SALPHA NGALLIAM – M. KHAMSIANMUAN' TANCHIN
By Manipur Express Team

Manipur Express Team in singtangmite' gam leh leitang humbitna dinga hinna pia 'Tribal Martyrs' 9te 'zahna' pekawm in, a tanchin uh mipi' theih dingin abanban in hong kitaklang hi. Amaute' tanchin tungtawn in mipi hi'n makai hitaleh ana lungke simte'n leng thathak hong lak ua, kitat hiamna ding a azat theihna ding uh ngimna leng ahi hi. I mihangsante' uh min leh mel theilou leh mukhalou, ei singtangmite lak ah avang(tawm) mahmah ding. Himahleh, a innkuan khawsakna uh banah a tanchin uh ana theikha tamlou maithei ahihman in amau tanchin i theihte tungtawn in thathak hon guan touzel leh chih, 'Manipur Express Team' in kideih mahmah hi.

September 26, 2015 ( Kiginni) nitak in, 'Tribal Martyrs' 9te lak a khat M. Khamsianmuan' nutsiat a innkuante houlimpihna va kinei a, mipi' theih dingin anuai ah a 'Tanchin' saulou i taklang ding.

Salpha M. Khamsianmuan ahihleh March 30, 1994 in Singngat Sub-division sung Sugnu Road a om Muizawl khua ah a piang hi. Anu Muizawl khawmi ahi a, a nute' khua ah kum 1 ava om sung ua piang hidan in anu'n gen hi. Akhua taktak uh Singngat Sub-division sungmah Sumchinvum ahi hi. Amah pa M. Kamkhenthang leh nu Damzaching' gil a gah goutan 2te lak a aneupen ahi hi. Kum 24 a upa sanggam numei Chingneihoih kia nei a, ki-it takin khawsa helhel uh a,tu'n Pearson ( Veng Khang ) ah khawsa uhi.

Aneulai in mi damtheilua ahi kei a,gawng dildel a, nu leh pa'n michia pha dingin leng gingta lou uhi. Huaiziakin Pharmacy khawng ah dot theihtheih dong kawma damdawi lei in ana kikemtou uhi. Sumchinvum khua ah School kai pan a, huai nungin Bungmual a om 'Harmon English School' ah kum 1 sung kai in Class B zou hi. Huaizawh in Singngat a a papite' inn a om kawmin Singngat Standard School ah a unu tawh kai uh a, Khamsianmuan in Class I zil hi. Huai mun apan Pearson khua a kisuan nawn in Covenant Children Home ah Class V sim hi. Class VI leh VII ahihleh a khua ua om Thangkhai Govt School ah kai hi.

A unu'n School kai a khawlsan chiangin amah leng laisiam theilua ahihlouh tawh atha hong dah deuhdeuhta hi. Huaiziakin anu' kiang ah " Nu, lehkhasiam kia nekzonna lah hilou a, School kai ka tawp mai ding a; zing leh nitaklam teng a tai kizil zelin sepaih ah lut ka sawmzaw mai ding " chi'n gen a, school kai khawlsan hi. Apa ahihleh nidanglai in SSB kichi ah ana pangkha ngei hi. Tu'n ahihleh pioneer a pang in Bungmual khawsak a Pioneer-te' camp sung ah na semzel hi. A unu'n tulelin Chennai ah a Restaurant ah sem hi. A khawsakna uh haksa ahihman in om maimai theilou hi. Huaiziakin 'Driving School' ah kai a, azawh in a ute gari zangin 'Tui Supply' in sum lawh hi.

Kum 1997 a buailai in Singngat ah leng inn neikha ua, tu'n Singngat ah api leh apu om uh a, amau chom uhi. Tui supply ahihman in nitaklam ki-awngsak zel in School naupangte pituah khawngin leng pang zeuhzeuh hi. A tai zek chiang in adip sa sazel ahihman in - Talab, Laizial, Malta chihte ngawl in a taksa kem siangthou hi. Amah sanga neuzawte khawng tawh kithuah in, ball khawng pekpih zel a, zingkal chiangin leng Bungmual khawkhung lam ah saupipi va taitou sek hi. Ball peksiam a minthan a utpen ahi kei a, himahleh sepaih alut asawm ziak a ball pek gige hizaw hi.

