TUPNA A OM LEH LAMPI A OM - II
✍️ Mawi Tombing
Laisiangthou thugente tangtung deuhdeuh in, hong tangtung semsem lai ding hi. Tuaten hun nanung ahih tak dan hon hilh in, i mu chiat uhi. Hiai bang hun a i om lel lai in, niteng i Khritian hinkhua ah, khosakna ah, innkuan ah, khotang ah, siamsinna ah, tupna kichian neih aloutheilou leh a poimawh pen hita lou hiam hon chisak hi.
Ei Khristian gingtute'n i gingtu khualzinna, i kitaitehna a lam manglou a Pathian hon tupsak mun i tun theihna ding a lampi hon kokmuh om hi. Huai en a i zuih ding Pathian hon bawlsak lampi tuh JESU ahi. Hebrute:12:2 ah, Jesu, i ginna siampa leh hihkippa, a ma a kipahna om ziak a zahlaknate ngaineu a kros a thuakpa, Pathian mang tutphah taklam a va tu, Amah lam en in chi hi. Leitung a i khualzin sung in khalam kitaitehna ah "TUPNA" nei a, Toupa'n i zuih dia lampi hon sialsak ah hon hihnokte koihkhia in Jesu lamen a kuhkal taka i tai ding uh ahi.
Kumbul ah i ding a i maban kalsuanna ding ah bang phukha in bangchi'n hun i zang dia chih i genthei kei. Himahleh, salam leh khalam a i paina ding leh i tupna ding Laisiangthou in hon kokmuh I ginna siampa Jesu Khrist enkawm in pai lehang lampi zuihkhelh chih omlou in, i tupna lampi ah i lohching ngei ding uhi. Lamtawn in Jesu ka zuizel ding, Khasiangthou in honpi ding hi; hon hih siangthou hi Amah bang ding in, Vangam ah hih thupi ka hi ding. Lamtawn in Jesu ka zuizel ding, vangam hon tunpih ding chih ka thei hi, thupina toh a hong pai nawn chiang in, tangtawn in a kiang ah ka khawl ding chi'n i leitung khualzinna ah i tup lampi mualsuah ngeingei ding in Jesu kia en in kal i suan ding uh aw.
Leitung i khualzinna gam ah, i piankhiat akipan i sihtan tupna toh ginna ziaka lametna a hingte ihi. I sihma tan kizil ding, tupna i neihte sepkhiak ding omden hi. Taksa a hing lai ihihman in nek leh tak, siamna pilna i zonlouh theihlouh ahihna ah i lawmvualte toh kitaitehna hinkhua zat ngaiden hi. Huchibang in, khalam ah leng tupnei a kitaitehna hinkhua izat ding kisam hi. Bangchileh mite sang in Pathian pahtak ka loh tamzaw dia? Ka sihnung chia'ng vangam ah lawmman muh ding ka neikei kha ding e chikawm in Amah lam i bel ding uh. I hihna bangbang toh Toupa mai a i kipulak hun ding enkawm in kal i suan chiat ding uh aw!! Tua hileh, phakchiam delh a i kitaitehna ah Toupa'n honpi dia hon lohching sak ngei ding hi. I tup mualsuahma kuhkal taka i pan peih nak leh nikhat ni chiang in lohchinna hon pe ngeingei ding hi. Toupa mahmah tup leh ngim a nei in, Amah enkawm in kitaiteh ni.
Tup kichian nei thei ding in Toupa'n a vualzawlna bukim toh hon makaih hen 🙏🏼