RAVI ZACHARIAS ; THE GREAT APOLOGIST !
(1946-2020)
~ Rev. T Thangzasiam
THUMAPI: Pathian nasemtu kichi tamzawte tuh Ravi Zacharias kua ahia chih theite ngen ahih uh ka lamen hi. Amah theikha peuh a itlou omlou khop a mi pammaih ahi. Upa selua ahih nailouh manin damlai hileh Pathian nasepna ah bangtan hiam kizang zoulai ding ahih manin, it huai kholdiak sakna tam hi. A tanchin thei tamlou pentak ka hi kha ding a, himahleh hichikhop a mite it a, a omna in tanchin gelhkhiak zek utna honpia ahih manin. Kuapeuh Ravi ngaina tuten a simding ua hon gelhkhia tuh ka hi nawn mai ve.
A HUN MASA AH; VAI NAUPANG MISUAL AHI ! Atangpi thuin, vai naupangte himhim tuh nu leh pa thumang theitak, kholai milou ahitangpi uhi. Himahleh Ravi tuh mi chituam taka hi ! March 26, 1946 in Madras ah apiang a, a pa sepna ziak in Delhi apem in huai ah khanglian hi, inkuan khosa hoihtak apan himahleh hinkhua (life) omzia theichian zoulou in. Kum-17 lel ahihin a hinkhua ningin Pathian om taktak gingta zoulou hi. Huchi’n mahni kithah tumin poison a dawn a, si manlou a hospital a etkol ahih laiin. Pathian nasemtu khatin hospital ah vehna neiin, a nu kiangah Bible pia in Johan 14 na Ravi ading a simsak in angen hi. Anu’n Johan 14;19 ; ‘Kei mah ka hin ziakin nouleng na hingsam ding uh ahi’ chihthu asim khiat a zaktak chiangin, Ravi lungsim puakgik teng mit a nin lakkhiak bangmai in beita hi. Krist toh hong kituak in a theihsiam louh life kichi khalam mit toh chiang kelhkulh in mu theita hi. Pathian om ginglou leh mahni kithah hial a nasawm vai naupang pa tuh Pathian thugentu leh Kristian thugin kembittu minthang tak asuakta hi.
A MAH KUA AHIA ? University leh mun tuamtuam a misiam taktakte kianga Tangthupha kikou pihngam, gingloute toh debate neisek ngamdia theihna thuktak nei, Kristian gindan kepbitna (Apopogetics) tawisangtu poimoh tak ahi. Word Publishing heutupa Kip Jordan in ‘1940 velin Kristian thugin kembittu CS Lewis a om a, huainung in Francis Schaeffer a hongsuak a, tuate zohin Ravi Zacharias i nei uh’ chiin na genkha hi. Huai tuh ngaihsang a a omdan genchetna himai kachi hi. Athugen minthang diakte ‘ Who are you, God ? chih bang, Pathian gintak louh a poidan a genna ‘What Happened After God’s Funeral?’ chihte mi ngaihnawp mahmah ahia. Billy Graham in Amsterdam ’83 ah kum 43 mi lek Ravi tuh ‘The Lostness of Man’ chih thu gending in hamphatna apia a, huai tunga a thugen tuh a minthan pih petmah hi. Huan a thugen khenkhat ‘ Is There Not a Cause ?, Is There Not a Cost ?’ chihte leh, ‘ Dancing to a Different Drummer’ kichite mite hinkho pitu poimoh taka hi uh.
A laibu gelh masak pen ah, Atheism a attack nasat mahmah na ‘A Shattered Visage: The Real Face of Atheism’ leh ‘Deliver Us From Evil’ kichiten simtute lungsim zou mahmah in kigen hi. Evangelical Christian Publishers Association ten a laibugelh ‘Can Man Live Without God’ leh ‘The Logic of God’ te ah, Christian Book Award ana pia uhi. Ravi Zacharias tuh Hotel Management zousa chih mahtak nek theihbawl lamleng nuamsa hiin kigen hi “Damsung a ka thilhih ut ka sep theihlouh a om, keileng restaurant bawl ka lunglut den’ achia, salam gilvahna restaurant bawltu in pangkei mahleh. Khalam hinna tuihing amah apan luangkhe zelte mi tamtakte adin damna petu ahi.
RAVI~ THUGEN SIAM: Thugen theihna lamdang bik piakte laka khat ahi chinuam dan ihi. Mi khenkhat te banga bass leh drum lum humhum a ging chi ahikei a, guitarist siamtak in lead ngaihnuam tak a a zut zaihzaih bangdeuh a ‘soft & powerful’ ahi. Apianthak tunglam deuhin Asia Youth For Christ ten, Hyderabad ah thugen competition a conduct kha ua, a teldia kisa a lawmpa a tel theih louhziakin Ravi a sik a vatel in, khatna a la kichi hi. Huai hun a endiktu Pathian nasem minthang Sam Kamaleson in ‘I ma-uah Pathian in a nasemdia a sapbik khata om achih pa ahi’. Sapte hilou napi sapte lungsim manban in, sapgam pansan a Pathian nasem sap melpu silou ahihna in advantage tampi pia hi. Sahkho dangte leh Atheist kichite toh debate a neihzel ua pan theihna chimtak nei ahichih amuh theih hi. Ei pawl i neu apan biakin kaiden napi biakna la khatleng byheart neiloute toh kigamlat in a om mahmah ve !. Kum 1984 in Ravi Zacharias International Ministries (RZIM) kichi dinkhia in. Tu’n khovel gam tuamtuam -12 velah luangkhia in, eimi Bible sinzou leh sinlai bangzah hiamten leng a phat tuampih ban uah, a sihtan dong Tangthupha meisel pesawntu poimohtak ahi.
MANGPHA: Ravi in nungzang na a buaipih a buaipih zel a, huai backpain etkolna lamah operationnhial a bawl hi. March 2020 in Cancer nei ahihdan muhsuah in a om a, Cancer lamdang leh vangtak mai veikha chih ahi. A taksa a chau zel a, Kum 74 mi Pathian sikha leh nasemtu thupi Ravi Zacharias in May 19, 2020 in thupina gam ah hon paisanta hi. A tanu in kum 57 paisa a pa pianthakna thu Johan 14:19 ‘Kei mah ka hin ziakin nouleng na hingsam ding uh ahi’ chih a hansuang ah gelhding chiin a gen a, a pa tuh tumalam tengsang a leng hingzaw ahi achi hi. Toupa vanzat Ravi- Khamuangin tawldamta in. Mangpha !