Salpha M. Khamsianmuan mi pautam ahi kei a, mi' houpihna bel a dawngkhial ngeikei. Tui a supply chiangin leng kithuahpih ding midang a tonpih sese kei a, amah leh amah kitoudelh zel hi. Anu a ngai mahmah mai a, inn apai chiangin anu samkhial ngeilou hi. Anu potkhia a, an nek hun a a pailouh chiangin ngak den zel hi. A nu'n, " hon ngaklou in an nana ne kei dia bawi" a chih chiangin, " Nu, ke'n maw..nang an thuksa mahmah ne nuam, lim leng limtuam sa ka hi " chi'n dawng zel hi. Nitak apot chiangin leng paihak ngeilou hi. Tui supply a zawh hak chiangin bel a ute' inn a gari a koih kawm in kisil zel a, huai mun khawng ah 'Carom' kap in omsuak zel hi. Miteng in a maingap uh leh polhnop a sak mahmah uh ahihman in, chiamnuih zialzial sek uh a, hileleng heh ngei selou hi..

Hunte hongpai zelin Imphal lam khawngah kiphinna husa ngaih deuhdeuh hi. Ama'n leng huailam thu bildawh pen in nei a, vei leng vei mahmah hi. Nikhat anu' kiang ah " Nu, Imphal lam a kiphinna om ziaka School naupang khat leng si eive. Huai, a thil nget uh a lawhchin ding uh chu ngaihngam huaikei e. Lawhching mawk le uh , eilam leng hon sukha ding hi'nchin, puaknat-huai mahmah ding ahi " chi'a agen chaingin, " Bawi, huaite khawng ei ngaihtuah phak ding hilou eive. Ngaihtuah nawn ke'n aw..huai khemkhem khawng " chi'n anu'n dawng zel hi. Huai hun chiangin, " Na theihoih kei ua, puak leng pawna lou na hi uh. E'n bangtan hiam theihna chiang kinei sam a, huai i hon gen ahi Nu " chi'n a nu' kiang ah gen tiautiau zel hi.

Huchih lai in a biakinn ( Moria ) uah 'Crusade' om a, amah leng vatel hi. Heutupa Damkhothang' thugente'n a lungsim khoih mahmah a, khalam kimuhsuahna hoihtak nei in, Setan sal apan suahtakna bukim ngah hi. Anu' kiang ah, " Nu, khawsakna lam khawng i ngaihtuah leh lungkhamhuai ka sa. Himahleh hiai leitung zaw khualzinna lel ahi a, salam suahtakna sangin khalam suahtakna poimawhzaw ahihdan leng ka musuah hi. Heutupa' thugen ka ngaihngaih chiang a maw Nu, ka lungsim puakgik teng hongbei mawk eive. I tung uah Pathian thupilua ahi. Pilna-siamna, sum-le-pai hauhnate a Pathian muh ding hileh, eikhawng in kimu zoulou ding hi a...tu'n zaw suahtakna hoihtak ka neita " chi'n kipaktak in gen hi.

Singtangmite' adia kipumkhatna(unity) ni August 31, 2015) in hongtung a, Lamka khawpi sung sou vengvung maita hi. A pata un akhua ua a ute' (a gari heksakte) inn ah om uh a, anu'n bel huaimun a om ahihlam uh thei deklou hi . Anu'n meikhu zam ngoingoi khawng gal etsuk zel in, a tapa' omna theinuamtak in om hi. Huchi a sawtsim mahmah a om nungin a pa inn ah va pai a, anu'n " Khamboi tawh hiding k'on sa a, amah koi a om a " a chih leh, " Ke'n, inn kang va en ka hi " chi'n dawng hi. Huaitak in " Nang, a lauthawng penpen huaitan vatung na hihleh, i tapa koigam a vatung phet diam maw...?" chihlouh ngal gen ding dang thei tuanlou hi.

Nitak hong hi a, a tapa uh inn hongtung ngei kei. A 'call' chiang un lah a 'pick-up' ngei kei zel a, lungbuai takin om uhi. Zan dak 12: 00 ve in anu' phone tungtawn in houpih a, " Nunu ei, misi om in chin maw..damdoi inn a va koih ung a, huaimun a om ka hi " a chih takin anu'n inn a pai di'n sam hi. Inn atun takin anu' kiang ah, " Nu, utdeuh leng..Damdoi inn a hong zanhak ding hi'ng a, mi gam-le-nam adia hinna pia om a, ei nuamtak a ihmut dan omlou ahi. Ka lawmte leng tampi om uh ahi. Tua buaina khawng ah sikha zenzen lehang akiminthang mah ding maw Nu " a chih leh anu'n, " Nang si lechin kou bang suak ding e? Hon hehpihlou maw bawi; hai paupau louh ding ahi. Tu'n leng, ihmu pah in la'n, thildang ngaihtuah sawm nawn ke'n aw " chi'n dawng hi. Salpha Khamsianmuan@Khampu in, " Nu, ka pau nawn kei ding. Hileh leng ka ihmu tuan kei ding. Mitsi leng le kei ihmu thei tuanlou ding " chi'n dawng a, dai vengvengta hi.

