Salpha Ngalliam - H Paulianmang' Tanchin

Manipur Express Team in, singtangmi-te' gam leh leitang humbitna dinga hinna ana pia 'Tribal Martyrs' 9te 'Zahna' pekawm in, atanchin uh mipi' theih ding in taklat kisawm hi. Amaute' tanchin tungtawn in mipi hi'n makai hitaleh, ana lungke simte'n leng thathak hong laak ua, kitaat hiamna ding a azat zel theihna ding uh ngiimna leng ahi hi. I mihangsan-te' uh min leh mel theilou leh mukhalou, ei singtangmite lak ah a vang (tawm) mahmah ding. Himahleh, a innkuan khosakna uh banah, atanchin uh ana theikha tamlou maithei ahihman in; amau tanchin I theihte tungtawn in thathak hon guan zelzel leh chih, 'Manipur Express Team' in kideih mahmah hi.

September 22, 2015 ( Thohlehni) in, 'Tribal Martyrs' 9te lak a khat; H. Paulianmang' nutsiat a innkuante houlimpihna va kinei a, mipi' theih ding in anuai ah a 'Tanchin' saulou I taklang suk ding.

Salpha H.Paulianmang ahihleh, aneu-alian in kikheem ni chi a itheih uh - 1st April ( April fool), 1993 in, Singngat Sub-division sung a om, Lungchin Khua ah ana piang hi. Amah ahihleh, (L) H. Thianlal leh Nu Ngaikhanching' gil a gah goutan 3te lak a alianpen ahi. Sanggam numei, kum 19 lel a upa khat (Chiinliankim) leh pasal kum 15 a upa khat (Muangouthang) nei hi. Aneulai hun a; mi damtheilou, awmna leh sungkhoh nei gige mi ahihman in mi chia phazou ding a leng akoihlouh uh ahihdan, a nutsiatsa apianna Nu'n hon gen hi.

Siamsinna lam ah ahihleh, School a kaitheih apan in Class - V tan, Lungchin khua ah kai a, Pawl(class) VI leh VII ahihleh, Singngat khua ah, a Pu Son' (Teacher a sem) etkolna nuai ah kai hi. A kai hunsung in mi' tung ah leng gige hi. A laisiam ziak mah in, tuition fee khawng leng 'free (awl)' kha hi. Pawl VIII apan B.A tan ( a sihtan dong), Lamka a om – Rayburn ah kaitou charchar hi. Rayburn a akai sung in; Student hi'n Teacher-te hitaleh, atheilou om di'n a gintakhuai kei. School ah, aheutute' uh deihsakna leng atang mahmah mai a, mi teng in leng ngaina uhi.

Inkuan haksatak a pan khangkhia himahleh, aneulai pek apan tup khat nei tinten mi ahi hi. Anu leh pa'n, hol (charcoal) khawng peuh haal leh singtanglou khoukawm in ana khosak pih uhi. Thil a tup ngal tum tinten a, azoh matan anungkik mawkmawk kei. Lungchin khua a aom lai un leng, a nu leh pa'n lou kuansan sek ua, ann huan khawng in amah ana pang zel hi (anaute'n huanthei nailou). Ann huanlai bang, inkhang gamlak ah vasa va kap zel a, a anhuan lam phawk nawnlou zen a, a vasa kap amat matan a va delhdelh hun leng om hi'n gen uhi. Huai hun chiang in, a invengte un a ann huan ana etsak zel uhi.

