Lamka khopi a innkuan khosak nuamhuntawk a khangkhia nungak khat in pasal aneih a, mou vanken ding a tu leh seng peuh aken leh bang genna ahia? Chikmah a akhoihkhaaklouh, azatdan atheihlouh peuh bang ding a ani poimoh nipen a adamsung akep dia keng ahia? Hiai tuh tawndan kidamkheekna ahi. Pawlkhatte khang nih sunglel a apute uh neekzondan leh khosakdan bang hihiam chih mangngilh zen ding a hamphatna khovel (nature) in apia hi. Kei bel tuate pawl lak a telkhalou ka hi ding. Tu ka zatkhaak a seng ka puakkhaak manin. Himahleh tua bang a hamphatna ana tangte leng khovel in akipatna uh koilak hihiam chih theisak teitei ut ahi ding a, ahinkhua ua ani poimohpen hun un a lusiip uah a nga hi. Tua bang a khovel in deihsaka ana piaklouh pawl dang leuleute ahih uleh nisim in tuzat-heizat mah toh ana hingkhawm lai uhi.
Banghang a nawtsiatsa tawndante’n mihingte khakhe pahpahlou a, aphaakzoh laisiah nungdelh nilouh hiam chih lamdang ka sa hi. Bangding a tuzat-heizat poimohlouhna Lamka zaang nasanaleng hon poimohngaihsak a, hon kengsak teitei hiam chih ahilhchetna ding ka theikei hi. Houh kikimna haakkol hon baatsak ut ahi ding e, Zodawn a tu leh seng mah ana hinpihte leh khopi a tu leh seng ana mangnglh tate kikimdan hon theisak zelzel ut a ahi ding e. Huan, kua peuh tu leh sengte theinawnlou ding a hamphatna khovel in ahon piak chiang in hiai kikimna haakkol leng a lakheta khamohkei ding e.
Thilhingte kidamkheekna (evolution) pen i gindan toh kikalh ahihziaka i gintaak nopkei leh leng tawndan kidamkheekna (cultural evolution) bel nialvual ding ahikei hi. Tawndan peuhmah tua omlel leh ana mangthang tate hileh, thupiak sawmte bang a khatvei thu a bukim a piangkhia ahikei ua, awl-awl a kikheek a hong khang ahi uhi. Pu Tuahchiang Guite’ hunlai in khosung ki-ukna leh bangkua kizopnate kiphut in ngeina hong piang chi in khangthu in ahon hilh hi. Huan Liandou leh Thanghoute hun apan sumtawng biak ana kipan chihleng a thangthu uah i mu hi. I ginna tengteng i ngakna uh Laisiangthou nanawng leng tua bang a kidamkheek a hong piang ahi hi. Pu Charles Darwin in, ‘Aphapha khosuak’ (Survival of the fittest) ana chih ngei tuh thilhingte kia hilou in tawndan ah leng adik hi. Tawndan ginalou sumtawng biakna, kithoih, galmat-samat chihte khosuak zoulou in aphapha tousa goh, upa sagoh, puzukholh, inndongta chihleh adangdangte akhosuak ua, tutan in a nungtalai uhi.
Mihing’ tawndan tua bang a kikheek toutou ahihleh a mihing angeingei gige diam? Mihing leh a tawndan lah kikhentheilou, dangkasiik lehlam tuak bang mai hi a. Ahihkaleh telsuina a ana navaak deuhte a ding in mihing leh atawndan tuh Einstein’ Hun-za-awng (spacetime) bangmai a khentheihlouh, anih ua kikawimat ahi uhi. Ei theihdan in hun (time) pen angeingei hiden a, kikheek ngeilou bang in i thei uhi. Himahleh Einstein’ Special Relativity in bel hun leh za-awng pen kikhat gigelou a, kikheekthei thil ahi chi hi. Hun i chihpen i awngpelhzah (speed) ah kinga ahi chi hi. Tua in agen bel i awngpelh (speed) ahaat zohpeuh leh hun pen awl hiaihiai chih ahi. Himahleh tua bang a hun kikheek hial theihna ding in awngpelh ahaat peetmah ngai hi. Hiai a haat i chih za-awng lenna (roket) te haatna khenlampek gen i hilai hi. Khomial lak a meivak i det a, tua vaak zungte kintak a kithehdalh bang ua haat gen i hi uhi. Tua bang phial a haat in bang leng hita lehang , hun awlpai mahmah ding a, midangte ading a kumkhat bang leng ei ading in nikhat bang lel hi ding hi. Hiai houh ahi ding e Sam 90 na in – Nang’ seh in kum sangkhat tuh zanmangta bang phet ahi ngal a’ ana chih. Hiai Einstein’ Relativity pen diktaktak mah hiam chih i theikei. Telsuina toh kisai a mihingte theihna lah anini in apung hulhul a, dik a pomsate bang leng nawlkhin a om in dikzaw chi a theihte’n amun uh hon luah zel ahihmanin. Himahleh tulel a hun leh za-awng (spacetime) i pomdan uh bel hiai Einstein’ Relativity ahi phot hi. Bangteng hileh, mihing, apumpi leh a tawndan khentheihlouh a, kikaimat ahi chih i gen ut siatluat nalam a Einstein’s Relativity lamlam va tungkha zezen ihi uhi.
