Naupangte’n Lungziinna (Depression) Anei Di Uam?
Thupatna:
Hiai topic tohkisai TONGLUANG magazine ah ka suah ngeita a, himahleh poimoh ka sakna alet luat ziakin in khatvei gen thak nawn lehang chih ka ut hi. Naupan lai thu khawng sut ding hita lehang nuam i sakna atam ding ka gingta a, huai ban ah haksatna ana thuakte adi’n khasiatna bang atam ding hi. Neulai nopdan chih gending atam mahmah hi. Himahleh tu hun chiang in naupangte nopsak dan leh nidangkum 30 lak khawng a naupangte nopsak dan atuam daihta a, huaiban ah lunglutna bang le atuamta hi. Huaiziak in innsung a pape’n bangle abuaihuai pen ahongsuak theita hi. Hichi bang hindan kikawkalh zelzulkal ah naupang khat lung-gim/lungziing leh mangbang a omthei ding in na gingta hia? Pichingte’n thil tuamtuam ngaihtuah khawm in i lunggim sek hi. Huchibang a lunggim thei ding in naupangte na koih hia? Ngaihzawng neihziak leh siamsinna lam a haksatna tuamtuamte ziak khawng a lunggim ding in na koih ngeihia? Tuni’n hiai toh kisai in houlim leeng chih ka deih hi. Hiai a naupang i chihte kum 1 apat 18 nuailam kal a omte genna ahideuh hi.
Naupangte Leng A LungkhamThei Uhi.
A hong piankhiat nung sawtlou chik in leng naupang in depression a neithei hi. Skul kailai naupangte'n hiai lungziinna ahonneih chiang un hing-utlou, kuamah ngailou, a kumtoh kituak a khang theilou, ihmut kichuplou (ihmu tamlua or ihmu tawlua), annduhlua/duhloulua ahihkeileh omdan hoihlou leh kilawmlou (van guk, zahmohthil gen, sisan suah ngap, poisakneilou a gamtangetc) tuamtuamaneitheiuhi.Enzaw “naupanlaiahichingainaahi” chi in bangmaha lamdang luadan a simlou i himaithei, theihlouh ziak leh ngaihzam ziak ahizaw diam? Himahleh a huntak a don ahihlouh chiang in hiai bangmalou a i koih natna in sihna tanpha atunthei hi. Huaikia leng hilou in, a laisim uleh khotang hinkhua ah mipi mitdonna leh khanmohbawk, nu-le-pa suzahlaktu khat in ahong khanglian thei uhi. Bangdang ziak hilou in lungkham-sinkhamna khat a neihziak uh ahi ut hi.
Hiai lungziinna (depression) in naupangtaksa, sia-le-pha theihna lungsim leh ngaihtuahna ban ah motivational well-being a sukha mahmah hi. Hiaiziak mah in siamsinna lam ah a hong chau thei uhi.
Kuate’n Nei Ut Diakse:
Naupang khat peuhpeuh in hiai natna neithei mahleh a nuai a i gelhte’n nei ut diak a theih ahi.
• Naupang pianken a lungsim veng chiahlou (autistic, behavioral disability, mental retardation, celebral palsy etc)
• Naupang a pian apan a damtheiloupah
• Pasa lhingal a pasal maha lunglut (gay) ahih keileh numei hingal a numei mah a lunglut (lesbian)
• Khota hindan leh khopi hindan a kimil theilou
• Theihloupi a naupaii kha (naudeih lah hituanlou)
• Innsung nu-leh-pa kilemlou, kina gige (ahih kei aleh pasal in tate muh a zi vaw gige)
• Apu-apa khang a depression ana neite
• Lungphawng thei leh thil lauhhuai ana thuakkha (Traumatic experiences)
Bangchi Theih Ding:
Naupang (0-6years) te’n a gen didan a theihlouh ziak un a lungkham lam uh genkhe lou uhi. Himahleh a lungkham nate uh agamtat-khohei apan in atheihtheih hi. Etsakna in naupang khat in banghiam lauh nei bang a anu nuse utlou, ihmu dukdak theilou, kiphin hat leh ann duhlou chih khawng ahong neihleh adamlou hiam ahih keileh ataks ahiam alunggeel ah adiklou khat om ahi chih theih ding ahi.
Atangpi a et in naupang in depression aneih ding chiang in hiai anuai a symptom-te ahong kilang masa ut hi.
