Laipau a ka pianthak theihlouhna.
By Ginza Vualzong. 

Paite Laigelhdan toh kisai ah Paite Literature Society (PLS) in intekna la a, laigelhdan zuih di kichiantak a luikhiak ban ah siamsinte zat ding in Paite Major Indian Language (MIL) subject college level tan a zattheih ding in bawl khia uh hi. Nidang in laigelhdan ka na ngaipoimohkholkei a, zuih tum neilou in keimah hoihsak dandan in ka na gelh sek hi. Laigelhdan zuihtumta khat neih poimawh ahih dan ka hon thei a, huai a kipan in PLS guideline-te enton in ka zuih sawm teitei hi. Ei singtangmite lak a ei Paite ten laigelhdan kichian i neih ziak un kipahhuai ka sa a, kisaktheihpih huai le ka sa hi.

PLSte nasep ka ngaihsang kawmkawm in PLS in laigelhdan a paipih khenkhat ka pomthei kei hi. A diak in C leh CH tungtang bang, double vowel zat dante ah ka kilankhetheikei a, laipau ah ka piangthak theikei hi. Double vowel bang a hong kihahzat luat chiang in simhak ka sa lemlom mawk hi.

1903 kum in Pu T. Vialphung leh David E. Jones panlakna in Paite laimal 24 - A AW B CH...Z bawl khiak in om a, Paite literature a ding in chiamteh tham suangphuh pha hi. Hiai laimal 24te zang in Pu H. Nengzachin in 1945 kum in Paite Sintungbu ana bawlkhia hi. Huchi in India a om Paite te'n A AW B CH laimalte zang in lai ana gelh ua, Bible, labu, lehkhabu leh tanchinbu tuamtuamte ana bawl khia uh hi.

Huchia A AW B CH India a Paite te'n a kizat nung in politics a halhthakna hong om a, laigelhdan tungtawn a Burma lam a unaute toh kitanauna di ngaihtuahna in 1984 kum in Moreh ah PLS leh Burma lam a laisai pawl Zomi Christian Literature Society (ZCLS) te'n Moreh Resolution chih hon bawl khia uhi. Hiai Moreh Resolution thupukna dungzui in laipau a kituahna (uniformity) omna ding chi in Burma lamte zat English alphabet 26 ABCD...Z hon zatpih ua, tua ban ah CH tang a C zat zawk ding in thupukna bawl uh hi. Tua banah common primer khat bawl khiak a zatkhawm ding in leng kithukim uh hi. Hiai English alphabet 26 pomna in Paite A AW B CH i neih uh hon hihbei a, i Paite pau a chituamna beisak hi.

Hiai Moreh Resolution om nung kum 33 bang pailiamta mahleh Burma lam a unaute toh laigelhdan ah kitanauna om theitatak tuanlou a, Burma lam te'n amau laigelhdan mah paipih ua, India lam te'n le A AW B CH mah zang in laigelh uh hi. PLS in MIL Subject a C mah paipih a, CH a lai kigelhte C in khek uh hi. Huchi in India a om Paite lak a soiselna a hong tam ziak in 11 June 1988 in C leh CH mahni lemchang dandan a zat theih chi in thupukna hon bawl thak uh hi. Utut zat theih chih himahleh MIL Subject ah bel PLS in C mah zang tou veve a, zalenna a piak uh omzia omlou suak hi.

PLS in C paipih mahleh, India a om Paite te'n ana zat ngeina mah uh CH mah zatnop leh simnop sazaw ua, laigelh tamzawte ah CH mah zat in om hi. MIL i chih Major Indian Language, India mi a dia bawl himah leh Burma lamte laigelhdan PLS in hon zatpih teitei pen logic omlou sak in om hi. A zangtute zatlouh kisinsak teitei pen masawnna om ding in gintak huailou hi. Huchi mah ahih ziakin C sangin CH zangtu tam zaw a, PLS paidan hiai toh kisai lohching lou suak hi. C leh CH utut zatheih aki chih vanglak leh a zangtu tamzawte zat CH mah poimohna piak hi zaw leh chih ngaihdan ka nei hi. Huchi mah bang in Burma lam a C zangtu tamzaw ahi a, C mah poimohna Burma ah piak hi leh dik ding in ka gingta hi.

Moreh Resolution ki-passed nung kum 33 bang paita ahihman in, i gam politics bang le kikhek mahmahta hi. Paite pau khat dan a i ngaihtuah Tedim pau zangte bang le Zomi Council nuai a tribe khat dan in om ta ua, kitanau zawk sang in kikhenna, identity tuam a omna hon tun zaw daih hi. Tua ban ah Zomi sung a pau sai ding in Zomi Language and Literature Society (ZOLLS) bang omta a, PLS in pau a kitanauna a saisawm pen ZOLLS in semkhe theita ding in gingtak huai hi. Hiai Moreh Resolution pen India leh Burma a om ten zuih ding chih himahleh Burma lam ten zui tuanlou ua, India a PLS in enforced sawm mah leh a zui tam lou a, Moreh Resolution failed suak hi. Huchi ahih man in Moreh Resolution a thupuknate etkik a, a mun leh a gam dungzui a bawl lem thak poimoh ka sa hi.

Hiai C i zat ziak ua Burma ten hon tanau bawl zaw deuh ding un ka gingta kei a, CH i zat ziak a hon mudah ding un le ka gingta tuan kei hi. Laigelhdan i chih i paipih, i ngeinaseh om hi. Burma lam ten le C mah zat nuam sa ua, huai mah a zat uh i zahtak sak ding ahi. Huchi mah bang in India lam ten CH mah zatnop kisa a, hiai deihtelna i zahtak ding ahi.

Literature i chih a zangtu omkei leh mangthang thei ahihman in, a tamzaw in a zat theihna ding in a tamzawte zat siam dan toh kiton in bawl leng mavan huai mahmah ding in ka gingta hi.

Hiai Moreh Resolution etthakna hong om a, a mun leh gam dungzui a bawlthakna hong om chiang in kei le kua hiamte chih dan in "laipau a ka pianthak" ka lamen hi.