Lamka ah inmun neikei mahle uh, Singtang gam sang a siamsinna lam hi'n bangkim ah, Lamka zaang a hoihzawk ziak in peem uhi. Dorcas Veng a, a papite' gam ah inn khat kibawl ua, teeng uhi. School a kai kawm in kimawlna dangdang leng kimawl kawm zel a, Football lam ah mite' sang mah a leng tungnung zaw a theih in hong om hi. Kimawl lunglut mahleh, a laisimna a bahsak tuankei. Football Club minthang leh piching mahmah khenkhat in leng a etlah mahmah khat uh ahi hi. Thahoih lam hi'n siamna lam ah leng mi' nuai ah aleng tuankei a, asih tanpha in 'Rangers United' (Football Club) ah kimawl hi. Huailou in, Super Division khawng ah leng ana kihelkha a, ama' sihna in adiakin football kimawlmi tamtak' luankhi nuulna tunphaban hi.

Unau a upapen ahih mahbang in, a sanggam te'n leng muang mahmah ua, zah leng zahtak mahmah uhi. Kum 2014 in, a Pa'n omlouh san a, kingaihsiatna nei zeuhzeuh in, achang in laizilna lam khawlsan khawng lunggulh sek hi. Apa' damlai in ahihleh, a pa kiloh in kuanzel a, anu'n siamgam in sum zong hi. Mi banga haulua hikei mahle uh, apa' damlai nanana in chuh, mi eng ngoihngoih in a om tuankei uh. Apa' omlouh apan in, a khosakna uh haksatdan ama'n leng kitheihmoh bawlthei vual ahihlouh man in, laizilna lam khawlsan a, sep theihtheih sem a leng inkuan vaak ngap ahihdan anu' kiang ah gen sek hi. Himahleh, School a aheutute' uh deihsakna ziak in a laisimna maban paisuakthei hi.

Amah ahihleh, mi pautamlou leh zaidam mahmah mi ahi. Apa' omlouh nung in, a nu' kiang ah, " Nu, tu'n mi'n hon simmohbawl mahle uh, tunung chiang a hon zahtaak di ahi uh. Na lungkham hetlouh di ahi. Ball pek khawng a va taitai di inga, Sepaih kilaakna ding om chiang a va taiching mai di ka hi..." chi'n, a nu khamuan sek hi. Chiamnuih bawlthei mi ahi a, chiamnuih leng dawlthei mahmah mi leng ahi bok hi. Pawt apai chiang a, a nu'n ana hansan nikhua in leng a hehngei sese kei a, anu' kiang ah " na hanghang lai diam, na hang lailai di leh pialkhang ah 3vei 'push-up' va hih masa in.." chi peuh in dawng zel a, a nu leng sawt a hehthei kei.

Nitaak a pawtdek chiangin leng, " Nu, hong paihaklou di ka hi. Inkuan kikhopna nei ding a n'on na ngak d'uh.." chi'n, a nu' kiang ah genzel a, akhenchiang in bel a pawtkhiat ma in kikhopna nei zel uhi. Achang a apaihaksim chiang in, anu' kiang ah, " Nu, ka pawtna agamla lua a, hong tunghak di ka hi. Kikhopna honna neihsan mai un aw..." chi'a genzel ahihdan khawng leng, anu'n gen hi. Hiai apan in leng, mi thumang mahmah ahihdan haih di vual ahi kei.

