Book Review | Siamsinpawl Annual Magazine 2015 (Vol. 49-51)

~ By Maj Thangson Shoute

Laibu min: Siamsinpawl Annual Magazine 2015 (Vol. 49-51)
Published by: The Editorial Board for SSPP GHQs.
Pek : 1-144. Bu 1000 sutkhiak.
Aman : 100 (INR)
Thupi/Theme: SIAMSINNA MAH AWLE.

Thupatna
Hiai SSPP Annual Magazine in thugelh/ articles piching 10 kia atuun, himahleh ataksa mahmah liinleen hi. Thugelhte 3 chihlouh adang 7 teng Civil Services (CS) toh kisai ngen ahi, aziak hiai Magazine CS lam focus/emphasized a kibawl hi’n ka thei. Athu tuun dangte ahihleh Preamble, SSPP Lapi, Editorial, Messages, Reports, Siamsin Education Initiative, SSPP/GHQ Executive Committee, Life/ Emeritus/ Patron Members, Advertisement chihte ahi.

Thugelhte etkikna
1. SIAMSINPAWLPI DINMUN TAKLATNA – by Upa Lalthanghlun Guite, MSS.
Hiai thugelh in Manipur a SSPP mite’ IAS, IPS leh IFoS (Forest Service) dinmun gen hi. IAS authorized 111 lak ah SSPP mi khat kia om (Pu Vumlunmang Vualnam, IAS). IPS authorized 90 SSPP mi khat lel leng om lou! IFoS 55 authorized SSPP mi 4 om, amaute Pu/Dr Khaizalian, Pu N. Sonzalian, Pi V.L. Roui leh Pu K.S. Tawmbing. Hiai article kasim in tuma deuh a Pu Jamchingthang Mangte in “Siamsinte’n Lung In Geel Dih Ni” chih agelh leh Pu Dr R Sanga in “Patau Dak” hong khet thute lungsim ah hong langsar mahmah hi.

2. TUP NEI SIAMSINNA (Purposeful Education) – by V. DONGZATHANG, IRS (Retd).
Hiai thugelh in I gam a siamsinna hong lamlahtu leh phattuamna lianpi nei NEIG Mission skulte ahihdan gen hi. Nidang in Mission skulte’n tup leh ngiim kichiantak nei uhi. Tulai a skul leh college te’n zong tup kichian neih hunta ahihdan leng gen hi. Education Policy bawlkhiak ngai mahmahta ahihdan leng gen hi. Siamsinna a asiamthei deuhte hoihtak a lamkaih a siamsinsak hileh chih adeihthu leng gen hi.

3. NAM LEH GAM KHANTOUHNA DINGA CIVIL SERVICES APOIMOHNA – by Vungzamuan Valte, IRS.
Hiai thugelh in CS hong kipatna thubul nouneltak in suut hi. British-te hong uk lai uh leh India in zalenna angah nung a CS te poimohna leh mohpuakte gen hi. Department tuamtuam a CS te poimohnate leng gen hi. Siamsinte adia challenges leng taklang hi.

4. CIVIL SERVICES – by N.T. Khankhup, IFS (Retd).
Hiai thugelh in Govt sepna zong sapsapte ading in CS exam tungtawn a muhte mah tup ding leh mitsuan ding ahihdan gen hi. Tuaban ah, CS exam tungtawn a sepna muh leh huailou a muhte kikhai lua ahihdan gen nawn hi.CS exam leh sepna zonna ah Tupna, Kuhkalna, Tempaina Lam Subject Lak, Laibuzat Tel Siam, Hun Zatdan Siam, chihte poimoh lua ahihdan gen hi.

5. CIVIL SERVICES A SSPP HAKSATNATE (Limitations of SSPP into CS) – by Upa Khamhenthang Ngaihte.
Hiai thugelhtu in CS a SSPP-te’ haksatna hidia a ngaihsutte hiai bang ahi:-
(1) CS toh kisai a theihtuak theihlouhziak.
(2) CS Exam paidan theihdi bang a theihlouh ziak.
(3) CS a a-semte’ poimohna theihkhaklouh ziak.
(4) Govt Serivce a officer-te sepna omdantak theihlouh ziak.
*(5) IAS Officer-te dinmun poimohna atangpi theihlouhziak a lunglutdi bang a lunglut zoulou. 
*(6) IPS dinmun atangpi theihlouh ziak.
(7) CS Officer-te gam leh nam a dia a poimohna insung a sinkhaklouh ziak.
(8) Nu-le-pate toh abul hoihtak a patlouh ziak.
(9) A hunhun a naupang kepna lam a pilvan zohlouh ziak.
(10) Thanopna leh taihmakna taksap ziak.
(11) Abul patdiklouh ziak.
(12) Siamsinbuk (school & college) kingakna tham chinglou himaithei.
(13) Saptuam leh khotang vai zatdan siamlou hikhamai thei.
(14) CS examdi-te hoihtak a kisakkhawllou himaithei.
(15) SSPP in tua sang a thupi zawsem a pan alak beh poimoh himaithei.
(16) Tup leh ngim kichian nei a a-nna pat hun ahi.