September 1, 2015 in leng a ngeina bang in tui supply nawn hi ( Water supply-te Bandh in huamlou). Sun dak 12:00 velin tui supply zou a, a gari koihkawm in antang khawng leng mi a ding va puaksak hi. Inn ah paisuk a, anu'n singpi san ana bawlsak adawn laitak un apa leng hong pai hi. Thau khawng ging ging mai ahihchiang in anu'n " bawi, khanglam a buaina ah na va hawh mahmah kei ding aw.." a chihleh, " khemkhem eive..." chi'n dawng hi. A pa'n leng hawhlou ding in genpih a, ahihhang in a tui supply na puan-ak kikheng in, va tungsuk veve hi.

Sawtlou nungin anu' kiang ah a tapa Damdawi inn a om ahihdan hilh in om a, anu'n leng keptheih lai ding sa zawmah hi. Apaisukna lam ah amun a tunma in 'beita' ahihdan thei malam hi. Amun tungsuk a, a tapa ahihleh houpih theih ana hinawn kei hi. Anu'n a aw neihteng suah a a kahkhum hang in Salpha Khamsianmuan in a dawng nawn kei a, gam leh nam adi'n 'thautang' 5 hial ana maituah khinta hi. Mipi atam mahmah mai a, a hehlou leh pawna lou kuamah a om kei. Akiang ah midang leng a kisial bimbem mai uhi.

A unu'n a naupa sihna tungtang a genna ah, " ka naupa omlou ahihdan ka theipah kei a, damlou hidan in ka thei masa. A khawnung a ka theih takin ka nak kahlua a, ka kongkaw zawzen a, ka seppih te'n hon buaipih mahmah uhi. Anizing in Lamka hong pai sawm mah leng Imphal leh Lamka kal buai a chih ziak un September 5 in innlam k'ong paithei pan phet a, ka nau' mel ka mukha man kei. Ka muhkhakna omsun ahihleh a sihkhiat ding kuan a, panpihtu bei kisa a a naak leplepna 'video' ahi lel hi. Unau 2 kia ka hi ua, ka ki-it in ka kihawmthawh mahmah uh. Amah ka khualna ziakin, Chennai lam ah nasem in ka va kilawh a, tunung chianga a kibulphuhna ding chi'n 'inn-mun' leng ka leisak zou hamham a, a sihma zekin sai ding teng ka saifel khin hi. A kaplum tute'n dakkal tamtak lakkhiat ding a phallouh ua, chiamnuih bawlna dia camera peuh a alak uh na ka salua a, ka thuakzou mahmah kei. A va laksawmte leng ana kapsawm zel ahihman un, ka nau zaw panpihtu bei kisa in Police Station kongah a naak leepleep maimah hi. A kipaih nunga leng kap thakthak nawnlou hile uh, tang 5 taktak a taksa tung ah alutna ding thu om hi'n ka theikei. Akhe leng a kapkha ua, huai zaw ahi ding mah hi'n leng ka koih " chi'n hon gen a, aban sunzom thei nawnlou hi.

Sawtlou nungin hon gen nawn a, " ka pa leng sepaih panglui ahi a, ' sepaih ka pan lai in, melma taktak tawh kikaptuah ahihkei ngal leh kawng tunglam kap a kiphal kei' chi'n hon gen zel a, a pawna mahmah. Tu'n leng inn ah a omkei. Inn ah leng ka pa a omthei kei a, a om sunsun chiang in leng phe hehu hi. Ka nau' lim a muh chiang in akiang ah ava kapkap mai a, khawlak a kitak khawng a muh chiang in leng a kahna khop apha gige. Alungsim hong paisual khak ding ka lauh penpen ahi. Ka nau' sihna zaw, 'blank fire' a kichi theikei ding a, khutvuak in sepaihte leng thah a sawmkei. Thutuam daih gen lehang mak ka sak mahmah ahihleh ka nau' sih thu ka zak ma ni in, ka ha liing khawl leng hilou in hong kethei leulou mawk a, mak ka sa mahmah " chi hi.