Thinghingte, adiakkhol in mihing, a pianzia uleh a omna un a tawndan uh a pokhia a, huan ah atawndan un a pianzia uh alehpuakkhiat kiik leuleu hi. Hiai tuh Environmental Determinism ahihkeileh Geographical Determinism chi in Ellsworth Huntington lawi in ana hahsui mahmah uhi. Mihing tuh akiim-apaam (environment) in ana siam hi, achi uhi. Tanggam a omte tanggam a gamtatsiamna ding apoimoh bang khut leh khe, nisatna mun a omte a poimoh bang uh vun, tua bang zel in ana thuam hi. Huaiziakin i pianzia leng i tawndan akikhenkhen bang a ana kikhengkheng houh ahi ding e. Laisiangthou i pomleh hiai i pom akuul hi. Kidamkheekna (evolution) i pomkei leh bel Laisiangthou nial i hi ding hi. Banghang hiam i chihleh kidamkheekna pomlou hita lehang mihing chi li chi nga i phaakdan bangchi hilhchian ding i hia? Pathian in Adam pen Causasian nam a ana bawl hi ding in um peuhmah phot lehang, ahang bel tua Eden huan omna hi ding a i gintakna kiim a omte tua namte ahihman un. Adam pen Caucasian nam ahihleh Evi leng hiai nam mah ahih hong kilawm ding hi. Hichi hitaleh abangchik kaal a Negritos, Australoid leh eipawl Mongoloid te hong piang hi ding i hi uale? Kidamkheekna loungal a hilhchetna ding a omkei hi. Laisiangthou athumal-thumal a la in, khovel bang kum 4000-5000 kikal a upa bang in tuat lehang, mihingte hiai kum 4000-5000 sung a Causasoid apan Negritos a kikheekman chih ahi. Huai tuh telsuina a ding in kidamkheekna kin mahmah ahi.
Chipota (gene) a alungluuthuai mahmah thilkhat ahihleh Laisiangthou toh kisai a laibu lem chi a eipawl in i pom ‘pseudopigraph’ chihte a om bang in ‘pseudogenes’ kichi mihingte’n leng i chipota uah i nei uhi. Huai tuh chipota lem chih ding ahi mai ding e. Etsakna ding in zawng (chimpanzee), ui leh mihingte chipota tehkaakta lehang, mun tampi ah kibang ngiitngeet uhi. Himahleh mun khenkhatkhat ah zawng leh ui a kibang a, himahleh ginatlouh banghiam ziak in mihing a pen kisia in, a nasep ding semtheinawnlou a, huchia khawl kisia bang mai a om a omthei hi. I theihsiam sem na ding in Phai khopi a eimite inn khat ah va hoh in ah, a inn baang uah seenglem neuchik ana kitaak taleh, huai bangbang hi ding hi. Tua azatna ding omlou seenglem bang ding a tuamun hong tung thei ahiam? Mihingte’n kilawm ding a ageelman ua bangmahlou apan ahon bawlkhiak ua, innzepna ding ua akoih uh hia? Hilou hial, tua seeng tuh nidang in pipute’n phatuamtak in ana zang ua, himahleh khosakna hong kikheek in, tu in tua seeng taktak azatna ding hong omnawnlou ahihmanin, neih kuul nawnlou a, himahleh banghiam ziak in tua seenglem neuchik pen baang ah ana kitaaklai hi. Seeng kichi himhim ana omlou hileh mihingte’n tua bang innzepna thil abawlkhiat na ding uh ahihtheihna (probability) atawm mahmah hi. Hun hong pai zel leh tua seenglem pen leng ahong mangthang hiam, ahihkei leh tu a naang a kibawl pen buangnai (plastic) hiam siik hiam a ahong kibawl hun hong tung ding a, tua in a hong kipatna seeng taktak toh kigamla sak deuhdeuh lai ding hi. Tua i chipota lem gente tuh hiai seenglem bang ahi uhi. Pathian in thilsiamte atuam chiat a ana siamchiat ahihleh bang hang a hiai khawl kisia bangmai a zatna ding omlou chipota lem mihinghte chipota a ana telsak ade aw chih in ka lungsim asubuai khemkhem hi. Charles Darwin in kidamkheekna agen chiang in kum amaktaduai-amaktaduai asim gen ahi a, Laisiangthou’ kidamkheekna bel, ei tuatdan in kum 4000 sunglel ahi. Kum sang 4000 sunglel a hiai bang kikheekna a tun leh Charles Darwin’ kumzah hun piak hile uh bangzahta akikheekna atungthei dia? Charles Darwin leng ama dikdik in adik hi. Laisiangthou toh a kikalhna uh zaw a ‘hun sawt leh tom’ thu lel ahi.
Hiai Charles Darwin kidamkheekna bang loh ding ahiam chih ka theikei hi. Va nawlkhin dimdem ding in lah diknatak om bang in alang a, va pom ding in lah ganhing apan piang va hih ding angaih thadahhuai zel a. Bangteng hileh thilhingte kidamkheek mah i hi ding. Tu hun a kipan nungkiik in, Adam hun tan ah khawl lehang, huai tuh Laisiangthou’ kidamkheekna ahi a, Adam hun a khawllou in, kiiksuk pek lai lehangla, kum amaktaduai-amaktaduai asim kiiksuk lehang, huai tuh Darwin’ kidamkheekna ahi. Ahunsawt leh tom bel theikhang in, himahleh mihingte tawndan kikheek haat zah in bel ahisamkei hi. Mihingte tawndan kidamkheek haat zah a thilhingte leng ana kidamkheek haat hile uh, kilawm chih ding ahi ding uam, liapluap chih ding ahi ding uam, ahihkaleh lenglong chihzawk ding ahi ding uam ka theikei ding hi. Ahangbel haikung ah suangkua paak ding a, vomva agah ding a, ahiangte ah theipiteh ahei leplep ding hi – Zomi khat a khomin Hebrew pau ahih a, ama min sapmin ahih a, atate’ min Greek peuh, Latin peuh ahihmah bang in!