6. CIVIL SERVICE A LAWHCHINNA KALBI: CCPUR DISTRICT AH HSLC EXAM SIANGTHOU – by H. Thangdam, ZEO (Retd).

Hiai thugelh in HSLC exam new course 1986 apan siangthoutak a conduct, exam hun a ‘pin drop silence’ ki maintain a, Imphal apan flying squad hong paite’n mat ding mu zou himhim lou uh ahidan gen hi. Hiai in I lak ah quality education hong polut in siamna taktak toh a pass-te tuhun a I officer leh sepna line tuamtuam tamipi neite agah ahihdan gen hi.

7. ALAMDANG LEITUNG NUNTAKNA – by Dr R Sanga.

Hiai thugelh in leitung nuntakna damlandan leh nek-le-tak zonna tuamtuamte zahpihlou a taimatak a sep ding ahihdan gen hi. Banah, gam leitang kibehlap theilou ahihna ah, gam leh leitang kituhna hong nasa semsem ding ahihna ah I gam I lei I huumbit poimoh lua leh khanloh hun lawta ahihdan gen hi.

8. CIVIL SERVICE EXAMINATION – by T.ROUMUAN, IRS

Hiai thugelh in CS te India govt adia ‘steel frame leh backbone’ ahihdan gen hi. All India Services, Central CS – Group ‘A’ leh ‘B’ te taklang hi. Banghanga CS tel ding? Aziakte: 

(a) Open to all.
(b) No investment (monetary) required. 
(c) Salary, perks & other benefits.
(d) Job security & Stability.
(e) Status, Power & Influence.
(f) Better opportunity to help others.
*(g) Good promotion prospects.

Hiaite banah, selection procedure or process nouneltak in gelh hi. CSAT, Main exam leh Interview te detail tak in gen hi. Abiktak in tua school leh college kailaite’ ki prepare ding dan leh tulel a CS exam pete ki prepare dingdan kimtak in kokmuh hi.

9. HIGHLIGHTS ON NATIONAL POLICY ON CIVIL SERVICES – by Haulianlal Guite, IAS.

Hiai thugelh in All India Services leh Central Civil Services te tungtang gen a, amaute ‘the permanent executive’ chih a om ahihdan uh leng gen hi. Atangpi a IAS te adia post leh mohpuakna ki reserve te leng taklang hi. Student- te CS ah lunglut le uh chih adeihsakna aziak tamlou leng gen hi.

10. MY HONEYMOON WITH THE ARMY – by V. DONGZATHANG, IRS (Retd).

Hiai thugelh in Emergency Commission Officer ding a interview telna, trainingna leh sepna tomkimtak in gen hi. A gelhpa tanchin I sim apan sepaih vaai tamlou theihtheih hi. Kuapeuh in sim dia hoih mahmah ahi.

Thukhitna

Hiai SSPP Annual Magazine peen hoih in taksa mahmah hi. Hiai laibu ka sim leh tulai a CS exam pethei dia hunlem neilai siamsinte ka eng mahmah hi. Ki exam thei lai hileh sithunam zen a pan a ut-huai khop mai. Tulai a CS lam I taksap luat uh toh kiton in khangthak siamsinte’n hiai laibu hoihtak in kem in simsim le uh chih ka deihsak mahmah hi. Amaute adin ‘next to the Bible’ hileh chih ut-huai hial hi. Laibu hoih ahih bang in amanpha, mi tampite hamphatpih laibu ahih ka lamet leh thumna ahi. Pek 109 na a Serial No 7 na Award muthei ding kuamah a omlouh gige tel na kasa!! Hiai Award ngahthei ding in Siamsinte’n “SIAMSINNA MAH AWLE” chih toh tak-kheh hon suah un. (Atung a asteric * mark ka piakte poimoh leh lunglut-huai diak kasak man in student-te’n a magazine mahmah apan ana sim le uh chih deihna ahi. Adangte poimohlou chihna bel hi zenzen lou).

SSPP damsawt in masawn zel hen.