• Omdan kikheng lamdang phut (ahoih apan hoihlou lam ah)
• Hehbaih, lungtom leh ningkitel/kiningtel (irritation), phunhat-hanhat
• Poisakna haulou deuhdeuh (increased risk taking)
• Ann nekdan leh ihmut dan kichuplou
• Athil hoih neihte itdan theilou leh anasep khatpeuh zoulou a khawlsan pahpah
• Ameel leh kichei dan kikheng
• Siamsinna lam a bah deuhdeuh
Hilehleng, doctor a etsak a treatment piakngai (major clinical depression) ahong hihna ding un hiai anuai a kigen 9te lak a 5 teitei neih angai hi. Huaiban ah hiai 5 ten a niteng hinkhua uh nipikal 2 (2 weeks) teitei asukbuai zoh nung ahih ding ahi. Neih chu neithou, hilehleng a niteng hinkhua subuai jenlou or niteng a neilou ahihleh major clinical depression ahi naikei chihtheih ahoih ding. A kinthei lam a Counselor/psychiatrist siam mahmah muh bel ahoih pet mah ding.
1. Niteng phial a lungziing hiam ningkitel/kiningtel leh hang den
2. Nidang a nuam a sakte nuamsalou or a sep utte sem utnawnlou leh bangmah lunglutna neilou a niteng phial a inn a kikulkhum.
3. Agikdan (weight) kiam deuhdeuh ahihkeileh agikdan akhan ding bang a khanglou
4. Niteng phial a ihmu theilou ahihkeileh ihmut suak hiden (lusu gige)
5. Niteng phial a om maimai theilou, hilehleng bangmah sempeih tuanlou
6. Tha beileh zoi ngoihngoih
7. Niteng phial a amah leh amah kimohsak (excessive guilt) in kingaisia (worthlessness)
8. Niteng phial a bangmah ngaihsun taktak theilou ahih keileh thupukna (houchik hilehle) la theilou (indecisive)
9. Sih utna lungsim leh mahni hinna sukbei utna lungsim nei gige (thamlou a attempt ngeita)
Atung a kigente lak ah telkha kei mahleh depression nei naupangten lunat (headache) anei tangpi uhi. Huai ban ah numeite’n niikniin neih kichup lou chihkhong leng anei thei uhi.
Thukhitna:
Hiai atung a i gente et-in i naupang tel a kah leng depression a om i chilou theikei hi. Donlouh keplouh in ahong khanglian ua, i society a khanmoh bawk ahong suak uhi. Social evils hichituk a Lamka a a tam bangmah dang ziak hilou in, naupan lai a kikep louhziak bang le hithei hi. Bangziak in naupang bangmah theilou in hiai bang natna (chimaini) anei mawk di ana chimai thei. Buai vengvung lai a nu-leh-pa, tuailai tampi lau-leh-liing in a ki-om hi. Huai lauhna in Post-Traumatic Stress Disorder (PTSD) kichi lungtang natna a tunthei a, hiai PTSD na taksa ah damlouhna danin (psychosomatic complains-lutangna, sungna, kawngna, natna kithei joulou, lah dam mahmahlou) ahong lang suahthei hi. Hiai natna in na tate neuchik beek a sawk kha kei ding na chi ngam hia? Ahih kei leh naupang hichidan a thil lauhhuai thuakte’n a thuakna or lauhna mangngilh mai ding in nagingtahia?
Khotang hinkhua damthei leh changkang neihtheihna dingin naupangte ngaihtuahna lam (mental health) tu-a sangmah a etkol ngai in ka thei hi. Major Clinical Depression tan hial tungkei mahleh Mental Health Problem (anxiety, PTSD, mild depression, somatic complaints leh mental health disorder tuamtuamte) nei a tam a, kep-le-don ngai ahihlam theilou in thuak hat jel hi lehang a kilawm hi. Hiai in hoihlam sang in siatlam ahon tunzaw hi. Huaiziak in ngaihtuahna lam toh kisai buaina (mental health problems) na neih or a nei i theih aleh professional counselor/ psychiatrist mah zuan thei lehang eimahni ading leh khotang hinkhua ading a hoih ding hi. Hiai bang natna toh kisai naupangte’n bangmah theisiam nailou ahihziak un pichingzawte leh nu-leh-pate’n awlmoh a, mohpuakna a ngaih ding ahi.
~~06072011~~