Zahkaina di mun ah zahkai theizel in, maingalna di mun ah bel kizahkaisak teitei tuanlou mi ahi nawn hi. Nikhat, school ah 'uniform' dia zattheih chiahlouh khedap muukzum bun in kimankhekha hi. Uniform dia deih a, alei leh bulh hilou in, adang bulh di aneihlouh ziak a abulhkhak ahi hi. School in, naupangte 'uniform' di toh kisai a 'zuihdan khat' nei uh ahihman in, ama' khedap pen School a bulhtheih di vual ahi nawnkei. Huaitak in, amah leng beidong kisa in a teacher-te uh kiang ah, sumlohna dia nasep di zonsak di'n va ngen ngal a, a teacher-te un leng asep di ngaihtuahsak uhi. School ah ni 2 na semsek ua, Rs. 500 apiak tak un, aman leng khedap Rs.500 man leingal hi.
Apa lah omlou, a khosakna uh lah haksalua ahihman in, a teacherte un leng hehpih mahmah uhi. Ama'n leng, a teacher-te uh zahtak etsakna in, a kimuh chiang un 'wish' khial ngeilou a, adeihsakna uh tang deuhdeuh hi. School a khawl kal chiang un, a school mun uah nasem in kuanzel a, ama' fee di leh anau a ding lohkhe zel hi. A heutute uh bang lawmbawl( zahtaklou hituanlou) suk mai in, a haksatna leng amau' kiang ah tun munzaw hi. Na sep nuamlouh anei kei a, kal 1 sung a 2vei school a khawl u'leh, 2vei va kuan zel a, na sep di omom thanuamtak in sem zel hi.
Mi tampi te'n, " houlua, huaikhawng maimai sem viallou e" a chih di ua gintaak – School aa Dailenbuk hah, zunbuuk hah, maimomlen hahsiang leh paakbawm bawl chihkhawng a va sep tangpi ahi hi. Cement lam nasep ding a om chiang in leng semsak zel ua, huai tungtawn in a 'fee' lam sufel zel hi. Class – XII a exam zoh un leng, sawtpi mahmah a School uah na va sem a, a naupa' fee ding December (2015) tan piaksak khin hi. A fee piakna 'receipt' leng amahmah in inn ah tawi a, anu' kiang ah " Lungnuam takin om in aw nu, ka nau' fee di December tan a di'n ka heutute un hon hihfel sak ta uh..." chi'n, anu a khamuan kawm in gen hi.
A nasepna, tha a alohkhiat di hileh, a lohkhiat zohvuallouh di himahleh, Paunak in " kamsiam in siallei a sang " a chih bangdeuh pian un, a haksatna te iim hetlou a aheutute kiang a atut chiang in, a heutute un leng, ' I naupangte hial un, muangtak a aheutute kiang a haksatna hon tun ahihchiang in, ahaksatna ah I panpih uh ngai ahi ' chih lungsim a nei ahi ngei ding ua, ahaksatna te dawn zangkhai pih zelzel uhi. Huaikia ahikei, a mihoihna nangawn in leng, a heutute uh lungsim luahdim zou vek a, chikmah chiang in mangngilh ngei ding un a gintakhuai kei. Asihnung nangawn in leng, anaupa'n ahoihna zarzou in, Class –XII a zohkhiat tan dong, Rayburn ah a 'free' in kai zomah ding hi. Hichibang a mihoih chaan; anu leh sanggamte a di'n naak thuakhak na'n chia...!

Apa' damlai in, anu toh pangkhawm in sum zong thei ua, adan om hi. Apa' omlouh nung in, anu'n siamgat mah in sum zong a, neek leh taak sutuah zou hamham in, khosa nimnem uhi. Ama'n ( H. Paulianmang in) leng, a haksatna uh a hamhaih ngeikei. Anu'n lah, anteh-louhing natawm chiing manlou a siamgan ahihman in, anteh meh khawng nasan leng lei gige ngai a, amehzohlouh hun uh atam mahmah. Sa-meh chihkhawng zaw, Chrismass leh Kumkhat lopna sa khawng ahihkei ngalleh, a neekna 'chance' uh atawm mahmah hi. Huaiziak in, anu kiang ah, " Nu, anteh-louhing khawng ahaksat leh leilei ngailou, mehhuan baihlam leh kiman mahmah 'havai (dal)' khawng neknek di himai ahi. Havai meh I kham louh d'uh, vitamin leng tam inchin, I tha le hoih ahi..." chi'n genzel a, havai meh ngen mehmeh mai uhi. Huchi ahihmahbang in, amah leng atha ahoih ngei ngut hi.
Football kimawl lunglut lua ahihman in, hun-awl aneih nikhua in a kimawl khial ngeikei. Hiai leitung a nutsiat ni ding in leng, kimawl in kuan hi. Khomial zuul in a innlum uh zuan vengveng a, kisil in ann nengal hi. Huchi'a a omlai in, a inkiangte uh nungak 2 in leng, a nu' kiang ah puan gatsak di'n va ngen ua, aman leng " tam pipi gansak zelzel uau, khat khawng kia na gatsaklouh ding uh ahi.." chi'n ana chiamnuih hi. Ahimah leng ahi. Anu'n, puan tam agat zohkhop leh, sum tam mu uh ahihman a, ana chiamnuih ahi( chiamnuih thutak). Huchih sung mah in, a lawmpa hong pawt a, alawmpa kiang ah, patau dak ging khawng za ahihdan agen tak in, alawmpa'n leng buaina om ahihdan hilh ngal hi.

