Laibu Thak “GAM SIANGTHOU A ZINNA” Etlawkna
Preview By B Ginkhanmang, Under Secretary to the Govt of India
Laibu gelhtu Pu Naulak Tuan Khankhup, Hanship khua ah a piang a; NEIG Mission ME School, Hanship ah a siamsinna bulpat in 1966 in DM College, Imphal ah BA Honours (Pol Science) zoukhia hi. 1968 in Allahabad ah IAS Pre-Examination Training Centre (PETC) ah kumkhat kai kha hi. 1969 in UPSC te sai Assistants’ Grade Exam ah tel a; Scheduled Tribe telak ah a sangpen a pang in Grade IV of Indian Foreign Service (B)/Assistants’ Grade piak in om a, Oct 27, 1970 in join hi. A hunhun a kaisang touzel in, Sikkim (tu a India), Sri Lanka, Kenya, Colombia leh Ecuador, Canada, Cyprus, leh Maldives a asepnung in North Korea ah India Ambassador in pang hi. A sep sung in gam leh khawpi tamtak ah zinkha hi. Amah February 2007 in pension in Bungmual ah teng hi.
Laibu gelhtu thil telsui (research) bawl peih mi ahi a; abik in Pathian thu leh khawvel thil a taktak a tungte (history) sui a lunglutna ahi. Sahkhaw vai toh kisai in anupa ua a khualzinna (pilgrimage) thu uh amahmah in a gelh, “Gam Siangthou A Zinna” kichi Laibu in hon bawl hi. Laibu Hoih, Manpha, Gou ching ahi.
Hiai laibu Gam Siangthou a Zinna amau taksa mahmah a Gam Siangthou a nihvei a zinna thu uh mai hilou in, khalam a laigeltupa’ khualzinna leng ahi a, Judate, Israelte tangthu abul mahmah, Pathian in Abraham a sapna (Gebesis 12) a kipan sui a, Israelte Suangtute (Patriarchs) a kipan, Aigupta a asaltanna uh, saltanna a kipan a suahtakna uh, Gam Siangthou a luahnawnna uh, vaihawmtute leh kumpite nuai a omna uh, gam tuamtuamte thunuai a aomna uh, Laisiangthou a akigelhdan in lunglut huaitak, nounel tak leh teltak in sui khawm sipsip hi. Abik in Esther Laibu leh Jonah Laibu a pumpi in suisuak hi. Jerusalem Biakin Khatna leh Nihna lamna ban ah hihsiatna thu Laisiangthou leh AD kumzabi khatna a Roman Jewish historian minthang Flavius Josephus leh Tacitus laigelh a kipan a agelh ahihziak in lungkhoih mahmah hi .Herod The Great tanchin contemporary historiante suina pansan a gelh lunglut huai mahmah hi. Atom lam a gen in, Laisiangthou Commentary te toh a kilamdan luatna tamkei leh kilawm hi.
Ei Kristian te a ding in Jesu Kris thu, Pilat thukhenna mun a kipan Kros a kilhlup ding a apaina Kros Lampi a athiltuah tuamtuamte, Kros a sihna mun, han a vui a om a, sihna a kipan vualzou a athohnawnna munte mit mahmah a ava muhleh a theihte ngentel tak in sui a,abikin Jesu Kris zep a omdan leh Kros a kilhlup a om a haksatdan teltak in sui a, ei sik-leh-tang a hichi lawmlawm a Jesu’n thuak ahi tel maw chih himai hi!
Laisiangthou sung a kigen khua leh mun leh mi tampite tanchin chiang zawsem a theihna hon behlap thei Laibu ahi. Hiai laibu mi vantang a dia theihna behlapna mai hilou in siamsin laite bang, Bible zilte bang leh Pathian thu thuktak a sui ut mite leh gen mite a ding in manpha tuanse ding hi.Laisiangthou a i sim khak khua, mun leh mualte, a khua omdan a genkawm in Laisiangthou bu a aomna bung leh chang te koih chetchet hi. Tua kia hilou in mun siangthou khat a ava hohna mun a thilte leh huailai a mi kigente' khangthu sutna, Laisiangthou toh kizawitawn in gen a, navak huai mahmah hi. Jesu sihna mun Kalvari taang a phakna a gelhna ah huai tang la a kiphuah khum khat hon gen a, hiai in a la thu theihsiam semna hon pia hi.
Khawvel khangthu, adiak in, Central Asia leh Europe lak a galbuaina thu hon gen kai a, Kidoupi Khatna leh Nihna tangthu ngaihnophuai tak in hon suttou detdet hi. Nidang a khawvel ana lungphawngsak–khawvel a thiltung dangte toh teh vuallouh Juda te thuakna leh huih namsia a maktaduai guk thah a omna uh Holocaust thu, Israel zalenna a muhna ding a UN in thupukna a bawl dan, Russia leh Europe gamte a kipan Judate a-guk-a-gal a Israel gam ua a kiknawnna dan uh, gam tuamtuam abik a Ethiopia a kipan Judate lamdang tak a Israel pikik a omdan uh, Uganda a Entebbe Airport a Judate hut khiakna thu ban ah khawvel a thiltung lunglut huai tuamtuamte hiai Laibu ah tuangkha hi. Huaiziak in, hiai Laibu in khawvel khangthu theihna hon behlap tuan mahmah hi.
HiaiLaibu gelhtu mifel leh kizen ahi chih a kichetna mahmah khat ahihleh a hohkhakna khua, mun leh a hohnite gelhthei chetchet hi.Hiai in mi etton thamching leh amah apat sin ding tampi kinei a hihdan hon musak hi.
Hiai laibu a thute phuahtawm tangthu (fiction) ahi kei a; a taktak a thiltung ngen ahihziak in laibu manpha ahi a, mi teng in lei a sim chiat ding a hoih Laibu ahi.
Gam Siangthou A Zinna laibu Bung (Chapter) 15 in kikhen a, pek 592 pha hi. Israel gam leh Jesu totkhakna mun tuamtuam te limlak tel in color page 18 tel hi.
Crown Size 18cmx24cm a lian ahi a, Hard Cover Edition a kibawl Jacket in tuam sawn lai hi. Sim zohna tan chiamtehna ding in Ribbon Marker kithuah hi. Hiai Laibu March kal nihna veel in hon khiakna neih hiding ahi.
