“A simthu khuaizu bang khum ngeiingei ka bil ah ka zaaklai in, tak a melmu a ka siang hong tung ding in lung in kana geelkha kei a, hizongleh ka siang hong tungni in ka lunglai ah Rose paak bang in a paak den hi. Ka ngaihnou in nong silh bang zaw singdang tengteng sang in na etlawm zaw e…. Zogam.com T-shirt ah anbang itna sakmel a mu ding bang ing e…”

Hun sawtlua painailou, nikhat facebook ah kava luut tei sam hi. Amasa in ut leh dah a utteng gen a chiak vengvungna groupte ah kava luut a, ka pawt toh kiton in ka va muhte ziing daibang in hong thengzel hi. Huchi’n atawp in lungsimneu tampi om mahleh pilhuai zaw deuh a kikuptheihna lam maimit kongsuan nawn a, huchia thil kigengente kana et-et leh atawpna lamah “Zogam.com T-Shirt order theihta..” chih kava mu a, ka kam in Zogam.com te’n T-Shirt bawldek eive ua maw kachi a, himahleh ka lungsim tawng ah deihna, order utna lungsim chii bang ana kituh khin hi’n ka thei ahi. “Aw Zogam.com T-Shirt, banghang a ka sinlai na hon hichih koih ahia, ka ngaih lianu lah hisamlou chin a…..” chihlouh ding vual ahitakei hi.

Selunglai ah suangtuahna sialbang lian mahmah mai…. T - Shirt silh leng Zolianute sinlai kuaizou deuh ding banga lunggelna hong om mawka, huai in mihing hihna toh lailung nopna leh lunggel damna hongpia hin ka thei. Ka taksa toh tui leh nga bang a bualkhawm hun ding kaal uh ngaklahna toh kidim ahihmanin a changin a saitute bang zekaisakna lungsim kinei a, hehsan ut huai phialni atam mahmah mai hi. Lungzuan zatam sial ding hileng zong tungsolkha taang nuai a Zogam.com T-Shirt toh lungzuan sialleng ka lunggel puaksing banggik hon dawnzaang tuam zou ding bang hi….. Kha khat sunglel T-Shirt I hon ngak bangzaw Bible a Elija hunlai a akum asim vuah zulou angak uh toh kilamdanna himhim ka theikei. Ka itpen leh ka kinepna pen ka kiang zuan a hongpai ding ngaka gari hong tai ta hiam chia gal et-et mai ka bang, aw ka mit khamthawn hina maizen e…….

Haingak-theingak a I ngak nung in hong tung petmahta, Kanan gam zuana Israelte apailai ua dawnding tui omlou a Mosi in a chiang a suangpi asaat a tui hongpawt a, amite a kipahding dan bang uh ka lunggel mitkha ah hong lang chiaichiai mai hi. Hawmkhiat hita chih simthu ahong thang in leikha in phuluun pawtna ding apetvanga phuluun alom-atanga hong leengkhe zungzung abang mai. Ei bangle a T-shirt nei ding hinazenpi in mi eima a T-shirt hong silh bang I muhchia’n melhoih isak mahmah khat I muh a atangvalpa toh kizui abang mai, hazaatna ngen in kidim hi.

T-shirt la dia kuan, amun a ki-test, a test te kuamah a suah ut om nawntalou, kuate hiam dana leina mun a silh in silhsuak vengveng mai. Abang chitel ahia hichi lawmlawm a maimit laukha a athaamdet, a bawltute lah melhoih veekvuuk chih ding hilou, a puannak lah a vaak sitsit chih hituan samlou, lah lungsim teng aluah mawka, lamdang saklouh vual ding ahikei. Mi T-shirt thak toh lim kila I muhchiang bangin hehtha ana suakmai a, hong fuhsim zomah uale bang eileng I silh chiang a I melsiatna tamkhop hong liahkhu ding ahi chih kinepna lianpi toh kipah mahmah in ana om mawk hi. Ama a T-shirt neih ding lungsim aom, I hon neih chiang in silh a lim kilaakpih ding bang I lungsim ah hong om nawnzel….huiha…. T-shirt khovel...

T-shirt silh kawm a limlang mai a din bang anuam mahmah mai… Kuaman hoih hongsa in kilawm honsa keile uleh ei hoih kisak in om mawka, kilawm bang kisakluat a om ahihmanin poi kisatuan hetlou a, I lungdam in lungsim nuam mahmah thouthou hi. Kholai pawtkhe lengle mite bang in I puannak honna mitsuansak chiat uh bangmai a, I puannak hon guuk etsak nilouh dan bang un midangte kimu zozen hi. Lungsim damdawi I chih papite adia zite, tangvalte adia nungakte ahi a, himahleh Zomi tengteng adin I T-shirt uh ahi de aw…chih uthuai bangzou phial hi.

Puannak silh a lungkimtaka omlai I puannak a bang thuthu tuang hiam chih I etvel nawnleh karei….thupi peuhmah zel, kisaktheih huai khop ding bang. Gam changkang mahmah a kigen USA te nasan in hichibang puannak nei nailou uh hitel hia chih uthuai phial. Zomi namte chiamtehna Vaphual lim bang etlawm peuhmah, Zomite lai lam a I chiamtehna hoihtak uh Zokhankhual bang hong tuang nalai, a mel sesim na a etlawm law mahmah mawk…. Lampi paina peuh a honmu kuapeuh in hiaipa singtang mi bangna e, bang nam eide aw…chia lungbuai ngailou…enle Zomi I hihdan va kipuan ngailou “ZOMI KAHI…” chih bang om nalai…….. A puannak silh nuam, asa hoih, a kigelhte hoih nalai…… genbeh ding himhim omlou. A kigeen tuung a kana order khaak ka kipak chih in thilteng genkim mai hi’n ka thei.

Gelhgelh ding chi leng laitui laipuan in hong dawllou ding ahihmanin hiaizah in I hunsak photmai ding. Atawpna dingin hiai banga T-shirt piankhiatna dia gim leh tawl khawk salou a ana pang tengteng phathuai in thupi mahmah ua, huaibanah a designtu bangleng ngaihsang huai deuhdeuh mai hi. Kipak..kipak…kipak chihchih mailouh gen ding avaang mai hi. Huai kawmkawm in I puan uh hoihlua ahihmanin a tangkhaloute poi isak pih mahmah mai a himahleh ahun lai a ngaihtuah khalou chu lungkimdan siamphot mai angai ding hi. Huaikia hilou in Adminte, abawltute tunga lungkimlou bangleng tampi hong om ngei ka lamen, deihluat ziak zaw in. Aw…nang Zogam.com T-Shirt, gammang a Sharon paakhoih mah bang chia…