Mi banga inmun-lougam hau leh, inn bawlsenglouhna di innmun nei leng ahi zenzen kei uh. Midangte'n igam uh hong laaksak in, "gamdangmi na hi uh.." hon chi hitamawk le uh leng, iit luat ding innmun-lougam nei hilou uhi. Himahleh, Siamsin naupang apilthei chiang a di'n puaknatlouh theih vual ahikei. Mahni tenna gamsung mah a, gamdangmi suah diing chih ngaihngam huai mahmah lou ding mah ahi hi. Tu lawlawl bel chikhang. Banah, Salpha Paulianmang in agilpi puahna di kia ngaihtuah hileh, inn ah a-om maimai ding( gilpi puahzou phet hiven) . Himahleh, maban saupi mukhawl ahihman in, inn apan " khang khawng ah va khawdaak zual di " chi'a, a nu' kianga gen in, alawmpa toh a kizuipawt ta uhi.

Mi buai vengvung khwng, paituah huthut khawng, inn kihaal ahihdan khawng a nu'n atheih chiang in, lunghimoh a, a call leh " ka omna hon mulou di na hi. Mi tam atam ahi nu, hon lunghimoh ke'n aw.." chi'n, a phone 'off' ngal a, huai tuh a pianna nu toh a kihou tawpna uh ahi maimah. Dak 9: 00pm bang gingtou di'a a kisak takin thau hong ging a, a nu leng patau gawp in, a tapa hawmthoh mahmah 'call' nawn hi. Himahleh, 'call' theih ahi nawnkei. Huainung sawtlou in, a inkiangte un 'facebook' tungtawn a 'si ahihdan thu' mukha ahihman un, va gen uhi. Apianna nu' a di'n zaw gintaak zoh di vual ahikei. Anu'n, " ka lungsim ah, 'den mahmah a ann nezou, inn apan pawtkhia a, ka tapa si chih a omthei kei di. Taktak mah hia bawl? Si taktak mah na hi hia? Nang na sihmawk leh inkuan bangchi khosak ta di e? Ka tapa si hiallou di hiveh aw.....! Theihkhelh khak ahi zaw di. Ka pasal lah omlou a, tua amah ka kinepna pen hi a, amah si chih zaw omtheilou di ahi' chih khawng hong suak a, adang ah ngaihtuahna leng ka neithei kei " chi'n gen hial hi.

Ama'n lah innlum lam naihlou in, Lamka Damdawi Inn lam naih maimah a, sisan in pumdim ta hi. Anu'n, a sakluang munuam in malbang koukou mahleh, anu' omna leh atapa' omna kekal aa 'Security' akhauh mahmah ziakin, muhtheih di vual ahi kei. Anu' a di'n zaw, 'lunggimna zanmial beizok hen la, khua vak ta leh, ka tapa' meel ka munuam lua ' chih kaan, huai zaan in alungsim ah om di'n a gintak huaikei. Asihkhiat di kuan in, asanggam leh a nu' sakmin lou in, a inkuan khosakna uh angaihtuah diam aw? Ahihkeileh, asihna ziak in Manipur aa singtangmite'n 'kivaihawmna tuam' ngah ding ahihdan uh agaalmuh bek diam aw...! Anu leh asanggam te'n 'Pa' bangmai a a-et uh, a iit mahmah uh chaan mahle uh, a sisan athawm mai a luanglou a, Singtangmite' gam leh leitang chanlouhna a apan taktak leh zaw, a kha (spirit) muangtak in tawldam veve ding ahihdan, mi tamtak in gen uhi.

