TULAI THIL OM DAN !. ~ Rev. T Thangzasiam

THUMASA: Lungsim ngaihtuahna giktak toh khovel ka ensek a, bangchi dan ahi diam aw tulai khovel ? chi'n ka kidong khanak hi, ka lungsim a dai theilou in ‘Tulai thil om dan’! chih thu hong gingden a, saulou a gelhkhiak nawpna ka nei hi. Thupi na et lel unleng i gen nawp na mankhin dingun ka lamen hi. Laisiangthou in "Tu bang hun ahia chih na thei uh" (Rome 13; 11) achia. Mizo bible in ‘tunlai thil awmzia in hriat a vangin achih sese deih huaisa in, tulai thil omdan chih kontel hi. Ahia, tulai tuh tulai ahih manin i theichian mahmah ding uhi. Newspaper, Tv leh Social media tuamtuamte enleng Covid-19 thu in a luahdim a, hiai natna in gam tuamtuam apehhat dan bang, huan a thuak nasapen gamte leh mihing sizah figure sang zungzung i muh chiangin. Laphuaktu in 'Lungkham dakging thangkim velte, Leh buaina chiteng mauging ka jakten; ka tangtawn gam hon ngaisak semsem, Ka pa mel nibang a tanna' achih lungsim ah honglian mahmah sek hi. Khovel lungkhamna dakging kim velten, I pa Pathian mel nibang a tanna gam ahon ngaihsak banah. Tulai thil omdan hiai bangin hon theisak hi:

NAUVEI KIPATNA AHI: Krist in a saptuamte honglak hun leh ni ding hilh hikei mahleng, tulai thil omdan tuh a tehna(theih theihna) hoihpen ahi. Jesu'n "kidou leh kidou thu thangte, zinlingte, kial leh a dangdangte" tuh hilh kholhna ahihdan gen hi. Huchibang na muh chiangun "... kong khak bul mahmah ah a omta chih thei un" (Matt 24;33) achi hi, huan "huai hunchiang in ‘Hii’ a leng lai ding" (Lk 21;11) achi hi. Tulai in natna hiipi Covid-19 mulkim huaitak i buaipih lellel uh, hiai tuh natna mak leh lamdangtak ahi. State khat leh gamkhat a thiltung hileh a theihsiam huai a, himahleh khovel koimun peuh kholum leh khovot mun aleng omthei natna ahih tuh a lamdanna mahmah ahi.

Gam khenkhat in vaccine musuah chizel mahleuh, 100% kingakna tham achingzou kei hi. Natna vei tamtak damnawn om mahleh treatment kibawl dan kichian official apuanzak theih mumal omlou hi, doctor siamten virus tuh kikhek(mutate) theizel danin a gen ua, huaiziak tak tuh vaccine muhsuah haksatna ahi. WHO Emergency director Dr. Mike Ryan in ‘the virus may never go away’ achihthoh mai hi. Bangteng hileh, Toupa Jesun a mou siangthou a saptuamte honglak naikei leh, Pathian hunseh ah vaccine hon muhsuah ngei uh lamet ahi. Tulai thil omdan na thei uh, koimun mah ah bitna ding a omta kei a, leitung mihingte tuh lauhna leh diphawmna in hon tuamta. Huai tuh tulai thil omdan ahi. Krist a hongpai nawnna ding nauvei kipatna ahi.

MITE A VIAL TAITAI DING UH: Tulai hun a i thiltuah ten Toupa' ni zaw gamla nawn hetlou ding ahihdan hon ngaihtuah sak khazel hi, genkim vek zoukei mahleng Jesu'n hong paiding kuan a omding achihte a samlai omlou khopin tung kimta. Jawlnei Danial in ‘hun beikuan lam chiangin, mite a vial taitai ding uh’ (Dan 12;4) achi hi. Khovel ah Covid-19 tunma in mihing sing tampite niteng in Airbus lian taktak zangin a vial zinzin ua, niteng mah in mihing a millions a sim rail leh motor in a vial taitai uhi. Tulaiin khovel ah refugee belh ding tuan neilou gamsa banga vial holhol million tamtak aom uh. Tu'n natna lauhuai tak nuaiah India in a gammi foreign a omte sing tamtak pilut in, India khopi tuamtuam apan siamsinte leh migrant workers a millions a genten mahni inn lamchiat zuanin vial tai vengvung uhi.

Jawlnei Isaiin ‘Sakhi delh ek bang leh belam chingtu omlou bangin michih amau chipihte lamchiat a ngading ua, amau gamlam chiat ah atai ding uhi’ (Isai 13;14) achih tulai thil omdan gen ahi maimah hi. Pathian thu dik hina tel e !. Bangziaka gam nuampen America leh a dangdang apan, i gam genthei tak hondelh ahi ua ?, banghanga nnasep ding tamna UAE leh Dubai khong apan, sepding omlouhna igam honzuan ahi ding uh?. Laisiangthou in a dawnna pekhinta hi, hun beikuan lam chiangin "sakhi delh ek" bang a lau leh thawmhau in, mahni chi leh namte omna lamchiat, mahni gamlam chiat a zuanding uh achi hi. Tu'n deih thusam hikei mahleh tunkimni bangmai inmahni gamlam chiat zuanin iluang zuungzung uhi.

