delh ngai chih khawng a om zeuhzeuh hi. A tung a ka gen khamtheih leh Zu leh Sa zatdan I siam louh ziak uh a hilel tak hi.

Gen ta lakloh kon behlap zual di, thil khat sai le SUM mah hizel, a koi a koi Ofis ah suai kaih na di, lehkha, certificate etc. lak na ding ah sum mah poimoh zel. I suai te uh le a mantam thei deuh kasa, kuaman la kei le uh zaw ka chi kei, ei a nei zou lou te a dia haksa deuh eive. Huai Ofis ah va hoh sum va pia, a saklam ah va pai non sum mah hizel, a khang lam ah diang suk non, sum mah hizel. SUM zaw a la uh, hilele bang ziak ei di a sum lak te uh a sel sese uh!! Loh nei lou uhia, a loh ua lungkim lou uhia oi? Kei sang a thudik thei zaw te’n hon gen khia toih mai le uh chih ka lung gulh ngoihngoih mai hi. Thudik gen peih non lou I hi ta uh chih di lah hikei deuh ven chi maw. “Sesum aw sesum, sesum aw na lian, ka Gam sesum in hon khawng kei un aw.”

Sawm-a-khat pia lai ve unchin maw. “Pathian in gim namtui in ana sang diam maw,” ka chi lel a. Kei a hai sim philphel chih mah tak in ka heh chiang leh ka lungkim louh chiang in ka gen kha veu a hiven. Mipil te’n zaw a gen peih non uh le ka gingta kei. A che thei leh a che thei lou, mi’ nei leh mi’ nei lou, a zawng leh a hau ki khiat in om veh. “Ofis ah thil hih di I neih chiang a mi’ I neih kei leh buai a buai huai eive, mi’ i neih le chu ki zou pahpah.” Chih ei chu a gen sek uh. Gamdang ah zaw hichi lawmlawm din ka gingta kei. Ei leh ei ki nene hi lim hang maw. A hau te piak beh in a om di ua, a zawng te laksak in a om di uh. Mun nih ah sepna nei chih bang le thuthak a hi khol kei. Chet theih na Gam! Huai ban ah ka theih beh khat chu bang dang hilou in, “Thudik gen lauh huai ahi, Bang in bil nei” chih hi tel eiveh!

Zogam ah chikchiang in THUDIK, in vai a hawm dia, diktat na in chik chiang in mun a tang zou dia, kua hiam khat in “Zogam hilou inchin Zuaugam ahi”,  a chih pen nakpi tak in dik kasa mawk hi. Zogam thu gen ngam huai lou tampi theih beh le kava nei sam hi. Pautam louh damtheih na thuguk ahi. Hiai khawng mahmah eive Zogam nuam I chihchih uh nuam lou sak tu..!!!

(Sutzop ding……)