Alarm Bell (Patau Daak) I – V-na tan hun paisate ah ka hon gelhta a, tu’n “Alarm Bell VIth” chih thulu a nei in thu tam lou gelhnawn le’ng i chi hi. India a om, Scheduled Castes leh Scheduled Tribes kichite kum 1850 akipan ‘Depressed Classes, or Adivasis’ chihdan a theih in om uhi. Adivasi kichi pen Sanskrit akipan kilasawn kammal ahi a, huai omzia bel kammal nih kigawm ahi: “adi” achil (beginning) “vasi” ateeng mite (dwellers) Ei pau a i gen chiang in “tualsuak mite” (Indigenous peoples) chihna asuak hi. Nam tuantual, khosakna leh khotang hinkhua a dinmun niam – haksatna nei, dinmun niamtak a khosate genna ahipen mai hi.
India Daan Bupi bawl ahihtung akipan huchibang nam tuantualte khualna ziak leh amaute dinmun niam ahih ziak mah un, tanpual sehkholhsak a om in; nam changkang leh dinmun hoihzawte toh tanbang kikim a ahong khosaktheih samna diing uh ngimna a “the Morley-Minto Reforms Report, Montagu-Chelmsford Reforms Report leh the Simon Commission” chihte tengteng in kum zabi 20th kipatchil akipan nam tuantualte dinmun bawlphatna diing a nasatak a panla in phualpi kivaihawmna a amaute sik-le-tang a palai asawllut theihna diing uh baan ah sorkar nasepna lam a zong tanvou aneih theihna diing ua sehkholhsak in nakpitak a apan lakna uh ziak a Scheduled Castes leh Scheduled Tribes tengteng in India gamsung ah tunitan hamphatna kingah thei hamham hi leldan ahi.
{The Constitution (Scheduled Castes) Order, 1950 lists 1,108 castes across 25 states in its First Schedule [Ref. Text of the Constitution (Scheduled Castes) Order, 1950 as amended], and the Constitution (Scheduled Tribes) Order, 1950 lists 744 tribes across 22 states in its First Schedule [Ref. Text of the Constitution (Scheduled Tribes) Order, 1950 as amended]}.
Manipur State biik ah en zual le’ng tulel in Scheduled Tribes, Phualpi Sorkar in theihpihna leh pompihna letmat India President in abawl dungzui in 33 chiamteh in om hi. Tuate baan ah Scheduled Castes leh Other Backward Classes kichi zong hunkhop om lai hi. Scheduled Castes kichite pen Meitei leh Thangal nam ahi tangpi uhi. Other Backward Classes kichi bel Pangal-Meitei leh adangdang ahi tangpi uhi. Kakching leh Thoubal lak a teeng Meitei-te lak ah Scheduled Castes tampi aom ua, hamphatna Scheduled Tribes in angah uh mahbang in amaute’n zong hamphatna tanpual tampi ngah uhi.
Scheduled Tribe Status (dinmun) a tribe khat peuhpeuh guanlut ahihtheihna diing a kul-le-poimoh zuih teitei diing: National Commission for Scheduled Tribes Guidelines dungzui in ‘Criteria’ poimoh taktak hunkhop aom hi. Hiai “Criteria” pen ST Status a guanlutna diing a minam khat peuhpeuh in Demand abawlleh NCST Guidelines-te zuih teitei diing kisam hi. ST status a guanlutna diing ngetna pen State Government leh Registrar General of India (RGI, Census Research) in adeihsakleh National Commission for Scheduled Tribe ah Ministry of Tribal Affairs in ngaihdan a dot masak diing ahi lai hi. Hiai pen NCST in ‘modalities approved’ dungzui a ST status list a guanlut hihtheihna diing a apansante uh toh kisai thupukna laakna diing a kul-le-poimoh masa ahi.
India Daan Bupi Art. 341 & 342 ah Scheduled Castes leh Scheduled Tribes a guanlut hiam lakkhiak diing hiam ahih chiang in President Order dungzui a namkip a om zel ahihdan gelh in om hi. Huchibang thusuah President in abawl chiang in Court ah heekna kuama’n bawl phal ahi kei a, President in a namkip ahihtaak ziak in paisuak pelmoh hi. Art. 342-na ah Scheduled Tribes guanlut ahihtheihna diing in kiteltak a thugelh aom kei hi. Himahleh National Commission for Scheduled Tribes Guidelines dungzui a “Criteria” kigente pen Daan Bupi a atangpi gelh ahih dungzui a ngenteltak a bawl bel ahi peuhmah hi.