Zaan mialnuai a lah, kikawmtuahna lam haksa ahihman in, a ni zing in anu leh asanggamte'n delhzui ngal uhi. Huai hun in zaw, a maai khawng ana bawk khinta. Amai a sisan kai neunuaute bek, a nu'n ahahsiang nop hang in, phalsak ahikei. 'Postmortem' bawl ma kuamah khoihsak lou uh ahihman in, a nu' a di'n zaw thuakhak sawnsawn na'n chia. Anu' a di'n zaw, manglam hi hen la'n, khanglou hita maileh, a chihhuai mah ding, midangte'n apuaknat sang mah un leng, a nu'n pawna zaw ding ahi chih haih vual ahikei. Himahleh, naunei di te'n haksatak a thuak masa a, naungek kipahhuaitak mel amuh chiang ua ana athuak teng uh bei huau abat bang in; anu'n lungkham-mangbatna thuak mahleh, a tapa' sisan luang in 'kivaihawmna tuam' a muhsak chiang in, tua a lungkhamna teng bei huau bang maimah ding hi. Himahleh, athawn mai a sisan aluang leh zaw, kuamah' ta lungkim di'n a gintak huaikei.

Anu'n athugenna khat ah, " ka tapa kei a ahi nawnkei a, mipi' aa ahi. Apiakkhiatna leng kineizou ahi ta. Ka tapa' sihnung a aguh-atang nangawn in thu genthei di ahihleh, kum 1 leh 2 koih lehang leng poi ka sa kei. Himahleh, ka tapa' sihna athawn asuah mai leh zaw, ka lung anuam ngeikei ding. Tulel a makaite' panlakna ka lungkim mahmah a, tuabang mah in pan hon lazom zel uh hen la, agah kipahhuaitak imuh ngei uh ka lam-en. Ka insung ua ka poimoh mahmah lai ua, I gam un leng ana poimoh mahmah ahingei dia, a va sikha hi. Meithai tagahte' thuakna ngaihsaklou a, I simei-vai( Politik) a heutute, tuni tan adaih dide uh zaw lamdang ka sa. Mihausate'n thuak ngeilou a, azawng leh genthei tata in kithuakkha a, tutanpha kampau khat leng neilou tel uh. Hichi di vetvet, ka tapa aneulai in ana sizaw maileh ka thuak anuamtuam di ka chih hang in, JAC leh JPO te panlakna thupi ka sa lua a, si di vetvet – si hampha ka kisak ton atam mahmah zel. Ka tapa' omna a ka pai chiang in, mite' kipiakzohna in tha hon guan mahmah a, ka lungkim mahmah. Himahleh, innlam ka tun chiang in ka ngui suk zel. Huai kawmkawm in, ' Tribal Martyrs' 9te' lim kitaak bang chilphih khum om achih uh ka zaak sawnsawn chiang in, ka khase mahmah. Ka ta, bangchituk in hoihlou in simmohhuai mahleh, alim(photo) nangawn leng ka kawikawi nop ahihman in, kichilphih khum hial zaw, ka pawsiam mahmah kei. A chilphihtu bang kithei hileh, hoihtak a houlimpih ut hial ka hi " chi'n gen hi.
Asanggamnu, kum 19 lel a upa ( Chiinliankim) in, "Oh ! Maizen U Mang, ' Sihna in I iit te a lakmang Chiang in, insung daailua in thawmhau huai hi' chih, laa in ana chikhinta ngal a. 31st August, 2015 pen, nii a suah ngeidan in hongsuak a, atum ngeidan mah in hong tum hi. Amulkimhuai leh dahhuai thu ka zaak ma in, ka hinkhua bel angeina mah in zangtou diing in ka om. Huchi'n nitak hong hi a , simlei-vai ziakin ka U bel inn apan 'kuate'n bang hih a, bangthu-bangla om hiam' chih enkhe ding in alawmte toh kholai lam zuan in diangkhia uhi.

