Sa leh gal, thauvui-thautang laka ngaihtuahna pilvaang taka om thei tuh mithupi chih kia inle adaih kei, Pathian bang ahi ka chi hial hi. Lau leh dipkua a oma vaihawm thei tuh thupi in azah tak huai. Hiai bang mihing zaa a khat i om de aw chih ka ngaihtuah vungvung sek.
Inn nuai, leilak van selna dia khuak kuak atam mahmah. Ahihangin, lauh leh beidot thuah ziaka van selloua mahni kisel khua khatah ana om hi (hai man hilou in mangbat man ahi). Ahaksat didan ka ngaihtuah leh kanaak bang abuai hial hi. A siin hon hong ua, lei kuak lianlou chik sungah apa'n atate kawi in ana khup bok khum hi. In kang saa petmah ahi dia min in amin gop ua khoih khak na na zul in zul khe mai mah. Anu uh, anuai nung pena om ana damlaia, adok khakna, akhut leh khe bel man theih di ahi mawn tuan kei. Naa sa in akikou mai. A et hak ngei. A tanchin uh gen man haam haam in a si pah hi.
Kou ki thu hilhna le Biakinn a tai di chih ahi het kei. Himahleh, thau hong ginga, patau aw ging i hon zak leh abei dong ka hi peuh mah di uh. Ka nute kataih sat nuamlouh mana hiai teng tuak ka hi mai, hikei leh ken le kaluum ka tei ka lik nuam sam vele. Thu dangah, kei bitna houh ahi zaw di.
Kei, thu hon dot hunuh tung di ahi ta. Ka kianga bang mah theilou a lum dildel, taltang vang siu seu, lutang phel langkhat omlou chih khawng ka va en khanak. A chizau huai ngei mai. Kei maban di hia..ka thuak ngap kei lua. Khen chiah enhuai uh kasa mai. Ka chi hummul hong thoua, ngaih tuahna mumal le ka nei non kei. Tangthu gen di chia kaki sak kholhna le kaphawk non kei. Ka zun suaklou pi kon teh hial zaw...hiai mangbatna leh mulkim huaina taihsan ka ut ngei (hithei leh,''may i go for number one'' chia ki ngeta pai kik nawn hetlouh di). Tai ek mai di ka hi de aw...lah thautang in hon delh zui ngal dia. Himahleh vangphat thu a suakta thei phut hi'ngaa, hiaia sih di ngaka haksa taka ka om sangin chia taimai dia kaki sak laitak in ka ban a pa hong tai guih chuh mit phiatkal lou in thau tangin delh zuia si khe zok theilou in sawt kuam tak ki pek sonson nilouh hi. Kamaa apa lah sikhin sa isak leh hon thoutou in adek a akhuak lakhia in hon en nilouh maizen. A et hak ngei.
Inn leh lou ki halsiat sak, hinna tampi kilak sak, lohtak lah omlou. Inbul, lian leh hoih pipi apammaih thei ngei. Khatvei Khominthanga power station kiangah khakhat-khanih kingak zual naang inn zongin kava kuan hi. ''BAHARA na pe zou dia hia?'' honna chimok.. Ngaihtuah na asau pai ngei. Room neu chik, midang toh ki pindan di. Kazi-kata insung ah giak leh kei, ka uii-ka aak toh konga ka giah ngai di hilai. Mi hausa, hiai vengtaw pek, buanmawi lakah inn zongin akuan kei hial di ka chi lung sim hi.
Minute 20 bang buaipih tuamtuam neia hon houpih zok loua a om sungun kei kana buaizaak ta. Ka muh ka zaakte ka sisan in apo zou non kei. Ka chii hong hik singsinga ka khe hongzoi in, ka mit hong mial a, bang mah theilou in leilak ah ka puk suk ta hi.