I SUNGKUANTE A HONGTUNG UH: Hiai thu ah gen behnawp ka nei. I nam khuampi dia lamet tuailai siamsin dia isawlkhiakte leh economy khuam poimoh tak company leh a dangdang a vasem, i sungkuante hongtungta uhi.Kin leh buang a inlam hon delhna ziak uh khasiat huai tak ahi. Amaute itna toh i na muakdia kilawm ahihlai in, ‘Virus super Spreader’ bangmai a i na etkhak ding uh ngaihtuah huai kasa hi. Unau Mizo ten ‘Chennai atanga kan zirlaite leh  inhlawhfa a awm te, kan khawtlangin kan lo lawm a cheu a, in zoram kan ram neihchhunah hian thlamuang takin chawl hahdam ula, duhsakna sangber thinlungtak in kanhlan a che u’ chih vaidawnna thuchah media ah muh ding om hi. Hiai i gam neihsun ah khamuang takin khawltawl dam un chih tuh khasiat huaikhop a ki itna kampau ahi. Mahni gam leh inn tuh a nuam pen hikei mahleh, i nat i sat inleng ka innlum mah ah aw, ka sih ka man inleng ka nu leh pa kiangmah ah aw chih ahih manin, i dinmun diktak uh a khasiat huai ngoihngoih hi zawlou hiam ? Anung i zuih Jesun leng it huailou natna hoihlou veite a ensan mailou hi.

Huchih laiin, khualgam apan tungte theihding leng a om tlat. Corona kidoupina nuai a om ihih manin khotang, sorkar leh vengsung vaihawmte danbawl bangbang zuihsiam na tuh damna hiding hi. Inkuan te toh kimulou a omna khua sawt khamah in teh, nidang hun a i zintun toh kibang hetlou himahleh thuman ding hi tawpmai ahi. Quarantine center khenkhat media interview kana follow ten hon kipak sak mahmah hi. Sorkar apan in ahuntak ah fund kimu kei mahleh, i tate ngawlsak lou e chia Ann kipiak saklou a papan tak a ki etkolna, inmates te physical exercise tanpha bawlpihte muh a nuam mahmah hi. Huai tuh tunung a hun hoihzaw i neih theihna ding ahih manin thupi lua hi, corona kidoupi maituah ihih dan phawk gige kawmin thumna, pankhawmna poimoh gige ding hi.

THUKHITNA; MARANATHA: I Laisiangthou pansan ah. Tulai thil omdan na thei uh achia, a ban i sim leh "tun zaw i gintung laisangin i hotdamna a naizaw ta" achi hi. (Rom 13:11-12). Tulai thil omdan gensek mahleng i genseng kei ding uh. I gen utpen tuh Krist hong naita chih ahi. Krist in a misiangthoute honglak touhding lungleng hetlou leh, lunggulh na nei hetlou a na om leh zaw kiman louhna nei na hi kha ding hi. Hiai thute in ki khamuan tuah chiat un (I Thes 4:18) chih ahih manin. Toupa saptuam ginna a naupang chik hong dingkhete tuh Rome sorkar huham takin hehpihna tellou in vatmai veksawm in a bei uhi. Catacom martyr, BenHur leh Quo Vadis leh a dangdang apan gingtute thuakna huaisiat dan i theithei uhi. Tuabang hun haksatak nuai a gingtute ki khamuanna zaw bangdang hilou in. Krist hong painawn ding chih thu ahi.

Roman Sepaihte mai ah taisia in kawkhuk leh gamnuai ahte a kibu ua, gingtute tuh chibai leltak leng kibuk ngam nawnlou in. ‘Maranatha’ chih thumal chibai tangin a zang uhi, huai tuh ‘ The lord is coming’ Toupa hongpai nawn ding chih ahi. Hiai Maranatha chih thumal a zakchiang un khalam leh lungsim chaute tuh halhkhe sungsung khopin khamuang uhi. Sorkar in hiai thumal a theihkhiak nawn chiangin leilak a tusuk in Ngasa lim a gelh ua, huai tuh gingtu ka hichih ataklatna dan uh ahi. Sawltak Paul in hiai gingtu masa sawina haksatak thuakte tuh thapiakna nei in '…jan a bei dekdekta, khua avak dekdek ta ahi' (Rom 13:12) achi a. Krist min in hon thuak teitei unla, hong pang hamham un. Tua na thuaknate uh beiding hita ahi, khua vak ding hita ahi chiin khamuan hi. Unau it aw. Tulai thil omdan na thei uh hilou hia ? Laisiangthou gen bangin Krist hongpai nawn ding ahi. Toupa tuakdin mansa in na om hiam ?. Toupan hon vualjawl in, hiai thuzangin hon houpih zawm zel hen. Amen