Huchi'n ke'n leng 'U hong paihak ken aw..Innkuan kikhopna neih honna ngaak ding ka hi uh' chih ka vaikhak hi . Ka U'n leng, 'honna lunghimoh kei un, hongpai haklou na diing a hi uh ' hon chi a, ka inn uh anu seta uh. Hiai pen, ka U toh...hiai leitung hinkhua a ka kihou tawpna uh ahi maimah hi ! Aw ana lua...thuaksiam ahak tel mai . Dakkal bangzah hiam nung in, ka U iit mahmah in hiai leitung gimthuakna apan suakta diing a honna paisanta ahihdan hilh in ka om maimah. Maizen maw U Mang! Maizen! Thuak siam ahak lua ! Huai hun in, khitui-naptui toh ka Uu iitna ziakin ka kapkhe buabua hi. Hiai ni a ka khitui luang teng, ka Uu iit mahmah adi'n ahun keilua .

Ka Pa'n hon omlouhsan baihlua ahihman in, kei leh ka inkuante a di'n ka Uu pen, ka 'Pa' asuak mai hi. Amah ah ka muanna leh lam-etna tengteng ka nga a, ka suang mahmah mai hi. Kei adi'n ka U bel, inn sungpa ahimai hi. Ka Uu in, nikhat ni chiang a sepna hoihtak hon neidia, innkuan khosakna haksatak apan hon tungding diing ahihdan ka kiang ah hon hilh sek a, ka lungkham leh dah mahmah ni in hon khamuan zel a, lam-etna hon guan gige hi.

Ka Uu toh hinkhua ka zatkhawm uh tom ka sa mahmah mai a...hon dampih lai henla, amah toh khatvei bek khovel ah anuam-ahaksa thuakkhawmlai le ung ka chi ngoihngoih mai hi . Khovel a piangthak a, sanggam pasal neinawn ding hileng, ka U Mang mah, ka sanggam diing in ka teel lailai ding. Ka Uu Ka iitna thute gensiam hileng ka gengen ding. Himahleh, huchi bang hih theilou ka hihman in, ka lungsim suangtuahna ah suun petmah in ka sun hi.

Bangteng hileh, hon siampa I biak Pathain un; kei' iitzah sang a leng itzaw, kei ngaihsang aleng ngaizaw, kei poimohzah sang aleng poimoh zaw ahiding a...ka Uu hon laaksak ta hi. Tua ziakin, ka Uu sihna tungtawn in I gam sung uah - KITUAHNA hong tun ka deih mahmah hi. Hun paisate apaisa hihenla, I moh leh khelhnate uh kingaidam tuah in . Tuni a ahing leh dam aa omlai te'n, hun hongtung ding ah - adikloute bawldiktu, ahoihloute zemtu, akawite tangsaktu hih sawm in, ei hon siampa' deihna leh I mi hinpihte iitna toh hing in kalsaun ni hang . Kou, kei, nang, nou chihte omnawn kei henla.."Eite" kichituah ta ni . I GAM leh Nam zemtu leh tungdingtu hihsawm ta ni hang, chih ka deih mahmah " chihteng gen lel a, tampi tuun kha hi.

Dakkal 2 sung vingveng, Salpha Paulianmang' nutsiatsa a innkuante toh houlimna neih ahihzoh in, Pathian in amau innkuan hinkhua leh a khosakna uah lamkaihzel ding a deihsakna thu, Manipur Express min a khakkawm in 'Mangpha' kikhak in, kipaisanta hi.