Anu'n a genna ah, " Ka tapa ataksa lian henhon mahleh a lauthawng mahmah mai a, achang in alawmte'n inn tan hong kha zel uh. Tua huaimun a hangsantak a ava sihkhak khelkhel lamdang ka sa. Amah kum 22 mi ahi a, nitaklam chianga ball a pekpih zel leh a kimawlpih zelte naupang kum 10 mi khawng ahi uh. Sepaih leng a vatai zel a, lawhching zou nailou ahi. Ka kinepna pen, ka tate numei khat leh pasal khat lel hi a, Pathian in hon laksak zel a, deihna nei ahi ding chi'n ka kihehnem thei zel. Himahleh, nitak a inn hong pai hun chiang in kongkhak hong kihong dia, ' Nu ' chi bek a hon sam di'n ka gingta lailai. Sithei dingin leng ka koihthei nai mahmah kei. Ka tapa' sihma ni zaan 3 kizom in ka innkiang uah ui leh zawhmeng hong kap vengvung gige ua, lamdang ka sa. Huchibang om chiang in, sihna tuak om zel hidan in gen mahle uh ka tapa zaw si di'n ka koihthei tuan kei. Himahleh tu'n si ahi mai a; vangtah kisa mahleng, sihampha ka kisa. Pathian theivek a ki-om a, Christian kichi vek minam ihi uh. Himahleh, i khelhna uh a sang lawta. Huaiziak a, i pil leh i kibawltheihna ding ua, Pathian in hichibang i gam ua hong tungsak a, singtangmite khekhat a hon dingsak hiding ahi. Huaibanah, JAC-te panlakna thupi ka salua. Mipi huaizah hon makaih ua ka ta leng hoihtak a hon kepsak ban uah kou akia hilou a mipi a asuah ziakin leng ka lung amuang mahmah hi. Ei singtangmite adia si ahi a – singtangmite' maban ding ngaihtuahna a pang i makaite uh thuthu ahi ta. Ka tapa leh a sihpih midangte tungtawn in i gam uah 'DAMNA' hong luanglut ta leh chih ka deih " chi'n hon gen hi.

Anuneu' tapa Minthang in a genna ah, " Dimapur lam a gari paite hek a sumzong ka hi. Ka naupa' sih ka zak in lamkal a menchipna mun ah ni 2 ka taang(stranded) uh. Zaan leng ka ihmu theikei a, a ni 3 ni in ahihleh Ukhrul lam a vial in inn k'ong tungthei hi. Inn ah leng ka ihmu theikei a, ka naupa kia ka ngaihtuah den. Ka lawinu'n leng pawna lua in a kapkap mai a, ihmut limtak a ihmu ka om ngeikei uh. Ka naupa etkol man zek a si hileh zaw ka thuak uh adan omdeuh ding hi a. Tunung a asihna video khawng ka muh chiang in, ka hatang athak mai a, amun ah omkha hileng, ka naupa' hinna humbit sawm in sihngam in ka pang sam ding.." chi'n gen hi.

Anuneu Hauniang in leng, " Sanggam pasal khat kia om ahi ua, mibang a tam leng ahi kei uh. Ka tate'n, ' ei si hizaw mai lehang leng a thuak nuamzaw ding hi a maw Nu' chi'n hon gen zel uh. Ahi mah leng ahi. Thuak haksa kasa a, ka innkuan un sivek mai le ung leng athuak anuam zaw ding. Asihma ni in ka lung aleng mahmah mai a, ka tanu neupen tawh, ' nitum ngeilou Zion khawpi' chih la khawng ka sasa mai uhi. Nitak khat, common room a ka tut lai un, ka room lam uh hong ging a, ka tanu nu'n leng, ' U Kham ' chikawm in room lam lutna a parda kizak a bawhphei mawk hi. Himahleh, kuamah a bawhkha kei, ' ka U kham tawhlet a hong tawmlut ahi' chi'n hon gen hi. Ke'n leng, ' na U Kham ahi kei ding..' ka chi hi. Huainung inn ah leng ka omnuam kei uh. Ka ngaihtuahna ah ka tapa menchipna mun a tang hi a, tuahsia banghiam tuak dek ahi ding. Khampu lah damlou ahihdan leng kitheilou a, chih khawng ka ngaihtuah hi. Huchi'a ka omnung uh ni tamlou zawh in, ka tapa uh Khampu in hon omlouhsanta. Ka it mahmah mai a, thuaksiam haksa leng ka sa.." chi'n hon gen hi.

Dakkal 2 leh akim sung Salpha M. Khamsianmuan' nutsiat a innkuante tawh houlimna neih ahihzawh in Pathian in amau innkuan hinkhua leh a khawsakna uah lamkaihzel ding a deihsakna thu Manipur Express min a khak kawm in 'Mangpha' kikhak in, ka paisan uhi.