Meitei-te’n Scheduled Tribe List a guanlut ahihtheihna diing ua ngetna phualpi sorkar ah thehlut sawm in February 9, 2013 in G.M. Hall, Imphal ah Symposium thupitak, Sub-Committee on Scheduled Tribe Demand Committee of Manipur Valley huaihotna nuai ah Program thupitak nei uhi (Hueiyen Lanpao, February 10, 2013 issue). Hiai Program hun a Keynote address, Nambam Manikanta in agenna ah Mongoloid stock hihna mangngilh a mipil khenkhat (some intellectuals), Royal Palace a mite leh Valley Areas a teeng Hindu Devotees-te phutluihna ziak a Indian Union a September 20, 1949 ni a Manipur Merger ahihnung Meitei-te ‘General Category’ piak a om ahi uh chi hi. Meitei-te pen Scheduled Tribe List ah guanlut diing ahi chih ngaihdan kiptak chii amaute lak ah kituh hoih petmah hi.
The Sangai Express July 17, 2013 issue ah hiai bang in kigelh hi: “Imphal, July 16 2013: Prime Minister Dr Manmohan Singh has asked the Scheduled Tribe Demand Committee of Manipur to make the State Cabinet first take a decision in favour of the committee's demand to recognise the Meeteis as Scheduled Tribe before the same demand is studied by the Government of India.” Scheduled Tribe Demand Committee of Manipur min a Meitei palai giat (8) in Prime Minister akimuhpih lai ua PM thugen ahi: “Meitei-te Scheduled Tribe a guanlut ahihtheihna diing ua Government of India in etchetna aneih ma in Manipur State Cabinet in thupukna hon bawl masa phot hen chi in Prime Minister Dr. Manmohan Singh in ST Demand Committee palaite kiang ah ngetna ana bawl hi.”
United Naga Council (UNC), All Tribal Students’ Union, Manipur (ATSUM), All India Tribal Students’ Association (AITSA) leh Pawlpi dang tuamtuam in hiai Scheduled Tribe Status Demand, India Prime Minister Office a Meitei-te’n Ngetna apiaklut uh pompih lou leh thil hithei lou ahi chih ngaihdan khauhtak nei in; tulel a Scheduled Tribe Communities tuamtuam in Local Newspapers-te ah lamdang sakna toh thusuah bawl souhsouh mai uhi. Bangziak a hiai daal kiphamoh hi hiam? Pu-pa satsa Gam leitang amaute’n kintak a hong luahdim pah diing uh, Sorkar sepna toh kisai ei pawl a diing sehtuam chih omnawn lou a, amaute toh dinmun kibang a omta diing (ST hikhawm vek diing); tu lel a STs dinmun a omte tanpual leh hamphatna tengteng amau angsung a huaihamtak a huailut a tangvekta diing uh chihna suak hi. Dinmun delthawng leh lauhuaitak ah singtang mite om ahi chih phawkthakna hoihtak neih chiat a pankhawm hun ahita hi. Huaiziak a “Alarm Bell VIth” – Patau Daak Gukna khen i hi.
Tulel a Manipur Hill Peoples kichite pen Scheduled Tribes dinmun a om mite ahi uhi. Zodawn, singtaang-gam a Inn-le-Lou nei a khosate, Nam tuantual, atamzawte Socio-Economic dinmun niamtak a nungta geigei, niteng hindan leh omdan a zong nam niam, Laisiamna lam toh kisai a niam mahmah lai, khanglui thusim leh nam tuantual; atuam vilvel pu-pa tawndan anei namte, India gamsung kiltawng-tuamsehna mun, Meileeng (Rail) tunphaklouhna, India in Independent angahna kum 60 vaal hialta mahleh tunitan Vanleeng tukna-phual (Airport) zong nei lou, Manipur Hill Areas aluah mite pen STs diktak ahi uhi.
Kum 2000 vaal akizom a suitheih khangthu hoihtak nei kichite (the Meiteis) leh ei, singtang mite dinmun kibang “Scheduled Tribe Status” ah omkhawm maizen le’ng mabaan a i tuah diing bel huaise petmah diing ahi chih kitel mahmah lel hi. Sum thahatna zang in singtang Gam leitang aleitheita diing ua, mimal huangsung nangawn ah taksapna ziak a inn-mun leh Lou-munte zuak in hong tawmlut in, innsakpa-innkhangpa,’ ahihke’h maakpa-pa a hong ompah diing uh ahihman in hon tummang pah mahmah diing ahita uhi. Huaiziak in, “Nang ihmu, thou inla, na huangsung kembit in…” Bangchi a huangsung kembit diing? Kipumkhatna, Kipumkhatna, Kipumkhatna lou in huangsung kepbit vual ahita kei hi. Mangkang pau a “issue-base or common interest/problem” chihte pawl kha theih kilkel kiphamoh ahita… Huchi lou in zaw siikden in i om diing a, amaute’n hon makhelh a hon taisan khin ahih lailai ua, dinmun kibang a om kawmkawm a – lah – dinmun kimkim het lou, kikhe law petmah i hi uh chih pen chiantak a theisiam a, kipumkhat hun ahi chih chiamtehna di’n i nakhang ah “Patau Daak” ging-ging bang in ngaihsun chiat le’ng deihhuai hi. Huchia kivaihawmna tuam khat singtang mite tengteng kigawm a sualkhawm kisam hi.